الحلقة{ 62 }
.
.
وقت المغرب
عند البنات
يغيروا ف دبشهم ويساوو ف شعرهم
تغريد( مقعمزه وحاطه ايدها ع خدها وتشوفلهم وهي سرحانه ف عالم تاني )
اريام( يساوى ف شعرها ولفت لخلود ومنار) : انت واياها نوضوا ساوو ارواحكم واسكتو شن قلبتوها عزاء قبل حتى ماتجي العروس
منار( تمسح ف دموعها) : مانقدرش نتحمل نشوفها اااه
خلود( تبكي) : ولا انا مانقدرش مش طالعه كان جت
جودي: ووك منك انت واياها خلاص عاد المفروض تفرحولها واخيرا تزوجت مش تبكوا
منار( تبكي) : هي بتسافر بتقعد 4 سنوات كيف بنقدرو بلاها
خلود( ضربت منار) : اسكتي معش تزيديني
جودي: ان شاء لله تتزوجوا بعدها وتعيشوا حياتكم ولين تروح هي
خلود( تبكي) : المفروض تزوجنا ف نفس اليوم باش مافيش وحده تبكي ع الثانية
اريام: هههه نوضوا نعرسوكم تو انت لوسيم وهذه نحذفوها لاول واحد نشوفوه
منار : لسامي احذفوها
خلود( شهقت وضربتها) : تااااافهااااا حمااارة تفي عليك ( بدت تضرب فيها والبنات يضحكوا )
جودي( لفت لتغريد يلي سرحانه وسكتت وقربت منها وقعمزت جنبها) : غروده خيرك
تغريد( ابتسمت ) : ولا شي
اريام: بالك حتى هي حزينه ع ندى ولا تبي تتزوج معاها ههه (سكتت لما شافت ان تغريد اضايقت وقربت منها وقعمزت جنبها) : صاير شي
تغريد( ابتسمت ووقفت) : خيركم ماصاير شي بس تفكر ف اعراسكم كلكم كيف بنفوتها وقداش بنبكي ع وحده ههههه
جودي: ان شاء لله قبلنا تتزوجي باش ماتبكي ع حد لان يلي تتزوج تفرح لصاحبتها مش تبكي زي العوانس هههه
اريام: هههه صدقتي فيها
تغريد( حست بالم يعتصرها ومشت وقفت ع المراية ) : يلا وتيتوا اطلعوا لناس لين نوتي روحي ونجيكم
خلود( وقفت) : هي منورة تعالي نهيجو قبل ماتجي ندوش ويبدا البكاء الا ارادي (طلعوا)
جودي: انا بنمشي نشوف رهف وبنوتتها وانتم الحقوا ( طلعت)
تغريد( تتجاهل ف نظرات اريام يلي تشوفلها )
اريام( قربت واتكت ع الدولاب وشافت لتغريد يلي تشوف للمراية) : صاير شيء
تغريد: لا شن بيصير يعني
اريام : فواز كيف حاله
تغريد( كلما حد يجيب سيرته تحس بالم حاااااد ف قلبها) : هه شن مش عارفه حاله وانتم ديما تراسلوا ف بعض
