ငွေရောင်လေး၏ စိတ်ဆင်းရဲစရာ အတွေ့အကြုံကို သိရှိပြီးနောက် ဝမ်လင်းက အချိန်အတော်ကြာ စကားမပြောနိုင်ခဲ့ပေ။
အားလုံးကို ခြုံကြည့်လိုက်လျှင် ငွေရောင်လေးက သူတော်စင်သားရဲ ဖြစ်သော်လည်း ရိုးအလွန်းသည်။
နေ့ခင်းကြောင်တောင် လက်ကောက်ဝတ်ကို ဖြတ်ပြီး သွေးထွက်နေသည်ကို မည်သူမှ သတိမထားမိမှသာ ထူးဆန်းနေလိမ့်မည် မဟုတ်လော။
အကယ်၍ သူသာ မမြင်နိုင်သော အစီအရင် သို့မဟုတ် နယ်နိမိတ် စည်းတစ်ခုကို သတ်မှတ်ခဲ့မည်ဆိုလျှင် ဤကဲ့သို့ ကိစ္စများ ဖြစ်လာလိမ့်မည် မဟုတ်ပေ။
ထင်မှတ်မထားသော ဤအဖြစ်အပျက်ကြောင့် သူတော်စင် သားရဲသွေးက နှစ်ရက်မျှ နှောင့်နှေးသွားခဲ့သည်။
ဝမ်လင်းက သူ့စိတ်ထဲတွင် သက်ပြင်းချမိလိုက်သော်လည်း အမှန်စင်စစ် သားရဲသွေးကို အရေးတကြီး မလိုအပ်သေးပေ။
ထွင်ထျန်းဟာ၏ မူလဝိညာဥ်က ၎င်း၏ လက်ရှိခန္ဓာကိုယ်နှင့် ပေါင်းစည်းပြီးနောက်တွင် လိုက်လျောညီထွေမှုရှိအောင် ကာလရှည်ကြာစွာ ပြုလုပ်ခဲ့ရသည်။
နတ်ဆိုးဘုရင် နှလုံးသားကျမ်းကို ကျင့်ကြံပြီးနောက် အိပ်စက်ခြင်းကို အလွန်အမင်း နှစ်သက်သည့် လက္ခဏာများ ပြသလာခြင်းမှာ ၎င်း၏ ခန္ဓာကိုယ်နှင့် လိုက်လျောညီထွေမှု သိပ်မရှိသည့် လက္ခဏာတစ်ရပ် ဖြစ်သည်။
သူတော်စင် သားရဲသွေးသည် ခန္ဓာကိုယ်နှင့် စိတ်ဝိညာဉ်ကို တစ်ခုနှင့်တစ်ခု လိုက်လျောညီထွေမှု ရှိရန် လိုအပ်သည့်အချိန်ကို သိသိသာသာ လျှော့ချနိုင်သည့် ဓာတ်ကူပစ္စည်း တစ်ခုကဲ့သို့ လုပ်ဆောင်နိုင်၏။
၎င်းက ထွင်ထျန်းဟာ အတွက် ထူးခြားသော အခြေအနေမဟုတ်ပေ။
ဝိညာဉ်တစ်ခုက အသစ်စက်စက် ခန္ဓာကိုယ်တစ်ခု ထဲသို့ ဝင်ရောက်သည့် အခါတိုင်းတွင် အချိန်တစ်ခုတော့ လိုအပ်မည်သာ ဖြစ်သည်။
မိစ္ဆာအင်ပါယာ ကွာဖီက အရိပ်အဖွဲ့ခေါင်းဆောင်၏ ခန္ဓာကိုယ်ကို ဌားရမ်းစဥ် သို့မဟုတ် အစားအသောက် ပို့ဆောင်ရေးသမားများ၏ ဝိညာဥ်များကို ခန္ဓာကိုယ်မှ ဆွဲထုတ်သော ဖြစ်စဥ်များတွင်လည်း ဤကိစ္စကို ရှောင်လွှဲ၍ မရနိုင်ပေ။
