#أمواج_الحياة

جزء24

امواج حياة
مروة_خالد
الحلقة 24
قاتلي رونق غدوة نخرجوا انا وياك نخيروا حاجة تلبسيها _ايه ان شاء الله قعدوا شوية معاي كي دخلو زكرياء وابراهيم روحو واش الدنيا اي تلمع والقاطوات غير لخير كاش عرس_شوفو مقتلكمش الصباح بالجمعة ان شاء الله جاين يخطبوني(هدرتها وانا ميتة حشمة وفي نفس الوقت غايضتني روحي هذا حال لي بلا والدين)_يخطبوك؟ شكون هذا _خالد لي نخدم عندو حلو فامهم خالد؟؟_ايه خالد_بصح مروة خالد كبير عليك بزااف_ايه عادي واش فيها العمر مشي عيب ونزيدكم حاجة راه متزوج نطق زكرياء كيييفاه متزوج علاه تدي شايب وزيد متزوج بايرة نتي ولا مخصوصة عقل_زكرياء احشم واستعقل وزيد نتا علاه تحوس عليه ياك انا لي راح نديه _لا انا ختي منمدهاش لمزوج وكبير _نتا واش المشكل تاعك مفهمتش متزوج ولا مطلق كبير ولا صغير ياربي حتى مشلول انا قابلة بيه_ايه وشكون الوصي تاعك _خالي الطاهر كي قتلو هكا ناض يضحك خالي ياه والله تامني بربي نسيت بلي عندي خالي _الله غالب كون مجاش لازم منجيبو منخبروا زكرياء راح يخبط في روحو وابراهيم قالي مروة انا تاني معجبنيش لحال بصح الله غالب حياتك هاذي ونتي حرة فيها ربي يهنيك وخرج ياربي وشبيهم هاذو ميفهموش انا راح ندير حاجة فوق جهدي غير على جالهم في اللخر يقولولي مراناش قابلين ويلوموني رحت للبيت لقيتهم رقدو وليت فرشت في الصالون ورقدت لغدوة خرجت مع رونق شريت روب كافطون في البلو غوا وصابو عراسي سامبل شوية اكسسوارات وروحت
وصل نهار الجمعة نضت بكري عقبت نشافة خفيفة ودخلت دوشت نظفت روحي مليح مليح هادو ماسكات هادو مرطبات المهم البدوع كامل جربتو خرجت نشفت شعري اصلا رطب جات رونق وامها وجدنا سينية وعدلناها قاتلي رونق هيا نوجدك جبدتلي شعري لميت نص ونص طلقتو دارتلي مكياج خفيف لبست حتى لقيتها مها دخلت بدات تصلي على النبي وتسمي جابتلي سنسلة ذهي وفلايكها وقورمات تاعها قاتلي هاذو قلت كي تتزوج بنتي نمدهملها وهاهي راح تتزوج _ياخالتي بزاف عليك هكا وزيد هادو تاعك نورمالمو من حق رونق _وعلاه من حق رونق قتلك نويتهم لبنتي غير اذا شايفتني برانية عليك _لا حشا من نهار توفات ماما لقيتك نتي كي تفكرت ماما الدمعة هبطتلي مسحتهالي قاتلي ايا ليوم نزغرتو ماشي نبكيو طبطب الباب راحت رونق تحل(خوتي خرجو من الصباح راحو يخدمو قالولي كي يقرب لوقت نجو) لقيت خالتي ومرت خالي دخلو سلمت عليهم خالتي كنت نحسبها هي لي توقف معاي اسع جات منها من البرانية سقسيتها على خالي قاتلي او برا في الصالون كي لقا النسا حشم يدخل رحت سلمت عليه برك وخرج قالي ندور شوية حتى يقرب لوقت شوية جاو خاوتي مع خالي دوشو لبسو وبقاو مع خالي في الصالون وانا بقيت مع النسا في البيت نحكي بصح قلبي يضرب في الالف نخمم في المصير لي حطيت فيه روحي واسكو هذا هو الصح ولا لالا غير رونق لي حاسة بيا ساعة ساعة تمسح على ظهري وتتكا على يدي باش طمني شوية وسمعنا لاصونات برا جرينا كامل نطلو لقيتهم زوج طاكسيات هبط منها هو لابس جين نوار وشيميزي بيضاء وصباط نوار دالي عقلي منكذبش زادو هبطو زوج نسا كبار وزوج نسا كي ركزت معاهم لقيت فيهم زهيرة اووو زهيرة واش دير معاهم تخلطولي لخيوط خرجو هوما يستقبلوهم الرجال استقبلهم خالي في الصالون والنسا دخلوهم لبيت القعاد وانا بقيت في الشمبرة تاع خوتي