#أمواج_الحياة

جزء45

امواج حياة
مروة خالد
الحلقة الاخيرة
حياتي ماتت وطفات من هذاك النهار المشؤوم خسرت كلش ضربة مرة خسرت خويا وسندي وبردو كتافي للمرة الثانية وخسرت ولادي لي كنت حاطة فيهم امل انو حياتي تتسقم بيهم صح مكنتش حابتهم بصح هوما نحاولي فكرة الطلاق من راسي. خالد من بكري متبدل وبارد معايا وزاد من نهار ماتو لولاد هبل عليا عاد ميحملنيش يقولي وجهك يفكرني فيهم بقيت نحمل ونحمل امو زادت دارت عليا سمعتها تهدر مع خالد تقولو زوج مقدروش يفرحوك بطفل واحد وحدة عاقر ولخرى تسمع الحس تطلعلها لاطونسيون واش دير بيهم طلقهم واتهنا منهم وتزوج الثالثة مدام المشكل ماشي فيك وبلا لكلام لي تلوحهولي هي وحتى خالد وصل يعايرني بمرضي حتى جات النقطة لي فيضت الكاس وحد النهار نحس في روح منيش مليحة قست لاطونسيون لقيتها 17 شربت الدوا ستنيت مدة والحال غير يزيد عليا زدت قستها لقيتها 22 واقيل خلعت كي شفتها طالعة تفابليت خلاص وهي كي تطلعلي راسي يولي راح يطرطق بالسطر ونرعف بزاف عيطت لخالد باش يديني للسبيطار قالي انا مّا عجوزة مجريتش بيها للسبيطار كيما نتي اشربي دوا تريحي وبركاي ما تتماوتي هاذ الجملة لي قالهالي كانت هي الحد الاحمر لي خالد فاتو وعفس عليهومن تما عرفت بلي مبقاتش فيها هزيت لافاليز لميت قشي لبست وعيطت لخالتي تجي ليا شوية جات هي وبنها خرجت من الباب الثاني علبيها مشافونيش تاع دارهم خرجت ميتة قودتني خالتي وبنها هزلي لافاليز داوني ديراكت للسبيطار وتما تصدمت للمرة الالف في حياتي كلاويا في زوج حبسو في جرة لاطونسيون كي حكيت للطبيبة بلي لقيتها 17ومجيتش رخستني قاتلي كيفاه تخلي روحك هكا كلاويك حبسو مدام تعرفي واش معناها حبسو صاي بكيت الدم ومن تما وليت ندير الدياليز (تصفية الكلى) صحتي طاحت لي يشوفني ميعرفنيش جا خالد شحال من مرة يطلب في السماح ويعاود قالي مكنتش في وعيي ومعلباليش واش صرالي ولا واش راني ندير ومكنتش نتعمد نديرلك هكاك وراني فهمت واش بيا اصبري عليا برك نفري اموري ونداوي روحي لاحظتو حتى هو مريض ويبان مش قادر بصح شعرة متحركتش فيا قتلو طلقني وانساني عليك_كيفاه نطلقك مروة مهبولة نتي لي درتو عليك كامل باش نطلقك في اللخر _لمعلوماتك صحتي هاذي لي طاحت لوكان جات في اي حاجة اخرى نغفرلك بصح كي وصلتني لهاد الحالة اذا سمحتلك الله لايسمحلي بقا هكا يروح ويجي مخلا ماجاب اخر مرة جابلي جماعة وجا حكا مع خالي وجابلي امام هدر هدر قالو ولد خالتي الطفلة مش حابتك طلقها واخطيها تقابدو قريب قتلو بعضاهم بقا هذاك الامام ساعة وهو ينصح في اللخر قتلو قولو يطلقني بقيت نستفز فيه باش يطلقني مفهمتش واش صرالي حابة غير يخرج ويخيطني كي كثرت عليه قالي حابة تطلقي اك راكي مطلقة قالو الامام العن الشيطان كيفاه هذا وميجيش وراك في حالة غضب برك وميجيش تخرب دارك قالو راك تشوف هيا حابة هكا وانا منقدرش نسيف روحي عليها وناض راح رفعت عليه دعوة خلع جات عمتو رخستني قاتلي الراجل من راقي لراقي يرقي في روحو باش ينحي الهم عليه وقلبو راح يحبس ونتي هنا تطلقي فيه _يرقي علاه يرقي _كيفاه علاه يرقي الراجل ملغم بالسحورات _ربي يشفيه ويسهل عليه اخطوني ومتزيدوش تجو عندي صاي طاح من قلبي قلو يطلقني ويهنيني من وجهو عيطتلو وانا نموت قالي بركاي ما تتماوتي اشربي الدوا تبراي هذا واش ندير بيه نطلقو ميات مرة ميبردش خاطري ،سقط دعوة الخلع وانا زدت رفعت وحدة بقينا هكا انا وياه حتى غلبتو وطلقني
امواج حياة
مروة_خالد
تابع للحلقة الاخيرة
نهار طلقني قالي راني طلقتك حتى نفري اموري ويتنحا عليك ونرجعك متتامليش بزاف قتلو ان شاء الله لي عليك ديرو رجعلي الدار رحت ليها انا وخويا باسكو منقدرش نقعد عند خالتي وانا في العدة بالنسبة لبابا خرج من الحبس جا طلب منا السماح وقالنا راح يحرق بيانسور متفاجاناش خاطر لي فيه طبة ما تتخبا وهكا كملت حياتي باش نعيش برك لانو من هذاك النهار مروة تدفنت مع ابراهيم لدرك مزلت مخبية هادوك الدراهم ومصرفتهمش شريت منهم مصحف وكل يوم نقرا منو وننويها حسنة عليه هذا وين فهمت علاه قالي ريحة خوك كان حاس بواش راح يصرالو بعد العدة قررت القراية مزدتش رحت حوست على خدمة لقيت خدمة نقري لولاد ليكور خالد في اللول دارلي حالة وكل يوم يفسد عليا بصح مقدرش يحبسني وزيد سمعت بلي راه مريض بعد مدة خطبني ولد خالتي مقبلتش ورفضت رفض قاطع خاطر شعفت من الزواج بصح خممت ولقيت انو حياتي منضيعهاش على خالد هو غلط وانا منبقاش نستنا فيه صغيرة بصغري حابة نعيش حياتي مشي ندفن روحي بالحياة قبلت بيه وخطبني وفتحنا لغدوة صدم عليا خالد للدار مخلاش بالكفريات والسبان ونعمل فيك ونديرلك وبقا يتهدد عليا وعلى اشرف من بعد قالي انا لي مش راجل مخلي لي ميتة عليا ونتبع فيك بصح مكذبوش كي قالو اكويه يعقل عليك ونتي كويتيني يامروة بصح ديري في بالك يامروة اذا تزوجتيه وجهك متزيديش توريهولي وسيرتو معاه خاطر نقتلك وندفنك واذا هذا كامل باش تنتاقمي مني كما قلتي فبصحتك وكيما قلتيلي بالضبط خرجتيها من قلبي بصحتك (ولد خالتي هو اشرف ) دار مادار فضحني في الحومة بصح اشرف مخلانيش وتزوجتو نهار تزوجت عيطتلي رونق في الليل قاتلي خالد راه في السبيطار بقلبو راه كوما قتلها ربي يشفيه ومتزيديش تجيبيلي خبارو بالنسبة لزكريا راه مع الباك لاتي من موتت ابراهيم هو اكثر واحد تضرر خاطر توام وقرااب لبعضاهم ومشي ساهلة عليه
بالنسبة لخالد نهار لي شفتو كذبت لكان هذا خالد شيااان ويبان تعباااان يمشي بسيف كي شفتو حسيت احساس مشي حب لالا خاطر حبي لخالد مات هاذي شحال بصح شفقة شفقت عليه وشفقت على روحي في زوج منستاهلوش النهاية هادي لزوج حبينا بعضانا وتمنينا بعضانا منكذبش خالد من بعدو مزدتش حبيت ولوكان مشي الشي لي دارو بلاك راني معاه لدرك ورانا مهنيين وبلاك صح بيه السحر واذا صح فلي دارو الله لاتربحو ان شاء الله بصح الدنيا كان رايها راي اخر وفرقتنا على بعضانا وخلاتنا انا بلاك تزوجت وتجاوزت بصح خالد حسب واش سمعت مزال في المنتصف المميت ماقدر يقدم مقدر يرجع وبلاك اكثر حاجة حارقتو انو لي دارو مشي بيدو وخارج عن نطاقو
درت عملية على الكلية تبرعلي بيها اشرف لي وقف معاي وقفة راجل تاع الصح كان معاي في كل موقف وكل لحظة عمرو خلاني ولا حسسني بنقص ولاضعف بالعكس نعم الرجل ونعم الزوج وحياتي معاه هانية الحمد لله ادعولي برك بالذرية
هاذي هيا قصتي لي كانت كلها امواج تديني وتجيبني كيما تحب ونستعرف بلي غلبتني بصح الله غالب كلشي مقدر ومكتوب
النهاية...