نافذة الذكريات

part 30

ضحكت غلا : هيه كيف تسبين اخوي
ضحك خالد : والله على بالي انه هيثم لانه هو اللي حضر من البدايه
نوف : الا صدق خلنا نتكلم بصراحه
خالد : وش
نوف :وش خلاك تجلده
خالد تنهد : قل حياه معي و كلموني العيال اني اهدا لكن يوم لحقني برا فرغت طاقتي فيه
رنا : نعم خير ليه تضربه تتوقع ان الحياه كذا عادي
خالد : لا ما هو عادي و ضايق انه تضاربنا بس في كل مره يشوفني انجح لازم ينتقد و يطلع كلام و في المره هذي خلا ابوي يصدقه و يكذبني و يقول انه انا غلطت عليه
رنا:  وهو صادق
خالد : لا ماهو صادق انا كنت مسافر عشان دوامي و نقلوني من مكه لي الرياض ف جالس اجهز للنقل بس هو خرب كل شي و راح عند ابوي و كان ودي واجهني قبل يروح عند ابوي ولكن صار اللي صار و انتهينا
هنوف : طيب وش بغى ذليوم
خالد : يقول بنت عمي حامل و ابوي قال بنعزمك على زواج خالد قريب خلك جاهز و طردته بس
رنا : وش دخلك في بنت عمك حامل او لا
خالد تكلم بهدوء : كانت خطيبتي و صارت زوجته
رنا : اها فهمت الموضوع عشان كذا مسوي كل هل دراما
خالد  ابتسم : انا ما احبها ولا ابغاها ولا في دراما في الموضوع
رنا : ما بتقدر تقنعني لانه واضح انك كنت تبغاها ولا وش خلاكم تتضاربون ذاك اليوم
خالد شد على الدركسون:  اقول لش تضاربنا لب سبب ثاني يختلف و خطيبتي انا تركتها لي سبب معين و سافرت لانه ما عاد ابغى اواجه احد لان كا ما قابلت احد يقولون رجعها وانا أرفض و جا نايف و أخذها بس لما عرف انه خطبتها بعدين تركتها صار يجي يوميا يحاول يستفزني بس انا كنت اقول له اعتبرك صديق و اخ  حتى وصل الموضوع عند ابوي وانا عندي كل شي عادي الا ابوي لا أحد يغلط عليه أو يحاول  يفرق بينا لاني بوقف في وجهه
سكت يحاول يهدي نبرته بس خلاص عصب و زاد في السرعه بعدين هدا تذكرهم انهم معه : بنزلكم المول و اخلي راجح يرجع ياخذكم
غلا : ليه وش فيه انت خذنا
خالد لف عليها : لا تضغطين علي لاني تعبان
هنوف : بسم الله عليك وش فيك
خالد : ولا شي لا تخافين
نوف : واضح مافي شي حتى صوتك طبيعي
خالد فتح جواله و شغل اغنيه و لف لهم : تسمعو وانتو ساكتين
كل احبك قلتها لك لا حشا ماهي تسلي
ما آتسلى بك و قلبي زاد في حبك مقره
كيف انا فيك آتسلى و انت وجهك قبلة لي
و الحكي منك يداوي كل ضيق و كل حره
والله ان العمر دونك ما بغيته دامك اللي
يجهل هموم اللياليو يبخص دروب المسره
والله اني يوم جيتك جيت شامخ و متعلي
ما تثاقلت الطريق ولا خشيت من المضره

بعد ما خلصت لف لي غلا : شغلي اذا تبغين
غلا : ليش انت زعلان
خالد : مو زعلان
غلا : الا تكلم مين مزعلك
خالد : اللي يفهمني غلط لف عليها : عادي تقولين لها دامها تحبك انها فهمت غلط وانه ما احب بنت عمي
غلا هزت راسها بالايجاب ولفت على رنا : ترا عمي صادق ما يحب بنت عمه و بعدين اساسا حتى انا ما احبها و اي شي انا ما احبه عمي ما يحبه و اي شي انا احبه عمي يحبه مثلش ذلحين انا احبش و عمي
دفها خالد و هو يضحك و قاطعها : كم مره قلت لش لا تقولين عمي لا تكبريني
غلا : تدري اول شي بسويه اذا تزوجت بخلي زوجي يناديك يا عم
ضحك خالد : لا ما اتفقنا بينادي ابوش مو انا هذا اول شي ثاني شي ماهو اتفقنا ما تتزوجين و تجلسين معي
غلا : يع وش ابغى بك انا ابغى اعيش حياتي
خالد ضحك : عيشي حياتك ما احد مسكش لكن لا تتدخلين في حياتي
ضحكت هنوف : ما احد يطلعك من جوك و ضيقتك الا حاجتين الأول غلا و ساره و الثانيه تغني بصوتك
ضحك خالد : لذا الدرجه واضح
نوف: ايه لدرجه اذا شافك ابوي ضايق قال نادو له غلا ولا ساره خلوهم يونسونه
ضحك خالد : ابوي من زمان يعرف ان غلا و ساره سبب في سعادتي لكن قصدي انتم ما قد وضحت لكم كيف دريتو
غلا : الله احلى اعتراف انه انحم سبب في سعادتك
ضحك خالد : بس ذلحين في شخص بينافسكم في تغيير نفسيتي
ضحكت غلا : انا اعرف مين
خالد : طيب اسكتي
غلا : ابشر
رنا كانت ساكته و تفكر في كلامه و عصبيته من فهمها له غلط و كانت تفكر في الاغنيه يقصد شي ولا لا وليه كل ما وصلت غلا للنقطة اللي تبغى تعرفها هو يسكتها
وصلو و كانت ماهي معهم و طول الطريق تناظره مع المرايه و تشوفه و هو يضحك و يسولف مع غلا و كانت طول الوقت تتأمله بحب و إعجاب و من تساول مين ذا ليه يبين لي الناس شخصيه و يخبي اشياء كثيره وش سالفته
لفت من سمعت صوت جوهره:  هيا نزلنا
لفت رنا و نزلت و كانت تشوف خالد يبتسم لها و مشت مع البنات بس وقفها صوته : رنا
لفت رنا وشافته نازل من السيارة و واقف يناظر فيها: هلا
خالد : انا اسف اذا رفعت صوتي عليش لكن انا ما احب اتكلم عن الماضي و ما احب احد يفهمني غلط
رنا : لا عادي وانت صادق المفروض ما افهمك غلط و اسمع منك
خالد : كويس انش فهمتي النقطه ذي لان كان من زمان ودي تفهمينها
رنا : ودي أسالك و ودي تجاوب بوضوح
خالد و هو خايف من سوالفها:  تفضلي
رنا : مرتين ذليوم غنيت و سمعت اغنيه فيها كلمة احبك وش قصدك
خالد: ولا شي بس اول وحده ما كنت حافظ الا هي و ثاني وحده على طول شغلته و طلعت على طول هي  بس
رنا : بس يا خالد انا تعودت عليك ما تكذب علي و تجاوب بكل وضوح
خالد : جاوبي بيكون الاسبوع الجاي بتفهمين بعدين كل شي
رنا : يعني تحب خطيبتك
خالد : ايه و قد اعترفت لي إخوانها و لي ابوي و اخواني و باقي هي بروح اخطبها و اشوف جوابها
رنا :الله يوفقكم و يتمم لكم على خير
خالد : آمين يارب و اذا احتجتي شي على طول تعالي لي وقولي من ريال اللي ماله نهايه اعجبش فستان او أسواره تعالي لي و قولي ودي و انا بقول لبيه تم و ابشري
هنوف دفته و هي تمشي من جنبه :خلاص تراك زودتها تتغزل حتى في الشارع
خالد : لا بس اعلمها اذا تبغى فلوس بس
نوف قربت منه وبصوت نازل : احس ضاقت يوم انت تكلمت عن حبيبتك وانت تقصده تتوقع تحبك
خالد:  لا ما تحبني بس تخاف احب زوجتي و اهتم فيها أكثر من دلع و هي المحاميه الشخصيه لي دلع
مشو البنات و هم يضحكون على خالد و ميانته و حبه الواضح  ولف خالد و اخذ جواله و دق على عبدالكريم:  يا ابو مشاكل
عبدالكريم ضحك: هلا والله يا ابو المصايب وش بغيت
خالد : ولا شي بس شكرا علمتهم بكلمه جديد تدري رنا صارت تناديني ابو راس مربع بسببك
ضحك عبدالكريم:  لا مو بسببي بسبب انه يوم حلقت شافن راسك
خالد : برسل لكم اللوكيشن تعالو لي خلونا نسولف
ضحك عبدالكريم:  تم جايين لك و انحم مشتاقين
ضحك خالد: انتظركم
قفل منهم و راح الكوفي يطلب قهوته و اخذ جواله و دق على وليد و على طول رد : هلا أمرني
خالد : ما يأمر عليك عدو حبيت اقول لك انه خطبتي يوم السبت إذا أنتو تتواصلون مع احمد قولو له ان خالد في حاجتك
وليد :والله ما اتواصل معه بس يكلم ابوي و ابشر بوصل لي ابوي علم يوصله له
خالد : تسلم يا وليد
قفل من وليد و كان يدعي من كل قلبه انه احمد يجي الخطبه ربع ساعه و جو عبدالكريم و سعود و جلسو على الطاوله : السلام عليكم
خالد : يا هلا  وعليكم السلام 
عبدالكريم:  وش فيك تهوجس
خالد : ولا شي بس اتمنى احمد يجي الخطبه حقتي
سعود : من متى و احمد يتأخر علينا دايم يجي
عبدالكريم:  شكلي بجرب أدق عليه يمكن يرد
خالد : ما اتوقع يرد
عبدالكريم حاول يدق و بعد عاشر مره رد وهو توه صاحي من النوم : هلا أمرني
عبدالكريم:  ما يأمر عليك عدو في سوال عندي واحد ترك اخوياه بدون سبب ليه
احمد : اووه عبدالكريم انا اسف بس ما احب احد يشوفني مكسور و حزين
عبدالكريم:  خالد بيخطب الاسبوع  الجاي نتمنى تكون موجود
احمد : اما و مين بيأخذ
عبدالكريم:  مفاجأه ما اقدر اقول لك لكن تجي و بتشوف
احمد : اي يوم
عبدالكريم:  السبت ان شاءالله
احمد : قول له انا بكون اول الحاضرين بس لا يزعل
خالد : اذا انت موجود ما بزعل
احمد : و انا بكون موجود تبشر  والله
سعود : اسمع وش رايك تجي ذا الليل لان في سوالف كثيره
احمد : ترا اول شي صحيتوني من النوم ثاني شي  تأمروني و كأني واحد من أولادكم
خالد : انا بروح هنوف ترسل
ضحك عبدالكريم: والله على فزتك ذي شكلها رنا اللي ترسل
خالد  :وش اسوي اخوانها وصوني عليها و قالو انتبه لها و لو تحتاج شي اشتره لها اهم شي ما تجيهم ضايقه وانا قد وصيت البنات قلت اهتموا فيه مثل نور يعني صادقوها
عبدالكريم:  احسن شي تسوي عشان ما تحس بالوحده و اذا اخذتها تكون مرتاح لأنها تعرف أهلك و مصادقتنهم
خالد : اي والله يالله مع السلامه
طلع خالد و لف عبدالكريم على جواله و هو يسمع احمد ينادي : لبيه احمد وش فيه 
احمد : خالد اخذ رنا ولا ايش
عبدالكريم:  ايه بيخطبها الأسبوع الجاي و قد صارح اخوانها امس و ذليوم قال لهم بجي يوم السبت بقبيلتي كلها لعيون رنا و قالو انحم في الانتظار و طبعا الكل يدري و موافق ما عاد هي ما تدري عن شي
احمد : اح وش ذا الدراما لذا الدرجه اختفيت مررره
سعود : ايه وترا خالد ضايق عليك مررره
احمد : معليه خالد  انا براضيه و بجي قريب ان شاءالله
عبدالكريم:  ترا ملكة هيثم الجمعه احضر
احمد : ايه قال لي ابوي بس خطبة خالد توي اعلم منكم
عبدالكريم:  ايه توهم الصبح قررو و قبل شوي كلم اهلك و قال لهم يجون و انت معهم