يامُناي ودعاي

Part 26

قام سعود ورجع لشبة النار واخذ مويا وجلس على ركبه وهو يغسل وجهه من الدم
قرب منه عبدالعزيز وخطواته ثقيله ويناظر فيه بهدوء وجلس جمبه واخذ بكت الدخان وولع له زقاره وجلس يدخنها بهدوء
طالع فيه سعود بصدمه من حركاته وقال : شفيك انت مريض؟
عبدالعزيز بعدم مبالاه : ايه
زفر سعود بنرفزه منه وسحب الزقاره منه وطفاها بالتراب وقال : خلاص وقف هذا الزفت كتمتنا !
تنهد عبدالعزيز بدون اي رد
سعود بتعب : عزيز انت زي اخوي وتعرف هالشي وانا اعرف انك تحب اختي ليان وصدقني بكون معك سند وبوقف ضد الكل لو تبي عشان تاخذها ، و ابوك لا تشيل همه يومين ثلاثه اسبوع شهر اخرته بيرضى و........
قاطعه عبدالعزيز وقال : بتزوجها
سعود : اي اكيد بتتزوجها وانا متأكد مافي احسن منك لأختي و ابوي مره يحبك وبينبسط اذا انت اللي بتاخذ اول بناته
عبدالعزيز طالع فيه وعيونه حمرااء وقال بصوت مبحوح : بتزوج اشجان
فز سعود وهو معقد حواجبه وقال بصدمه : ايشششش!
عبدالعزيز: اللي سمعته
سعود بنفس صدمته : تستهبل؟
عبدالعزيز ببرود : لا
سعود مسك عبدالعزيز من ياقة ثوبه وقال بعصبيه من برود عبدالعزيز: عزيز منجدك انت ؟ طول عمرك تحكي لي عن حبك لليان وعن احلامك معها و و و والحين يعرض عليك ابو اشجان بنته وتوافق على طول ؟؟ وين حبك لليان ؟ وش ذنب اختي تعيش بأحلام معك طول عمرها و اخر شي كذا !؟
دف عبدالعزيز سعود عنه وقال : وش تبيني اسوي يا سعودددد وش تبيني اسوي ها؟
وجلس يطالع بسعود وهو يتنفس بقوه ونزل راسه وحط يده على عيونه وكمل وهو يبكي : حاولت وربي حاولت لكن الموضوع اكبر مني والله
عقد سعود حواجبه وقرب من عبدالعزيز وقال بهدوء : وش صار ؟
ما قدر عبدالعزيز يكمل وشهقاته كانت سابقته
حط سعود يده على ظهر عبدالعزيز وهو يهديه
عبدالعزيز بصوت يادوب ينسمع : قال لي يا تاخذ اشجان يا لا انت ولدي ولا اعرفك
غمض سعود عيونه بقهر وتنهد وقال : معليه معليه انت هدي الحين وكل شي بينحل
عبدالعزيز وخر من سعود ووقف وقال بأنفعال : وش اللي بينحل فهمني؟؟؟ البنت اللي احبها من صغري ورسمت احلامي معها و اخطط لحياتنا مع بعض يوم كبرت و ابي اخذها اخسرها بهالطريقه !!!!
قام سعود وقرب منه وضمه بقوه
ارتخى عبدالعزيز بحضن سعود وطاح على الارض وهو يبكي  وسعود يسمي عليه ويردد : اذكر الله كل شي بينحل

_____________________________
• عند ابو مروان •
رجع البيت على الساعه 1 ونص وهو مصدع ، دخل وكان البيت هادي مره و الظاهر ان الكل نايم ، طلع الدور الثاني وشاف الانوار كلها طافيه الا غرفة كادي مشى وهو متجه لها وفتح الباب بدون ما يدقه و اول ما دخل كانت جالسه على السرير وتكلم و اول ما دخل ابوها قفلت المكالمه وقالت : يبه شفيك خرشتني
ابو مروان عقد حواجبه وقال : مين تكلمين بهالوقت ؟
كادي بتوتر : مين بكلم يعني ؟ صديقتي
ابو مروان : وليه قفلتي ؟
كادي : من الخرشه والله احسب الكل نايم ويوم دخلت خرشتني
ابو مروان ما حب يدقق بالموضوع ومشاه بمزاجه وطلع وسكر الباب
زفرت كادي براحه ورجعت دقت وقالت بصوت راخي : ياويليي ياسر ابوي دخل عليّ
ياسر: اما ؟ شك بشي ؟
كادي : يمه مدري ، بس قعد يسأل مين تكلمين وعشاني قفلت احس زادت شكوكه
ياسر : لا ان شاءالله مافي شي
تنهدت كادي وقالت : ان شاءالله
ياسر : خلاص ياقلبي هديلي روحك
كادي : مدري احس خايفه ابوي يكشفني
ياسر : ما بيصير الا كل خير ، خلاص انتِ روحي نامي وبكره اكلمك زين ؟
كادي : تمام تصبح على خير
ياسر : وانتي من اهل الخير

_____________________________
•عند سعود وعبدالعزيز •
كان سعود يسوق و عبدالعزيز متلثم ومرجع المرتبه على ورا ومنسدح
سعود كان عنده شقه بنفس منطقتهم ويروح لها من فتره لفتره وقف عندها ونزل وراح لجهة باب عبدالعزيز وفتح اول ما فتحه فز عبدالعزيز ومسكه سعود بهدوء وهو يسمي عليه وقال : امش نزلنا
كان عبدالعزيز يطالع البيت بستغراب وهو يحاول يتعرف على المكان
نزل وسكر الباب ومشى مع سعود ودخلوا العماره و اول ما وصلوا للشقه طلع سعود مفاتيح وفتح الشقه ودخلوها وعبدالعزيز باقي مستغرب وقال : شقة من ذي ؟
جلس سعود على الكنبه وقال : شقتي
رفع عبدالعزيز حاجبه وقال : شقتك؟
سعود : اي
ما اهتم عبدالعزيز ولا سأل او بالاساس ماله خلق
سعود :خلك هاليومين هنا لين تهدأ الاوضاع في بيتكم
تنهد عبدالعزيز بدون رد
سعود قام وقال : امش ندخل احس صدعتت وفيني نوم
مشى وراه عبدالعزيز ودخلوا المجلس ، طلع سعود يجيب افرشه وفرشها وجاب لحافين وانسدح ، قام عبدالعزيز وطفى النور وانسدح على الفراش وهو داري انه مارح ينام لكن وش رح يسوي بعد خمس دقايق لف على سعود وشاف نور الجوال وهو عاطيه ظهره وقال : سعود
ما رد
جلس وطالع فيه لقاه نايم ، ابتسم ابتسامه خفيفه وسحب الحوال وطفاه ورجع ينسدح

_____________________________
صلو على النبي 💙