Star in the dark ⭐ [Complete ✅]

Ch 34: ហេតុអីគេមិនទទួលយកស្នេហាខ្ញុំ?

 
រាងក្រាស់ដាក់បង្គុយនៅលើសាឡុង ចឹបស្រាយ៉ាងស្ងប់ស្ងាត់ ធ្វើដូចមុននេះគ្មានរឿងអ្វីកើតឡើង ទាំងដែលទើបត្រូវធានាចេញពីប៉ុស្តិ៍ប៉ូលីស។

វាមិនងាយនឹងចេញមកមែន បើខាងនោះមិនដកពាក្យបណ្តឹង តែសម្រាប់នាយ គឺមិនចាំបាច់ត្រូវចាំរហូតដល់ពេលហ្នឹង។

"ឯងប្រុងនៅអង្គុយស្ងាត់ៗដល់ណា? មិនគិតចង់ធ្វើអីខ្លះទេហេស?"
មីនឃ្យូ ស្រែកឡូឡាក្រោយពេលបានស្ដាប់រឿងរ៉ាវគ្រប់យ៉ាងរបស់គេ។ បើជានាយវិញ នាយមិនព្រមឈប់ត្រឹមនេះនោះទេ រឿងអី ហេតុអី្វមកត្រូវមកមួយបង្កាច់គេ ហើយចាប់គេញាត់គុកបែបនេះ?

"ឲ្យយើងធ្វើអី?"
"នែ! កុំប្រាប់ថាឯងចង់បញ្ចប់ដោយបែបនេះ? យាយចាស់នោះ ប្រាកដជាបានចិត្តស្លាប់ហើយ!  មិនដែលជួបទេលោកអើយចិត្តខ្មៅជាងម៉ែទាវទៅទៀត"
លីសា ងើបក្រោសដោយការខឹងក្រោធជាងម្ចាស់ខ្លួន។ មិនដឹងចិត្តគាត់សាងពីអ្វីទេ មកបំបែកស្នេហាគេទៅកើត?

"យើងនៅមានការងារត្រូវធ្វើច្រើនទៀត ពួកឯងរៀបចំអីវ៉ាន់ទៅ"
"ការងារហ្នឹង បើឯងហាមាត់បញ្ជាតែមួយម៉ាត់ពួកយើងអាចពន្យាពេលបានពីរបីថ្ងៃទៀត។ ឯងគួរតែនៅដោះស្រាយរឿងឯងសិនទៅ"
នៅក្នុងចិត្តមិនសូវបារម្ភពីអាមិត្តល្ងង់នេះប៉ុន្មានទេ តែមីនឃ្យូបារម្ភពីអាយដលរបស់ខ្លួនជាង។

"បើឯងបោះបង់ត្រឹមនេះឯងមិនមែនត្រឹមតែកំសាកហើយល្ងង់ទេ នៅគ្មានទំនួរខុសត្រូវទៀតផង"
សម្ដីរបស់ជេយ៉ុនមួយម៉ាត់ៗ គឺដៀលនាយត្រង់ៗ ថែមទាំងធ្វើឲ្យនាយគ្មានពាក្យប្រកែក។ រវាងខ្លួននិងថេយ៍ គឺបានជ្រុលជ្រោះនឹងគ្នាទៅហើយ នាយមិនអាចរត់យករួចខ្លួនតែឯងមិនប្រឈមមុខនឹងការពិតទេ។

"ឯងច្បាស់លាស់បន្តិចទៅ កុំឱ្យឈឺចាប់ទាំងសងខាង ព្រោះមើលទៅគេដូចជាមិនដឹងរឿងម៉ាក់របស់គេទេ"
អ៊ុនវូ និយាយហើយក៏ក្រវីក្បាលដើរចេញ ទុកឲ្យគេអង្គុយពិចារណាដោយខ្លួនឯង។ តាមពិតពួកនាយមិនត្រូវមកលូកដៃទេ បើមិនឃើញថាគេល្ងិតល្ងង់ដល់ថ្នាក់នេះ។
ដឹងថាគេឈឺចាប់ព្រោះស្រមោលអតីតកាល និងប៉ះពាល់ដល់អារម្មណ៍ពេលរំលឹកដល់ប៉ាម៉ាក់គេ តែរឿងពួកគេផ្ទុយស្រលះ គេមិនមែនជាប៉ាគេឯណា? ខ្លាចអីនឹងមើលថែកូនគេមិនបាន?