الحلقة(63)
.
.
يدور بسيارته وحاس الدنيا ضايقه بيه فكر يمشي لفواز بس عارف لو مشاله بيقتله .. قرر يمشي لمصعب اكيد عنده اخبار اتصل بيه يسأل وين هو مرات ف الكلية مع الشباب .. قاله مصعب انه ف المحل مشاله ونزل وسلم عليه وقعمز ع الكرسي وماعرف كيف يبدا
مصعب( قعمز جنبه ع الكرسي) : خيرك فيك شيء
رضا( شاف للمحل وكان فاضي لف لمصعب) : تعرف من يلي بيخطب تغريد وفواز بيغصبها عليه
مصعب( بصدمه) : كيف ؟؟ من ؟؟ يعني من وين سمعت؟ كذب مرات
رضا( بالم مرير) : مش كذب وهي قالت
مصعب: مش عارف الحق بعدين علاش بيغصبها
رضا( بضيق) : قصه طويلة ومش مهم تعرفها المهم متزالين من بعض وهو يبي يغصبها
مصعب: وانا نقول خيره متغير حتى سألته قال تدلع عليا مانسحاب وصل بيه الزعل لين يغصبها
رضا( بغيض) : تو يشوووف هالفواز كل شي ولا يغصبها ع حد المهم اعرف من هو يلي بيخطبها
مصعب : شن ناوي ادير
رضا( بغضب شديد ) : ناوي نحارب العالم كله المهم هي ليا
مصعب : ان شاء لله تكون ليك يااارب
رضا: اميييين
.
.
.
في الكلية
سامي( مقعمز ف الساحه ) :فواز
فواز : شن
سامي: كيف حال تغريد
فواز( بعصبيه) : وانت شن تبي فيها
سامي : بنت خالتي وتهمني
فواز( بعصبيه) : بنت خالتك تنساها نهائيا المفروض تعرف انكم كبرتوا ومش زي قبل مافيش داعي للكلام والهدرزه مع بعض والسهر ف الليل مع بعض ولا اتصالات ولا لقاءات كل هذا ممنووووع ساااامع
سامي( مصدوووم) : انت خيرك تغريد عارف انها زي اختي
فواز( بعصبيه) : كلمه زي اختي تنساها سااامع مافي قانون يحلل هالشي بمسمى زي اختي
سامي( وقف معصب) : شايفك تحلل وتحرم وانت مش حرااام يلي ادير فيه تضحك للبنات وتحذف ف الكلام وتناشب وتعلقهم فيك وانت تبي بنت عمتك وتكلم فيها ومش خااطبها لتو .. وتحاسب فينا ع مشاعر الاخوة يلي بينا اسسسسمع زين مهما صار تغريد راااه اختي انا ماعندي خوااات وتغريد اختي
فواز( وقف معصب) : قلتلك لا تقول اختي مرااات يصير شي وتصير حلاالك
سامي( بصدمه) : حلالي
فواز( بغيض) : اي تخطبها وتتزوجوا
سامي( بصدمه) : نتزوج تغريد
فواز( بهزوة) : تطمن لو خطبتها ولله مانوافق عليك وتموت ولا توصل فيها لان عارف افكارك العوجاء يمكن توافق باش تنقدها ولا تحلمو بهذا الشي ( ضرب الكرسي ومشى)
