طوبى ☕شارع القهوة☕

الجزء_الثالث_والتسعين

#طوبى  "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
‏الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
‏القول البديع.أهـ.( ١٠٩)٦

🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ليس جُرحاً فيُشفى ، ليس حدثاً فيُنسى إنما هو تلفٌ يا صديقي ، تلفٌ لا يمحى..🍃
_______________________________________
في حضن امها تبكي.
وخالتها وعمة امها حواليهم يسمعوا فيها شي تقول وقلوبهم تعتصر ألم عليها..
اريج ببكي:علاش هكي علاش! الواحد كيف بدي يرتاح كيف بدي يعيش..علاش يديروا فينا علاش يزيدوا يدمروا فينا!
فردوس تبكي معاها بصمت..
وطوبى ودموعها في عيونها قالت..
/ربي يحميه ويحفظه ومايوريك فيه سو يارب..
اريج ببكي:مش عارفه ياطوبى..قلبي مقبوض مش مرتاحه..تفكرت بابا لما طلع ومعاش ولى..
فردوس ضمتها بقوة وبدت تبكي بالصوت..
مطيره مسحت دموعها وقالت..
/فردوس خيرك! خيركم !! علاش تفاولوا بالشر بطلوا بكي بطلوا..
طوبى:عندها الحق..معاش تسبقوا الاحداث..شدوا الدعاء بس..الدعاء مافي شي يرد القضاء زي الدعاء..واللي يبيه ربي بيصير..
الكلام اللي قالاته طوبى لاغبار عليه..لكن لما الخوف يتملك الانسان يخليه مايشوفش الا السواد..وفردوس واريج كانوا حاسين بقوة ان مآساة الفقد في حياتهم حتكرر مرة تانيه...
🍃🍃🍃🍃
خش نضال للحوش وهو في حالة ضيق وقلق من اللي صاير..
وين جي بيمشي للصاله..شاف جيهة الكوجينه..
لقي سميره مقعمزه تبكي وتمسح في دموعها بطرف شاربتها..
مشي خش للكوجينه وهو يقول..
/خيرك تبكي!؟
سميرة بنبرة باكيه..
/شي..
نضال حط يده ع الكرسي وقال..
/خالتي سميره اني زي ولدك..
قامت عيونها المدمعه وشافتله وهي تقول..
/خوي كلمني..ماشي بيحارب..
نزل نضال عيونه للكرسي وبدت ع وجهه ملامح الضيق..
سميرة رشفت وقالت..
/مش اول مرة يمشي يحارب ولااول مرة يوصيني كنت نخاف لكن ندعيله ومسلمه امره لله..بس المرة هادي قلبي واجعني عليه..مالحقش يفرح..
شد نضال بقوة ع الكرسي..غمض عيونه بعدين فتحهم وبلع ريقه وقال..
/ماتقوليش هكي..ماتندريش شن يصير..مرات ماطولش حدها اسبوع وتوقف..وزي ماروح من اللي قبلها يروح منها حتى هادي مافيه شي..وتفرحي بيه وبصغاره..
يقول في الكلام وقلبه قاعد يتمزق...
سميره وهي تسمع فيه شافت الوجع في عيونه..ابتسمت بحزن وقالت..
/ان شاء الله يارب..
ضرب بأطراف اصابعه الكرسي وقال بإبتسامه..
/هي وين قهوتك تعودت عليها..
سميره مسحت دموعها وقالت..
/شويه وتجيك لعندك..
نضال بإبتسامه..
/ياودي منورة..احسن مرت بو في العالم..سكت فجأه وفنص عيونه وحط يده ع فمه..
ضحكت سميره..
وهو قاعد حاطه في فمه طلع من الكوجينه بعد ماخلاها تضحك من قلبها...
🍃بعد ماطلع من حداها بدت ع وجهه ملامح الحزن نزل يده ومشي ركب الدروج...
🍃🍃🍃🍃🍃
وفي حوش جيرانهم..
عواطف بخوف..
/قتلك اصوات اشكال الوان مش فاهمين شي .
صفاء بقلق..
/ووك ياربي..غير كان يحصلوا كيف يطلعوا..
عواطف؛ياريت يديروا هدنه يوفقوا شويه بش يطلعوا الناس..
صفاء بقلق:ربي يلطف! حسني صقعت من الخوف..
ع خشة اشرف وملامح وجهه ماتتفسرش..
/عيت خوك فرج حاصلين..
عواطف بفزع:وصلوا حتى غادي!..
اشرف:في طريق المطار قالوا..
صفاء مسحت بإيديها ع وجهها من الخوف...
عواطف:ياربي الطف بينا..حتى نجاح كلمتني قالت صاير فيهم حاله..
اشرف؛الدنيا بتنقلب غادي..
قعمزت صفاء ع الكرسي رجليها معاش حملوها من الخوف..
اشرف وهو يشوفلها..
/صفاء خيرك راهم بعاد علينا!..
صفاء بخوف:تو يوصلوا فينا..
عواطف؛ان شاء الله لا..ياربي ابعدهم علينا..
🍃🍃🍃🍃
وفي شقة محي الدين..
كانت راما واقفه ع امها وهي تقرالها في منشور من الفيس بوك..
/خشوا طريق المطار..
خديجه بخوف؛وااك ياربي..خل نتصل ببوك نقوله يقعد في الزاويه..ونمشي نشوف خوك المتخلف مافيش طلوع بكل الايام هادي لين نشوفوا شن بيصير..
ومشت طلعت من حداها..
راما:خل نكلم محمود نشوفه..ومشت تجري لدارها..
🍃🍃🍃🍃🍃
"مكان المركز قريب هلبه من غادي يارب سترك"
مروة بقلق:تقولي ياماما الحرب هادي طول؟
فايزة بضيق:والله ماني عارفه يابنتي شن بيصير ماحد عارف فيها شي البلاد هادي..
تاله؛معناها معاش بنمشوا للمدرسة!؟
فايزة:مدرسة شنو في وضع زي هدا ياماما..
مروة بحسرة؛خسارة ما خططت بش نولي من الاوائل الحماس اللي عندي للقرايه السنه هادي اكثر من قبل..حسيته انطفي بكل..
فايزة:حسبنا الله ونعم الوكيل..ماكلمتيش مناسك..
مروة؛كلمتها قالت بعيد عليهم..لكن الناس فيسع روحوا ماقعد حد غير عيلتهم..
فايزة:من بيقعد والدنيا مقلوبه بالله..
🍃والدنيا اللي انقلب فجأه في العاصمه..قلبت حال الناس معاها...في من حس ان الحياة وقفت وان المصير ولى مجهول...
بس في من حالهم يشبه حال كل من التحق بجبهات القتال تأدية لواجبه...
افراد الجيش الأبيض..الجيش المحايد دائما في الحرب...
🍃في مصحة القدس..
كان خالد طالع بسرعه...وهي ماشيه وراه بسرعه تنادي فيه..
هناء:خالد..دكتور خالد..
وقف في مكانه وهو يقول بعجله..
/شن ياهناء تكلمي بسرعه..
هناء:جلال نبيه يقعد عندي الفترة هادي..
خالد:هناء توا مش فاضي كان فضيت نحكوا..
وكمل طريقه..
هي لحقاته وقالت..
/باهي قولي وين ماشي!؟
طلع من غير مايرد عليها..
شويه فات من جنبها ممرض شداته وقالت..
/وين ماشيين..
بعجله قال:المستشفى نادوا علينا جابولهم جرحى الاشتباكات..ومشي طلع بسرعه..
هناء قعدت واقفه في مكانها والخوف تملكها...
ع جية اميمه تجري وقفت جنبها وقالت..
/قالوا في جرحى وصلوا لمستشفى*****
هناء بقلق..
/توا خالد ومجموعته مشوا غادي..
اميمه هزت راسها وهي تقول بخوف..
/يارب
🍃🍃🍃🍃🍃
وفي مناطق الاشتباكات الناس كانت عايشه في حاله رعب رهيبه..
اصوات الصواريخ لما تقرب وطيح..وتنفجر..وتزلزل الارض من تحتهم وتزلزل قلوبهم معاها
الاطفال يرتعدوا من وفي من صاباته حالة هلع زيهم
كبار السن اللي يدوب عندهم شويه حيل يكملوا بيه ماقعد من عمرهم.. الكبير والصغير في هديكا اللحظات مش بس حسوا يقرب الموت...شافوه بعيونهم..
🍃مجتمعين كلهم وسط الصاله بعيد ع الشبابيك والفيرندات.. بدد الظلام اللي اجتاح المكان بعد ماانقطع الضي..فلاش تليفونها وهي وامها يسمعوا في اختها تقرا في الاخبار ع صفحات الفيس..
ام سلافه بحسرة..
/وين ماعم نروح الحرب والدمار بيلاحقونا..صواريخ وقذائف وكهربا مقطوعه..حاسه انو نهايتنا بشي صاروخ او قذيفه.
لبانه بخوف:ماما بترجاكي لا عادتقولي هيك حكي..
ويسمعوا صوت رزمه قويه..
سلافه غمضت عيونها بشده وقالت..
/ياالله دخيلك!
لبانه؛عم تسمعوا كل شي بالشقه انهز..
ام سلافه بخوف:ان شاء الله ابوكن يسمع الكلمه و يضل بجنزور..لستا امنه ماهيك!.
لبانه:ايه مافيها شي لهلأ..
وينفجعوا فجأة بصوت رزمه تانيه كان اقرب خلتهم يحسوا إن العمارة اللي هما فيها بطيح..
سلافه بدت تبكي وهي تقول..
/ياالله ياالله..
لبانه ودموعها في عيونها..
/بس لو يتركونا نطلع..
امهم بألم؛تعالوا حبيباتي تعالوا..
وضمتهم الزوز لحضنها وبدت تقرا في القرآن..
🍃🍃🍃🍃🍃
"‏أعوذ
بكلمات
الله التامات
التي لايجاوزهن
بر ولا فاجر من شر
ماخلق وذرأ وبرأ ومن
شر ماينزل من السماء
ومن شر مايعرج فيها
ومن شر ماذرأ في الأرض
ومن شر مايلج فيها
ومايخرج منها ومن شـر
فتن الليل والنهار ومن
شر كل طوارق الليل
والنهار إلا طارقا
يطرق بخير"
هالدعاء كانت تردد فيه نجاح وهي مرقده حداها ربيبها وولدها..
قعدوا في الدور الاول في حوش اهل راجلها كلهم في مكان واحد..
تسمع في حماتها تقرا في المنشورات متاع الاخبار والخوف يزيد يكبر في قلبها..
:وحده علقت قالت كان يخلونا نطلعوا وبعدين ان شاء الله يكملوا بعضهم..
نجاح:لازم يعطوا مهله للناس بش تطلع مش معقوله هكي اباده عيني عينك..
ام عبد الحفيظ بخوف..
/وين بنجلوا وين! ..
نجاح سكتت وهي مضايقه ع الاخر..
هي لو طلعت اكيد حتمشي لحوش اهلها بس اهل راجلها وين بيمشوا!!؟
شويه تكلمت حماتها وقالت..
/انتي نجاح خلي حفيظ يرفعك لحوش ماليك وارفعي معاك مصطفى بالله..
نجاح؛وانتم!؟
ام عبد الحفيظ:خل نطمنوا عليكم انتم وحني ربي يديرلنا طريق.
نجاح:لاياعمتي اللي بيا بيكم تطلعوا انتم اني نطلع..
ويسمعوا صوت صاروخ..جمدوا وسكتوا في مرة وحده..
ويسمعوا بعدها ويحسوا بصوت انفجاره اللي زلزل الارض من تحتهم...
ام راجلها بذعر..
/بنموت اني..خلاص حاسه قلبي بيوقف..
بنتها بقلق..
/خيرك يما عاد قوي روحك تربحي..
نجاح؛طاح بعيد علينا ياعمتي من قوته تحسابيه قريب..
ومجرد مانهت جملتها معاش الصاروخ هدا تبعوه صواريخ..
والحال اصبح اسوأ لدرجة الرجاله جو قعدوا معاهم في مكان واحد...
🍂🍂🍂🍂🍂🍂
وتمر الأيام الاولى للحرب..
والوضع من سيء إلى اسوأ...
بالمئات سجلت حالات النزوح...والناس تشردت..
بس في من ماعنداش وين يمشي قعد في حوشه وهو يراجي رحمة الله تعالى...
زي المراة اللي تخدم عندها فايزة بمساعدة طوبى..
علقت هي وصغارها في الاستديو اللي ساكنين فيه في مكان الاشتباكات..ولما عطوا للناس مهله بش يطلعوا هي مالقتش من يطلعها ولاعندها وين تمشي لوطلعت..
🍂🍂10ابريل...سنة 2019🍂🍂
🍃طوبى:الدور الاول في حوش سدرة فاضي قداش ليه نجيبوهم يقعدوا هني لين نفرشوه..
عبد الرؤوف وهو يشوف في تليفونه العنوان اللي كتباته طوبى هز راسه وقال..
/تمام..طالعين توا..
اريج بقلق:باهي قولي الحق شن وضع اسكندر!؟
عبد الرؤوف ابتسم ومشي للباب وهو يقول...
/والله اموره تمام راهو قط بسبعه ارواح....
فتح وطلع سكره وراه..
طوبى:هو بروحك يقوله الامور تمام..
اريج بقلق:مش بيدي ياطوبى مش حنرتاح لين نشوفه قدامي..
طوبى:قالك الايام بيجي ان شاء الله..
اريج بعدم صبر..
/امتى باهي امتى!؟..
شدت طوبى يدها بقوة وقالت..
/تعالي خشي تعالي..
وخدتها وخشت بيها للحوش وحاولت تهديها بس احساس عدم الراحه اللي كان مسيطر ع اريج ماخلاهاش تهدا...
🍃🍃🍃🍃🍃
وفي هالوقت..
كان عبد القيوم في مكان عمله ياخد في معلومات عن حجم الاضرار اللي صار للشبكه جراء الاشتباكات..
قطع عليه اتصال جاه وين شاف المتصل اتفاجأ وخاف..
🍃عبد القيوم؛ايوه..
جاها صوتها المرتعش والخايف وهي تقول..
"عبد القيوم انا بتعذر منك لأني اتصلت بيك بس كتير مضطره..بدنا حدا يجي ياخدنا من هون..بابا مو بطرابلس وعمي ولادوا عم نتصل فيهن ماعم بيعلق معنا الخط..بترجاك تساعدنا بترجاك ماعاد فينا نضل هون"
عبد القيوم:تمام تمام..خل بنسكر توا ارجي مني اتصال..
وسكر عليها واتصل بالمهدي...
🍃🍃🍃🍃🍃
وعبد الرؤوف اللي كان متطوع للمساعدات الانسانيه بعيد عن ساحات القتال.
خش للمنطقه الموجوده فيها المراة في وقت المهله كان لابس مدني وسيارته عاديه غير ملفته للأنظار وكان معاه واحد من اصحابه متطوع زيه..
وصلوا بعد جهد جهيد للأستديو اللي ساكنه فيه المراة وطلعوها هي وصغارها..
ومن لما ركبت وهي تدعيلهم...وهو يشوف للصغار من مرايه السيارة وقلبه موجوع ع حالهم..
طلعوا من المنطقه بأمان....وبعد ماقطعوا مسافه لابأس بيها وصلوا لشارع القهوة....
🍃🍃🍃🍃
طوبى:خشي حبيبتي خشي..خشوا حبايبي..
:الله يربحك الله يفرج عليك..
طوبى بإبتسامه ودموعها في عيونها..
/اجمعين يارب..
مطيره بإبتسامه:هي خشي حبيبه..خشي..خشوا ياعساسيل..
وخشت المراة ووراها صغارها..
ولما جت بتلحقهم طوبى..
"طوبى"
التفتت وقالت..
/نعم..
عبد الرؤوف:حاجاتهم..
طوبى:هيا هي..وقدمت للباب تراجي في عبد الرؤوف ينزل الشناطي..
فجأه سمعت صوت سيارة جايه..شافتلها..
لقتها اللاند كروزر...ارتبكت وتوترت في لحظه..
هو درسها ونزل لعبد الرؤوف وقاله..
/باهي اللي لقيتك نبي تعدي معانا نطلعوا عيله في *****
عبد الرؤوف:شويه بس..
شافه ينزل في الشناطي بعدين غير نظره للباب لقي طوبى تشوفله..
نسي كل شي..لاعيله عالقه..لاحرب..ولاعاد يتفكر حاجه..
ليه فترة طويله ماشافهاش..ولما جت اللحظه اللي يشوفها فيها يتلاقوا عيونه بعيونها الحايرة..
خجلا نزلت عيونها ووخرت عن الباب...وهي حاسه ان قلبها عداده في الالف...
ع خشة عبد الرؤوف بالشناطي وهو يقول..
/هما هادوا..
هزت راسها بدون ماتتكلم..وهو طلع..وهي سكرت الباب بعده وقعدت تتحسس في خدودها..
☘هو استاقظ لما ناداه المهدي..
التفت وقال:بيعدي معانا عبد الرؤوف..
يدوب شافله وهز راسه..ومشي لسيارة عبد القيوم..
عبد القيوم تجاهل اللي صار وقال لعبد الرؤوف..
/هيا..
ركب عبد الرؤوف السيارة وماكانش في باله وقتها غير العمل الانساني اللي بيديره...
🍃🍃🍃🍃🍃🍃
وصلوا للمنطقه اللي تسكن فيها سلافه..خشولها بعد ستين واسطه...
وصلوا في العمارو درسوا قدامها..
شويه ويطلعوا منها سلافه وامها واختها وهما بشناطيهم..
نزللهم عبد القيوم طول..
والمهدي وعبد الرؤوف اللي لفتهم جمال الام وبناتها قعدوا مركزين عليهم وعبد القيوم ياخد في شناطيهم وهو يكلم فيهم..
عبد الرؤوف تفكر مرة حكتله غرفه عن بنت سوريه التارقي يبي يخطبها..قالوا اشاعه وهو كذبها بس اللي يشوف توا شنو!!؟
فتح عبد القيوم سيارته من الخلف ركبوا التلاته..سكر السياره..
ومشي حط شناطيهم..بعدين ركب هو شغل السيارة وتحرك..
وعبد الرؤوف تحرك وراه..
سلافه؛انا اسفه مرة تانيه..
امها"شاديه":غلبانكن وجبناكن لهون بس لو ماكنا مضطرين..
قاطعها عبد القيوم وقال..
/الناس لبعضها ياخالتي..واللي درناه واجب مش جميل..
سلافه:شكرا كثير..
عبد القيوم ماردش عليها..
لبانه حركت عيونها لأختها..لقت خدودها محمرات والابتسامه تغلب في ملامح الخوف ع وجهها..شويه وشافت لأختها..
لبانه رقصت حواجبها وغمضت عيونها وهزت راسها يمين ويسار وكأنها تقوللها..
"بيجنن"..
هي فنصت في اختها وشدت ابتسامتها..
وامهم في جنبهم عيونها في الروشن تفكر وين بيمشوا وشن بيصير فيهم..
هدا كله والمهدي محتفظ بصمته وهو يفكر شن علاقه عبد القيوم بيهم!؟...
بعد ماطلعوا من المنطقه بلحظات رجعت الاشتباكات..
وهما زادوا سرعتهم بش يبعدوا عنها اكثر..
شاديه:الله يهديهم لبعض الله يصلح حالهم...
عبد القيوم:خالتي وين تبونا نعدوا بيكم!؟
شافت لبناتها والتلاته بدت ع وجوههم ملامح الضيق والاحراج..
عبد القيوم:سلافه..
سلافه بإحراج:مافي مكان محدد بصراحه..بس يعني لو بتعرفوا مكان للنازحين خدونا عليه..
سكت عبد القيوم...ماردش عليها...
والمهدي شافله شويه بعدين رجع شاف للطريق..
وهما التلاته كانوا مضايقات ع الآخر...
🍃🍃🍃🍃
بعد ماقطعوا مسافه طويله بعض الشي..
وصلوا للعمارة اللي ساكن فيها عبد القيوم..
درسوا سيارتهم..
عبد القيوم: هي انزلوا ..
ابتسم المهدي ابتسامه خفيفه..
وهما نزلوا وكانت ملامح الاستغراب باديه ع وجوههم..
نزل بعدهم ووقف قدامهم وقال..
/المكان هنا امان بعيد ع الدوشه والاشتباكات حتى انكم معاش تسمعوا في شي نهائي..
طلع المفتاح من جيب سرواله ومده لسلافه وقال..
/في شقه في الدور الثاني ع يدك اليمين فاضيه مافيها حد بس مفرشه وفيها كل شي..تموا فيها لعند مايرد باتك وبعدها شوفوا شن بديروا..
شاديه؛ليكون ياابني هالشقه لإلك؟!
عبد القيوم:اها شقتي..
شاديه؛بقصد ساكن فيها..
عبد القيوم:حاليا لا..
شاديه شافت لسلافه اللي كانت تشوف لعبد القيوم بنظرات اعجاب واضحه..
حمحت وقالت..
/يعطيك العافيه ياابني بس لو بتاخدنا ع الاماكن اللي فيها النازحين بيكون احسن..
بناتها شافولها بصدمه..
عبد القيوم:ماتخافيش مني ياخالتي..ردي بالك تفكري اني ممكن نضايقكم..مش حنجي شور الشقه بكل..
سلافه:ماماممكن لحظه..وخدت امها ع تركينه...
وقعدت لبانه واقفه بروحها وهي محرجه..
وعبد القيوم تباعد عنها ووقف ع سيارته..
🍃سلافه:انا بعرفوا للزلمه من فترة منيحه حدا كتير محترم واخلاقه عاليه..
شاديه بشك:ليش ليعطينا شقته هيك بلا مقابل مشان سواد عيونا!؟
سلافه:امي..انتي لسا مابتعرفيه لما بتعرفيه منيح بيروح استغرابك..
جتهم لبانه وقالت..
/ماما هدا هو نفسه المهندس اللي مدح رائف اخلاقه وعرف بابا عليه..نسيتي شو حكي عنه!؟
شاديه:ييي! هدا هو المهندس عبد القيوم تبع الشاي الاخضر اللي صرعني بيه ابوكي!؟
سلافه بإبتسامه حماس..
/وطلعتي بتعرفيه من ورايي!؟لك ايه هو
لبانه ضحكت..
شاديه برفعة حاجب:شوبك هيك فرحتي اولي!!؟
الزوز بلعوا ضحكتهم..
وسلافه قالت وهي مرتبكه..
/ماما عيب الزلمه ناطرنا..تعالوا..
ومشوله التلاته وقالت ام سلافه..
/اسفه ياابني بعتذر منك ماكنت بعرف انك نفسه المهندس اللي اشتغل ببيت ابن اخوه لزوجي.
ابتسم بجديه وقال..
/مش مشكله..تفضلي..ومدلها المفتاح..
خداته وهي تدعي..
/الله يفتحلك الابواب المسكره..
عبد القيوم بإبتسامه..
/آمين..
ومشي نزل شناطيهم وقال..
/خل نرقيهن قبل..
ومشي خش للعماره..
شاديه:اكابر هالشب..
لبانه شافت لأختها بإبتسامه..
وسلافه قلبها طاير بين ضلوعها من الفرح..
🍃وينزل عبد القيوم ويركب السيارة ويراجيهم لين يخشوا للعمارة..
بعدين تحرك..
المهدي:شو في مافي!؟
شافله برفعة حواجب وقال..
/نعم!؟
المهدي بضحكه؛باهي وين بتقعد حضرتك..
عبد القيوم:نبات عند واحد صاحب الليله بعدين ندبر وين نقعد ساهله..
المهدي:ولي للشقه ياراجل وبلاش منها طروحك هادي..
عبد القيوم حس روحه بيطير من الفرحه..وقال في نفسه بدهشه..
"شكلها دعوة المراة لقت باب العرش مفتوح!"
المهدي:تارقي..!
عبد القيوم؛معاك..
المهدي:متأكد مش في الشام العديه..
عبد القيوم بإنزعاج..
/ايييه علينا..كان ناقصتك انت ماهو..
ضحك المهدي وقال..
/قوللهم يلمولك حوايجك في شنطه..
عبد القيوم خبط جبهته وقال..
/نسيتها القصه هذي بكل!...يللا مش مشكله نعدي نشري وخلاص..
المهدي ابتسم بصمت...
🍃🍃🍃🍃🍃
"ماشاء الله البيت متل الفله"
لبانه:مرتب ونظيف بطريقه مستفزة..
و سلافه دور بعيونها في الشقه وهي هايمه في تفاصيلها..
شاديه:الزلمه عايش هون مبينه..
لبانه:يكثر خيره..انا هلأ بدي نام صارلنا يومين مانمنا..
سلافه:معك حق..
☘ودوروا ع مكان يرتاحوا فيه..
لقوا دار وحده بس مفتوحه..اللي هي دارالمعيشه..
بدلوا حوايجهم وطول رقدوا فيها....
🍃🍃🍃🍃🍃
"تي طروف يطيحوا الطير الطاير"..
غرفه رفعت الموس اللي كانت تقرض بيه في اللحم وشافتله بنظره مخيفه..
هو قال:تو شن قلنا..قاعد نحكيلك بس..التارقي طلع مش ساهل ويدير في جو داري ع شمعتك تقيد..والله عنده حق مش شمعه هي..
غرفه:كلمة تانيه نغزك في رقبتك..
ضحك بعدين قال..
/لكن تعرفي ضحكت ع روحي مش عارف كيف فكرت في حاجه عبيطه شويه ماتصيرش..
غرفه:شن هي!؟.
عبد الرؤوف؛فوتي..ايه حقه بنقولك..
غرفه:شنو؟
عبد الرؤوف رفع حاجبه اليسار وقال..
/بنجيب عمتي وبنتها يقعدوا هني فترة...
🍃🍃🍃🍃🍃
"ياعمي  اسمعني بالله عليك..هدا حوشي والصغار هادم صغاري عمر عشته معاهم راني ربيتهم ع ايديا"
:درتي واجبك..وتوا خلاص الراجل توفى ماعندهم بيك لزوم..
مازن:ياحاج صل ع النبي راهو حتى شرعا مايجوزش لازم تكمل عدتها في حوشها..
:واني شن يضمني شن يصير من هني لين ترمي عدتها! البلاد خايضه ومرات معاش نقدروا نخشوها طرابلس مرة تانيه..
فوزيه ببكي..
/ياعمي مانقدرش  نخلي صغاري..
عمها بصرامه:ماهمش صغارك ولاعاد يربطك بيهم شي خلاص
خوها:فوزيه عمك عنده حق
ربيبها الكبير بعصبيه..
/في شني عنده حق!!؟ قوله محرمه علينا زي حرمة امنا علينا بالك مايعرفهاش هادي
مازن فنص في خوه..
:تي فوتني ياراجل تبيني نسمع الجهل اللي يقول فيه ونسكت!!؟
فوزيه بألم:خلاص بالله عليك
عمها بحزم؛توا تنوضي تلمي دبشك وتطلعي معاي توا..انتي امانه خوي الله يرحمه مانبي ربي يحاسبني عليها
خوها قال..
/فوزيه..
وفوزيه بإستسلام ناضت ماكانتش تقدر توقف في وجه عمها اللي عندها في مكانة بوها..خافت لوعانداته تخسره وتخسر عيلتها كلها تعرف عقليته وقوة سيطرته عليهم..
وفي نفس الوقت كان قلبها يتقطع ع فراق صغارها..وواجعها حالهم وقله حظهم في الدنيا زي ماكان حظها هي قليل..
تسمع في مازن ينادي فيها ومش قادره ترد عليه..
ركبت للدور التاني تجري..
ومازن وخوته وخواته معاها بنظراتهم اللي كلها صدمه..
المشهد نفسه قاعد يتكرر..تخلي للمرة التانيه من انسانه تانيه ليها نفس المكانه اللي مقدر عليهم انهم ينحرموا منها..
🍃مناسك طلعت من دارها بعد مافاقت من النوم...شافتها وهي ماشيه لابسه ثوب الحداد والخمار مرفوع وشاده شنطه في يدها..
واللي خفتي منه يامناسك صار...!
مشتلها تجري وهي تقول بصدمه..
/ماما..بتخلينا!!؟ حتى انتي بتخلينا!؟
نزلت فوزيه بسرعه وهي تبكي..
ومناسك وراها..
/ماما حرام عليك اني مازال صغيره..مازال نبيك..
فوزيه كانت منهارة وعاجزة تماما..
خيروها وللأسف ماقدرتش تبديهم  ع اهلها...
مناسك بفزع:شدوها ماتخلوهاش تمشي..
جيداء بغضب ودموعها ينزلوا..
/لاخليها تمشي مش حتكون خير من امنا اللي جابتنا..
"فوزيه"..
سمعت صوت عمها غمضت عيونهابشده بعدين فتحتهم ومشت بسرعه..
مالك بصدمه..
/يام!!..
وعيونهم برجاء تلحق فيها وكلهم كانوا متأملين في اخر لحظه انها تتراجع..بس فوزيه طلعت وسكرت وراها الباب..
لحظه صمت..وصدمه...خلتهم يرجعوا بالسنين للماضي البعيد..
ويتفكروا كيف تخلت عنهم امهم في مشهد يشبه هدا لما بدت سعادتها عليهم...
مناسك من الصدمه قعمزت ع الدروج و هي تشوف في الفراغ...
مالك شافها..قلبه تقطع عليها..مشالها وقعمز جنبها..
حط يده ع شعرها ومسح عليه..وهي طول خشت في حضنه..
ضمها..انهارت بالبكي وخواتها بكوا معاها..
وخوتها كانوا في حالة حزن شديد..ويتم حقيقي من الجهتين...لاعاد في اب...ولاأم....

#خريف
#طوبى

....يتبع....