يامُناي ودعاي

Part 21

- عند عبدالعزيز-
دخل القسم وهو مبسوووط انه لقى دليل ولو انه كان صغير جدًا، و امر الضباط انهم ياخذون ريان ويودونه عندهم بالتوقيف الى ما تثبت التُهمه عليه ، و اخذوا البصمات وراحوا يفحصونها على امل يلقون بصمه من بصمات انفال

_____________________________
- بالمستشفى -
بعد صلاة المغرب جا عبدالله و ابوه من المسجد ورجعوا ينتظروا عند غرفة فارس عشان يصحى وبعد انتظار اخذ نص ساعه طلع الدكتور وكان مبتسم وبشرهم ان فارس قام ويقدرون يشوفونه لكن واحد بس عشان لا يتعب وقام ابوه ودخل الغرفه و اول ما شاف شكل فارس تغورقت عيونه دموع ، على كثر ما انه قاسي الا انه ما تحمل منظر ولده كذا قدامه ، تقدم له ومسح على راسه وباسه بقوه على راسه ، فتح فارس عيونه بضعف وشاف ابوه قدامه وهو يبكي ، مسك يد ابوه وباسها
ابو ليّث ما قدر يتحمل وجلس عنده وهو يمسح دموعه وقال : كيفك يا فارس ؟
فارس بصوت يادوب ينسمع : الحمدلله
ابو ليّث بندم لانه يحس انه هو السبب باللي قاعد يصير لفارس : وش يعورك؟
ابتسم فارس وهو يحاول يطمن ابوه : ولا شي
سكت ابو ليّث وشوي وجا الدكتور وقال : ياعم لازم تطلع عشان المريض ياخذ راحته وما يتعب زياده
قام ابو ليّث وسلم على راس ولده بهدوء وطلع
فز عبدالله لأبوه اول ما شاف وجهه وهو يبكي وضمه بقوه وجلس يهديه وبعدها ب 5 دقايق دق على ليّث و عبدالعزيز يبشرهم ان فارس صحى

وبعد نص ساعه جا ليّث ومعه الشرطه واخذوا اذن من المستشفى انهم يحققون مع فارس ودخلوا عنده واخذوا كل التفاصيل منه وبعد فتره قصيره طلعوا وقال الشرطي اول ما وقف ليّث : رح نسوي الاجراءات اللازمه ونقبض عليهم بأذن الله لا تشيلون هم
ليّث : ان شاءالله
طلعوا الشرطه وطلب ليّث انه يدخل عند فارس وفعلاً دخل وكان فارس جالس وهادي جدًا وعدل جلسته اول ما شاف ليّث
قرب منه ليّث وسلم عليه وقال : كيفك؟
فارس : الحمدلله
ليّث بندم وهو يحس انه السبب بكل اللي صار : فروس انا اسف ياخوي ، انا السبب بكل شي لو اني نقلتك من لما قلت لي ما كان صار كذا اسفف
مسك فارس يد ليّث وقال : ليّث خلاص وشفيك شوف مافيني شي
رفع ليّث يده ومسح على راس فارس وطلع عشان يرتاح فارس

_____________________________
- آخر الليل عند فاطمه -
رجعت واخذت شاور وكانت تطقطق بجوالها بغرفتها بهدوء ورفعت عيونها للباب بهدوء على دخول كادي ، جلست كادي عندها وقال : دريتي وش صار اليوم ؟
فاطمه بتعقيدة حواجب : لا وش صار ؟
حكت كادي السالفه كامله لفاطمه اللي شهقت من الصدمه وقالت بقهر : قليلة الادب!!! تقول زي كذا عن مجودي ورضيتوا تخلونه يرجع معها !
تنهدت كادي وقالت : اووفف واخوك الكريه غشيم وعقليته متخلفه مره كأنه من الجاهليه مو معقوله صار له معها 4 سنين وللحين ما لاحظ تعاملها مع مجودي ؟ حسبي الله عليه وعليها
فاطمه بحزن : يا حياتي يا مجودي الله يصبره ، صح قلتي لي ان ام سعد عزمتها تتوقعين تجي؟
شهقت كادي لانها تذكرت شي : نسسسيييتت اقوللكككك
فاطمه انخرشت وضربتها على كتفها بخفه وقالت : وجع خرشتيني ، انطقي وش صار ؟
كادي : ابوي طرد مروان من البيت وقال له لعد اشوفك لا انت ولا زوجتك
وسعت فاطمه عيونها بصدمه وقالت : احلللفييي؟؟
كادي : اي والله فـ ما اتوقع انها تجي العزيمه
فاطمه بقرف منهم : يع اخوك مدري كيف متحملها وربي ما تنبلع من اول يوم ما بلعتها
كادي : وش نسوي عاد قدر ولقى غطاه
تنهدت فاطمه و انسدحت وقالت : خلاص انقلعي وطفي اللمبه وسكري الباب
كادي : تراك صايره قليلة ادب ! احترمي فرق السن اللي بينا ولا عشانك صايره متوظفه وما نشوفك باليوم الا مره متكبره علينا
ضحكت فاطمه وقربت منها وباستها بخدها وقالت : سوري بس والله مصدعه وتعبانه
ابتسمت كادي وقامت وقالت : تصبحي على خير
فاطمه من تحت اللحاف : احبكك يا احلى نقالة علوم
كادي رجعت لها وضربتها بالمخده وقالت : تراها مو مدحه يا حماره
ضحكت فاطمه على شكل كادي وهي راجعة لها وقالت : خلاص خلاص امزح ههههه
طلعت كادي وسكرت الباب بقوه وضحكت اول ما وصلها صوت فاطمه من الغرفه : وجععععع

_____________________________
كلهم ناموا بهذي الليله بتعب الا ابو ليّث ما جاه نوم وهو عند ولده ويقرا عليه

_________
- يوم الجمعه 10:13 -
صحى عبدالله وهو متكسر ولاحظ انه طول الليل كان نايم على كراسي المستشفى وما انتبه للوقت وطالع بالساعه وانصدم من الوقت وراح للغرفه اللي كان فيها فارس ولقاها فاضيه استغرب وراح للدكتور اللي كان مسؤول عن فارس وقال : السلامه عليكم اخوي وين الولد اللي كان بغرفة رقم ***
الدكتور : ياهلا وعليكم السلام هذا حطيناه بالغرفه العاديه رقم 505 لان وضعه صار مستقر
ابتسم عبدالله وقال : زين يعطيك العافيه
وراح لغرفة فارس وفتح الباب بهدوء وكانت الغرفه شوي بارده وقال : السلا.....
وسكت اول ما شاف فارس نايم وابوه جالس على كرسي عند سرير فارس وحاط راسه على السرير وجنبه مصحف ، قرب منهم وجلس يطالعهم بهدوء كان وده يصحي ابوه عشان يتعدل بنومه بس خاف يصحى وما يقوم وهو واضح ما نام من الليل جلس عندهم بهدوء وكلها 10 دقايق وصحى فارس و اول ما صحى فز ابو ليّث وقام على طول يقيس حرارة فارس تحت مراقبة عبدالله اللي كان جالس بزاوية الغرفه ومحد انتبه له
خلص ابو ليّث وقام وهو وده يروح يتوضى ويتجهز لصلاة الجمعه وقال بخرشه اول ما شاف عبدالله وهو يناظرهم ومسرّح : ولدددد! وجععع ان شاءالله وش تسويي ؟
ركز عبدالله وقام وقال : ههههه صح النوم يبه
وكمل بعد ما سلم على راس ابوه : ابد اتأمل حنانك مع فروس وخوفك عليه
ابو ليّث وهو يدف عبدالله بخيزرانته : يولد توكل على الله ، يلا قدامي بنروح نصلي مع الجماعه - ومشى من قدامه -
ضحك عبدالله على تصريفة ابوه وتحرك اول ما صرخ فيه ابوه بـ : ولددد!

_____________________________