#أمواج_الحياة

جزء19

امواج حياة
مروة_خالد
الحلقة19
يعني نتي راكي تحكي على زواجي؟؟_هاه وعلاه مالا تنفس بارتياح وقالي خلعتيني حسبتها حاجة وحد اخرى وحل الباب هبط تكا على الطوموبيل جبد قارو وبدا يتكيف هبطت عندو قتلو واش من حاجة هادي ولا راك داير ديڨة اخرى ومخبيها عليا شاف معاي جبد جبدة من الدخان وقالي مروة اذا على زواجي مكنتش راح نخبيه عليك صح نورمالمو نصارحك من اللول باش اذا قبلتي ايه واذا مقبلتيش حقك بصح انا حبيت نضمنك اسع _تضمني؟ والله مليحة هاذي وزيد ضامن بلي راح نقبل بيك ياه_وعلاه متقبليش بيا ولا مرانيش قد المقام _لا حشا مقامك بصح منيتك تتوقع مني نقبل براجل شايب قد بابا وزيد مستعمل انا قتلو هكا وهو دور ليا انا قلت اليوم موتي مفيهاش قالي واش قلتي سكت قالي علبالك على الكلمة هادي قادر نديك لهيه وشار على الغابة ونرجعك حتى نتي مستعملة كي قالي هكا متت في بلاصتي الدم راح من وجهي قالي بصح منيش رخيس وحل الباب ركب بقيت غير نشوف فشلت عيط عليا اركبي واش تشوفي قبل ما نتبلى بيك ركبت طريق كامل وهو ساكت ويخبط في روحو وصلني حدا دارنا جيت هابطة تفكرت بلي تتحل غير من برا قتلو اهبط حلي الباب تخنزر فيا وجا حل الباب كي خرجت همسلي في وذني مرتي نحبها ونموت عليها ومستحيل نخدعها بصح غلطتي في الماضي كبيرة ولازم تتصحح وغير نتي لي نديك مشي على زينك بصح ضميري راه يقتل فيا من جيهتكم وراح ركب وطار مفهمت والو واش راه يخرط وكيفاه غير انا لي يدي بسيف الحكاية ولا كيفاه طلعت للدار بدلت درت الغدا تغديت انا وخاوتي اذن الظهر صليت ورحت نريفيزي بصح مقدرتش نركز خلااص زعما واش كان يقصد بهدرتو والله عييت من الالغاز هزيت التيليفون شعلتو باش نعيط لرونق لقيتو راح يتحرق من ليزابال لي دخلولي وكامل من عندو سمانة كامل وهو يعيط ويبعت في الميساجات مروة وينك، تقلقت عليك، كاش ماصرا معاك، علاش راكي تهربي مني فاصيتهم وعيطت لرونق