<< عند محمد >>
كان بدوامه ويشتغل بهدوء ووقف بفرح اول ما دخل خويه " ناصر" اللي صار له اسبوع ونص ماخذ اجازه مرضيه، ابتسم محمد وقرب منه وقال : ارحححببب
ناصر بفرح مو اقل من محمد : تبقى
سلّم عليه محمد وقال اول ما بعّد : الحمدلله على السلامه ، وحط يده ورا ظهره وهو يبيه يجلس: طمني عنك؟
ناصر : الحمدلله ابشرك انت اخبارك
محمد وهو راجع لمكتبه : والله الحمدلله انا على ما يُرام ، كيف الاجازه
ناصر : اللهم لك الحمد ارتحتت و الحين احس فيني طاقه للشغل
محمد ببتسامه : الحمدلله اهم شي صحتك
ناصر وهو يعدل جلسته : ايوه ؟ وش عندك يبو مشعل صار لك ثلاث ايام تقول عندك سالفه مهمه
تنهد محمد وقال : ههههه والله مدري وش اقول
ناصر : قِل قِل
محمد : انا احب
ناصر بصدمه : تحبببب؟؟
محمد بضحك على رد ناصر وقال وهو رافع حاجبه : اي ليه حرام؟
ناصر : والله ما اعرف صدمتني ، مين تحب وكيف؟
ابتسم محمد وهو يتذكر شكل ليان وخوفها اول ما شافته وكيف تصنمت بالغرفه وقال : ما اعرف كيف لا تسألني ، لكنِ شفتها و انعجبت فيها و ابي اطلبها ومتردد
ناصر : وليه متردد؟
رفع محمد اكتافه بعدم معرفه
ناصر وهو معقد حواجبه : وبعدين وين شفتها؟
محمد بفشله : كانت بغرفة اختي ودخلت عليها بالغلط
انفجر ناصر ضحك فيه وقام اول ما رماه محمد بعلبة المناديل ، جلس ناصر على ركبه وهو يضحك بقوه على محمد وعلى وجهه وهو واضح انه متفشل وقال : انا الغلطاننن اني اقول لك يا حيوان
قام ناصر وهو يمسح دموعه ورجع مُقابل لمحمد اللي قال له وهو يأشر له على الباب : انقلع برا
مد ناصر يده لدقن محمد وباسه وتنحنح وقال : خلاص والله كمل
تنهد محمد وقال : زي ما قلت شفتها و انعجبت وودي اطلبها بس ما اعرف ياخي ، وسكت شوي وقال بضحكه خفيفه : ياخي اخاف ترفضني
عقد ناصر حواجبه وقال : وليه ترفضك بتكون غبيه لو رفضتك يارجال انا لو اني بنت وافقت بدون ما استخير
ضحك محمد وقال : الله يجبر بخاطر يبو سعد
ناصر : اسمعني كويس حبيت البنت ؟ اعجبتك؟ خلك رجال وروح اطلبها من ابوها لاتمشي بالغلط
محمد : اكيد اكيد ، انا اصلاً معرف شي عنها غير انها بنت واحد من معارفنا
ناصر : كويس دامهم من معارفكم ، تعرف ابوها؟ اخوانها؟
محمد وهو يهز راسه : اي والله ابوها رجالٍ ما في اطيب منه
ناصر : اجل كويس تقدم لها و ان شاء الله ربي بيكتب اللي فيه الخير
محمد ببتسامه : ان شاء الله
قام ناصر وقال : يلا انا استأذنك عندي اشغال بروح اخلصها
محمد : موفق
طلع ناصر من المكتب وجلس محمد يقلب بالاوراق ويفكر بكلام ناصر وكيف رح يفتح الموضوع مع اهله وهل رح توافق ليان عليه او لا ، تتهد ورجع ظهره لورا ورجع استوعب ان عنده شغل يبي يخلصه قبل الظهر
_______________________________________________
<< عند عبدالله >>
كان بممرات الجامعه هو وفهد ويسولفون بهدوء الى ما قال فهد : ايووهه عبود الحمدلله خلاص ما بقي شي على التخرج كلها اسبوعين وخلاص
عبدالله براحه : ايي والله و ارتحت زياده بعد ما خلصت مشروع التخرج
فهد : صصدق هههههه عاد انت الدكتور استقعد لك
عبدالله : اي والله الـ ***** خلاني اعيده ست مرات
ضحك فهد وقال : وش ناوي تسوي عقب التخرج؟
عبدالله بتفكير : امممم بقدم على مكتب محاماة و ان شاءالله يقبلوني
فهد وهو يطمن عبدالله : معليك يا رجال بيقبلونك وانت ماشاءالله عندك مؤهلات كثيره تخليك تضمن الوظيفه
أبتسم عبدالله ، وغمز فهد لعبدالله وقال : وبعدين انا ما اقصد الوظيفه ترا
عقد عبدالله حواجبه بعدم فهم : وش تقصد ؟
فهد بتشفير : مدري ، يمكن اقصد الورد
ابتسم عبدالله لا إراديًا لمجرد ما ذكر فهد الورد وفهم قصده وقال : ياخي معرف عنها شي وش اسوي ؟
فهد : سهله ، حاول تعرف
صفق عبدالله لفهد وقال : واو الله يسعدك مره ساعدتني
ضحك فهد وقال : والله صدق يا عبود مو صعبه تقدر تعرف بيتها وتعرف اهلها وتعرف كل شي عنها لو تبي وبعدين عبدالله انت مو ناقصك شي فلوس ماشاءالله وعندك واهلك ما بيقصرون معك ووظيفه ما باقي شي على التخرج وتتوظف ان شاء الله وحتى بيت عندك ( للمعلوميه ام عبدالله الله يرحمها كان عندها ارض وتبي تبني فيها بيت وتوقف اول ما ماتت وبعدها باربعه شهور رجع عبدالله يبني البيت بدون معرفة احد بمساعدة ليّث )
كل هالسوالف قالوها وهم بطريقهم للكلاس وقال عبدالله اول ما قربوا منه : بشوف بشوف ان شاء الله خير
فهد : ان شاء الله ( ودخلوا )
_______________________________________________
<< عند محمد >>
خلصت محمد شغله وركب سيارته وهو متجه للبيت ، اول ما وصل وقف سيارته بالحوش ونزل ، دخل البيت وكانت امه و العامله يجهزون الغداء دخل عند امه وسلّم عليها وطلع عشان يبدل ملابسه ويجي يتغدى معهم ، وبعد ما بدل وكل شي طلع من الغرفه وشاف فاطمه داخله غرفتها وناداها ، التفتت عليه فاطمه و قربت وقالت : هلا؟
محمد : وين داخله ؟ يلا غداء
ابتسمت فاطمه على وقالت : انسى يروحي ابوي باقي ما رجع و امي حالفه ما نتغدى الى ما يجي
محمد : طيب نموت يعني ؟
رفت فاطمه اكتافها بعدم معرفه و اعطته ظهرها وهي راجعه لغرفتها ، لكن لحقها محمد بحركه سريعه وقال : اسمعي اسمعي
فاطمه بتعقيدة حواجب: شفيك ؟
مسك يدها ودخل معها غرفتها وسكر وقال : اسمعيني بكلمك بموضوع
فاطمه وهي مستغربه من حركات محمد الغريبه : وشو؟
محمد وهي حاس انه بيتفشل لكن قال : تذكرين البنت اللي جت عندكم قبل فتره ؟
فاطمه : اي وحده؟؟
محمد بتأفف : افقف ذيك بنت سلمان *****
فاطمه بفهم : اهاااا ، لكن اي وحده ؟ هم ثلاث خوات
تورط محمد وهو ما يعرف شي عنها وقال بعدم تفكير : اللي كانت لابسه بلوزه حمراء
فاطمه بتعقيدة حواجب: وانت وش عرفك وش كانت لابسه ؟
رفع محمد يده وهو يحرك شعره بأحراج وقال : كنت ادور شاحني عندك ودخلت غرفتك بدون ما ادق الباب احسبك لحالك وشفتها بالغلط
حطت فاطمه يدها على فمها وقالت بضحك : اهااا وانا اقول شفيها متوتره وما غير تتلعثم بالكلام هههههه
محمد بحماس :اما قالت لك شي ؟
فاطمه : لا بس سألتها وما قالت شي المهم انت وش تبي فيها؟
محمد بتوتر : ابيها
فاطمه برفعة حاجب: تبيها؟
محمد بخوف : اي ليه ؟
فاطمه بعدم معرفه : مدري والله بس اذا تبي نصيحتي البنت مافي اطيب منها والله
انبسط محمد وقال : تعالي تعالي قربي احكي لي عنها
فاطمه بغباء : احكي لك عن وش ؟
محمد بغبنه من غبائها : فاطممههه عن اللكاعه وربي اني متوترر وحالتي حاله ركزي معي ، احكي لي عنها كم عمرها تدرس ولا لا كيف حياتها ، يختي انا حتى اسمها مب عارفه
ضحكت فاطمه وقالت : خلاص خلاص لا تصيح ، اسمها ليان ، عمرها 22 وتدرس جامعه تخصصها فنون ، هي اكبر خواتها
كان محمد يهز راسه بالاستجابه مع فاطمه وقال اول ما وقفت : كملي
فاطمه قامت وهي تدقه بكتفه : لا حبيبي تكفيك هالمعلومات
طفش محمد من عباطة فاطمه ووده يقوم ويصفقها لكن اكتفى بأنه يهددها: والله لأوريك اصبري علي بس
ضحكت فاطمه وقالت : انت خلّ يصير بينكم شي رسمي وبعدين تبشر اسولف لك عنها اما كذا معليش يا اخوي بس تخسى ما ارضى عليها
قام محمد ورفع اصبعه السبابه عليها وقال بتهديد : خليك قدها ، وهو يقصد كلمة " تخسى "
باسته فاطمه من بعيد وقالت وهي تضحك : هههه ابشر ، واستوقفت محمد عند الباب وهي تقول اذا جاء ابوي نادني ترا محد بيسولف لك عنها ( تقصد ليان ) غيري لاتنسى
ضحك محمد بخفه وهو عاطيها ظهره وما يبي يبيّن لها وسكر الباب وطلع ، ابتسمت فاطمه وهي تدري انه يمزح معها بكل تهديداته وراحت تطلع كتبها وتحل واجباتها عبال ما يجي ابوها تكون خالصه واجبات وتتغدى وتروح بس دوامها .
_______________________________________________
تتوقعون ليان بتقبل بمحمد او بترفضه ؟
أنت تقرأ
يامُناي ودعاي
Actionسبحان الله وبحمده سبحان الله العظيم ----------- اول روايه اتمنى تعجبكم💗
