#أمواج_الحياة

جزء2

امواج حياة
مروة _خالد
الحلقة الثانية
نضت صباح على صوت تيليفوني يصوني شفت لقيتها رونق هذي صاحبتي لانتيم تقرا معاي وحتى هي وقفت معاي وقفة تاع رجال في كل طيحة نلقاها باباها يخدم شاف تاع الجدارمية ويسكنو غير حدانا ديما تفوت عليا ونروحو مع بعضانا كل مرة شكون يوصلنا مرة باباها مرة خوها لكبير وسعات كي ميكون حتى واحد نروحو في البيس ،هزيت عليها -واش مزال منضتيش -والله كون معيطتيش منوضش حتى الرفاي نسيت مدرتوش لبارح من الغلبة طحت رقدت ديراكت- ايه حتى انا عرفتك هيا ازربي نوضي وجدي روحك-اسمعي راكي في الدار - بايتة عند خالتي -اك مالا نتلاقاو في لافاك
نوضت ابراهيم وزكرياء باش يوجدو رواحهم هزيت لفراش ورحت للكوزينة نوجد الفطور موالفة ماما تنوض وتنوضني يادرا ليوم علاه منوضتنيش توسوست قلت بلاك كاش مادارلها بابا لبارح اصلا مجاش في حوالو-طبطبت على شمبراها مكانش طليت مكان لا هي لابابا اوووو وين راحت عيطتلها قاتلي رحت عند فوزية(لمرا لي تخدم عندها) -رحتي بكري بصح -ايه عندها عرضة وقاتلي نجي نوجد معاها -اك معليش كوبيت لبست روبة بيضاء وخمار نوار هزيت حوايجي لقيت خاوتي خلصو لفطور خرجنا مع بعض خاطر نفوت على الليسي تاعهم،وانا نمشي لقيت اسامة هذا البوندي تاع الحومة اكثر واحد يدير المشاكل ومن زهري خاوتي دخلو يقراو بقيت نمشي وندعي في ربي ميوصلنيش خاطر موالف يتبلاني بقيت نمشي وندور منين الغاشي مقدرش يقدملي خاطر الدنيا عامرة بصح غير دخلت للزنقة الفارغة حسيت بيه ورايا بدا يصفر ويلوح في الهدرة يالشابة حبسي نهدر معاك برك اعطينا النومرو برك كي محبيتش نحكي معاه محسيت غير بيدو على زندي راني نهدر زينة _اخطيني خير من لي نلم عليك الناس _ياحبي وشكون راح يسمعك هنا _اطلقني قتلك بقيت نجبد في ذراعي بصح محبش يطلقني وبدا يقرب ليا حط وجهو في وجهي واش رايك تعطيني نومرو نتفاهمو بالحسنى خير ملي ندخلك هنا ندي واش حابة ونرميك كي الكلبة _منمدش قتلك واطلقني _اك مالا نتي لي حبيتي بدا يجبد فيا جيهة القاراجات الفارغين وانا نعيط ونجبد في يدي طحت في الارض شفت حجرة هزيت مع وقفني خبطتو بيها للراس خليت الدم يسيح حكم راسو وطاح انا كي شفت الدم خلعت اصلا عندي فوبيا منو غير نشوفو منعرف واش صرالي طيشت الصاك والحوايج ورحت نجري ونقول قتلتو والله قتلتو حتى زدمت في واحد غير طلعت راسي شافني نبكي قالي وشبيك ختي علاه راكي تبكي مهدرتش بقيت نبكي ونقولو قتلتو شفت الدم والله مات _احبسي فهميني شكون هذا لي قتلتي _والله ما كنت ناوية نقتلو بصح هو تعدى عليا وحب ياذيني وانا ضربتو _صحة قوليلي وينو هذا لي ضربتيه درتلو بصبعي وقعدت في الارض