بين الخطيئة والغفران

Part 16

🥂 بَـيْـنَ اَلـخَـطِّيئَـةِ وَ اَلـغُـفْـرَانِ 🥂

•" كُنْتِي سَبَبَ رُجُوعِي إِلَى خَالِقِي فَصِّرْتِي جَائِزَتِي وَ شَّفِيعَتِي يَوْمَ اَلحِسَابِ "•

•" بِـرِيـشَـةِ :سَمِيـرَةِ غَــدْ "•

الـفـصـل الأول

الـجـزء : 16

فاقت على صوت طرقات فالباب.. حلت عينيها كتشوف فراسها ناعسة على الارض .. قلبت شفايفها بحزن وعينيها لمعو بدموع فاش تفكرت لبارح وبلي ليوم اتمشي عند مرات جدها تقادات في جلستها كتكسل بدات كتقلب بعينيها على تيليفون لقات صاك مليوح فوق ناموسية ناضت ناحيتو بتعب وجسمها مدگدگ جبدات تيليفون من صاك كتشوف شحال فساعة لقاتها 7 تأفأفت حكت عينيها متاجهة لباب حطت يدها على لمقبض حلاتو ولقات نعيمة لعاملة عندهم

نعيمة امراة كبيرة وغليضة وقصيرة لابسة لباس لعاملات صاية طويلة وديالها فلون ابيض مع طابلية فلون اسود طربوش فنفس لون باين لكبر على ملامحها ولكن كيف كيقولو كيمشي زين ويبقاو حروفو تجاعيد تحت عينيها لي فلون عسلي بشرتها بيضاء وشم صغير تحت فمها او وسط حواجبها كتشوف فيها بإبتسامة حزينة وملامحها باين عليهم لحزن شديد من شي لي سمعات لبارح.. شحال مولفة لجين وعزيزة عليها عارفاها طايشة وعقلها صغير وكدير لي قال ليها راسها مع ذلك كتبغيها.. دخلت نعيمة سادة وراها لباب لجين غير شافت نعيمة دموعها تسرسبو على خدودها وبدات تشهق تلاحت فحضنها مزيرة عليها وكتبكي ونعيمة كطبطب على ضهرها باش تهدن

لجين :[نطقت بانهيار] شفتي امي نعيمة شنو كيديرو ليا [كتسكت شوية بسبب شهقاتها] باغين يصيفطوني عند مرات جدي فالعروبية [هزت راسها فيها وعينيها حمارو بالبكا ] هوما ماكيحملونيش شفتي اخر مرة مشيت عندهم حرقوني فضهري بالعصا [نزلت راسها بحزن]
نعيمة :[نطقت بتعاطف معاها وعينيها عمرو بدموع حتى هي] صبري اكبيدتي صبري.. ماعندك ما ديري هوما كيبقاو واليديك وباغين مصلاحتك وماغادينش يديرو شي حاجة لي ضرك..[حضنت وجه لجين بين يديها كتمسح ليها دموعها بالابهم ديالها] اما عائلة باك.. انا عارفاك ابنيتي عافية ومايقد عليك غا لي خلقك [كضور فراسها ولجين حكمتها ضحكة] على هوما ماشي ضربوك حيت هرستي مرات جدك من رجلها
لجين [حطت يدها على فمها كاتمة ضحكتها ودموع فعينيها] هي لي ماخلاتنيش نمشي معاها لعرس [هزت كتافها كتقلب فعينيها نطقت لغرور] اوى وجلسنا بجوج.. تاوحدة ما مشات
نعيمة [ عينيها تكمشو وهي كضحك بخفوت على كلامها] احياني علك العافية .. [نطقت بجدية كدوز يدها على شعرها بلطف] ديري عقلك الله يرضي عليك عمامك وعماتك باغين غير منين يشدوك كوني مرأة بألف راجل وانت وسطهم.. ماتخليهمش يحگرو عليك ويهنشروك بسنانهم
لجين : [اومات براسها كتبتاسم بإمتنان ] عارفة امي نعيمة [ هزت يدها باستها ليها] لهلا يخطيك عليا..

جلست ملاك فوق لفراش جامعة رجليها عندها كتشوف فنعيمة لي مشات لماريو جابدة باليزة كبيرة حاطاه فوق لفراش توجهت لدريسينغ تختار شي حاجة مستورة ديرها ليها ساعة مالقات والو نفات راسها بلا حول من هاد لبنت هزت شي كساوي طوال ولكن مفتوحين من لوسط حد لفخض خرجت من دريسينغ واقفة قدامها هازاهم فيدها

نعيمة :[عينيها مرة على لكساوي ومرة على لجين نطقت بتساءل] ماعندك حتى حاجة مستورة ابنيتي.. كولشي مقزب كي رجلين دجاجة
لجين :[قلبت عينيها بملل كتشوف فيها] اوف امي نعيمة ماتبدايش حتى انت.. جمعي حوايج كاملين وخليني نمشي بحالي ..