طلّع المفتاح من جيبه يفتح باب الشقة ودخل يفتح الأنوار ويناظر المكان
دخل غرفته يفتح أنوارها ورمى الشنطة اللي تحمل أغراضة للنادي الرياضي على الأرض وجلس على السرير يناظر الساعة
١٠ صباح، ويناظر التاريخ يعدّ الأيام، مرت شهور من سفره وغايب عن الكل
مقفل رقمه ومغير حساباتهم ما يدري إن فقدوه أو لا وسألوا عنه أو للآن محد لاحظ غيابه
رغم إنه وحده طول هالشهور ما تصاحب مع أحد ببلد غريب عنه لكنه ما إستغرب ولا حس بإختلاف، إعتاد على الوحدة والغياب ولا أحد يسأل عنه ويتفقّده ما إختلف عليه حاله سوى إنه صار ببلاد ما هي بلاده
بلل شِفاهه يفتح درج يشوف شريحة رقمه القديمة وأخذها يسرقه فضوله يشوف لكنه تركها يقوم من مكانه يمتنع عن رغبته
دخل المطبخ يسوي فطوره الصحي واللي تغير نظامه من سافر ، دخل دورات عن مختلف المواضيع وتواصل مع إخصائي نفسي، وصنع له روتين يشغل نفسه فيه ، دخل وظائف متعدده بسيطة تأخذ وقته
تغيرت حياته ونفسيته ونظرته للحياة ولنفسه
عرف إن إختياره لشخص أخر يعدله ويغيره ويصنع منه شخص أفضل هي فكرة مغلوطه ، وإنتظاره لأهله متى يستوعبون أغلاطهم إتجاهه ما كان إلا ضياع لعمره ووقته أهله هم ذاتهم ما راح يتغيرون بيوم عشانه، والنتائج كانت خسائر واضحة،
بالبداية أكله الندم لإنه خسر ولإنه ضيع فرصة ثمينة مع حب حياته اللي إلتقاها بوقت خاطئ وحاول يكسبها من جديد بحاله ذاته اللي خسرها بسبّته
لكنّه فهم وأخيرًا إنه ضروري ومهم يهرب من المنطقة اللي كوّنت سوءه وإنه بنفسه بدون مساعدة أحد يطلع نفسه من الظلمات اللي إنخلق وسطها يخرج بأفضل وأقوى نسخه منه عشان لمّا يرجع لهم ، يقدر يعيش مرتاح
'
صحت من نومها تناظر إتصالاته الفائته وابتسمت لإنها يوميًا ما تصحى من نومها إلا وما تلاقي رسالة منه أو إتصال، عاودت عليه وهي غافية عينها ما صحصحت : هلا سراج
سكت يتمعّن بصوتها المهموس وبحتها وابتسم من إختلافه: الحين أصبحنا
ضحكت تسحب لحافها تتغطّى فيه وتسكت تسمعه : وش هالنوم طولتي
ضي : تعبانه سراج امس كله بالسوق ندور فستان لجوجو تعرف ما بقى إلا اسبوع لملكتها
سراج : إيه عارف بس متفقين نطلع سوا اليوم نشوف تفصيل المطبخ ونتعشى سوا
عضت شفاتها تتذكر وابعدت الجوال تناظر الساعة : باقي معانا وقت
هز راسه بالإيجاب : أسرع شي جايك الآن
قفلت منه تقوم من سريرها على دخول سماح وابتسمت : مشرق الوجه الله !
ضحكت ضي تعدل طرف بجامتها وتدخل دورة المياة تاخذ شاور سريع
وتجهزت على إتصاله وضحكت لإنه يتصل بالوقت اللي تنتهي من التجهيز : طيب نازله لك بس من الباب تبع الشقة
ابتسم يحرك سيارته يتذكر أحداث مضت ووقف : وقفت عنده يالله
نزل من السيّارة وأول ما فتحت الباب بتطلع له دفعه يدخل لها وشهقت تناظره : بسم الله خوّفتني أحسب تستناني بالسيارة
ضحك ياخذها بحضنه وابتسمت ترفع يدينها تبادله الحضن : ما صدقت على الله أقدر أخذك من مكان ماهو عيب أخذ فيه هالأستقبال
ضحكت تبعد عنه : بخاطرك يعني
سراج هز راسه يناظر ظلمة الدرج والمكان : والله بخاطري أشياء وأشياء المكان يناسب محد حولنا
دفعته عنها تطلع : وقح سراج تدري صح ؟
ضحك يطلع وراها ويركب السيارة : والله لأخليك جريئة صبرك علي بس
مسك كفها يناظر مناكيرها العودي : أروع لون مناكير شفته بحياتي
ضحكت لإنه ينتبه وحرك السيارة يمشي : ما يمدينا اليوم نشوف غرفة النوم صح ؟
هزت راسها بـ لا : نو احس تعبانه حتى يا دوب نشوف المطبخ ونتعشى برجع أنام
سراج : كثران نومك
هزت راسها تبتسم : إيه لإن مبسوطه ونفسيتي حلوة رجعت زي زمان
ابتسم يناظر الطريق ووقف عند محل ينزل معاها وكفها بكفه يدخل وتقدمت تناظر التصاميم المعروضه بالمحل وتكتف يمشي وراها يشوفها تتخير وتناظر وبتركيز ولفت عليه تسأله : شرايك حبيبي هاللون ؟ ما ابغى زيه بس اللون خيال نسوي زيه ؟
سكت يناظرها ساهي يفكّر بكم تمنى هاللحظات كثير، يسمع هذي الكلمة ويشوفها أمامه يأثث بيته معاها ويشوفها تختار وتشاوره
عقدت حواجبها تتقدم له : سراج اسألك شفيك
ناظرها ياخذها تحت جناحه وابتسمت بحرج لإن المحل ما كان فاضي ولفت عليه تهمس : شرايك بلونه أقول
سراج : عاجبك أنتي ؟ ناخذه أبشري
هزت براسها بـ إيه : ايه بس لونه بس بعطيه تصميم من عندي مسويته
سراج : على هواك
التفت لصاحب المحل يكلمه ووقفت جنبه تسمع كلامهم وتعطيه رغباتها
هز راسه سراج : كذا خلاص متى يجهز ؟
ناظره صاحب المحل : إسبوعين ثلاثة
لف يناظرها يشوفه يناسبها أو لا ، وهزت راسها بالإيجاب
ومد كفه سراج : يعطيك العافية أجل يا باشا نمرك وقتها
طلع من المحل وركب يناظرها : لو قعدت نص ساعة زيادة بدون ما أكل باكلك انتي
ضحكت وهزت راسها : حتى أنا من صحيت ما اكلت على طول طلعت لك
سراج : ازهلي يجيك أحلى عشاء الحين
ابتسمت تناظر الطريق وحرّك لمطعم
'
رفعت راسها تناظره ياكل لقمته وعينها عليه وابتسمت تنزل نظرها لصحنها : سراج من جلسنا وعينك ما شلتها عني أبد وترتني
ضحك بخفة من خجلها وابعد نظره عنها وتنهّد يسكت يفكر
عقدت حواجبها تشوفه ومدت كفها لكفه تمسكه : وش فيك بأيش تفكر ؟
سراج : سلطان
ضي : وش فيه ؟
سراج : من صارت المشكلة ببيت جدي إختفى ما عاد له حس سافر ما ادري لوين، جواله مغلق وما يستلم الرسايل بالواتس وكل حساباته مقفلها
تنهد يهز راسه : بالي مشغول فيه ما ادري كيف نوصل له ، وعمي ما همه حتى كلمته مرة وقال ماني مسؤول عنه
ناظرها : بقى على زواجنا شهر بس وودي بخاطري يحضر والله يعز علي مثل سامي ما ودي أفرح بدونه
ميلت شفاتها تفكر وناظرت له : كيف عايش لحاله كل هالشهور وقت طويل
تنهدت تكمل كلامها : ودك نأجل ؟ يمكن توصل له وتكلمه
هز راسه بـ لا : لا والله ما بأجل شي أنا ما حسبت على الله تتيسر لنا، مافيه مكان اوصل له اصلًا
ضي : يمكن يدور أمه
سراج : ايه بعد هالموضوع، عرفت عنها
ضي : صدق ؟ وينها
سراج : متوفيه من ٥ سنين، ووقفت أبحث ما أعرف قبلها وين كانت
ضي عقدت حواجبها : الله يرحمها ، تتوقع يعرف ؟
سراج : ضني لا
تنهدت ترجع تتكّي وتفكر وكملت أكلها
'
وقف على البيت ينزل وابتسمت تناظره يفتح لها باب السيارة وضحكت تمسك كفه ودخل معاها : ما ودك تسهريني عندك ؟
هزت راسها : عشان ماما تدفنك وتدفني معاك
ابتسم يحاوط خصرها يسحبها له : ماهي مشكلة
ضحكت تتوتر من قربه وهمست : سراج
تنهّد يناظرها : أستهوي إسمي
رفه كفه يمسك شعرها وعينه تتنقل بين تعابير وجهها : كسبت أشياء كثيرة بحياتي
رفعت نظرها تسمعه يكمل حديثة : كثيرة كثيرة والله، لو أعددها لك تنذهلين
ابتسمت : عددها
هز راسه بـ لا : ما عدت أشوفها مكاسب بحياتي بعد ما كسبتك، صرت أشوفك المكسب الوحيد والأكيد والأكبر وكل ما قبلك سخافات، وأسعى كل السعي عشانك عشان أعيش كل العمر معاك معاك وبس ما أملّه، يقولون عنك ضي الليالي بس أنا ما أشوفك كذا وبس، أنتي ضي الليالي وضي سراج جيتي وأضويتي هنا
وضع يده على صدره وابتسمت تمسك كفه تسمعه : شعلتي شعاع يشوفه الأعمى حبّك أصبح بصيرتي ومن دونك ما لإسمي معنى
عضت شفتها تحط يدينها على صدره : أموت عليك سراج والله، وأموت بدونك
عقد حواجبه : ما تصيرين بدوني بس لا تنطقينها
فزت من سمعت أمها من فوق : ضي ؟ هذا أنتي ؟
ابتعدت عنه ترفع صوته : إيه ماما أنا
سماح : اطلعي يالله برد عندك وش تسوين ؟
لف تناظره تبتسم وتتوسع حدقة عينها من انحنى يقبل عنقها : جايه
دفعته تناظره : يلا اطلع خلاص
ضحك يشوفها تطلع بسرعة من الدرج وطلع يسكر الباب خلفه وتنهّد يركب السيارة
يوم عقد قران
-سلمان & وجد-
دخلت ضي للشاليه تفتح لها أماني وسلمت عليها : وين العروسة ؟
ابتسمت أماني : داخل وترى معصبه عشانك تأخرتي
ضحكت ضي :وين تأخرت تو الناس الساعة ٢ يمدي أجهزها
دخلت ترفع صوتها : يا عروسه
طلعت من الغرفة وجد : أخيرًا جيتي
تقدمت ضي تحضنها وباستها تضحك : في وقت حياتي الآن أطلعك أحلى عروسة
دخلت معاها نشوف فستانها معلّق والبخور يعجّ بالغرفة وعلى التسريحة ناثره الميك آب ومطلعة الإجهزة تشغلها عشان تسوي لها ضي شعرها
جلست وجد تلتفت لها : يالله ضي ترى مافي نهار بالشتاء
نزعت عبايتها تهز راسها : حاسبه حساب الوقت ولا يهمك انبسطي
التفتت تبتسم من شغلت أغنية وجت ضي تبدأ تسرّح شعرها : تاركه أبوي وأخواني وحدهم وجايه لك اتحداك بس تلاقين زيي
ضحكت وجد ترمي لها بوسه : اموت عليك والله
ضي : أمهم جت أمس للبيت، أبوي حبيبي ما أعرف كيف سوا
وجد : جايه بيت طليقها ؟ تستهبل ما تعرف تاخذ فندق ؟
ضي : جتها الفرصة تفوتها ؟ أنا قبل تجي على طول اخذت اللي احتاجه ورجعت بيت جدي، أخواني وأبوي بشوفهم إذا جو هنا
وجد : أنا نسيت انها أمه لما وافقت، كنسلت ضي معد أبغاه
ضحكت ضي تترك شعرها وتبعده عن وجهها عشان تبدأ بالميك آب : ما بيعيشك عندها هو بيكون هنا وهي عند اهلها بالدمام، معليك
وجد ناظرت المرايا تنهدت : ضي خايفة
ضي : اسكتي جوجو اسكتي خليني اسوي حاجبك صح
غمضت عيونها وجد تغمض عيونها بتوتر : الساعة ٤ بيجي الشيخ
ناظرت الوقت ضي : إيه ماباقي شي واخلصك وتلبسين نلحق، ويشوفك سلمان قبل يجون الضيوف
انتهت منها ولفتها على المرايا : ها جوجو شرايك ؟
ابتسمت وجد تقرب من المرايا : خيالي !
لفت عليه تمسك وجهها بكفوفها : احلى هيرستايلست و ميكب ارتست واختي وحب حياتي
ضحكت ضي تمسك يدينها تبعدها : عجبك؟
هزت راسها بـ إيه وتنهدت تلتفت على دخول أماني بيدها فستانها : خلصتوا بنات
لفت عليها وجد : وينك أنتي من الظهر مختفيه ؟
أماني : أخت العروسة أنا ناسيه ؟ شفت الكوشه جابوها والاستقبال جهزت كل شي وجيت الحين أتجهز
ضحكت ضي تناظرها : يا روحي راح وقتك تركضين لحالك، اجلسي ارتاحي شوي واسوي لك الميكب آب أنا شرايك ؟
رفعت حواجبها وجد : ضي صايره رايقه وحبوبه وتساعدينا ؟ عسى ماشر
ضحكت تجلس بتعب : مو لعيونكم عشان خاطر سلمان
والتفتت لأماني تنحني لبطنها تمسكه : وخاطر الكروشه الصغيرة هذي اللي ما تنشاف
ضحكت أماني تمسك بطنها : صغيرة ما تنشاف ومع ذلك قلب موازين حياتي طلع عيوني من التعب
وجد لفت ترمي بوسه لها : حبيب خالته يسوي اللي يبي
وصلوا ماجد وسلمان اللي يسوق فيهم صقر للشالية،
نزل سلمان وناظرهم : الشيخ متى يوصل ؟
ناظر الساعة صقر : ربع ساعة بس ادخل يا ادمي اقلقتنا من الظهر تسأل
ابتسم سلمان يعدل شكله وانفتح الباب يستقبلهم أبو أحلام ويرحّب فيهم
دخلوا لقسم الرجال.
'
ضي لفت على وجد تساعدها بفستانها: ياختي على العروسة القمر
لفت وجد تناظرها تمسك يدينها : مابقى وقت خايفة
ضحكت تهز راسها ضي تضحك : الله يعين سلمان انسانه قلقه جوجو إهدي
ولفت من اتصل جوالها ترد عليه : هلا يا عريس، وصلتوا ؟
هزت راسها تطلع من الغرفة تناظر أحلام تتكلم مع أماني والعاملات : تعالوا لي طيب بشوفكم ، ايه مع هذا الباب
قفلت جوالها تبتسم وتناظر شكلها وتنهدت تطلع لهم وابتسمت تشوفهم يدخلون خلف بعضهم سلمان وصقر وأبوها
سلمت عليهم ورفعت حواجبها تبتسم لسلمان : كيف التوتر من أمس ؟ هربت ما شفت كيف وضعك
ضحك سلمان : والله لعب فيني، بس متأكد بس بشوفها بنسى كل هالتوتر ، تكفين ضي بسرعة بشوفها اول ما نعقد لا تماطلون علي ، قبل يجون الضيوف
هزت راسها ضي : من عيوني
تقدم ماجد وابتسم يمسك وجهها بكفوفه وهمس يحصنها وابتسمت تسمعه وتناظر لعيونه وباس راسها وتقدمت تحضنه تهمس : عيوني أنت
اتصل جوال ماجد يناظره ورفع عيونه لصقر وسلمان : جاء الشيخ امشوا يالله
تركتهم ضي تدخل وناظرت وجد عندها احلام تعدل مناكيرها : وصل الشيخ
عضت شفتها وجد بتوتر وناظرتها ضي : بتزعل شروق ما لحقت على هاللحظة
والتفتت من افتح الباب تدخل : أسابق كل الأوقات أنا مين قال ما بلحق ؟
ضحكت وجد تقوم وتحضنها : عروسة قلبي والله
ناظرتهم ضي : يالله نطلع سريع نجلس قبل يدخل عمك
جلست وجد تناظر البنات ضي وأماني وشروق حولها وأحلام وأمها ، تسمع أصواتهم بالجهه الثاني وتنهّدت من سمعت طق الباب وابتعدوا عنه البنات وطلعت أحلام تاخذ الآيباد من أبوها تدخل فيه ومدته ل وجد ورفعت جوالها ضي تصوّرها
'
اتصل جوال ضي وردّت تهز راسها : اوكي بعطيها خبر ثواني
ولفت على البنات : سلمان يبي يدخل
شدت على البوكيه اللي بيدها ووقفت : شوي بليز
هزت راسها ضي وطلعت تشوف البنات وناظرت للإستقبال تشوف أم أحلام تستقبل وحدة ووقفت تناظرها تمشي مع أم أحلام بإتجاههم واخذت نفس تشوفها نظراتها وصدت عنها ما تسلم وطقت الباب ودخلت
رفعت نظرها وجد وعقدت حواجبها تناظر لها ما عرفتها ولفت تناظر ضي اللي دخلت خلفها
أم أحلام : أم صقر
سكتت وجد لثواني ووقفت تبتسم تهز براسها، وترتها نظراتها وعدم مجاملتها وسلمت تهمس : مبروك
ولفت على ضي : اخوك قال يبي يدخل، فضوا المكان خلوه يشوف عروسته
رفعت حواجبها أماني تناظرها ولفت على وجد تعدل شعرها وهمست : لا تتوترين مرة
همست وجد : والله ما توترت من سلمان كثر ما توترت من أمه وش هذا
ابتسمت أماني تاخذ المسكه ومدتها لها : يالله
طلعت وطلعوا وراها الكل
وبقت وجد وشدت على المسكة اللي بيدها تمنت لو معاها أحد ، رغم تواجد عمها لكن وجودة بقربها ما يطمنها ولا ينزع من صدرها خوفها، طق الباب ودخل أبو أحلام خلفه سلمان وتقدم أبو أحلام يسلم على وجد وباس راسها يلتفت على سلمان : اترككم خذوا راحتكم
هز راسه سلمان وناظره يطلع يسكر الباب خلفه،
تقدم لها وطق الباب تدخل أمه وعقد حواجبه يناظرها وابتسمت : جيت اشوفكم حبيبي
لفت تناظرها وجد وتقدمت تسلم على سلمان : يا حبيبي وليدي مبروك الله يتمم عليك على خير
هز راسه : الله يبارك فيك امي
جلست ولف يناظر وجد وتنهد يجلس بجانبها يناظر امه الساكتة وتناظرهم
طق الباب دخلت خلفها ضي من شافت دخول أم صقر عليهم : المصورة جايه بالطريق، نجيب الشبكة سلمان تلبسها ؟ عشان يمديكم تقعدون شوي سوا قبل تجي المصورة بعدها ما عندكم وقت
ابتسمت وجد لإنها تدري عشان تقدر تطلّع عنهم أم صقر وهز راسه سلمان يناظر أمه : يالله أجل
دخلت ضي تجيبها وابتسمت تمدها : لبسها
توترت وجد من قربه ونظرات أم صقر اللي عليها من دخلت ما وخرتها وصورتهم ضي من بعيد ، وتقدمت تحضنهم : مبروك حبايب قلبي الله يتمم عليكم على خير
ولفت على أم صقر : يالله ؟
وقفت أم صقر تطلع وطلعت وراها ضي تلتفت تغمز لهم وسكرت الباب
بلع ريقه سلمان ولف عليها : ما كان عندي خبر عن المصورة
هزت راسها وجد بصوت خافت : ما جبت بس قالت كذا ضي عشان يتركونا وحدنا
ضحك يهز راسه : كويس عرفت تطلعها عنا، امي الله يصلحها
سكتت وجد وعقد سلمان حاجبينه : ما زعلتي صح ؟
هزت راسها بـ لا وهز راسه سلمان يناظرها ساكت من شدّة توتره وربكته ما قدر ينطق بأي شي كان مخطط إنه يقوله لها
ناظرته لثواني تقطع الصمت بينهم وهي تلعب بدبلتها : أصريت تشوفني بدري عشان تسكت ؟
رفع نظره لها وابتسم يهز رأسه بـ لا : أذهلتيني كل كلام كنت بقوله ضاع مني ونسيته
ابتسمت تناظره ومد كفه يمسك كفوفها تنهد يشد عليهم : ما وصلتك بسرعة
زادت ابتسامتها وصدت بنظرها عنه وهز راسه : وأصريت لين كسبتك وصرتي حلالي لبستك هالدبله
بلعت ريقها تناظر الدبله اللي لمسها وناظرته : ما أعرفك عن قرب ونصفك أجهله ولا بيني وبينك مواقف قريبة، لكنك تشديني تسرقين تفكيري وودي أعيش معاك سنوات عمري الباقية أكتشفك وأعرفك عن قرب بدون حواجز وقيود
غمضت عيونها بربكة من اقترب يقبل راسها : أوعدك أكون لك زي ما تحلمين وتبين، أشاركك كل ما تحبين وأعوضك عن كل ما نقص بحياتك
'
تجمعوا المعازيم وامتلى المكان بالحضور، إعتلت صوت الأغاني الطّربية وريحة القهوّة اللي تعج بالمكان يخالطها العنبر والعود العربي،
لفت ضي على شروق وتنهدت : اسوء شي إن ماما ما جت، كله من عجوز قريح هذي
شروق : كان بخاطرها والله تدرين جوجو بنتها بس مستحيل يجتمعون بمكان بعد كل هالسنين
صدت ضي تهمس : وترتني نظراتها يا بنت ! اكلتني اكل من دخلت انبسطي ملكة ولدك ليه متسلطه علي
شروق مسكت كف ضي : لا تبعدين عن عيوننا بس احس لو تقعدين لوحدك معاها بتاكلك
ضحكت ضي توقف من اشتغلت أغنيه : تخسي ما بقى إلا هي
وقفت معاها شروق تطلع ترقص معاها وأماني بينهم ترقص بهدوء وعيونها تلمع
ضحكت ضي تمسك كفها : أموت على الإخت الحنونة
جلست ضي بتعب بعد وقت وناظرت رسالة سراج : اقدر اشوفك ؟
عضت شفتها ولفت على شروق : بطلع اشوف جوجو
هزت راسها شروق ومسكت فستانها ضي تمشي تحت أنظار تترقبها
ناظرت شكلها تعدله وفتحت جوالها ترسله : تعال
تركت جوالها ودقايق طق الباب وفتحته تشوفه يسترق الدخول وضحكت تسكر الباب
لف عليها وتنهّد يقترب : اويلي
ضحكت تمسك ذراعينه بعد ما حاوط خصرها وهمست : سراج بينحاس شماغك أبيض
رفع نظره لشعرها يبعده الخصل عن وجهها : ما عندي إلا قلب واحد وسرقتيه، من وين لي قلب ثاني أحب فيه هالإبتسامة ؟
ابتسمت تناظره وأخذ وجهها بيدينه ينحني ينوي تقبليها وهمست : روجي أحمر سراج بعّد
هز راسه بـ لا : هو لإنه أحمر ما اقدر ابعد
بلعت ريقها بتوتر لإنها ما تمنعه لأول مرة، حبست أنفاسها تشعر بقربه وملامسته، فتحت عينها تبعده عنها تاخذ نفس وهزت راسها بخفة : ما بقى وقت على زفة جوجو
ناظرها وضحك بخفة : ما منعتيني
ضحكت تعض شفتها وهمست : قلت لك بتنحاس
مسكت كفه تمشي معاه واخذت مزيل ميك آب تناظره بإرتباك ومدت يدها تمسّحه : مايروح إلا كذا
ولفت تشوف جوالها يدق وهمست : بتبدأ زفة جوجو اكيد
انحنت تناظر شكلها بالمراية وعدلت روجها ولفت عليه تهمس : خلاص سراج شفيك قاعد للحين ؟ اطلع
وقف يسحب اللي بيدها ويتركه وعقدت حواجبها من حضنها وهو ساكت واخذ وقت وابعدته عنها تهمس : وش فيك
هز راسها يمسك كفوفها : أحبك
عقدت حواجبها تناظرها لأن على وجهه الضيق : ليش تقولها كذا وش فيك ؟
رفع اكتافه ورجع يحتضنها ساكت ورفعت يدينها تحتضنه تشوف سكوته
ناظرته يبعد عنها وتنهد يعدل شماغن وطلع وناظرت شكلها تعدله وطلعت لوجد بغرفتها وهي بالها معاه
'
انزفت وجد وجلست على الكوشة وبيدها مسكتها، وعينها على أماني وضي وشروق وروان ولمياء اللي يرقصون حولها وأحلام تأشر لها من بعيد تقوم
ابتسمت تقوم من مسكت يدها ضي توقفها ترقصها معاه وتردد مع الأغنية : بص بترقص حلوة إزاي
ضحكت وجد من سحبتها ضي تمنعها من خجلها : من طلع من عندك سلمان اكلتي لسانك
ابتسمت وجد تعض شفتها ويدها بيد ضي ترقص،
'
انتهى الحفل ومشوا الناس وبقت ضي واهل أبوها وأحلام وأمها
مشت أم سراج لضي تجلس بجانبها وابتسمت ضي تلتفت لها تسمعها : بسم الله عليك يا ضي، قمر الليلة
ضحكت ضي بخجل تميل راسها : حبيبتي خالتي
تنهدت أم سراج تلتفت للحضور اللي قلّ : ودي اطلع من الحين ماودي اقعد مع ام صقر
سكتت ضي تناظرها من بعيد : وش اقول يا خاله وحنا من العصر وجيهنا بوجهها
أم سراج لفت تناظرها : اقول بس انتبهي تراها جنيّه، خليك مع البنات لا تقعدين معاها لحالك
ضحكت ضي توقف من اتصل عليها سلمان : وش بتسوي لي يعني ؟
ابتعدت ترد وطلعت للحوش : هلا سلمان، ايه مابقى إلا خالتي ام سراج وعمة وجد، مين باقي عندكم ؟
هزت راسها تسمعه وضحكت : وش دخلني تعصب علي اذا عمها رفض تاخذها تتعشون سوا، ما عليه بكرة اضبطك وعد، طيب خلاص اقول لهم يطلعون بشوفهم
قفلت منه تناظر روان ولمياء يسولفون : بنات سلمان يقول العيال يدقون عليكم ما تردون، ينتظرونكم بيمشون
نزلت نظرها لمياء لجوالها وهزت راسها : اوف من سامي تمام
تركتهم ودخلت على وجد : يا عروسة
ضحكت وجد تعدلت بجلستها : مين باقي ؟
هزت راسها ضي : خلاص ما بقى احد
وجد وقفت تطلع : عاش الان تدرون وش احتاج ؟ قهوة وسهرة بالحوش بعد ما مشوا الناس وقت الحش
ضحكت ضي تناظر جوالها : بس بنسرق ساعة
لفت عليها وجد تناظرها بحدّة : والله ساعة وراجعة هنا اسهر معاكم
وجد : اخوانك مشو ؟
هزت راسها بـ لا : سراج يقول قاعدين ابوي وعمك سوا واضح راقت لهم السوالف
كشّرت وجد وصدت : وع ما لقى إلا عمي
ضحكت ضي ولبست عبايتها : بيمررني البيت سراج ابدل فستاني وشوي واجي اوكي ؟ لا تفوتني السوالف الحلوة انتظروني
بينزل بارت أخر الليل ❤️
