الحلقه { 31 }
.
.
كانت في المربوعه وشاده مكنسه وتكنس تمت وفتحت الباب وطلعت وانخلعت لما لقت اسامه قدامها
اسامه( انصدم بوجوده ) : كيف حالك؟
ناريمان( ثوثرت بوجوده وقلبها صار ينبض بقوة ) : ب بخير وانت
اسامه( ببتسامه) : بخير الحمد لله كيف حال خالتي
ناريمان: ت تمام
اسامه: نوري قعد ؟
ناريمان: اه اي لا هو مشى مع صاحبه
اسامه( ببتسامه ) : اها نسحاب قعد كان جا قوليله يكلمني
ناريمان( ف خاطرها ولله يعدمني كان قلتله اسامه جا ويبيك) : به
اسامه: شن اخبار الكلية معاك
ناريمان: الحمد لله تمام
اسامه: اذا ضايقك اي حد بس قوليلي
ناريمان( ببتسامه حب) : ان شاء لله
اسامه( ابتسملها) : بتوفيق يااارب بسلامه ( مشى)
ناريمان ( اااه ياقلبي اسااااامه نحبببببك نحبببببك اااه من قلبي يلي ينبض بحبك 💓 امتى بس بتحس فيا امتى)
.....
في اليل في مربوعه مصعب
فواز( حاط ايده ع كتف مروان) : مروان هدي روحك
مروان( منزل راسه وحاط ايديه ع راسه) : اااخ كييف نهدى كيييف
مصعب: كل شي تو ينحل
مروان( رفع راسه وشافه) : قول كل شي انتهى خلاااص هي واثقه اني نخون فيها
مصعب: مروان قول الصدق انت خنتها؟؟
مروان: جعلني نمووت تو كان درتها وقسم بالله ماخنتها ولا بحياتي كلمت بنت غيرها ابدااا .. ياجماعه انا نحب ندى نحبهاا من صغري ولله ولله بحياتي ماخنتها حتى بتفكيري ولله.. وماعرفت شن ندير باش تصدقتي ولله انجنيييت كيييف تشك فيا كيييف؟
فواز: لازم تفهم منها كيف يعني رقمك عند البنت وهي متأكده انه رقمك ولا كيف ؟؟
مروان( بحزن) : ماتردش عليا وع اتصالاتي ولا رسائلي .. ( دمعوا عيونه) : نخااف تضيع من ايدي وتوافق علي يخطب فيها قبل ماتصدقني تربحوووا ياجماعه الخير دبرولي حل ولله كان وافقت ع غيري نموووت ولله ننجنن
فواز( بعصبيه): لو تبي ولله نمشيلها نخليها غصب ترد عليك وشن توافق ماتوافق ساهله هي عندها تزعل توافق ع غيرك وين حب السنين ووين ال
مصعب( قطع فواز مايبيه يكمل ) : اه اسمع ندى بس تهدد فيك ومستحيل توافق ع غيرك ( وفنص ف فواز بغيض)
فواز( تدارك خطأه) : اي اي ندى مستحيل توافق
مروان( بضيق) : بس كيييييف نقنعها كييييف ( شاف لمصعب) : تربح ياولد عمي كلم خلود اكيد تعرف شن صار لان ندى تحكيلها كل شي
