#أمواج_الحياة

جزء23

امواج حياة
مروة_خالد
الحلقة23
تحبني؟!!! على هاذ الكلمة مخي تحرق صاي من بكري طايحة وزدت تجرجرت بصح محبيتش نبينلو قتلو اهيه والسبب الثاني_نتي الحكاية كاملة شديتي منها غير السبب الثاني_باسكو علبالي بلي السبب الثاني هو الاصل وهادي تاع نحبك غير هدرة راك تضمن فيا بيها كيما قلت نتا_مروة انا منيش ذراري باش نبقا نلعب ببنات الناس كي نقلك نحبك يعني نحبك صح مرانيش نتمسخر وصح كاين سبب ثاني بصح ميهمش المهم والاهم اني نحبك وهذا يكفي بالنسبة لمرتي متخميش عليها انا علبالي واش راني ندير وعلبالي مليح مشاعري مرانيش مراهق ومام نتي نضن قبولك بيا راح يفيدك في بزاف حوايج منهم خاوتك لي لكان يكملو هكذا راح يضيعو مهما كانو متربيين وعاقلين عمرهم صعيب وولاد لحرام بزاف_تسما على حسابك هدرتك الزواج هذا زواج مصلحة _لا اله الا الله ياطفلة وشبيك نجيك منا تروحيلي منهيه وشبيك هكذا خايفة وهاربة تقول مديك نعدمك ماشي نتزوجك_صاي خالد خليلي شوية وقت نخم فيه _ايه بصح مشي تخممي راح نعطيك وقت تقنعي فيه لانو فكرة الزواج مديك مديك وتفاهمت مع خالك نهار الجمعة ان شاء الله نجي نديرو الخطبة والفاتحة _ وشنوووو تفاهمتو بلا رايي راح تشري بقرة؟ مروة انا عييت من الشرح كي تفهمي وتقنعي وتولي تخممي كي لعباد عيطيلي ونهار الجمعة ان شاء الله نزيدو نحكو كي نتلاقاو وكوبا خلاني ناكل في روحي ماكلة وخالي اللي يخلي دارو هذا وين فاق بلي عندو ولاد اخت والله حقدت عليه من بكري ودرك زدت كلبت عليه كنت راح نعيط نخلطها معاه بصح بقات هدرت خالد دور في راسي من جيهة عندو الحق صح انا نحبو وحبي هذا مالغري مصارحتوش بيه مفهمتش كيفاه فاقلو يعني انا مام حبيتو بصح بيني بين روحي لدرجة مشفتش لفارق العمر وكون معرفتش بلي متزوج نقبل بصح فكرة اني نخرب دار ولية مقدرتش نقنع بيها مهما كان راني مام انا ولية والدليل كي عرفت بزواجو جبدت روحي بصح خاوتي تاع صح تعبوني ليامات هادو اني نشوف فيهم راح يضيعوا يدورو غير مع الجمايع لي متعجبش وليت منقدرش نتحكم فيهم ابراهيم بلاك شوية بصح زكرياء راه غير يزيد صح كي نهدر معاهم راسهم ميهزوهش مشي خوف وانما حشمة مني بصح باش نتحكم فيهم ولا على الاقل نعسهم مكانش كيفاه بقيت مع تخمامي في اللخر استنجت قراري لي مكانش رجعة فيه
الصباح نضت بكري نوضت خاوتي يقراو هوما راحو وانا هزيت تيليفون عيطت لخالد قتلو باش يعطيني كونجي ليامات هادو باش نوجد للخطبة _شفتي كي تخمي بعقلك كيفاش تولي مالا فوتي عليا من بعد نعطيك دراهم اشري واش خاصك_وعلاه شفتني في الهلال الاحمر نطلب حمد لله عندي شهريتي مخاصنيش _مزلتي برك لسانك طويل انا قلت تسڨمتي وليتي تخمي مليح ظاهر زدتي هبلتي _ايا خليني ماش وقت مناقشة عندي خدمة وكوبيت عليه عيطت لرونق حكيتلها بلي جاي يخطبني فرحتلي وقاتلي دقيقة نكون عندك (القراية مراناش نروحو باسكو صراو مشاكل في الاقامة ولا حاجة المهم الطلبة دايرين اضراب) شوية لقيتها جات مع يماها سلمت عليهم شكرتها لي جات _بوه عليك امشي امشي ياك زعما خواتات ولا بطلنا _قاتلي يماها الله غالب انا منيش تاع ميناج كيفكم جبتلكم دوزان القاطو ونبدعلكم هنا _خالتي كون غير مشقيتيش روحك كنت غدوة راح ندير _انا نعرف يمات لعروسة لي دار لقاطو وتبسمت معاي سلمت عليها قتلها تعيشيلي
بدينا في الميناج هاذي نفيضة هادا تسياق هذا غسيل حوايج مهم ميناج بنكهة العيد 😂وامها دير في القاطو في الكوزينة من لي بدينا على 9تاع الصباح حتى اذن العصر (هي صح الدار لي كاريينها ماشي كبيرة لهديك الدرجة بصح مليحة مخدومة وزيد نقيناها على اصولها) خلصنا كلشي فينا مكسر حطينا قهوة العصر وبقينا مڨصرين نحكيو على الخطبة وواش نوجد