بين الخطيئة والغفران

Part 18

🥂 بَـيْـنَ اَلـخَـطِّيئَـةِ وَ اَلـغُـفْـرَانِ 🥂

•" كُنْتِي سَبَبَ رُجُوعِي إِلَى خَالِقِي فَصِّرْتِي جَائِزَتِي وَ شَّفِيعَتِي يَوْمَ اَلحِسَابِ "•

•" بِـرِيـشَـةِ :سَمِيـرَةِ غَــدْ "•

الـفـصـل الأول

الـجـزء : 18

كيتمشاو جنب طريق من بعد ما دوزو لحصات ديالهم نهار كامل خرجو..صوت ضحكات نور مسموعين.. اما مرام فراه حشمانة من شوهة لي دايرة ليها صاحبتها هزت يدها حطتها على فم نور كاتمة ضحكتها

مرام :[ مخنزرة فيها نطقت بصوت خافت] ضحكي غير بشوية اشوهة شوهتينا
نور :[ حيدت يدها من على فمها كضحك فصمت] بلاصتك ما زال ما سخنتيها بديتي فالمشاكل.. اما الى دوزتي شهر اتولي تجيبي معاك لمضا لافاك
مرام :[ وجهها تورد عوتاني نطقت بهدوء ورزانة] غادي يدي عليا نضرة خايبة [ التافتت عند نور] ياك؟ [رجعت تشوف قدامها] اوف ايقول هادي جاية بمشاكلها
نور : [ كطبطب على كتفها ] تاء ماتخافيش اصاحبتنا راه باينة فيه ضريف [ ضورت مرام وجهها بزربة عند نور كتستوعب شنو كتقول ] وتيتييييز ياختي
مرام :[ دفعتها بكتفها ] اسبحان الله المدلولة.. شتك دبتي[رفعت حاجبها] زعما راه مخطوبة
نور :[ بدات ضحك وشافت فيها ] ايه راه واخا تشوفي لعين زايغة ولكن لقلب تابت عند يعقوب
نور : [ كتنفي براسها مصغرة فيها عينيها ] امم احياني علك.. عينيك راه مفاوتين

بقاو كيهضرو ويضحكو حتى كل وحدة مشات فطريق.. داخلة لدرب كان فيه لهرج بحكم 4 هادي فغادي يكون عامر بدراري صغار.. والعيالات جالسين قدام بيبانهم شادين نميمة فالغادي وجاي.. مرام لي دازت من حداه كتبتاسم ليه تمشات مدة حتى وقفت امام دار فيها 3 طاج  قلبت صاكها هزت راسها فشرجم بخيبة امل من ساروت لي ناسياه عارفة بلي ادوز اتقل 10 دقائق فحياتها قلبت عينيها بملل وهي كضق فالباب وحتى واحد ما حل عارفة بلي دبا راه كيضاربو شكون ينوض يحل لباب وهي ناسينها قدام دار .. بقات واقفة 10 دقائق حتى تحل لباب خنزرت فلي حل دفعاتو ودخلت

مرام :[ كتنطق بصوت مرتفع معصبة ] الله يعطيكم جوع.. مابغيتوش تحيدو منكم هاد لقاعدة وتنوضو تحلو لباب

معاد :[جاها رد من وراها ] علاش ما كديش معاك ساروت وتخلينا نازلين
مرام :[طالعة فدروج نطقت مخنزرة كتعيب فيه] علاش ماتنوضش تحل مالك محني
معاد :[تابعها من لور ] سكتي اغلالة وسيري تجلسي

دارت عندو كطلع وتنزل فيه هازة شوكتها لسما دخلت اول بيت كان حدا دروج لي هو صالون كان كبير مفرش فراش مغربي ومتول جالسة ماماها لي مزال كيبان عليها صغر سن واخا والدة تلاتة لعزارة وجوج بنات .. فيدها طبسيل عامر بالجنجلان كتنقي فيه .. فورمتها هي هاديك مقادة هازة شعرها شفنجة لي فلون اسود.. لابسة بيجامة صيفية كمامها نصاصيين بشرتها سمرا ضايرة نضاضر طبية عينيها فتلفازة

مرام :[توجهت عندها باست ليها راسها وجلست حداها كتحيد في فولارها] ماما علاش كتخليوني واقفة قدام لباب وعارفيني كنجي عيانة
صفية :[ بصوت هادئ ورزين كتشوف فيها بابتسامة] توحشتك اكبيدتي [هبطت راسها لطبسيل] راه دروج بزاف شكون هدا لي غادي يقدر يهبط
مرام :[كضور عينيها فالبيت نطقت بتساءل] فين هي سلوم شفارة
صفية [ماكتشوفش فيها] راه غا سمعت صونيط ديال لباب هربت قالت لك مافيها لي يحل

جمعت شفايفها على شكل بوسة .. ماجاوبتهاش ..حيدت حجابها لي كان شعرها متوسط طول فلون بحال ديال ماماها .. حيدت لعباية كانت فورمتها غليوضة ومبطبطة كيف شي بطة.. لابسة بودي مع ديالو مكروز عليها فالابيض هزت حوايجها خرجت من صالون كتفحص بعينيها ليكونو خوتها بخطوات سريعة توجهت لبيتها حلاتو ودخلت....يتبع