بك اهتَديت

الشهر العاشر

"السؤال الثاني يا مهندس فاطمة التقليدي جداً وبيتسأل في أي interview ، شايفه نفسك فين بعد خمس سنين ؟..."

سكت فاطمة لتفكر ثم إبتسمت بغباء وهي تتخيل نفسها :

_"أنا شايفة نفسي بقبض أكثر واحدة في الشركة دي وشايفة إني عايشة في بيت كبير واسع قدامه جنينه كبيرة ومعايا عربية اروح آخد عشر ألاف جنية كده أجيب لانشون وجبنة رومي "

ضربت كنزي جبهتها بملل من تلك الفتاة التي لا تفكر سواء في المال حتى أنها لم تتعب نفسها وتكذب عليهم بأي شئ يخفي حبها الشديد للمال

_"آخر سؤال ، لما شوفتي الإعلان اللي عن الشركة ايه أكثر حاجة عجبتك وخلتك تيجي تقدمي معانا "

إبتسمت لها فاطمة ونظرت إليها لمدة ثوان ثم قالت :

_"شركة جميلة ومنظمة والمرتب كويس "

حكرت كنزي رأسها بيأس من تلك الفتاة التي لا تستطيع فهمها ، ثم قالت وهي تعطيها الأوراق :

_"بتمنالك تحققي اللي بتتمنيه ربنا معاكِ إتفضلي ورقك ولو في أي حاجة هنرن عليكِ "

أخذت فاطمة الورق وخرجت فسرعان ما قامت مرام من على الأريكة لتذهب إلى كنزي وتقول

_"دورك خلص يا حلوة قومي دوري "

وقفت كنزي بخفة وأصدرت أنين خفيف وهي تمسك بطنها فأمسكتها مرام مسرعة وهي تقول

_"مالك يا كنزي؟..."

تركتها كنزي وتحركت إلى الأريكة وهي تقول :

_"لا ده وجع في البطن خفيف كده من الصبح مفيش حاجة ، دخلي البنت اللي بعديها "
__________
"شايف نفسك فين بعد خمس سنين ؟؟... "

إبتسم له عبدالله إبتسامة هادئة قبل أن ينظر إليه ويفكر لمدة خمس دقائق ثم يقول :

_"إن شاء الله شايف إني هتقبل في الشركة دي وهوصل لمركز كويس فيها أكيد مش هقعد خمس سنين مجرد مهندس بسيط لا حاسس إن حياتي هكملها معاكم هنا ، وشايف إني عايش حياة مسالمة مع مراتي وإبني اللي عنده سنتين دلوقتي "

شعر إسلام بالرضا والسعادة من عبدالله وشعر أيضاً أن الشركة هي من كسبت شخص مثله

_"إيه أكثر حاجة عجبتك في الشركة وخليتك تيجي تقدم معانا لما شوفت الإعلان ؟.. "

_"النظام ، بسم الله ما شاء الله الشركة منظمة وعلى فكرة ده هيخليها شركة ناجحة أنا إشتغلت في شركات كثير قبل كده واللي خلاني أسيب الشغل في كل مرة إن مفيش نظام الشركات كلها مش عايزة تتطور عايزة تقعد زي ما هي طول عمرها لكن أنا شايف إنكم شباب عندكم طموح والشركة هتبقى ناجحة إن شاء الله "