بين الخطيئة والغفران

Part 13

🥂 بَـيْـنَ اَلـخَـطِّيئَـةِ وَ اَلـغُـفْـرَانِ 🥂

•" كُنْتِي سَبَبَ رُجُوعِي إِلَى خَالِقِي فَصِّرْتِي جَائِزَتِي وَ شَّفِيعَتِي يَوْمَ اَلحِسَابِ "•

•" بِـرِيـشَـةِ :سَمِيـرَةِ غَــدْ "•

الـفـصـل الأول

الـجـزء : 13

كتسلت فنصاصات ليل حاطة يدها على لمقبض لباب حالاه بشوية باش مايديرش صوت دخلت راسها كتشوف شكون كاين.. لقات لاضواء طافيين وكاينة غير ضلمة وسقيل دليل على انهم ناعسين.. حيدت صندالتها وسدت باب وراها.. شعلت لبيل ديال تيليفون كتشوف فين كتعفط .. كتمشا بهدوء على صباع رجليها باش ماديرش لحس ويفيقو يغسلوها.. حطت رجلها لولة على درجة بهدوء تابعاها تانية وهي طالعة لبيتها وكتلفت وراها ليكون شي حد وصلت لبيتها حلاتو داخلة ورجعت سدات لباب تنفست براحة حيت ماحصلها حتى واحد  .. التافتت شاعلة ضو حتى خرجت عينيها بصدمة سرطت ريقها بخوف وشدتها رجفة .. وهي كتشوف باها جالس فوق لكرسي كيشوف فيها بملامح غاضبة وباين بلي كاتم غضبو والعافية ديالا لاعصاب دايرة بيه كيطقطق بصباعو على لكرسي مخلي طقطقاتو كيزرعو فيها رعب حدرت راسها كتلعب بصباعها بتوتر وخوف.. شفايفها گاع كالتهم اما قلبها فراه طاح حدا رجليها .. وقف بهدوء كيتمشا عندها وصوت صباطو وريح هو لي كيتسمع فداك لبيت وقف قدامها خاشي يد وحدة فجيبز كيشوف فيها بغضب مكتوم كيزفر كيف شي تور كارز على سنانو ومزير يدو حتى بانو عروقها صدرو كيطلع وينزل بالاعصاب

عمر :[نطق بخيبة امل كينفي براسو ]خيبتي امالي فيك.. [كيطلع وينزل فيها بملامح مخنزرة] ماكفاكش تبرهيش وليتي تباوسي مع شمايت وترجعي فنصاصات ليل [هزت عينيها فيه بصدمة كفاش عرف ضحك باستهزاء] تصدمتي ياك؟؟! درت كارد يتبعك ويقول ليا شنو كديري... ياريتني ما درتوش مرمدتي وجهي فتراب [كتشوف فيه بغصة فحلقها] حياتي ولات عداب فعداب بسبابك   [رفع حاجبو ونطق] واش واعية على شنو كديري ؟ واش تربيتي كانت خايبة على لهاد درجة لي خلاتك تخرجي لطريق؟ قبل ماتحلي فمك على لحاجة كتحضر ؟ شنو كان ناقصك ؟ كنتعاملو معاك كبالغة ماشي يله درية صغيرة.. واش عمرك قلتي بابا بغيت شي حاجة وقلت لك لا [مانطقت بوالو غير حادرة راسها نطق بنبرة عالية بصوت غاضب ] هضري

نفات براسها بخوف .. دموعها شلال كتنزل على خدودها .. كلامو جمرة على قلبها وحرقتها.. ماكنتش دارية بلي هادشي غادي يوصل حتى لهاد لحد .. بغات تقول شحال من حاجة فقلبها .. ولكن لسانها تربط ليها ..

عمر :[ مكمل حديتو بغضب] واش ماكتهمكش مشاعرنا انا وماماك.. كنت فخور بأني عندي بنت غادة تهز راسي لسما.. [ضحك بسخرية كيزير على شعرو] ولكن مع الاسف هزاتو حتى لسما وخبطاتو مع لارض.. عارفة بلي هادشي لي كديريه كيضرك نتي وحنا؟ ولا انت باغا غا تزهاي مع لبراهش قرايتك هي لخرة طلعتي فيها على دراعي ؟ عمرك درتي شي حاجة كتفيدنا ولا تفيدك.. مايمكنش ليا نتحمل هاد تبرهيش وتسلگيط ديالك من هنا لقدام.. صافي لكاس عمر وفاض [عطاها بضهر] اتمشي عند مرات جدك لعروبية

لجين :[توسعو عينيها بدهشة كتحاول تستوعب شنو قال] كفاش..؟ غير كضحك معايا ياك [وقفت قدامو شادة فيديه بتوسل] لا ابابا لا..الا لعروبية مانقدرش نمشي تم انا هنا كاينة قرايتي وصحابي ونتوما..
عمر :[نتر يدو بغضب ] قراية وصحابك وعائلتك نسايهم.. بحالا عمرهم كانو عندك.. اتمشي ويديك فوق راسك [هز يدو بتحدير] ولله تم ولله يابنتي يا لجين ونسمع درتي شي فضيحة تم حتى نحيد لمك لگصب ديال رجليك
لجين :[تحدرت شادة ليه فرجلو ودموعها كيسقطو حارين على خدودها حارقينها نطقت كتنخصص] لا ابابا .. الا هادي الا مرات جدي.. هي ماكتحملنيش حتى واحد فديك دار ماكيحملني..[شدت يدو باستها] الله يرحم ليك لواليدين ابابا ماتعدبنيش هكا ماتصيفطنيش عندهم.. ماغاداش نعاود ولله[بسرعة اومات براسها بإيجاب] اه اه غادة نشد طريق وماغاداش نعصبك ولله عفاك ابابا
عمر :[كيحيد عينو عليها ماباغيش يعطف عليها ولا يحن نتر رجلو ويدو عاطيها بضهر خارج ببرود] داكشي لي كاين قلتو نساي مك وباك ختاريتي تسلگيط..[غمض عينيه نطق بحسرة] نعيمة اطلع تجمع لك حوايجك كمارتك مابغيتش نشوفها غدا فدار ..

خرج مخليها مصدومة من كلامو جمعت رجليها دفنت وجهها بين راحت يديها كتبكي بحرقة وصوت شهقاتها كيضرو فالقلب لي سمعهم.. كون غير ضربها ولا يقول هضرة بسمها..يتبع

#الله على كبيدتي لجين زهرها عاطيها بقاعو ..🥺💔