طوبى ☕شارع القهوة☕

الجزء_الثامن_والثمانين

🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿 #طوبى  "جنة طوبى"
#جمان_فريد
#الجزء_الثامن_والثمانين "سجن يوسف/مقاومه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الحمد
قال رسول الله ﷺ:
« إذا قال العبدُ : ( الحمدُ لله كثيراً )  قال الله تعالى :
اكتبوا لعبدي رحمتي كثيراً ».
صحيح الترغيب (1578)
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "نحن نجتاز الأيام برحمة الله و لُطفه." 🍃
__________________________________________
انطرحت ع سريرها اللي كان مقابل سرير صاحبتها.
خدت خصله من شعرها تلعب بيها وهي تحكي بهيام..
/بس بدي شي شوف شي واحد مايعجبني فيه..بس بدي شوف شغله وحده تخليني قول عندو عيب..
ميار:وين تعرفيه انتي!!؟ الداخليات متاع الناس ماتبانش الا بالعشرة سوفي..
رقدت ع جنبها وهي تشوف لصاحبتها وتقول..
/مابعرف..يمكن..بس ياميوش انا بعمري ماقابلت حدا هيك..فيه جاذبيه رهيبه..تصرفاته كثير حلوة..انتي شفتيه شلون بيشلح جاكيته ولا لما بيرجع يلبسوا حسيت قلبي رح يوقف..
ميار:بصراحه بصراحه..عندك حق مميز هلبه تحسي اللي زيه معاش في منهم توا ماتلقي كان الملصق والبارد والدحناس..هو حتى لما يدوي مع البنات مايشوفلهمش هلبه..
سلافه بغيره؛كأنك زوديتها ما!!..
ميار بضحكه:وبدينا نغاروا..
سلافه ابتسمت بعصبيه..
ميار ضحكت عليها بعدين قالت..
/ماتعرفيش كان عنده حسابات ع مواقع التواصل؟
ناضت قعمزت وهي تقول بمفاجأه..
/ييه كيف نسيت! هو كتب الاكاونت تبعوا ع الفيس بوك ع اللوح وانا صورتوا..
ضحكت ميار..
خدت سلافه تليفونها من ع الكامدينو..
خشت ع الصور وشافت الصوره اللي فيها اسم حساب التارقي..حفظاته في عقلها..
بعدين خشت ع الفيس وقعدت دور عليه..طول طلعلها..
ضحكت وقالت؛ليكوا....خشت ع صورة بروفايله بدت ع وجهها ملامح الهيام وهي تقول..
/وولي ياميوش..شوفي شوفي..
ومدتلها التليفون..
خداته ميار وشافت الصوره..
كان فيها عبد القيوم لابس تارقي..الصوره متصورة بإحترافيه مقربه ليه واخدينهاله ع الجنب باين نص وجهه وهو يشوف للأرض.. تبان في الصحراء من الخلفيه..ولابس عمامه لونها ازرق بترولي..نظرته كانت تبان جاده وحواجبه كالعاده معقوده..
ميار:اسمعي خليهولي ولدنا هدا راهو..
جبدت منها التليفون وقالت..
/فشرتي والله مابتركوا لحدا..
ميار بضحكه؛واضح بالذات كيف خليتي معز "اخ ميار"يعزمه ع الغدي غدوة..
قعمزت وهي تتأمل في صورته وتقول بإبتسامه..
/لاانا ماعملت شي خبرتوا انو ليبي وهو ماصدق دغري عزموا وكان رح يحلف عليه بالطلاق..
ميار ضحكت وتمددت ع السرير بعدين قالت..
/اني بنرقد خلاص احلام سعيده..
وسلافه مش معاها بكل اتكت ع السرير وقعدت تدهور في حساب التارقي..شافت التفاعل حلو ع منشوراته..
اغلبهم كانوا صور من شغله في الخط..اما ابيات شعر او ايات قرآنيه..وفي مناشير كاتب فيهم ابيات شعر شعبي مافهمت منه شي بس عجبها هلبه لأنهم اما اختياراته او مألفهم بنفسه..
🍃وهي سهرانه ليل التارقي..والتارقي سهران ليل ام العيون الحايره...قلبه مش مهنيه مش متحمل البعد عن مكان هي فيه..حتى لو معاش يقدر يشوفها ولايكون قريب عليها..المهم  يكون في مكان عايشه فيه..
انهم وهو يفكر شن دايره مع الجالي..عارفها كارهاته..ومش قادر يقتنع انها متقبله الحياة معاه..غيرته عليها ماتبيش تخليه يفكر ان حياتها معاه ماشيه طبيعي..غير هكي طبعها اللي بدي يعرفه كويس ماتحب حد يفرض عليها شي ماتبيشي وفيها عناد..وهالحاجتين ع قد ماهما مفرحينه ع قد مامخوفينه عليها...
وفي النهايه وين يستاقظ لنفسه انه قاعد يفكر في مراة ع ذمة راجل..يكمل ليله استغفار وقلبه موجوع ع الآخر لين يرحمه الله وينزل عليه النوم...
🍃بس هي وين حتشوف النوم وتسمع في بنتها تعيط..
خبطت ع الباب خبط ورم ايديها..عيطت لين صوتها قريب راح وهي تنادي عليه..تسمع في بكاها وقريب تنجن معاش عرفت شن دير..
حاولت تفتح الروشن بش تنادي عليه منه ومش هامها من يسمعها من الجيران..بس للأسف الروشن كان مسكر بإحكام..
انهارت وطاحت ع ركابها وقعمزت ع الأرض وهي تبكي بألم وحرقه شديدين..
رفعت عيونها فوق وهي تقول بكل ضعف وتوسل..
/يارب..ياربي...يارب...
ماقدرتش تقول شي تاني غير هالكلمه..
لحظات وسمعت صوت باب دار جنه انفتح..
ناضت تجري وقفت ع الباب وحطت وذنها عليه..
سمعاته وهو يقول..
"خلاص بابا بابا"
وصوت جنه بدي يهدا لين معاش سمعاته عرفتها رقدت عنده..
انهدت ع الارض وحطت راسها ع الباب وهي مغمضه عيونها وقالت..
"الحمد لله"
🍃وجارتها جميله مش قادره ترقد غمضه تسمع في صوت عياطها وقلبها متقطع عليها..لكن مابيد حيله الحكايه فيها طلاق..وباقي الجيران عليهم انفسهم مافي حد يبي يوجع راسه بمشاكل غيره ويدخل روحه في معامع مرات يكون ليها اول ماليهاش اخر...🍃
☘طوبى بعد ما رقدت بنتها هدت شويه وقعدت تفكر..
تفكرت صلاة القيام ليها مده ماصلتهاش..ناضت بصعوبه ومشت خشت للحمام..
وين وقفت ع الحوض شافت للمراية..
اثار صفعاته كانت معلمه ع وجهها بوضوح خدها الأيمن مجروح ونازف وهي مش حاسه بيه..بعد ماشافاته حست بوجع فروة راسها من قوة شدته لشعرها..
تمعنت في نفسها وهي تشوف لشكلها في المرايه..قداش وجعتها روحها..وقداش خافت من بعدين..بس لازم ماتستسلمش لخوفها وتضعف..لازم تكون قويه..تصمد وتقاوم..وتستعين بالصبر والصلاة...والله مع الصابرين..
طردت الافكار اللي كانت حتهد عزيمتها..
وبدت تتوضا...حست بألم وهي تغسل في وجهها بس احتسبت اجر هالالم وتخيلاته كيف مسح هلبه ذنوب دارتهم...
طلعت من الحمام وهي مرتاحه بعض الشي..وتوجهت لغرفة الملابس..وقفت ع الملايات..وخدت اللي لونها اخضر كان في تحتها صلايه..خدتها ومشت طلعت لدار النوم...
🍃وقضت اكثر ساعات هالليله الطويله وهي تصلي وتناجي وتشكي لرفيقها الاعلى..لين خداها النوم ع بابه...
🍃تاني يوم
اللي كان جمعه...
فاق الجالي من نومه..كان راقد ع السرير في دار جنه كمل ليله وهو يشم في ريحة طوبى اللي عالقه فيه
لما فاق شم ريحتها..نزلوا دموعه..بعدين مسحهم وناض..شاف لسرير بنته لقاها فايقه تلعب بلعبتها"الشكشاكه"
نزل من السرير ومشالها وقف عليها وقعد يتأمل فيها بإبتسامه..ضيق عيونه وهو مركز ع لون عيونها..اللون بادي يتغير مش حيكون زي لون عيون امها..كل ماتكبر يزيد يبان اللون اللي كان واضح انه حيكون مختلف عن الوان عيون بنات الواعر..
تنهد..وخداها وهو يقول..
/نصلي ياقلبي ونغيرلك تمام...باسها من خدها بعدين ردها للسرير...
🍃وطوبى في دار النوم..
ماكانتش راقده..كانت مقعمزة ع السرير وهي تردد في ذكر الصلاة ع النبي ودور في الدار بعيونها وتفكر..
"زعما مداير فيها كاميرات!!؟ لالا مااعتقدش..لازم نتأكد..باهي كيف بنتأكد!!؟..ياطوبى انتي استفزتيه هلبه...باهي شن بندير وصل في شرفي..ويبيني نكون زوجته عادي واني مش طايقاته مش طايقه نسمع اسمه.."..
غمضت عيونها وبدت تردد في الصلاة ع النبي بصوت عالي..
فجأه فتحت عيونها..ناضت من السرير ومشت لدولابه فتحاته...
طلعت بدله عربيه معلقه وحطتها ع السرير بعدين سكرت الدولاب..
ولت خدتها ومشت لدار غرفه الملابس متاعها..وجت لطاوله الكوي وهي ناويه تكويله البدله..
🍃هو بعد ماغير لجنة ولبسها وعطرها وكان في هدا من البارعين..
خلاها في سريرها ومشي للجناح..فتح الباب بالمفتاح وخش..
استغرب لما مالقهاش..شاف ملايه فوقها مصحف محطوطات ع السرير..تنهد..بعدين مشي للحمام..وقف وين شاف ضي طالع من دار الملابس..مشالها وخش..
واتفاجأ ع الآخر لما لقاها تكويله في بدلته العربيه..
وقف في الباب وقال..
/تبي تزيدي تهبيلني بتصرفاتك هادي..
مابتش ترد عليه..
رفع حاجبه وقال..
/ok..كمل جميلك وديري فطور ومش حتشوفي جنه الا بعد ماتغسلي ماعين الفطور..
ولاردت عليه بكلمه ولاتعبت روحها تلتفت تشوفله..
الجالي:بنبدا نتعامل معاك بأسلوب جديد الدلع والمسايرة مايمشوش معاك..
حطت المكواه ع حنب ولبست العلاقه البدله متاعه بعدين مشت علقتها مع الحوايج اللي هو واخدهولها..وبدون ماتشوفله طلعت من حداه..هو لمح اثار الضرب ع وجهها قلبه وجعه..لكن عفس عليه..ومشي طلع وراها..
لقاها تشوف لدار جنه اللي كانت مسكرة بالمفتاح..
هو قال؛ديري اللي قتلك عليه نخليك تخشيلها..
التفتت وهي تشوفله بحده وعيونها غارقات بدموع..
/درتلها حليب؟
الجالي؛درتلها كل شي..بنتي هادي..
غيرت نظرها عنه...ومشت نزلت من الدروج..
وهو نزل وراها بش يقعد كاتم ع انفاسها..
🍃🍃🍃🍃🍃
"وقال ماخلت مادارت حتى الشاهي باللوز"
فردوس وهي مصدومه؛معقوله!
فايزة:قال طلعت وهدرزت وهي تضحك وجوها حلو..
مطيره:مرات غاصبها دير هكي..
فردوس بضيق:ايه صح..
فايزة:لكن نسرين قالت طوبى هي اللي عزمت..
مطيره:والله مانصدق طوبى ونعرفها تلقيه مهددها الكل..ب بش دارت هكي..
فايزة تنهدت بضيق وقالت..
/صح..
فردوس:المهم حالها باهي ومش داير فيها شي..
فايزة:ع حسب ماقالت نسرين حالها باهي..
سكتوا لحظات وهما يفكروا بعدين مطيره قالت..
/صارلها صفاء من الجيه..
فايزة؛ايه جايه تتغدا هني..
فردوس:اريج والاء مشوا لحوش جدهم بيتغدوا غادي..
خشت عليهم اميمه وهي تضحك قالت..
/هم يضحك وهم يبكي..
هما بدت ع وجوههم ملامح الاستغراب..
اميمه هدت ضحك وقالت..
/صباح الخير..
مطيره؛خيرك خاشه تضحكي هكي!؟
اميمه بضحكه؛احسبوا بابا وهو مرته في الغدي..
تبدلت ملامح وجوههم للدهشه..
اميمه؛تو كلمني وقال بيجي بمرته يتغدوا هني..
ضحكوا فردوس وفايزة وهما مصدومات..
ومطيره؛اني نبي نشوفها طايحة السعد هادي.
اميمه بضحكه؛حتى اني..
ضحكوا وكملوا كلام عن مرت عبد المطلب الجديده وهما يتخيلوا فيها...
🍃وفي حوش الصيد..
طلعت صفاء من جناحها وهي لابسه بالطو شتوي طويل وشاح..ووجهها خالي من الزينه..
مشت بطريقها لدار المعيشه اللي كانوا فيها عزوزتها وسلفاتها وصغارهم ملتمين وع راسهم خديجه وراما..
خشت عليهم صفاء وسلمت ع عزوزتها وعطتها علم انها طالعه..وبعد ماسلمت من بعيد ع الباقي مشت طلعت من الدار متوجهه لباب الحوش..
لكن قبل ماتوصل فيه..
"مايجيش هكي راهو"
وقفت والتفتت شافت عواطف واقفه تشوفلها بنظرات مريبه..
عواطف؛لما يكونوا سلفاتك ملتمات هني تقعدي للغدي بعدين تمشي لأمك مش من بعدها هي..
صفاء بشي من الارتباك؛اني امس تغديت معاهم وخديت اذن عمتي وقلتلها..
قاطعتها وهي تقول..
/مش نديدتك اني بش تردي عليا دوة الكلام اللي نقولك عليه تسمعيه وتاخدي بيه في الجديد..وتوا بري..ولفت ومشت وخلتها وهي خايفه ومضايقه في نفس الوقت..تعامل عواطف معاها من البدايه غير مريح وتوا في غياب اشرف حتاخد راحتها...
ولأنها من طور امها..وحالتها النفسيه تعبت بعد اللي صار فيها بتضطر تساير وتسكت مافيش غير هالحل قدامها..
تنهدت بعدين لفت ومشت طلعت من الحوش وهي مضايقه ومتوتره..
🍃وطوبى..
دارت للجالي مايبي..
فطور..وغسلت الماعين..وقعدت واقفه في الكوجينه تراجي فيه وهو يشرب في الميه ع اقل من مهله..
كمل حط الطاسه ومشي بيطلع..هي وقفت قدامه وقالت..
/عطيني المفتاح..
هو بإستغباء:مفتاح شني!؟
طوبى عقدت حواجبها بضيق وقالت..
/جالي..
هو قال:بشرط..
نزلت عيونها وهي مضايقه لأبعد حد..
الجالي:تخليني نحضنك..
غمضت عيونها بشده وقعدت ساكته..
هو قال بإبتسامه ماكره..
/السكوت علامه الرضا...
والتف عليها زي الافعى العاصره...وهي حاسه بنفسها انتكم وضلوعها تشابكوا في بعض..كان يقول في كلام الحب والغرام اللي مخلي طوبى تشعر بإشمئزاز رهيب..
معاش قدرت تتحمل..قعدت تباعد فيه عنها بالشويه..
وهو تباعد بعدين تنهد وقال..
/تلقيه تحت العفاسه متاع الدار ياروحي..
طوبى طول مشت طلعت بسرعه ..سرعت خطواتها وولت تجري ركبت بسرعه..
ووصلت للدور التاني..مشت لدار بنتها طبست ع العفاسه حولتها لقت المفتاح..بلهفه فتحت الباب وخشت للدار..
وجت لجنة بشوق الدنيا كلها خدتها من سريرها وضمتها بقوة وقعدت تشم في ريحتها وتبوس فيها ودموعها ينزلوا..
🍃🍃🍃🍃🍃
في العاصمه المصريه القاهره..
بعد صلاة الجمعه..
توجه عبدالقيوم بسيارة الاجره للمطعم اللي عزمه عليه اخ ميار..
وصل..ونزل السياره بعد ماعطي السواق اجرته..
ومشي خش للمطعم..
🍃وداخل سلافه وميار وخوها كانوا يستنوا فيه..
وفي نفس المكان..ع طاوله تانيه..
كانوا سالمين وجبريل مقعمزين مع زوز من ولادهم يتغدوا اخر غدي في مصر قبل ليروحوا نهائي لليبيا..
خش عبد القيوم للمطعم..شافه اخ ميار واشرله يجي..
هو كان محرج بعض الشيء مش متعود ع الوضع بس ماقدرش يرد الراجل اللي اصر عليه..
وصل في طاولتهم..وسلم ع معز اللي ناضله..
وسلافه وميار يشوفوله بإعجاب..
كان لابس بدله كاجوال لونه جاكيتها ازرق بترولي تحتها فانيليا بيضا رقبتها طويله ع سروال اسود..
سلافه ولما شافت لون الجاكيت تفكرت صورته بالعمامه تناثرت من عيونها قلوب عبت المكان..
هو  قعمز مقابل معتز..وسلافه وميار مقابلات بعض..
عبد القيوم؛كيف الحال.
سلافه بإبتسامه:الحمد لله..
ميار:الحمد لله..
سلافه:انت كيفك؟
هو شاف لمعتز وقال:الحمد لله..اول مرة نجي مصر مانعرف فيها شي..
معز بإبتسامه:اني هادي تاني مرة الاولى كنت جايب فيها الوالد علاج..
عبد القيوم:ان شاء الله لاباس..
معز؛لا ليها فتره مشكله بسيطه والحمد لله عدت ع خير..
عبد القيوم؛ربي يعطيه صحته ويطول في عمره..
ميار ومعز..
"آمين..بارك الله فيك..تسلم"
سلافه بضحكه؛انا مثل سندباد بشد رحالي دايما من بلد لبلد..
عبد القيوم؛ليش؟!
تنهدت سلافه وقالت..
/انا بالاصل كنت بأشتغل بمجال الدعايه والاعلان بوكالات كبيره بالعالم العربي..بس بعد الحروب والمشاكل وقفت حياتي فتره وطلعنا انا واهلي من البلد وانتقلنا لكذا بلد لحد مااستقرينا بليبيا..
عبد القيوم؛كم ل٦كم في ليبيا؟
سلافه بإبتسامه؛سنتين..
عبد القيوم؛مرتاحين؟.
سلافه؛الحمد لله مرتاحين..
عبد القيوم؛اسف لوالسؤال كان خاص..قاعدين في ملك ولاايجار..
سلافه وهي مبتسمه؛شقه صغيره ملك..
عبد القيوم هز راسه بصمت..
معز؛عيلتها ناس تخش القلب فيسع يتوالفوا معاهم الناس.
سلافه بإبتسامه:شكرا..
معز بضحكه؛عفوا..
عبد القيوم ابتسم بجديه وقعد ساكت..وميار تسرقله في النظر...
🍃تبادلوا اطراف الحديث شويه بعدين طلبوا الغدي..
عبد القيوم انسجم مع معز ومعز كذلك فرحان انه تلاقى بواحد ليبي وارتاح هلبه لعبد القيوم وعجبه..
وسلافه كانت مستمعه ومكمله تركيزها في تفاصيل عبد القيوم اللي قاعد يجذب فيها كل يوم اكثر من اليوم اللي قبله وصاحبتها تراقب فيها..
🍃وبعيد عنهم في نفس المكان..
ولد جبريل:مايطلع منه التارقي..
خوه:ماقالش بيجي لمصر..
جبريل؛وليش لازم يعطيك علم!
:قصدي نديروا واجبه..
:بنعدي نسلم عليه..
سالمين؛خليك في مكانك..
جبريل:ايه خلوه في حاله كان حقنا تو يجينا..
سكتوا الولاد وهما يشوفوا لسلافه وعبد القيوم كيف يهدرزوا مع بعض..
بس امهم كانت مركزه اكثر منهم..
🍃🍃🍃🍃🍃
ونساوين عيلة الواعر في صالة حوشهم كانوا مركزات بنظرهم ع مرت عبد المطلب الجديده..
تبان من جيل فردوس وسدرة..بكامل اناقتها عروس بكل معنى الكلمه حتى من الحنه محنيه..بس المدهش في اللي يشوفوا فيه الذهب اللي لابساته..كان عندهم فضول شديد يسألوها انتي واخديته ولاراجلك؟
هاديه؛بادي الصقع غادي وحتى المطر صبت اكثر من مرة.
فردوس:ايه هداكا هو قولي الشتي خش..
هاديه؛ايه..انتي عندك زوز بنات وولد ولا؟
فردوس:ايه..اشرت ع غرفه وقالت..وانتي اللي عندك التويمه..
غرفه بإبتسامه؛ايه راقدين داخل..
هاديه؛مازال وخيتكم اللي قاعده برا والله منين حكالي قصتها عبد المطلب وجعتني ع الآخر وفرحت من قلبي لما قال ناضت ربي يتمم عليها بالشفي..
كلهم باصوات متقطعه ردوا..
"آمين؛
هاديه؛مازال الصغيره..وينها؟
فردوس؛ماقدرتش تجي اليوم معزومه..
هاديه كانت تعرف قصة طوبى واستغربت في اللي قالاته فردوس بعدين فهمت انهم مايبوش يحكوا في الموضوع مابتش تسأل اكثر..شافت لصفاء وقالت..
/اكيد هادي العريسه اللي درتوا عرسها الشهر اللي فات..
صفاء بضحكه؛ايه..
هاديه؛راك حامل..
كلهم تفاجئوا..
هاديه؛ماتقولوش كيف عرفتي اني مراة احساسي قوي هلبه عند ناسي في غريان يقولوا مكشوف عليا الحجاب..وضحكت..
فايزة شافت لبنتها وقالت:مالهاش هلبه مسكره شهر..
هاديه؛خليها تمشي تعاين وبعدين ساهل..
فردوس بضحكه؛شوقتيني بصراحه وكان فيها كيف خليت فايزة ترفعها توا..
ضحكوا..
هاديه بضحكه؛راهوا احساس بس علم الغيب مايعرفه كان العلي القدير..
فردوس:ونعم بالله..
ع خشة مطيره ووراها اميمه بسفر الغدي..
هاديه وهي تشوف لأميمه..
/بوها قالي عندي بنيه انجليزيه صدق والله..
يدوب ابتسمت اميمه..
هاديه وهي تشوفلها..
/حظك حلو هلبه..
شافولها بإنتباه..
هاديه؛والله اعلم ربي بيعوضك فوق ماتتخيلي..
فردوس بفرحه؛ان شاء الله ياربي..
مطيره:طلعتي شباحه ياعروسة عبد المطلب..
ضحكوا..
هاديه بضحكه؛اعوذ بالله ياوخيتي احساس والله احساس..
مطيره؛باهي اقربي ياام الاحساس اقربي..هيا اقربوا كلكم..
وقدموا كلهم حوالين السفره وبدوا يتغدوا..
ومطيره بدت تحقق مع هاديه..
☘فردوس بضحكه؛خلي المراة تتغدا..
مطيره؛اسكتي انتي..
شافت هاديه لمطيره كويس وقالت..
/معاش طولي..
انصدموا..ومطيره شهقت وقالت..
/ان شاء الله في راسك..
هاديه بضحكه:لا اني خلاص صاحب النصيب وجاني...
فايزة:اهاا..قصدها بتتزوجي..
مطيره:ترا سلم عروسة خوي تغدي واسكتي ماتخلنيش نبدا في احساسك..
قعدوا يضحكوا..وهاديه خدتها بروح رياضيه..
كلهم انسجموا معاها بس اميمه قعدت متحفظه..طبيعي ضرة امها مش حتقبلها من الاول...
🍃🍃🍃🍃🍃
"حياتنا الخاصه مانبي حد يخش فيها لابوي ولاماليك الحاجه هادي متفاهمين فيها من الاول"
ارام ودموعها ينزلوا..
/ماقصدتش هكي..لكن اني معاش عرفت نتعامل معاك يامهند ليك فتره حالك متغير ..حاساتك كارهني..
مهند بإنزعاج؛بدينا..
ارام؛انت ماتشوفش في روحك كيف وليت تتعامل معاي مش حاس بروحك!!
مهند؛اسمعي اليوم هدا يوم عطلتي الوحيد نبي نرتاح فيه ونريح راسي ارجوك اجلي النكد متاعك يوم تاني..
رفعت حواجبها وقالت..
/النكد متاعي!!..نزلت حواجبها وقالت..مهند شن رايك نمشي نقعد عند ماليا فتره بش نريحك من نكدي ع الاخر!؟
مهند بلامبالاة قال..
/يكون احسن..
ومشي وخلاها تلحق فيه بنظرات كلها صدمه ودموعها تنهمر انهمار...
🍃🍃🍃🍃🍃
"خبرتك انتي بش تكلمي اخته تقوله لو مافكنيش من شره نحرش بوه"
عمة بنات فردوس قالت بإستياء..
/ياخسارة مانحسابه حط عقله في راسه وولى راجل..
الاء بنرفزة؛تي لالا مافيشي امل..
☘وبرا الكوجينه..
في دار المعيشه..
الجده:كانه راجل كويس توكلي ع الله بنتي..
اريج هزت راسها وقالت..
/ان شاء الله خير ياحناي..
الجده؛ان شاء الله..قولي خالتك الصغيره شن صار فيها..
تنهدت اريج بحسره وبدت تحكي لحناها اللي صار مع خالتها...
🍃وبعيد عنهم شويه في دار معتز اللي كان مداير مكالمة سكايب مع احدهم..
معتز:كلهم ملاح والنوعيه اللي نبيها..
"كويس بكل...باهي قولي فكرت في الموضوع اللي قتلك عليه؟!"
معتز بشي من التوتر..
/فكرت..ومش عارف الحق..
"شن اللي مش عارفه حبيبي اني نبي مصلحتك بس"
معتز تنهد وقال..
/قالولي غلط تصاحب حد اكبر منك بهلبه..
"اللي قالك هكي مايفهم في شي ماتسمعش لحد اسمع لعقلك بس"
ابتسم معتز بتوتر وهز راسه بإيجاب..
🍃🍃🍃🍃🍃
"هي بيعملوها بالفلفل الاسود..جرب هي"
عبد القيوم خدي صونيه مدتهاله سلافه وقال..
/شكرا..
سلافه بإبتسامه:العفو..
معتز:شكلك مش صحاب انت والتوابل..
عبد القيوم:ايه يتعبن فيا شويه..بس الفلفل الاحمر ماعنديش معاه مشاكل..
معتز بضحكه:غريبه..
ميار؛التوابل التانيه اقوى من الفلفل الاحمر..
عبد القيوم هز راسه وهو ساكت...
معتز:صار انت من جماعة الكهربا..
عبد القيوم بضحكه:اها من جماعة المغضوب عليهم..
ضحكوا..
معتز؛وماتلقطوا كان في الدعي..
عبد القيوم بإبتسامه:هذى ليش الحياة معاكسه معانا..تنهد وقال..الحمد لله..
تلاشت ابتسامة سلافه وهي تشوفله بتعاطف..
معتز:من اللي مش معاكساته الحياة في بلادنا..ا قولتك الحمد لله ع كل حال..نقولوا ربي يكفينا شر الحروب في هلبه حاجات قاعده تصير ماتبشرش بخير.
عبد القيوم ؛يكفينا الله شر الحرب ويلم الشمل..تعبنا وملينا خلاص..
سلافه ودموعها في عيونها؛كلنا تعبنا وملينا بس مافي حدا بيهتم بحالنا نحنا الناس العاديه دايما بنروح دعوسه بين الرجلين..
عبد القيوم ركز نبرة الحزن في كلامها وجعه حالها..الغربه والتشرد ابشع الحالات اللي يعيشهم الانسان في الحياة..
قاللها:عندك حق..
ابتسمت وهي تشوفله..
وهو خدي طاسة العصير وقعد يشرب بعدين حطها ورجع ياكل ويسمع في حديث معز..
🍃الحرب..
مالهاش شكل واحد في الحياه...هي كلمة يجي تحتها سطور وسطور تشرح عن معناها وانواعها..
والحياة اللي عايشتها طوبى من بدايتها لعند اليوم حرب في حرب..
حاربت بش تكون البنت المثاليه اللي تتمناها اختها بعد ماتعبت في تربيتها تربيه فيها الشده اكثر من الراحه.د
حاربت بش تخلص نفسها من الشعور بالذنب ..
حاربت بش تعيش حياة مستقره مافيهاش خوف..
حاربت بش تقاوم شعور خيبة الامل اللي كاد يسيطر عليها وافقدها نفسها..
حاربت بش تحافظ ع ارث عائلتها حاربت شرار الخلق وصمدت وقاومت شرهم بكل شجاعه..
وحاربت بش تحافظ ع وصية بوها....
وقاعده توا تحارب بش تاخد حريتها وتحافظ ع وجود بنتها معاها كل العمر..
🍃في الكوجينه قاعده ضم فيها بعد ماغسلت ماعين الغدي  وهي تردد في الصلاة الابراهيميه..
بعد ماكلمت طلعت من الكوجينه ومشت للصالون وين مامقعز الجالي يلاعب في جنه..
جاته وقالت؛ترا جيبها..
قعد يشوفلها برفعة حاجب بعدين مدهالها..
هي خدتها وجت بتمشي..هو شدها من طرف توب البيجامه متاعها..
غمضت عيونها بعدين فتحتهم والتفتت تشوفله بإمتعاض..
الجالي:قعمزي نبيك في موضوع ضروري..
تنهدت بعدين مشت قعمزت بعيده عنه شويه..
الجالي حط رجل ع رجل وقال..
/غدوة بنرفعك للجامعه امتحاناتك السبوع الجاي صح؟
طوبى هزت راسها بصمت..
الجالي:امتى عندك؟
طوبى:من 8 ل2..
ابتسم وقال؛حلو عمري خليك ديما هكي صادقه معاي..
قعدت ساكته وهي تشوفله ببرود..
الجالي:تمام غدوة بنرفعك..
طوبى:وجنه؟
الجالي:بتجي المراة اللي شفتيها يومها تقعد معاها..
طوبى ضمت بنتها بخوف وقالت..
/مانخليش بنتي مع وحده مانعرفهاش..
الجالي؛لو كانت مش موثوقه نخلي بنتي معاها!؟راهو هادي قعدت مع جنة اسبوع كامل..
طوبى؛وانت وين كنت!؟
الجالي؛نخدم ع اللاب توب طبعا..
طوبى قعدت ساكته..
الجالي:رقديها وانزلي ديريلنا قهوة..
ناضت بجنه ومشت من حداه بدون ماترد وهو معاها بعيونه يشوف لآثار الضرب بنظرات ضيق..
🍃🍃🍃🍃🍃
"شن رايك فيها؟"
اميمه بضحكه؛انت مرتاح معاها؟
عبد المطلب:كويسه..
ضيقت اميمه عيونها وقالت..
/باهي قولي الذهب اللي لابساته انت واخده..
عبد المطلب:ناخدلها الفري..في بابه اني الذهب..
قعدت تضحك..
عبد المطلب:عمتك مطيره شن تقول عليها..
اميمه؛حسيتها عجبتها..
عبد المطلب:وجدك..
اميمه:جدي مش رايق..
عبد المطلب:مكبرها وهي صغيره مراة تشاكلت هي وراجها وبعدين تصافوا..
اميمه؛تصافوا شني بس..!؟ عارف كيف خلاها تولي ولا!؟
هز راسه وقال؛في النهايه ولت لراجلها وحوشها..
اميمه تنهدت وهي تشوف لبوها عارفه شكل تفكيره وعقليته مش حيكون رايه في اللي صار مع طوبى غير هكي...
🍃وفي حوش جارهم الصيد..
كان عبد الفتاح واقف في الجنان يراجي في ابتسام والصغار يطلعوا..
طلعت ابتسام بصغارها للسيارة طول..
وهو شاف واحد من ولاده طالع ناداه...
جاه وقال:نعم بوي..
عبد الفتاح؛نادي امك..
مشي الولد طول خش داخل وقعد بوه يستنى لين طلعت سميره وجاته..
وقفت عليه وقالت.
/نعم..
عبد الفتاح؛غدوة مسافر.
سميره؛عارفه..
عبد الفتاح؛هنت عليك لدرجة نسافر وماتبيش تودعيني..
سميره ودموعها في عيونها..
/وداع شني تحرك من مكانك..
ابتسم وقال..
/ياودي تسلمي عليا..
سميره؛تمشي وتروح سالم..
هو بإبتسامه:ماتبي شي؟
سميره:سلامتك..
هو هز راسه بعدين قال؛ردي بالك ع روحك وع الصغار..بالسلامه..ومشي بيركب السياره وهي تشوفله بنظرات بخوف بعدين لفت ومشت بتخش وهي حاسه بشي تجمع في صدرها وكتم عليه..سمعت باب الحوش لما انفتح التفتت شافت السياره طالعه..والباب تسكر وراها..بكت..بكت بوجع وجع جاي من قلبها اللي يحبه ومش هاين عليه مهما دار فيه..
🍃🍃🍃🍃
وتفوت ساعه وتروح صفاء..
خشت لعزوزتها هدرزت عليها شويه بعدين طلعت من حداها بتمشي لجناحها بش تغير حوايجها..
وتتلقاها عواطف اللي وين شافتها انفجعت..
عواطف:غيري حوايجك وتعالي للكوجينه ضميها وطيبي العشي طبيخة بازليا ورز ابيض وطاجين..
ومشت وخلتها وهي قاعده مفجوعه..بعدين تحركت بسرعه لجناحها..
🍃🍃🍃🍃🍃
واقفات ع الكورنيش مقابلات النيل وهما يهدرزوا...
سلافه بضيق؛مابدي ياه يروح ياميار..
ميار:لهالدرجه سوفي!
سلافه دمعوا عيونها وهي تقول.
/انا كمان مستغربه بحالي كتير..بس مابعرف..مو بإيدي...شافت ايسارها وعيونها جو عليه وهو واقف ع معتز بعيد عليهم...بحس براحه لما كون معو بحس بشي مو عارفه كيف بدي اشرحلك ياه..بإختصار بدي ياه يضل مابدي يروح..
ميار ابتسمت بأسف وغيرت عيونها للنيل...
🍃وقعدوا يتمشوا في ع الكورنيش الشباب بروحهم والبنات بروحهم ونظرات سلافه ماخلتش عبد القيوم لين روح..
ومن قبلها تمنت لو يصير شي ومايسافرش تاني يوم..
🍃وطوبى في كل لحظه كانت تتمنى من الله يعجل بخلاصها من الكابوس اللي عايشه فيه..وكان دعاء بتحقيق هالأمنيه بإلحاح شديد اخر ساعه من يوم الجمعه...
🍃خلاها ترقد مع جنه هالليله..وماجاش ناحيتهم..
وهي من الخوف بالغصب رقدت..
🍃🍃🍃🍃
ويطلع نهار يوم جديد..
15ديسمبر...سنة 2018..
اليوم جنة تسكر اربعه شهور تخش الخمسه..
فردوس من لما ناضت الصبح وشافت التاريخ في هاتفها وهي تبكي..بكت في الخفاء بشوق والم ع اختها وبنت اختها اللي كانت عندها اغلى من بناتها...
🍃اما طوبى..
مامنعهاش الآسر اللي عايشه فيه من انها تحتفل بهاليوم..
الجالي وهو راكب الدروج مع المراة اللي جايبها بش تقعد مع جنه..سمع صوت طوبى وهي تغني..
يابنات يابنات يابنات..واللي ماخلفش بنات..
ماشبعش من الحنيه ولاداقش الحلويات..
🍃وصلوا في الدار..
قعد ساكت كان يبي يستمتع بحالتها المرحه مع بنتهم..
والمراة تشوفلهم بإبتسامه..
طوبى وهي حاضنه جنه..
/حلوة الايام في عنيا..علشان خلفت بنيه..
ولاشفت الارض تهدت..ولامالت الحيطه عليا..
وباستها من خدها وهي تقول..
/انتي الحاجة الحلوة الوحيده اللي خديتها من بوك..
تلاشت ابتسامته..والمراة شافتله..
التفتت طوبى بيها..شافتهم تفاجئت..
هو عقد حواجبه وقال؛نراجي فيك لوطا..
ومشي طلع من حداهم..
طوبى قدمت للمراة وقالت..
/يالله ديريها زي بنتك..
؛اطمني يامدام واخده عليها وحتى هي خدت عليا..هاتيها.
شافتلها طوبى بنظرات قلق بعدين مدتهالها...
سمت بالله المراة وخدتها.
طوبى خدت شنطتها وطلعت وهي تسرق في النظر لبنتها..
ولما تباعدت عنها قالت..
/اللهم اني استودعك اياها...
🍃🍃🍃🍃
طلعت برا الحوش للسياره..
وصلت فيها فتحت الباب وركبت شافاته يمسح في عيونه بعنف..حست انه سمعها شن قالت عنه لجنه..
هو بصمت شغل السياره وطلع من الفيلا...
فاتوا جنب سيارتين تابعات لجهة امنيه..
قاللها..هادم مدايره يراقبوا المحيط متاع الفيلا..
شافتله بتعجب..
الجالي؛عارفك في شن فكرتي..ونقولك مرات الحب يغلب هلبه حاجات..
مااهتمتش للي قاله وركزت بنظرها في الطريق..
وقعد الصمت سائد طول الطريق لين وصل بيها للكليه..
طلع من جيب بالطوه تليفونها الجديد وقال..
/خودي..
خداته وجت بتنزل..شد يدها التانيه..رفعها وطبع عليها قبل من داخل..بعدين حط فيها فلوس..
جبدت يدها منه بقوة وفتحت الباب ونزلت وسكراته بقوة..
هو ضحك بعدين تحرك بسيارته من قدام الكليه..
🍃خشت للكليه ومازالت حاسه بقيود اسرها الملفوفات ع رقبتها..
دورت بعيونها ع صاحباتها لين لقتهم كلهم بس بدون عبير اللي وقفت قيدها بش تجهز لعرسها..
حضرت المحاضره الاولى..وبعد ماطلعت منها..جت لوحده من صاحباتها وقالت..
/نبي تليفونك شويه بندير مكالمه غير رصيدي تم
عطتها صاحبتها الهاتف وهي تقول..
/ع حسابك بيبو..
خدت طوبى الهاتف وقالت..
/صحيتي حبيبتي..
وتباعدت عنهم شويه وبدت تكتب في رقم محدد واتصلت بصاحبه..
نادى مرة تنين..تلاته..بعدين انفتح الخط..
"ايوه"
طوبى:السلام عليكم رؤوف معاك طوبى.
"لحظه شويه"..
قعدت تستنى لحظات بعدين سمعاته قال..
"رقمك الجديد هدا!؟"
طوبى:لالا هدا رقم صاحبتي الرقم الجديد اللي دارهولي ربطه برقمه..
"شن داير فيك!؟"
طوبى؛مافي شي يخوف عادي ..داره كبد وخلاص..
"متأكده"
طوبى؛مرات يكشخ لكن مادارلي شي..المهم بنقولك هو داير كاميرات ع السور وداخل في الجنان الدور الداير..وحاسه انه داير كاميرات داخل..مش عارفه كيف ندير..
"شغلي دماغك شويه وحتلقي طريقه تعرفي بيها كان في كاميرات داخل ولالا.."
طوبى هزت راسها وقالت..
/نلقى ان شاء الله نلقى..
"قاعد نقولك اني مش راضي خايف تصير فيك حاجه ياطوبى والله لين نموت مانسامح روحي"
طوبى:قتلك قبل انت مادخلك بشي اني اللي خططت لكل شي وعارفه ربي مش حيضيعني..
"ونعم بالله..رقمي وحافظتيه صار ماصار ياطوبى اتصلي طول ويصير اللي يصير"
طوبى:تعرف انه مخلي ناس من جماعة***** محاوطين الفيلا ويراقبوا..
"توقعت هالشجاعه ماجاتاش من فراغ"
طوبى:مختار وراهم!؟
"لالا مالهمش علاقه بيه.."
رن تليفون طوبى قالت..
"يتصل بيا الشيطان تقول حاسها"
ضحك عبدالرؤوف وقال..
"ربي يحفظك..ردي بالك ع روحك وزي ما وصيتك"
طوبى:حاضر..وسكرت عليه ..وفتحت ع الجالي وردت..
/ايوه..
"هاي ياحلوة معاك ضرتك"
غمضت طوبى عيونها وضحكت بتهكم بعدين فتحتهم وقالت..
/باهي فهمت انك معاه ومش فارق عندي ديروا اللي يعجبكم..
"علاش وليتله كان هكي ياعقربانه"
طوبى:مانزلش من نفسي ونرد عليك..وسكرت عليها ودارت تليفوتها صامت بعدين ولت بتليفونها لصاحباتها..
🍃🍃🍃🍃🍃
" والله مارقدت غمضه سقدت الولاد وجيت هني طول"
صفاء وهي توتي للغدي..
/اكيد وصل بالسلامه توا..
سميره بقلق؛يارب..
فجأه سمعوا صوت باب الحوش انفتح..وسمعوا بعدين صوت دوشه..
شويه وفاتت عواطف من قدام الكوجينه وهي تجري..
سميره بخوف:ياستير يارب..
وصفاء كانت في قمة القلق..
ويسمعوا صوت صرخه وحده من عواطف سكتت بعدها..
هني سميره عقلها معاش حملها طلعت تجري من الكوجينه وصفاء لاحقتها....

#سجن_يوسف
#طوبى

.....يتبع....