يامُناي ودعاي

Part 20

- 4:46 العصر في بيت ابو مروان تحديدًا بمجلس الحريم -
ام سعد : والله يا ام مروان بنتك تفتح النفس وهيفاء تمدحها دايمًا الله يسعدها ومو بس هيفا حتى الزباين يمدحون تعاملها
ام مروان : يا حياتي يا ام سعد والله
ام سعد : انا جيت هنا عشان مسويين عشاء بكره لخطبة ولدي سعد وكلكم معزومين انتِ وبناتك وعيالك وهذي ( وكانت تأشر على هاجر وهي ما تعرف غير فاطمه وكادي )
رفعت هاجر حاجبها بقهر
اما كادي كانت كاتمه الضحكه وطالعتها هاجر بحقد
ابتسمت ام مروان وقالت : هاجر ، زوجة ولدي مروان
ام سعد : ماشاءالله ، حياكم كلكم ، وكان والله ابو سعد بنفسه راح يجي ويعزم زوجك وعيالك لكنه ما فضى وقال لي اعطيكم خبر
ام مروان : والله لنا الشرف يا ام سعد و ابشري ان شاء الله
طلعت ام سعد وجلسوا ام مروان وهاجر وكادي يسولفون ودخل عبدالمجيد وهو يركض لجدته وضمها بقوه وبعدين راح لكادي ، ضمته كادي بحب وجلست تسولف معه وام مروان وهاجر يطالعونهم وسألته كادي سؤال ينسئل اي طفل وقال : مين تحب ماما هاجر ولا بابا ولا فصولي ؟
قال عبدالمجيد بتفكير : امممم احب بابا وفصولي
ضحكت كادي وقالت : وماما هاجر؟
طالع عبدالمجيد بهاجر وقرب من كادي وقال بهمس كلهم سمعوه : عشان ماما هاجر تضربني وتعصب علي دايمًا
كلهم طالعوا بهاجر وقالت كادي وهي تطالع هاجر ومعقده حواجبها : ليه تضربيه؟
هاجر بتأفف من نظرات كادي و عمتها : اووفف على اساس ما تعرفون ولد اخوكم مؤذي ودايمًا يكسر البيت
وتكتفت وهي تقول : وبعدين ما ضربته ولدكم يحب يكبر المواضيع
كادي : مستحيل الطفل يكذب
هاجر بنبرة صوت عاليه : ووش يعني انا اللي اكذب ؟
قامت كادي بعصبيه وقهر وهي تقرب منها وقالت : ايي تكذبين لان ولا عمرك اعتبرتي عبدالمجيد ولدك ودايمًا تفرقين بينه وبين فيصل
وكملت وعيونها تغورقت دموع : حرام عليك يا ادميه احتويه اعتبريه ولو مره وحده انه ولدك وحسسيه بحنان امه اللي فقدها بعمر صغير ، وش القلب اللي عندك انتِ ؟
وقفت هاجر وقالت : انتِ ههيي ؟؟ وش قالوا لك معذبته انا ؟ احمدوا ربكم انه ماكل وشارب عندي ولا حاسبته عليها
وقفت كادي بصدمه من كلام هاجر
اما ام مروان اللي ما تحملت الكلام اللي سمعته وقامت لهاجر و اعطتها كف بأقوى ماعندها وقالت بقهرر : وخير ان شاءالله عبدالمجيد مو قاعد ياكل من خيرك يا قليلة التربيه ، واذا انتِ مو قد المسؤليه هاتيه انا بربيه زي ما ربيت ابوه
و اثناء هوشتهم طلع عبدالمجيد من المجلس بخوف من الموقف اللي صار قدامه وطلع للصاله وهو يركض و استوقفه ابوه اللي كان جالس مع جده و اعمامه وقال : تعال تعال شفيك تركض
راح عبدالمجيد لأبوه وقال وهو يتنفس بقوه من الركض : جده ضربت ماما هاجر
فز مروان و ابوه لمجلس الحريم يشوفون شسالفه تحت صدمة احمد ومحمد اللي كانوا يلعبون مع فيصل ، اول ما قرب مروان من المجلس شاف كادي وهي تمسح دموعها وامه وهاجر باقي يتهاوشون واول ما هاجر شافت مروان جاي قامت تمثل البكي وقالت : حرام عليكم وربي حرام هذا وانا ماقد اذيتكم ودايمًا وطول عمري ما قصرت لا على عبدالمجيد ولا على فيصل ولا حتى ابوهم
وكملت وهي تشاهق بكي
التفتت لها كادي بصدمه و ام مروان كانت تطالعها  وعيونها شوي وتطلع من مكانها من صدمتها على بكى هاجر المفاجئ
قرب مروان وقال : خير ان شاء الله ايش فيي ؟؟
كادي اعطتهم ظهرها وهي تعرف ان كل حركات هاجر عشان تستعطف مروان
هاجر ببكي : يرضيك يا مروان يرضيك ؟ امك و اختك يتهموني اني اعنف عبدالمجيد تخيل !!
كانت تشهق بقوه وكملت : ما ادري ليه يكرهوني كأني انا اللي ذبحت رنا
تنرفز مروان على ذكر زوجته الاولى وقال بعصبيه : يمه اذا انتِ ماتبيني اجي مره ثانيه لا تحطين حرتك بهاجر ، وكمل بصوت عالي : زوجتتتيي ما تمدين يدك عليههااا !!!
قربت كادي منه وقال بقهر : مروان احترم نفسك ترفع صوتك على امي عشان هذي اللي ما تسوى ؟
مروان كان يحس ان عيونه تطلع منها شرار من العصبيه من بعد كلمة كادي وراح لها و اعطاها كف بكل قوته
داخت كادي من قوة الكف وطاحت على الارض وهي تبكي
وكل هذا كان قدام ابو مروان اللي قرب من مروان ومسكه من يده بكل قوته وقال بعصبيه وهو يرص على اسنانه : مو انت اللي تمد يدك على بنتتي !!!
مروان : يبه شوف بنتك ربها كويس وبعدين قول لي كذا
ابو مروان بصراخ : تعال علمني كيف اربي بنتي يا كللب !! ، انا ربيتك وربيت امثالك بس شكلي صدق انت اللي ما ربيتك كويس ، اخر عمري ولدي البكر يرفع صوته على امه ويضرب اخته قدامي ، جلس يطالعه بأستحقار وقال : يا حسافه فيك والله يا حسافه
وفك يده بقول وقال : يلا انقلع لا اشوفك لا انت ولا زوجتك هنا مره ثانيه
طلع مروان بغضب وطلعت وراه هاجر واخذوا عيالهم وطلعوا
جلست ام مروان وهي تبكي وقربت منها كادي وهي تمسح دموعها
قالت ام مروان : كان ما تكلمتي يا بنتي
ابو مروان وهو معصب : وش اللي ما تتكلم ، ولدك ذا قليل تربيه االمشكله كلنا ندري ان المصايب ما تجي الا من ورا زوجته بس هو يشوفها ملاك
ام مروان ببكى : بس .....
قاطعها ابو مروان وقال : لا بس ولا شي خليه معها لين يعرف ان الله حق ويكشفها على حقيقتها
وسكت شوي وقال بعد ما هدئ : شفيكم انتم وش صار؟
حكت له ام مروان السالفه وهي باقي تبكي
انصدم ابو مروان من اللي سمعه وقال بينه وبين نفسه : استودعتك الله يا عبدالمجيد من هالام و الاب ، وقرب من ام مروان وباسها براسها وجلس يهديها
وقالت كادي بصوت باكي وهي تضحك : وانا يعني مالي نصيب من هالمواساة ؟
ضحك ابو مروان وتقدم لها وباسها و وقفها معه وهو يمسح على كتفها كانوا طالعين من المجلس و ام مروان وراهم وتحمد ربها على حنية ابو مروان ببناته
_____________________________
- بالمستشفى -
جا عبدالعزيز اتصال وكان من فيصل وقال : هلا فيصل
فيصل : عبدالعزيز الفريق طالعين يفتشون رح تجي ولا لا ؟
عبدالعزيز وهو كان ناسي التفتيش وقال : اووفف انشغلت وربي يا فيصل خلاص خلهم يروحون ما اقدر انا
فيصل: ابشر
قفل عبدالعزيز وجلس عند ابوه اللي سأله : وش عندك؟
عبدالعزيز: مو مهم ، كنت بروح مع فرقه نفتش لقضيه بس خلاص بجلس هنا
طالعه ابوه بعصبيه وقال : وخير يا طير وحنا وش نسوي هنا ؟؟
طالع عبدالعزيز ابوه بستغراب وقال : هاه؟ لا بس بجلس لين يصحى فارس و اتطمن عليه
ابو ليّث : و اخوك مارح يصحى الا على وجهك ؟
وجلس يدف عبدالعزيز يبيه يقوم وقال : توكل على الله يا ولد وروح لشغلك بس
عبدالله وليث كانوا يطالعونهم ويضحكون ووقفوا اول ما طالعهم عبدالعزيز وقال : خير ؟
قاطعه ابو ليّث وقال : انت باقي واقف ؟
عبدالعزيز : خلاص ابشر يبه
طلع عبدالعزيز وهو يبتسم ودق على فيصل وقال : فيصل الفرقه راحوا ؟
فيصل : لا والله باقي يجهزون
عبدالعزيز: تمام انتظروا مسافة الطريق و اجي
فيصل : ابشر