سلطان : بس أنا ماني مقصر عليك بشي عشان تشتغلين ، اقعدي بالبيت واقرأي لك كتب وتابعي مسلسلات وعيشي حياتك وخلي الوظايف للي محتاج
زمّت شفاهها وهي تاخذ فنجاله من يده : ماتقصر أنت بس ..
سلطان : لا بس ولا شي هالموضوع خالصين منه من زمان ! متفقين احنا
هزت رأسها : طيب اللي تشوفه حبيبي لا تعصب
سلطان تنهّد وابتسم : جاهز العشا
ابتسمت وهي تهز رأسها : لا قلت نطلع نتعشى برا مليت من البيت والله
سلطان : الليلة تعبان سوي العشا ولا اطلبيه ما ودي أطلع
سكتت وهي تقوم عنه وتدخل المطبخ تدور شي تجهزه له .
.
دخلت ضي الصالة بوجود أهلها كلهم
من جدّها إلى أصغر حفيدة رؤى
أبتسمت بإتمنان لهذا الجو
عائلة كـبيرة وملتمه ببعضها بشدّة ، لا نفاق ولا مشاكل ولا سوء فهم يحصل بينهم
من طلعت على هالدنيـا كبرت بهالبيت وبين هالأشخاص
عائلتها ومكسبها الوحيد بهالدنيا
وكان أعز من بينهم كلّهم خالها الأكبـر محمد
رفع رأسه على وقوفها عند الباب وابتسم وهو يمد يده : تعالي عندي يا ضي القلب
ابتسمت وهي تجلس بجنبه وتشوفه يمسك الدلة بنفسه ويصب لها ويمد لها الفنجال : قهوتك اليوم من يديني
باست كفّه : أدفع الباقي من عمري ولا يخلى من هاليدين
ضحكت من شافت رؤى تركض بإتجاهها وترتمي بحضنها من ملاعبة فهد لها
ضي حضنتها : صرتي بأمان خالو فهد مايقدر ياكلك
سكت فهد وأبتسم وهو يشوف إنسجامها مع رؤى ولعبها معاها لدرجة ابتعدت عن سوالفهم وجلستهم
تنهدّ بملئ صدرة وهو يتأمـل ضحكتها الغنّاءة وتعابير وجهها الهادية
فز على ضربة أمه له على ظهره وهي تهمس : قوم انقلع من المجلس لا أكسر راسك وعينك هذي
ابتسم بحرج وهو يناظر أمه وبنفس الهمس : يا يممممه ، خليني أشبع عيني ، هي مو مزعجها الموضوع جالسة عادي ليه تقوميني أنتي
ضحك من شاف نظراتها تحتد أكثر ووقف وطلع وهو يغني : ترى راعي الهوى ! مفضوووووح والله مفضوح ، آه يا ضيّ القلب ليت عينك تبصرني
رفع حواجبه بدهشه لوقفة عادل أمامه : أركب معاي بكلمك
فهد ضحك لإنه عرف إنه سمعه : ياليل
طلع معاه وركب السيارة وشغلها : إيه ياراعي الهوى ، من طيحك على خشمك
تبسّم فهد : ماهو واضح !
عادل : واضح ولا مو واضح أنا ابغى اسمع الإجابة منك
فهد تربع على المرتبة وهو يلتف بكامل جسدة على عادل : احسني مفضوح والعالم أجمع يدري قلبي مين يهـوى
بس هي وحدها ما انتبهت لي !
عادل ابتسم ابتسامة جانبيّة : مين هي ؟
فهد : ضي ، ضي هالقلب
عادل : ماهو من جدك
فهد ضحك وهو يتنهد : والله اني صادق والله ، أحبها يا عادل فوق ما تتصور ، مافيه فيه انسان يحب محبوبه مثل ما أنا أحبها
عادل : وهي ؟ تبادلك
تنهد فهد : متأكد إن بقلبها مشاعر لي بس تكابر وتنكرها لإنها ما تدري اني أحبها
عادل : فهد أتكلم صادق أنا ، شلون متأكد وهي ما وضحت لك ولا لمحت كيف أنت واثق
فهد : بتشوف صحة كلامي ، لامني صارحتها
عادل : أخاف تنكسر لك قلب وآمال
فهد : ضي حنيّنننه يا عادل ماتكسر قلب ، تنوّر وتضمد جروح القلب وبس
عادل : الحين البنت عايشه معاك بنفس البيت ٢٤ سنة وفجأة حبيتها ؟ وش تحول هالمشاعر هذي
ضحك فهد : ومين قال لك إن حبي لها من يومين ؟ من نعومة أظافري وقبل تخشن يديني وهي هـوى هالقلب .. كنت أنكر بس لكن على ما قالوا راعي الهـوى مفضوح مين يقدر يكبت شعوره كل هالسنين مثل ما أنا سويت
تنهد عادل وهو يتوقف قدام الاستراحة اللي كانوا فيها أصحابهم : لي كلام معاك طوييييل يا فهد لكن مب الليلة ، كافي الليلة
فهد : نعرف كلامك لكن وفّره للمحتاج أعرف أنا وش أسوي وكيف ابدأ أرسم طريقنا أرجوك لا تتدخل
سكت عادل ونزل ونزل وراه فهد ودخلوا للعيال .
'
دخلت سماح وأم عادل ووراهم سارة للمطبخ وكانت تدور بينهم سوالف
سارة ناظرت لسماح : عمه بكلمك بموضوع متى مافضيتي
ناظرت لها سماح : عساه خير بنتي
ابتسمت سارة وهزت رأسها : خير ان شاء الله
شكت بالموضوع سماح وناظرت لأم عادل وسكرت باب المطبخ : ايه وشو
سارة : بصراحة ما أعرف كيف ابدا هالكلام بس حنا اهل ومابيننا رسميات وعشان كذا جيت اكلمك قبل أهلي
ابتسمت سماح وكملت سارة كلامها : أخوي خالد ، ناوي القرب .. قال لي اسألك أنتي وضي وينشاف رأيها قبل يتكلمون الرجال بينهم
ابتسمت سماح : والله ونعم بخالد وبأهلك كلهم يا بنتي ، أنا مالي رأي ولا كلمة بعد كلمة ضي .. بكلمها إن شاء الله ونشوف
الله يكتب اللي به خير
سكتوا من دخلت ضي وهي مبتسمه : بناااات شرايكم نكشت ؟
التفت سارة : الحين ؟
رفعت كتفها ضي : إيوه ، يعني طلعة سريعة بمر أماني و وجد واللي يبي ، تجون معانا ماما و خاله ؟
هزوا راسهم بالرفض وسارة : ليالي شتويه ماتتفوت والله بطلع
ضي : ماتطلعين بدون رؤى ، ماتجي رؤى ماباخذك
سارة : بر وبرد واخذ هالبزر ؟ ليش لا بتركها عند خالتي
ضي : أنا أبغاها تكفيييين
سارة : أوكي روحي لبسيها وانتي اهتمي لها وانتبهي لها هناك من النار والتراب
ضي : بنيتي هي أصلًا أحطها بعيوني بعد
سارة ضحكت وهي تطلع معاها من المطبخ
وطلعت هي وشروق لـ ضي اللي تنتظرهم بسيارتها
ومرّت بعدها لبيت وجـد وأخذتها وإتجهت لبر بأرض
" نــجـد العذيّة "
بكوفي " ضـيّ الليالي "
كوفي وجـد اللي من حبها لصديقتها الوحيدة بهالدنيا سمّته بإسمها
طلعت منه وجد بعد ما أخذت الكيكة المفضلة لضي وقهوة
ركبت السيارة وسلمت على البنات وهي تقول : من حظكم الليلة الكيك بقى منه كثير !
شروق : اه كيكتك هذي ! مو طبيعي احس مستعدة أدفع كامل ثروتي عشان اكلها
أحلى شي دخلتيه بمشروع والله
ضحكت سارة : هالكيكة اللي لي كم ابغى اذوقها ولا ذقتها ومن كثر ما يمدحونها ضي وشروق احس تحمست لها زين جبتي منها
وصلوا للمكان وجهزوا الجلسة وأندمجوا بسوالفهم وبينهم أروى وتلعب بالرمل
ناظرتهم ضي وعدلت جلستها وهي تقاطع سوالفهم بحماس : بناتتتتت رد رددد
التفتوا لها بخرشة من صوتها اللي أعتلى فجأة وضحكت على نظراتهم : ما قلت لكم ، أنا من قبل أتخرج وأنا أدور مكان أشتغل فيه بعد التخرج ، وأمس العصر لقيت واحد هنا بالرياض معلن عن احتياج موظف وكلمته بعد نقاش طويل أمس رد علي الحين قال المقابله بكرة يسسس
ضحكت شروق : ماشاء الله ، ما صار لك أسبوعين من تخرجتي
ضي : حظ حظ يارب تعدي المقابله على خير بس
وجد : متأكدة بتمر مثل ماتبين باذن الله وينكتب لك اللي فيه خير
ضي : اه يابنات حمدلله أحس احلامي قاعدة تتحقق قدامي ، تخرجت من تخصص أحلامي وأهلي معاي وبيدي مفتاح سيارة أحلامي ووظيفتي باذن الله انها بالطريق ، أحس ما ابي شي أكثر من الدنيا و
ضحكت من قاطعتها رؤى اللي رمت عليها التراب تبيها تلعب معاها
التفتت لسارة وهي تضحك : لو نشبت لك مرة ثانية عشان تطلع معانا اكسري راسي ، اه ياربييي منها
ضحكت سارة وهي تقوم وتأخذها : بنومها عنك خلاص بهالمناسبة السعيدة
شالتها بين يدينها وهي تبتعد عن إزعاجهم
إعتدلت بجلستها ضيّ ورفعت راسها وهي تبتسم بتأمل لضي القمر اللي يتوسط سماء نجد : آه يا ليالي نجد
التفتت لها وجد بعد ما شافت سارة وشروق قاموا من الجلسة يتمشون حول المكان : مدركه أنتي كيف الدنيا غيرتنا ؟
التفتت لها ضي وكملت كلامها : كيف كانت أحلامنا لما كنا صغار ! وكيف أحلامنا صارت وسعينا وراها لين حققناها ! أنا وأنتي يا ضي أنا وأنتي
ضحكت ضي : كان حلمي الأكبر أشوف بابا يلوّح لي من السماء بعد كل مرة اسوي شي كويس بحياتي ! كنت أنتظر وأنتظر ولا أشوفه ، الحين حلمي وظيفة ومشروع ناجح وراحة بال
وجد : ما انسى كل ليلة كنت ابقى فيها بعز الشتاء بالحوش انتظر امي وابوي يطلعون لي بالسما او اتعلق بنجمة أحسبها هم لين أدركت انها خرافة علمونا اياها افلام الكرتون
