#أمواج_الحياة

جزء10

امواج حياة
مروة_خالد
الحلقة10
قتلو عمري 22قالي الله يبارك بقا مدة يشوف معاي وانا هبطت راسي وسكت قالي مروة شفت معاه سكت مدة وهو يشوف معاي نظرتو عييت نفسرها من بعد شغل فاق مع روحو مسح وجهو وقالي وكتاه تحبي تبداي الخدمة قتلو اليوم _قالي اك وكيما تفاهمنا نهار متقرايش ارواحي برك متفرطيش في قرايتك قتلو اك قالي والخلاص *** يساعدك _قتلو لقيت خدمة ونزيد نتشرط لي تعطيهولي قابلة بيه قتلو تقدر تنعتلي وين نخدم قالي اك ارواحي معاي خرجنا راح للحانوت لي مقابلو بعد شفت مرا في هي لي حاكماتو قالها زهيرة هاهي الامانة لي حكيتلك عليها تهلاي فيها _قاتلو متخممش في عينيا قالي مالا نخليك اتعرفي على زهيرة _هو راح وانا بقيت نحكي مع هاذي زهيرة ڨصرتها حلوة متتشبعش بقينا نحكو من بعد قاتلي ارواحي نعتلك القش وليبري كان حانوت تاع قش النسا يبيعو فيه كلش ڨنادر بيجامات بديت نحفظ في الاسعار ونجاوب في المشترية المهم عجبني الحال واندمجت في الجو لحقت الربعة تاع العشية قاتلي زهيرة هذا هو الوقت لازم نغلقو قتلها علاه البازار يغلق درك؟ قاتلي لا بصح خالد مدايرلنا احنا النسا الربعة اللخر هزيت حوايجي وخليتها قاتلي ندي الحساب لخالد ونجي خرجت هبطت الدروج لقيتو حدا الباب يتكيف حبيت نفوت كلي مشفتوش حتى نلقاه عيط عليا مرووة درت ليه زعما هذاك وين شفتو قتلو اااا مشفتكش قالي ايه باين عليك عديتي حداي حشمت ملقيت واش نهدر قالي المهم عجبك الحال قتلو ايه ومام زهيرة الله يبارك ناس ملاح قالي ايه علبالي حتى انا على هذا حطيتك معاها قالي تروحي وحدك قتلو ايه (البازار جاي في وسط لافيل والديار شوية بعاد عليه لازم بيس ولاطاكسي) قالي هيا مالا نوصلك زربت نطقت قتلو لالا منقدرش _علاه ياك مش راح ناكلك نوصلك برك قتلو لا ماشي قصدي بصح منقدرش نركب مع واحد اسمحلي قالي اك مالا امشي نوصلك على الاقل تركبي لبيس نتهنى عليك ملقيت واش نقولو قالي هيا بدينا نمشو وهو عينيه غير فيا منكذبش مام انا غير نشوف معاه كي نكون معاه نحس روحي طايرة مالغري بيناتنا مواقف قليلة برك بصح نحس باحساس مليح وانا معاه فيقني من سرحتي كي قالي مروة اسامة هذاك النهار واش دارلك تلبكت وليت نتاتأ قتلو اسامة شكون اسامة درت روحي منعرفوش _قالي لي ضربتيه هذاك النهار _قتلو اااا ديرونجاني قالي علبالي بصح واش دارلك بالضبط قتلو حب يدي نومرو تاعي بسيف وانا محبيتش _قالي هذا مكان؟_قتلو ايه محبيتش نحكيلو كلش منعرف علاه خفتو يزعف