#أمواج_الحياة

جزء36

امواج_حياة
مروة_خالد
الحلقة36
بقيت نتلوى من السطر والدم يجري تحتي هو بقا يتفرج فيا طبس عندي مروة وشبيك واش الدم هذا مهدرتش معاه بقيت غير نازع عطاني طريحة الموت بقات الباب طبطب وعمتو وامو يعيطو راح حللهم دخلت عمتو تجري كي شافتني شهقت يخااه واش درت في بنت الناس جات هزتلي راسي قاتلي مروى حنونة وشبيك واش الدم هذا كيف كيف غير نازع السطر غير طبيعي في كرشي قاتلو امو يااا خالد واقيل الطفلة بالحمل ونتا ضربتها كي قاتلو هكا ناض يعيط مّا واش راكي تهدري قاتلو عمتو ايه الطفلة راهي بالحمل اجري اديها للسبيطار لبستلي حجابي وهبطتني هي وهو مقوديني وصلت للسبيطار طافية روحي راح تخرج غير شافتني الطبيبة قاتلهم هادي راهي اونسانت ادوها اجرو دخلتني دارتلي ايكو قاتلي مدام راكي اونسانت عندك شهر ومن بعد قاتلي جيتي وحدك ؟مع راجلي راهو برا قاتلي واش اسمو قتلها خالد راحت عيطتلو جا قاتلو المدام راهي اونسانت عندها شهر تصدم وانا كثر منو قالها ياك راهي لباس مبيها والو قاتلو متخافش راهم لباس من بعد شافت فيا قاتلي مدام عندكم في العايلة لي جابت توام مهدرتش معاها مزلت تحت الصدمة قالها ايه ماماها قاتلي مالا كرشك توامة كي ماماك ناض يعيط قالها توام ؟؟؟!قاتلو ايه توام فرح فرحة متتصوروهاش وانا خبطت راسي بيديا كيفاه توام وانا كنت مقررة نكرهو حتى يطلقني مطلقنيش براسي راح يطلقني بزوج في كرشي ياربي نهار تتعدل حياتي تفنى الدنيا حبستلي النزيف قاتلي تقعدي هنا ساعتين نطمنو عليك وتخرجي بصح لازمك تجيبيها غير فراش حتى وقت لكونترول بقيت ساعتين تما وخرجت خالد طاير بالفرحة وعمتو تباركلي وتعاود انا غير ساكتة وتايهة وصلنا لدار لقيناهم مجموعين في الصالون دخل يجري قالها مّا باركيلي _غير الخير _جاييني توام في الطريق بدات تزغرت وجات تحضن وتسلم سبحان الله مغير الاحوال باركولي كامل حتى نسمعو صوت خبطة درنا نلقاو سلمى مغاشية راحو يجرو ليها مام هو دا قرعة ما وراح يفطنها خليتهم وطلعت لداري قعدت فوق السرير وحكمت راسي ياربي كيفاه ندير واش هاذ المصيبة لي طحت فيها ياربي كان عندي امل نطلق بصح درك محاال وانا منيش مستعدة نعيش في المرار هاد لازمني ندير حاجة وميجوش (اسمحلي ياربي جهلت وياريتني مهدرتش هكا) مروة واش راكي تهدري هكا حرام عليك هذو ولادك استغفر الله ياربي واش ندير ياربي بقيت ندور ونخمم سمعت صوت الباب تحل دخل جا حضني وبقا يشم في شعري قالي ياعمري مغلطتش كي حاربتهم عليك والله تستاهلي كلش درتو على جالك بعدتو عليا ورحت قعدت على السرير قالي مروة مزلتي زعفانة مني_لالا علاه نزعف نتا راجلي لازم تقتلني وانا نسكت ونبلع معنديش الحق نهدر_مروة واش الهدرة هادي واذا على قبيل اسمحيلي الله غالب غرت مقدرتش نسكت عليها كيفاه يهدر معاك وانا واقف وقدام خوتي _ياك مهدرش العيب حمدلي السلامة هذا مكان_لالا نتي مرتي وانا برك عندي حق نحكي معاك منسحق حتى واحد يقدملك_ايه معليش بصح روح عند مرتك راها مريضة متخليهاش_تزعطي فيا_لا بصح حابة نريح