نافذة الذكريات

part 24

عبدالكريم : ايه عشان كذا انا ما ابغى اقابله وبنتظر في
السياره
خالد ناظره وناظر راجح و سكت يناظر الطريق وهو خايف من كل شي و عارف ان سكوت العيال فيه شي بس هوه ما يدري وش هوه و كان يتمنى انه خير
وقف عبدالكريم على جنب و التفت : خالد ليه ساكت في شي يوجعك
خالد ما رد رجع لف راجح عليه :اخوي الكبير وش رايك تجي قدام مكاني لاني ما احب اركب قدام وانت عارف الوضع بس ركبت عشان احمد لا يركب و يزعجنا
خالد ابتسم : لا خلاص خلك انت قدام
احمد : نعم يالطيب وش سويت فيك عشان تركب بدالي
ضحك خالد : والله انه صادق لو ركبت قدام ما بقيت اغنيه الا وشغلتها لكن اجلس هنا وانت ساكت
عبدالكريم : انت زعلان مني يا اخوي عشان اختصمت مع ابوك
خالد ناظر فيه : لا مو زعلان لكن افكر في وش بيصير في الموضوع و مين نقل لي ابي سوالف غلط
راجح: مدري والله اني انصدمت يعني يوم سولف لي عبدالكريم
خالد : والله انه انشغل بالي مين اللي له الجرئه يتكلم عني بذا الاسلوب عند ابي لا و ابي يصدقه احس اني مقهور ولا عارف اتصرف
عبدالكريم : والله اني حاولت فيه ابغى اعرف اي شي ولكن ما عرفت شي
احمد : وش صار انا رحت امس عشان دوامي و كان كل الاوضاع تمام ليش تغيرت
سعود : ههههههه والله اهون من اللي يصحى من النوم مفجوع على الاتصالات
خالد : نفسك صحيت مفجوع من الاتصالات
راجح لف لي عبدالكريم اللي يهوجس : تبغى اسوق عنك
لف عبدالكريم و عقد حجاجه :وش
راجح : تبغى اسوق عنك
عبدالكريم : لا انا بسوق معليك الا ياعيال نمشي
العيال : امش مشى عبدالكريم و راحو الديره و وصلو بعد ساعه و كانت الهواجيس تاكلهم كلهم لانه ماهم عارفين يتصرفون لف خالد لعبدالكريم : تعال انزل معي لو كنت مطرود لكن انت معي
ابتسم عبدالكريم و نزل بدون رد و راح معهم دخلو المجلس و لقو ابو خالد و ابو هدى و ناس كثير موجودين و من بينهم نايف اللي جالس بجنب ابو خالد و سلطان و مهند تقدم خالد خطوه عن اخوياه و رفع صوته : السلام عليكم
كل الحضور لفو له و قامو و سلمو عليهم و يوم وصل خالد لي نايف نايف ابتسم و خالد قرب منه :والله لو يجيني علم انك انت اللي سببت مشاكل في غيابي ان لااندمك
ضحك نايف : الله يبارك فيك والله اني مبسوط بشوفتك و جيتك
لف خالد و شاف الناس يناظرو و تركه و راح يكمل يسلم على الباقين بعدين جلس و لف ابو خالد يسولف مع ابو هدى ولا كلم خالد و لا عبره كأنه مو موجود و خالد انقهر من الحركه ذي لانه كان دايم يجلسه ابوه بجنبه و يجلس يسولف معه تنهد بغضب و لف وجهه يناظر العيال يسولفون و لف من سأله هيثم : عمي متى جيت
خالد : جيت العصر و نزلت على طول
سلمان : لو منك ما جيت نهائيا
خالد : ليه وش فيه
سلمان : مدري جدي معصب بدون سبب معين و يخاصم الكل توه هزئنا قبل تجون
ضحك خالد : الله يستر
نايف رفع صوته عشان الكل يسمع : خالد قالو انه نقلوك الرياض ليش نقلوك وش مسوي من مصيبه
خالد ضحك وناظر فيه : الحمدلله ما هي عوايدي اجيب المصايب ولا هو من طبعي اني اخذ حاجه ماهي لي ولله الحمد اما موضوع النقل كان فيه ترقيه و انا ادور التريقه و زيادة الراتب ف طلبت نقل و نقلوني في رياض
ناظر فيه نايف و انقهر لانه سبه قدام الناس : اها على بالي لانك ماش ذي الايام مدري وش فيك تسافر فجأة قلنا يمكن في مصيبه جديده
خالد : ههههههه تطمن ماني حولك ولا اشغلت بالي فيك ابشرك
نايف سكت ورج يتقهوى و يشوف نظرات خالد له شوي و طلع خالد الحوش يمشي و لحقه نايف : ولد انتظر
خالد : نعم وش بغيت
نايف : وش قصدك بكلامك قبل شوي
خالد : ما قصدت شي بس انت حساس
نايف : لا ماني حساس انت مدري وش بلاك
خالد لف يناظر له : انا وش بلاي ولا انت اللي تدور الزله و تفكر كيف تسوي مشاكل
نايف :مشاكل وش انا ما فكرت في شي
خالد تقدم له و هو معصب : ايه تسوي نفسك مجنون لكن والله لو ادري انك ورا مشكله لا تندم والله
رجع خطوه ورا نايف : ليش دايم تظلمني
خالد قرب منه : لانك اخذت هدى و قلت عليك بالف عافيه ما همتني لكن تجي و تبغى ابوي يوقف في صفك في احلامك وانت نايم تتحلم بذا الشي
نايف ضحك : اوووه طلعت متضايق عشان الشايب صدقني و كذبك
خالد انفلتت اعصابه وبكسه في وجهه و رجع مسكه من ثوبه :وش قلت مين صدقك ودي اكسر فكك ذليل تكلم
نايف :ما تقدر ههههه
خالد رجع يبكسه : مين ما يقدر اقول احترم نفسك و ابوي عمك و تاج راسك
نايف : ايه دافع عن هذاك اللي ما صدقك ولا بيصدقك بيصدقني انا
كمل خالد عليه يضربه و هو يحاول يدافع عن نفسهو يضربه و صارو يتضاربون حتى خرجو الرجال اللي في المجلس و فزعو يمسكون خالد و يبعدونه و مسكو نايف
ابو خالد : وش فيكم وش صار لكم
خالد : ما في شي فكوني
ابو خالد : لا تفكونه بيسبب لنا مشاكل هذا انجن رسمي
نايف ضحك و ناظر خالد : اي والله ياعم انجن ولا وش سويت به عشان يضربني
عبدالكريم : اكيد مسوي مصيبه ولكن ما تعترف فيها
خالد : دافع عنه يا ابوي لكن بقول لك شي انا ما ضربته الا بعد ما قل ادبه معي و معك ما احترف نفسه و حبيت اربيه
نايف عصب : انا متربي احسن منك لكن انت اللي مو متربي ولا في واحد يضرب ضيفه
خالد : ايه اضربه اذا قل ادبه و لا عرف يتكلم اكسر فكه عشان يرجع يتكلم صح
نايف : وانا وش قلت غير انك انت دايم كذاب و انا الصح
خالد حاول يفلت نفسه و ركض بيضربه بس مسكه سلطان :
سلطان :خلاص خالد خله اذا انت صادق بيظهر كل شي
ابو خالد : خالد لا عاد تشوفك عيني انت ما تجي الا وتجيب المشاكل اتعبتنا اتعبتنا جبت لي ضغط والسكر و ذلحين وش باقي بتجيب لي
خالد : لا يبه لا تظلمني يبه انا ولدك انا مستحيل اسوي شي يبه اي شي يصير انا اوقف معك على طول ييه اوقف معي وبتعرف اني مظلوم والله مظلوم
ابو خالد :انا قلت وانا ما عاد بتراجع عن كلامي اطلع برا بيتي لا عاد تشوفك عيني
خالد نزل نظره وسكت مشى بيطلع بس نادها
ابو عبدالكريم :ياولدي اجلس تعشا
لف خالد ينظر فيه :والله يا عم مالي خلق بروح تصبحون على خير
عبدالكريم و احمد و سعود لحقوه و مشو معه و طلعو من البيت و سكت خالد ما قال شي ركبو السياره بس خالد ما ركب جلس يمشي على رجوله لف عبدالكريم لي احمد : وش بنسوي
سعود : بروح اناديه نزل سعود و راح عند خالد و مسك بيده : خالد نمشي
خالد لف له : مالي خلق اركب السياره خلني امشي شوي
سعود: طيب عادي امشي معك لاني احس انه زايد وزني و اخاف تشوفني نور و تنحاش و يتشمت فيني عبدالكريم
ضحك خالد : هههههههه اي والله نور من يوم و هي صغيره تقول ما تحب اللي معه كرش
ضحك سعود : تدري انا ماني خفيف لي ذي الدرجه ما بسوي رجيم عشان ارضيها
ضحك خالد : يالله بنشوف ما ندري الا و انت ناحف كم كيلو
ضحك سعود : والله من اول افكر اسوي رجيم
خالد : داري والله طيب تعال نجلس في جلستنا زمان
سعود لف يناظر :العيال مدري وينهم
خالد : عادي ندق عليهم تعال نجلس
شوي و جو العيال احمد : وينكم تأخر
خالد : ودي نجلس هنا شوي
سعود : اي والله الجو حلو
عبدالكريم : تمام بروح اجيب لكم فرو و جكيتات عشان ما تبردون
خالد : لا ما ابغى شي ما احس ببرد
عبدالكريم : مالي شغل بجيب و واحد يقوم يجمع حطب
سعود : ولد بيتكم قريب من هنا
عبدالكريم : يعني مو مره ليه
سعود : ولا شي بس ابغى اجمع حطب و اشب النار عشان الحب تشوفني وتنعجب فيني
اخذ عبدالكريم حجر من الارض : والله لا ارميك
ضحك سعود و ركض ورا خالد : اتحداك انا في وجه خالد
ضحك عبدالكريم : خالد بعد لا تحطه في وجهك لاني تعبت منه
خالد : سعود اهجد وانت نزل الحجر من يدك مالنا خلق مشاكل
ضحك احمد : ترو خالد طالع منها
خالد ضحك :هههههههههههه ايه طالع منها لانه يستاهل الكلب هو اللي تكلم فيني عند ابوي و ابوي مصدقه و مستحيل عاده بيصدقني
عبدالكريم : طيب قابلت امك
خالد لف يناظر الجو: امي اي شي يقوله ابوي صح و اساسا هي من اول قالبه علي و زعلانه مني عشان تركت هدى بس كان ابوي يهديها بس ذلحين صار الوضع عادي ابوي ما عاده بيوقف معي
احمد : ان شاء الله الامور تزين بس انت روق
خالد : انا مروق معليك ما في شي
عبالكريم :انا بروح خمس دقايق و برجع امسكو سعود و كلمو مسعود و عزيز و ماجد و سالم خلونا نجتمع و ننبسط مع بعض
خالد : اي والله
مشى عبدالكريم و وقف سعود : بروح اكلم و ارجع
ضحك احمد : والله ان تجلس لا تكلم ذلحين ساعدني نشب النار
خالد : خله يكلم وش فيك عليه
ضحك احمد : لاني عارف انه بيلحق عبدالكريم و بعدين يقول ما انتبهت كنت اكلم
ضحك خالد : ايه صادق ما انتبه قلبه اللي مشاه مو هو و لا ما كان وده يمشي
ضحك سعود : شفت قلبي اللي يمشيني مو انا اللي امشيه
احمد : ايه ايه اسمعو مسعود و عزيز و سالم و ماجد ارسلت لهم و قالو بيجون اساسا هم جالسين طفشانين
جا عبدالكريم و رمى الفرو و الجكيتات على العيال و جلس : اوووه تعبت
سعود : لو خليتني امشي معك عشان اساعدك
ضحك عبدالكريم لف يناظر احمد و هو يشب النار: وين اللي بيشب النار
لف سعود : كنت بشب النار بس احمد رفض يقول اجلس مع خالد
خالد عقد حاجبه : ما سمعته قالها
احمد : حتى انا ما سمعت نفسي متى قلت الكلام ذا
سعود : اهم شي اني سمعت انا وش دخلني
راجح جا : سلام عليكم يا قوم
ضحك خالد : وعليكم السلام مطرود ولا ايش
راجح جلس بجنب عبدالكريم : لا والله بس طفشت وحدي لفيت لي العيال اخواني لقيت سوالفهم ما هي حلوه لفيت لي الشيبان لقيتهم يسبون ف قلت اجي استانس معكم
ضحك احمد : كويس يارجال طلعنا من عندهم خلنا نرتاح شكرا خالد
ضحك خالد : ما سويت شي لا شكرا على واجب
راجح : شف يحسسني انه ما سوى المشكله و انه واجب يسوي كذا
خالد : انا قد تركت المجلس عشان اسلم منه و من مشاكله لكن لحقني و يستاهل اللي ما جاه و ودي ما فزعو العيال يمسكونا شوي
ضحك راجح : طيب شوف وجهك يا حلو
ضحك خالد و مسح وجهه : نظيف بس خدوش بسيطه
احمد : والله يستاهل قد قهرني من يوم شفته جالس بجنب ابوك و يضحك
خالد : اكتشفت انه هو سبب المشاكل يوم شفته يضحك و يناظر فيني
عبدالكريم : مستحيل تستسلم و تخليه على راحته
خالد اخذ نفس : مدري افكر اشوف وش اسوي فيه
راجح : سو نفس اللي يخاف منه
خالد : كيف
راجح : خرب زواجه
ضحك خالد : ودي بس ما اقدر حرام
ضحك سعود : اخخخ لو ان نور لبستها الخاتم ما كنت جالس معكم و اسمع سوالفكم اللي ماهي حلوه و كنت ذلحين اتسمع لي سوالفها الجميله و الرائعه
اخذ عبدالكريم جاكيت من اللي كان منسدح عليها و رمها عليه : اسكت اسكت
سعود : وش قلت ما قلت شي قلت الحقيقه بس
احمد : اسكت ما احد فاضي لك انت و الست نور
عبدالكريم : احمد احترم نفسك اذا ما ودك تنجلد نور لا احد يذكرها على لسانه
ضحك احمد : اسف يا غيور ما انتبهت
ضحك خالد : والله انكم فاضين
ضحكو ولفو من سمعو صوت سيارة و جلسو يناظرونها بستغراب حتى نزل مسعود و العيال و قامو يسلمون على بعض و جلسو
عزيز : الله الجو يجنن والجلسه حلوه
ماجد : اي والله جو شاعري
ضحك خالد :ماجد شكلك شاعر
ماجد ضحك : لا والله بس احب الاجواء اللي كذا
مسعود : خالد بسألك انت على طول من المطار ولي هنا
خالد نزل راسه و رجع رفع يناظر النار و يتذكر احداث اليوم كله و كل شي صار وسكت ما قدر يتكلم
مسعود : خالد وش فيك
خالد ناظر فيه : ما فيني شي و ايه على طول جيت هنا
عزيز : مريت اهلك
خالد : ايه
احمد : عيال اتركو السوالف و واحد ينقز للبقاله ياخذ لنا اغراض الشاهي
خالد : والله خاطري في قهوه
عبدالكريم : ابشر بي بس وش تبغى قهوه سعوديه ولا ايس امريكانو
خالد : لا قهوه سعوديه
سعود : عنك يا عبدالكريم انا بروح اخذها
ضحك خالد : لا ارتاح ما نبغى نتعبك
عبدالكريم : ارتاح لا اجلدك
مسعود عقد حاجبه : ليه ما تخلونه يروح
عبدالكريم لف يناظره : اعرف وين بيروح ف ممنوع يروح الا اذا بيروح البقاله
سعود : لا لاما ابغى اروح البقاله نفسي اروح اجيب القهوه
عبدالكريم : يالله ياعيال استاذنكم بروح اخذ قهوه و ارجع لف الا سعود ركض و لحقه يركض معه يبغى يلحقه قبل يروح البيت
لف عزيز : وش السالفه
احمد و هو يضحك وماسك بطنه ماعاد قادر يتكلم و خالد نفس الشي و راجح ما عاد قدرو حتى يردون على عزيز و يناظر لهم عزيز و هو مستغرب ضحكهم الهستيري
رجع احمد يرفع يده يبغى يشرح لهم بس ما قدر
و خالد بعد شوي سكت ولف لي عزيز : سعود خاطب اخت عبدالكريم ف كل ما طفش جاب طاري اخت عبدالكريم و عبدالكريم بسرعه يتنرفز شوفه ذلحين تطاردو عشان بس عبدالكريم كا يبغى سعود يشوف اخته بس و سعود يطقطق عليه
ضحك عزيز : جوهم حلو والله
مسعود ضحك : تذكرت بتصير معك انت و اخو زوجتك
لف ماجد عليه : ما بسمح له ياخذ اختي انا عارف انه يلف و يدور عشان اختي بس ما بوافق
عزيز سكت كو لف لي النار يتدفى عليها وضحك ماجد وضرب كتفه : لا والله امزح معك و موافق بس مدري عن اختي
ما رد عزيز و لف خالد يناظر فيه كان يهوجس و ماهو معهم خالد : عزيز وش فيك ساكت
عزيز لف عليه :و لا شي بس كان ودي انسى و لكن ما ضنتي اقدر انت كيف نسيت
خالد : ما نسيت بس احاول اتناسى
لف ماجد يناظر فيه : ليه تبغى تنسى
عزيز : لانه ما نقدر نجتمع مع بعض وانت عارف شرط اهلي بس خلاص ابشرك عاف الخاطر
ماجد : لا لا تستسلم حاول فيهم حتى يرضون
عزيز : ان شاء الله بس قفل على الموضوع و قام انا بروح اجيب اغراض الشاهي في شي ناقص
احمد : ايه فيه جيب فصفص و فطاير و بطاطساات لان في واحد اعرفه ما اكل شي من يوم جا
خالد ناظر احمد ورجع النظر لي عزيز : اذا بتجيب شي لي ما ابغى شي لكن اذا بتجيب لك انت والعيال اوكيه
مسعود : في بقالتكم دجاج مبهر و خبز
احمد : ايه كل يوم ينزل جديد بس مدري تلقا ولا قد خلص
مسعود :تمام اذا لقيت يا عزيز خذ خلونا نشوي و نستانس بالجواء ذي
سكت خالد و ما قال شي و شوي و جو العيال يركضون و هم يضحكون لف خالد لهم : وش فيكم تضحكون
عبدالكريم : راح يسبقني يدق الجرس حق بيتنا و يدعي تخرج نور و توقعو مين خرج
ضحك خالد : اكيد امك
عبدالكريم ضحك : لا
مسعود : اتوقع نور
عبدالكريم : لا
احمد ضحك : لا تقول ابوك ولا محمد
ضحك عبدالكريم : ايه ابوي و هزئنا يقول وش فيكم كل شوي تدقون الباب قال سعود خالد يبي قهوه و رحت اجيب له لانه من ذليوم ما تقهوا قال ابوي ادخل يا عبدالكريم جيب و دخلت اخذ و جينا و انا اعلق عليه حتى ذلحين و اضحك
كلهم قامو يضحكون بعدين خالد لف له : ما كان ابوك عند ابوي وش فيه رجع البيت
عبدالكريم : الخوي ما يخلي خويه خرج معنا يقول ما عاد له نفس يتعشى و خالد ضايق
اخذ نفس خالد : كان عزمتوه يجي يجلس معنا
سعود : عزمته بس رفض يقول بينام
عبدالكريم : معليك بيتعشا اي شي و ينام
خالد قام : ودي اجلس وحدي انتم خذو راحتكم انا راجع بعد شوي
مسكه عبدالكريم : خالد اذا تعبان قول
خالد : مافيني شي طيب بس بطلع اتمشى شوي
احمد : خذ الفروه ذي تدفى بها
خالد : ماني بردنا
مشى يتركهم و يوم بعد لف مسعود يناظرهم ساكتين : وش الموضوع
دخل عزيز : السلام عليكم جبت لكم الاغراض كلها
العيال : وعليكم السلام
مسعود رجع لف لهم :تكلمو ليش ساكتين
احمد اخذ نفس و هو يقلب النار عشان يسوي مكان لي الشاهي : تضارب مع نايف و وصلت لي مدت اليد ماغير فزعنا لهم و بعدناهم عن بعض و تشاد مع ابوه و طرده من البيت و كل السبب نايف و من اول و نايف يسبب مشاكل عشان كذا ضربه لانه ما تحمل يشوفه يلعب بهم و هو ساكت
عزيز : ايه وذلحين وش بيسوي
عبدالكريم :مدري حتى ابوي يقول كان مرره معصب من خالد
سعود : اي والله انا خايف على خالد لانه متعلق في ابوه مررره
راجح : انا خوفي يتقابلون خالد و نايف مره ثانيه و انحم بعيدين
مسعود : حاولو ما تبعدون عنه خالد محتاجكم و والله اني ما دريت عن شي توي اعلم منكم
احمد : عادي يا اخوي ما صار شي و اساسا نبغاكم تجون عشان تونسونه شوي بس مدري وين راح