#أمواج_الحياة

جزء31

امواج حياة
مروة_خالد
الحلقة31
علاه غير لخير واش صرا_ متحوسيش تفهمي مهم اليوم نرجعو للدار ورانا خدامين نسلكو الكرا وحدنا(عيا فيهم خالد باش يحبسو الشونطي محبوش)بصح فهموني واش صرا علاه تبدلتو هكا خالد كاش مادارلكم كاش ماهدر معاكم _نطق ابراهيم مروة خيتي نتي هنا مراناش لاقيين راحتنا دار كبيرة وموالفين غير وحدنا _بصح هنا رانا وحدنا وشكون معانا نطق زكرياء من اللخر راجلك مراناش حاملينو واحمدي ربي مقتلناهش في الطريق _يخااه واش دار علاه هذا كامل _علبالك دارنا اللولة شكون مولاها ولا معلبالكش _وانا وين نعرف مولاها _ياو خالد يا الجايحة _خالد؟خالد لي شراها كيفاه هذا _كون غير جا شراها علبالك راجلك واش دار بابا كانو عندو ديون مع خالد ديون كبار من لي كان يخدم عندو وسي خالد عطا مهلة لبابا كي خلصت علبالك واش دار سيف عليه يكتبلو الدار ولا يشكي بيه وزاد زعطو من الخدمة وجابنا حنا برا مرحمنا مشفق علينا وبابا من نهارها دخل في الطريق العوجة وضيع روحو وضيعنا معاه فهمتي درك نتي راكي متزوجة شيطان
انا بقيت مصدومة بقيت غير نترعد دموع ضببو عينيا والحقد عماني هوما يهدرو وقلبي يزيد يحرق رحت نجري وقفت في الدروج وعيطت خاااااالد الدار تهزت خرجو كامل يجرو عمتو يماه سلمى زهيرة جات يماه وشبيك تعيطي هكا واش صرا بكل يشوفو مصدومين خليتهم وطلعت نجري هادوك الدروج حرقتهم وصلت لقيتو خارج من الباب وشبيك تعيطي هكا هبلتي دزيتو دخل للدار ودخلت قفلت الباب رحت للشومبرة لقيتو جا ورايا وشبييييك مهبولة _دارنا شكون شراها _لونو تخطف واش من دار مفهمتكش _دارنا شكون مولاها _مروة وشبيك واش راكي تهدري وانا وين علبالي مولاها شكون _خاالد اخر مرة نسقسيك صينو انا لي نهدر وتما تندم _راكي تهددي فيا معلباليش داركم شكون مولاها _كيفاه معلبالكش مزلت برك تكذب بابا حكا كلش لخوتي نتا بسبة الديون ديتلو الدار وخرجتنا برا وزعطتو من الخدمة _مروة اركحي نحكيو بالشوية _منحكيش ودرك جاوبني صينو ليوم تخلى الدار صح راهي باسمك _غمض عينيه وقالي ايه باسمي بصح والله يامروة مكان علبالي بقيت نشوف معاه منيش مامنة دموعي يطيحو وحدة ورا ختها شواربي يرجفوا وانا كامل نترعد حتى باش نهدر مقدرتش نطقت بسييف وقتلو نتا؟ نتا هو السبة في هاذ الشي كامل؟ خالد محال نتا دير حاجة كيما هكا محال علبالي بيك حاب تقلقني برك _مروة اصبري نفهمك شوفي راكي تترعدي ارواحي اقعدي ونهدرو _بعدددددد بعدد عليا يدك موسخة متمسنيش بيها كيييفاه كيفاه عطاك قلبك ودرت فينا حاجة كيما هادي كيفاش عطاك قلبك وعذبتنا كامل هذا الوقت علبالك بسبتك شحال من يوم بتت ندعي على بابا ولا معلبالكش كنت حاسباتو شيطان اسع ضهرت نتا ابليس لكبير_يامروة نحلفلك بربي مكنت علبالي مكانش علبالي بيك وبخاوتك وزيد هو لي قالي منحتاجهاش مقاليش عليكم خلاص والله كون جيت عارف مندير هكا _اسكتتتتت عليا اسكت بديت نهز في الحوايج ونخبط لي جات في يدي نخبطها في اللخر هزيت قرعة ريحة تكسرت في كتفو الدم عاد يطير حكم كتفو قتلو هكا باش تحس انا واش حسيت وماما واش حست وواش تعذبت بسبتك الله لاتربحك ان شاء الله والله العظيم نخرجها من قلبك نخلف فيك القديم والجديد والله نعيشك في جحيم تكره النهار لي تزوجتني فيه ومن وقتها نار الحب من جيهة خالد طفات بعد ماكلات كلشي وشعلت في بلاصتها نار الانتقام لي مكانش علبالي بلي راح تحرقنا كامل
بقيت غير نرجف ونهدر وحدي اليوم ندمركم كامل تخلصوها غالية كامل نطقت امو قاتلي هذا كامل على جال دار السكارجي درت ليها اقسم بالله كون مجاتش عمتو بيناتنا غير ندخل فيها بقيت نهدر وحدي والله منخليكم تتهناو ندمركم رحت للكوزينة هزيت موس ورحت للصالو هادوك الفوتيات كامل شرقتهم بالموس قطعتهم كامل هزيت الفاز وخبطت بيه التيليفيزيو راح كل طرف وحدو رحت للكوزينة جبدت الكويزينيار هبطتها وقطعتلها الخيط الفريجيدار هبطتو هوما غير يتفرجو فيا واحد مقدر يقدم كامل خافوني بقات امو تعيط عليه اخرج والله تقتلك المهبولة هادي وهو يقلها ما اخرجو وخلوني نطقت سلمى قاتلو يخاه مهبولة هادي تقتلك نورمال وندور ليها قتلها ليوم نمحيك ارواحي نوريلك المهبولة بنت السكارجي واش دير حكمتها من الشعر ونخبط بالكفوف بالعضان كلبت عليها هي غير تعيط وتخبش فيا ندبتلي يدي كامل تسيح بالدم بصح محسيتش الغل لي في قلبي مبردش وهوما كامل يجبدو فيا والله مقدرولي جاو خوتو بقاو يجبدو فيا ثلاثة رجالة بسيف جبدوني عليها الغل كامل فرغتو فيها داوها وخرجو طحت في الارض نبكي بالشهقة نبكي ونشكي كي الطفلة الصغيرة علاه درت فيا هكا علاه رميتنا برا وخليتنا برا حرام عليك بقيت هكاك وهو يشوف معاي بنظرة شفقة قعد حداي في الارض حاكم راسو ويعيط منيش انا منيش انا السبة هو انا خاطي صح ديت الدار بصح خاطي انا من لي كنت انا لمهبولة ولا هو المهبول يعيط ويقول منيش انا صح ديت الدار بصح ماشي انا السبة هو هو حب يديك يامروة حب يديك عليا وانا مخليتوش مفهمتوش واش راه يخرط وعلمن يهدر بديت نحس في يدي اليسرى توجع قراف وفشلت وبدا السطر يروح لقلبي نحس في العروق يتقطعو من قلبي حكمت قلبي ونعيط من السطر هز راسو شاف معاي وشبيك مروة وقفت وبقيت حاكمة في قلبي نشوف في الدنيا تظلام ونحس في حاجة تهبط من خشمي واقيل رعفت كي حكمني ناض يعيط وشبييييك تترعدي هكا طحت بين يديه بقيت نسمع فيه يقولي يامروة راني خاطيني نوضي والله خاطيني يحاول فيا كي الاولاد بقيت نغمض في عينيا بشوية سمعتو يعيط على خوتو من تما مزدتش فقت

شفتو واش نحبكم هاني بردتلكم قلوبكم وعطيتكم السبب هههههههه بالمقابل زدت هبلتكم زعما شكون لي كان يهدر عليه خالد وواش علاقتو بالموضوع
نسحق القروب يتقلب بالتوقعات صينو مكانش حلقات غدوة