أحببتها رغم كل شيء 🥰

الحلقة ١١

الحلقة الحادية عشر
#احببتها_رغم_كل_شيء
#بوسي_مصطفي
....................
تدخل وداد البلكونة/بتعمل ايه هنا يا واد؟
اياد/ مفيش يا تيته كنت بشم شوية هوا.
وداد تنظر لسهر/ طيب أدخل ذاكرلك كلمتين ينفعوك بدل طولت اللسان بتاعتك دي.
سهر / تصبحو ع خير.
وتدخل سهر جوه.
وداد بمكر/ مالك يا واد احوالك كده مش عجباني اليومين دول تكونش بتحب ؟!
اياد/ هو الحب عيب يا تيته؟
وداد/ لأ مش عيب يا قلب تيته بس مش لما تخلص تعليمك الأول؟
اياد/ هو يعني مش ممكن اخطب دلوقتي وبعد كده بقى...
تقاطعه وداد/ اوعى يا واد يكون عينك من بنت خالتك؟
اياد/ وفيها ايه يا تيته دي سهر..
تقاطعه وداد بغضب/ دي لو آخر واحدة في الدنيا إياك تفكر فيها وامشي بقى من قدامي حرقت دمي.
..........
اياد / بعد اذنك  عندي مذاكرة.
يدخل اياد اوضته.
منى خارجة من الغرفة تنادي / ماما...ماما انتي فين؟
وداد/ انا هنا يا بنتي في البلكونة.
منى تقرب من البلكونة ببتسامة / بتعملي ايه يا ماما هنا بتشمي هوا؟
وداد/ و ماشمش هوا ليه؟!
تعالي يا منى عايزة أتكلم معاكي.
منى / حاضر اتفضلي يا ست الكل انا سمعاكي بس اوعى تقوليلي امسكي ايدك  ف المصاريف لاني خلاص تعبت ومش عارفة اعمل ايه كل مظبطها من هنا الاقي باب تاني اتفتح والفلوس يدوب بتكفي بالعافية.
وداد/ لأ الكلام اللي هقولهولك أهم من مصروف البيت.
منى / خير يا ماما.
وداد/ انا عايزاكي تخلي بالك من ولادك اكتر من كده وبالذات اياد.
منى / ليه يا ماما؟
انا ولادي شايفاهم كويسين وكل واحد فيهم واخد باله من نفسه ومن دراسته وشغله
ومفيش واحد فيهم بيشرب سيجارة.
وداد / ولادك كبروا وكمان سهر كبرت.
منى / تاني يا ماما!
وداد / اسمعي بس ابنك عايز يخطب سهر.
منى / اياد؟ !...هههههههههههه
وداد/ بتضحكي ع ايه ؟!
منى / ع لعب العيال
خطوبة ايه بس يا ماما. ..مش لما يخلص دراسته الأول ويشتغل.
وداد/ ماهو دا اللي انا بتكلم فيه
ابنك طالما حط البت ف دماغة يبقى خلاص.
منى بقلق/ تقصدي ايه يا ماما؟
وداد/ أقصد إن قعاد سهر هنا وسط ولادك غلط وممكن يعنى.
منى / لا يا ماما انا ابني متربي.
وداد/ و الشيطان بقي نعمل فيه ايه؟
منى / هتقلقيني ليه بس؟
أهو كل اللي احنا فيه ده من تحت راس سهير.
وداد/ خلي بالك من ولادك وخلاص اديني قولتلك.
...........
رجعنا للحاضر
في الطريق.
سهير / خلاص يا ابني أقف هنا ملوش لزوم تدخل جوه.
آسر / ازاي بس يا طنط انا هوصلك لباب الشقة.
سهير/ طيب خلاص أقف هنا.
يوقف آسر.
سهير/ متشكرة ياابني اتفضل بقى فوق تشربوا حاجة.
أسر وهو بينظر ل سهر/ معلش بقي يا طنط مرة تانية.. كنا عايزين نطلع مع حضرتك بس حضرتك شايفة سهر نايمه .
سهير/ طيب ياابني...تصبح ع خير.
أسر / وحضرتك من أهل الخير .
تطلع سهير شقتها.
آسر ينزل من العربية يصحي سهر.
اسر/ سهر. ..سهر حبيبتي اصحى
تصحي سهر بفزع/ ايه ؟!!!في ايه؟
اسر/ متتخضيش.. تعالى اركبي قدام.
سهر وهي بتفتح عينها/ هي ماما نزلت؟
اسر/اه لسه نازله.... احنا قدام العمارة.
سهر تنزل وتقعد قدام جنب أسر.
ينظر ليها ببتسامة ويُقبل يدها
تبتسم سهر ابتسامة خفيفة ثم تغمض عينها
آسر / لأ كفاية نوم... كده مفيهاش نوم الليلة!
سهر/ هو انا نمت كتير كده؟!
آسر / يوووه احسبيها بقى من وقت ماخرجنا من العزا لحد دلوقت شوفي قد ايه؟
......................
انتي ايدك متلجه ليه كده
انتي بردانه؟
تهز سهر رأسها وتقرب تضع رأسها ع صدر آسر.
آسر / سهر كده مش هعرف أركز في الطريق.
تبتعد سهر وتميل برأسها على الكرسي.
آسر / معلش يا حبيبتي انتي عارفة احنا بليل والطريق محتاج تركيز.
سهر أغمضت عينها و نامت.
.........
في شقة منى.
منى / خلاص بقي يا سلمى مش وقته الكلام ده.
سلمى / ماما حضرتك مسمعتيش مامته قالت ايه؟!
عمار/ ماتهدي بقي هو دا وقته الناس وانتي كل
همك إن الفرح هيتأجل!
سلمى / دي قالت إن مفيش فرح خالص حتي لو بعد خمس سنين يعني عاوزة تنكد علينا.
منى / وليه  الهيصه يا بنتي!؟.... تكاليف ع الفاضي.
سلمى / ماشي موافقة بس دا يكون قريب
لكن دي قالت مفيش فرح قبل سنه وكمان من غير هيصه ولا أي حاجة.
عمار/ مش المهم انكو تتجوزوا...يبقى خلاص متزعلهمش بقي الناس معذورة.
سلمى / يعني انا مليش نفس افرح زي البنات.
عمار/ جينا للهايفة. ..عايزة تعملي زي البنات مش مهم مشاعر خطيبك؟!
يلا يا علا هاتي الولاد خلينا نروح.
منى / اقعد ياابني نتعشا مع بعض.
عمار/ لا يا ماما الوقت اتأخر خر وعندي مقابلة بكره الصبح ف المدرسة. ..ادعيلي.
منى بفرحه/ بجد! !!...دعيالك يا نور عيني.
تدخل سلمى غرفتها تتصل بسهر.
......
سهر و آسر داخلين من باب الفيلا.
أسر / سلام عليكم.
ملك ودولت يرددوا/ وعليكم السلام.
ملك/ ايه ياابني اللي اخرك لحد دلوقت؟!
اسر/ كنا بنعزي في واحد قريبنا.
دولت بقلق/ مين يا أسر؟
اسر/ دا يبقي حما بنت خالة سهر
ملك / يعني قريب سهر مش قريبنا  احنا أبقى وضح متوقعش قلبنا.
تليفون سهر يرن / بعد اذنكو.
تطلع سهر الغرفة
سهر/ تمام ...لسه داخله حالا
ايه يا سلمي مال صوتك لسه زعلانه ولا ايه؟
سلمى / انا مخنوقه اوي يا سهر ومحدش هنا حاسس بيه.
سهر/ اكيد علشان ميعاد الفرح اللي اتأجل.
سلمى / هموت يا سهر بجد...مش عارفةاعمل ايه؟
سهر/ هتعملي ايه يعني؟ !...اصبري.
سلمى / صبرت كتير. ..خمس سنين وانا ع الحال ده وخلاص جبت أخرى.
سهر/ ماهو مفيش حل تاني.
سلمى / مامته شكلها كده عايزة تفركش الجوازه.
سهر/ لا يا بنتي متفهميهاش غلط هي بس حزينه علي وفاة جوزها.
سلمى / يعني عاجبك اللي بيحصل ده؟
يدخل أسر ببتسامة يقرب من سهر ويطبع قُبله
على خدها.
سلمى / ايه ده يا سهر؟
سهر باضطراب / لا ابدا مفيش حاجة.
يكررها تاني وبهمس/ مين؟
سلمى / خلاص اقفلي يا سهر
سهر/ لا يا حبيبتي انا سمعاكي كملي.
سلمى / لا خلاص ...الظاهر أسر جنبك...سلام وهكلمك بكره
سهر/ طيب تصبحي علي خير.
تقفل سهر لتنفعل/ ايه دا يا أسر احرجتني.
آسر ببتسامة/ وسلمى بتتصل بيكي ليه انتوا مكونتوش مع بعض من شوية؟!
سهر/ أصلها مضايقة شوية.
أسر / علشان الفرح هيتأجل؟!
سهر/ مين اللي قالك؟!
آسر / انتي يا حبيبتي قولتيلي قبل كده إن رامى والده تعبان وسلمي خايفة يحصل حاجة ويتأجل الفرح بس دي ظروف غصب عنه ومفروض تواسيه وتوقف جنبه.
سهر/ سلمي جدعه ع فكره وهي زعلانه ع حماها بس كمان دول بقالهم خمس سنين مخطوبين ولسه كمان هياجلوا فـ نفسيتها تعبانه.
آسر بغمز / طب ما تيجي جنبي بقى ...هنفضل نتكلم كده طول الليل.
سهر بمكر/ نام يا حبيبي عندك شغل الصبح.
اسر/ لازم تفكريني؟
سهر / تصبح ع خير يا حياتي هههههه
يمسك ايدها/ رايحه فين؟ !!!
سهر/ هنزل تحت اعملي فنجان قهوة.
اسر/ هتسهرك ...تعالي نامي احسن.
سهر/ لا ماهو انا النوم طار يا حبيبي طار.
اسر/ هههههههه طيب تصبحي ع خير.
......
تنزل سهر تحت المطبخ تعمل القهوة وتقعد على كرسي في المطبخ و عينها في فنجان القهوة وترجع بذكرياتها لبعيد.
يوم نتيجة الثانوية العامة.
{فلاش باك}
سهر قضت السنه كلها في شقة خالتها منى وكان اياد هو اللي بيدفعلها فلوس الدروس وجدتها بتساهم بجزء من المعاش بتاعها في البيت علشان سهر
ويوم النتيجة الساعة واحده الظهر
سلمى وسهر قاعدين قلقنين ومنتظرين النتيجة
اياد نزل من ساعة يطمن ع النتيجه ولسه مرجعش
منى / يا حبايبي متخافوش انتوا ذاكرتوا وتعبتوا.
سلمى / مش قادرة يا ماما حاسه إن قلبي هيوقف
وإن اليوم ده يوم حاسم ف حياتي إما أكمل اواموت بقى.
منى / بعد الشر عليكي يا حبيبتي
مش عارفة ماما وعمار ايه اللي آخرهم ؟
سهر/ ليه هي تيته فين؟
منى / راحت تعمل تحليل سكر في معمل جنبنا هنا
يسمعوا صوت صفير.
سلمى / ايه ده؟!
سهر تنظر من البلكونة اياد يشاورلها تنزل
سهر دقات قلب سريعة والخوف تملك منها
سلمى / مين دا يا سهر؟
سهر / هنزل أجيب حاجة من السوبر ماركت اللي تحت.
سلمى / استني أنزل معاكي اضيع وقت شوية يكون اياد جه.
سهر / لا خليكي انا هنزل أجيب لبان من تحت وجايه ع طول.
سلمين/'هاتيلي معاكي انا كمان أهو أي حاجة تلهينا وخلاص يمكن نهدا شوية.
سهر/ حاضر.
وتنزل سهر جري ع السلم تقابل اياد في مدخل العمارة ينظر لها ببتسامة.
سهر بخوف/ ايه النتيجة ظهرت ؟
اياد/ آه.
سهر بقلق/ آه ايه. ..متتكلم ع طول؟!
اياد/ متخافيش نجحتي.
سهر/ وسلمى؟
اياد/ انتوا الاتنين نجحتوا.
سهر وهي مقربة بتبتلع ريقها/ جبت كام؟
اياد/ قولي انتي.
سهر/ اياد متهزرش مش وقت فوازير أنطق احسنلك.
اياد/ طيب حاضر متتعصبيش ...خمسه وتمانين.
سهر/ بس؟ !
طب و سلمى؟
اياد/ واحد وتمانين.
سهر/ ودا يدخلونا ايه؟
اياد/ آداب أو تجارة.
سهر/ لا انا هدخل تجارة.
اياد/ ههههه ماشي بس يلا نطلع نفرح ماما و سلمى
تطلع سهر جري ع السلم وتوقع.
اياد / حاسبي يا سهر.
تقوم سهر وهي ماسكه دراعها
اياد/ حصلك حاجة؟
سهر / دراعي بس اتخبط في السلمه متقلقش حاجه بسيطه.
اياد/ طب تعالي نضفي هدومك السلم كله تُراب.
تنزل سهر تحت عند مدخل السلم تنضف هدومها من التُراب.
وداد وعمار داخلين من مدخل العمارة
ولسه عمار بياخد بايد وداد علشان يطلعوا اول سلمه
وداد بهمس بعد ما تلمح سهر واياد/ استنى يا واد هنا.
يوقفوا وهما مراقبين سهر وإياد.
عمار/ في ايه يا تيته؟
وداد بهمس/ اشششش أقف وانت ساكت.
اياد لسهر/ نضفي هدومك كويس لسه في تُراب ع كتفك.
سهر/ خلاص كده لسه في حاجة؟
اياد/ لا خلاص...بس ظبطي هدومك بقى.
سهر/ ماشي يلا بينا.
اياد ببتسامة/ يلا علشان نفرحهم.
تطلع سهر جري ع السلم.
اياد / حاسبي بقي انتي مبتتعلميش؟!
عمار/ هو في ايه يا تيته؟
وداد بغضب/ في مصيبة...خد بايدي طلعني السلم.
يدخل اياد وسهر ببتسامة.
سلمى واقفة بخوف / ها عملنا ايه؟
تنظر لها سهر بصمت.
سلمى تصرخ وهي بتبكي / سقطنا مش كده؟
تقرب سهر منها وتحتضنها/ لا يا سلمى متخافيش احنا نجحنا.
منى / ولازمتها ايه توقعوا قلبنا كده؟!
اياد / ههههههههه سهر برضو قلبها كان هيوقف وانا بقولها تحت.
منى وهي بتحتضن سهر و سلمين / الف مبروك يا حبايبي.
تدخل وداد وعمار.
وداد بغضب/ مبتفتحوش الباب ع طول ليه؟
اياد/ عمار معاه المفتاح مبيفتحش هو ليه؟
وداد بغضب/ انت مش شايفة أيده مش فاضية شايل الدوا بتاعي وانا لا قادرة اشيل ولا اعمل.
منى تحاول تهدي الجو / مش تقولي للبنات مبروك يا ماما.
عمار/ ألف مبروك المهم المجموع.
قعدت سهر ووضعت رجل ع رجل / انا جبت خمسه وتمانين.
عمار / كويس بس يا تري دول يدخلوكي تربية ؟
سلمى / مظنش.
عمار/ وانتي بقي جبتي كام يا لمضه؟
إياد / واحد وتمانين.
سلمى / يعني تقريباً زي بعض مش كده يا سهر؟
سهر / لا طبعاً مش زي بعض.
وداد ل سلمى / وانتي تجيبي أقل منها ليه؟!
مني/  مجموعهم كويس يا ماما
وبعدين هما أدبي هيدخلوا آداب ولا حقوق.
سهر نظرت لـ اياد/ لا انا هدخل تجارة زي إياد.
وداد / تعالي يا منى عايزاكي جوه وهاتي المحروس ابنك.
وشاورت ع إياد.
منى لـ اياد/ انت عملت ايه؟!
اياد / معرفش تيته مالها كده من أول مدخلت وهي تصرفاتها غريبة ومش طايقة حد مننا.
منى / عمار هي جدتك كويسه الدكتور يعني طمنها؟
عمار/ آه...تحليل السكر كويس.
يهمس لـ اياد/ أدخل بقي شوف تيته عايزة ايه
وانا ليه كلام معاك جوه لوحدنا.
اياد/ ايه يا عم أسلوب المباحث بتاعك ده؟!
وداد تنادي من جوه/ منى تعالي انتي وابنك.
منى / يلا يا ابني نشوف جدتك عايزة ايه.
سلمى ل سهر/ هو في ايه؟!
سهر/ معرفش ...يا خبر النهاردة بفلوس بعد دقيقة هيبقي ببلاش
سلمى / ههههههههههه ع رأيك
تعالي بقى ندخل جوه نفكر نرتب للاجازة
ومتنسيش اياد وعدنا انه هيخرجنا نصيف في شرم.
سهر/ نفسي اشوف شرم دي يا تري زي مبتيجي في التليفزيون؟!
سلمى / اكيد.
.....
في غرفة منى.
وداد بحده/ اقفلي الباب يا منى  وتعالي.
مني تقرب من والدتها اللي كانت قاعدة ع السرير/ خير يا ماما... في ايه بدأت أقلق.
وداد تنظر ل اياد / ما أنا قولتلك من زمان و كان لازم تاخدي بالك.
منى / اخد بالي من ايه يا ماما؟
انا مش فاهمه حاجه.
وداد وهي لسه عينها من اياد/ أسألي ابنك.
اياد/ انا ؟ ليه يا تيته انا عملت ايه؟!
وداد/ كنت بتعمل ايه انت وبنت خالتك تحت؟
اياد بدهشة/ مش فاهم.. تقصدي ايه... وتحت فين؟
منى / ايه يا ماما اللي بتقوليه ده...مش فاهمه تقصدي ايه.
وداد/ ابنك اللي يفهمك لاني مش قادرة أصدق اللي شوفته تحت.
منى بقلق / مترد يا ابني قولي في ايه قلبي هيوقف.
اياد / ما انا لو فاهم هقولك ياماما.
وداد / كنت واقف انت وسهر بتتكلموا مع بعض تحت وهي بتنضف هدومها من التُراب وبتضحك.
اياد/ آه...ودي فيها ايه ؟!
وداد / وايه اللي جاب التُراب ع هدومها وكانت بتعدل هدومها ليه فهمني؟
مني واضعه ايدها ع بؤها من الصدمة
اياد بغضب/ تقصدي ايه يا تيته؟!
لا متفهموش غلط.
وداد / أقصد اللي شوفته ملوش تفسير تاني يا ابن منى
منى / يا خبر أسود و مهبب.
اياد/ ايه يا ماما في ايه؟
محصلش حاجة صدقيني دي سهر...
قاطعته وداد بقلم على وجهه.
اياد/ تيته انتي فاهمه غلط.
منى / قول يا ابني الحقيقة متخافش ايه اللي حصل بينك وبين سهر؟
اياد/ يا ماما صدقيني محصلش حاجة سهر وقعت ع السلم فوقفت نضفت هدومها وظبطتها مكان الوقعه انا بقي معرفش تيته شافت ايه غير كده يخليها تفتكر حاجة تانية؟!
منى بانفعال/ ادخل اوضتك دلوقتي...يلا واقف ليه ؟
اياد/ حاضر... بس محدش يتكلم مع سهر بقى.
وداد/دا انا هقطم رقبتها بس اما اطلعها.
اياد/عشان خاطري ياتيته سبيها تفرح بنجاحها النهاردة.
وداد/اسمع كلام امك وغور يلا ع اوضتك.
اياد /أنا مش فاهم عملنا ايه لكل دا
مفيش مرة تسيبونا نفرح.
منى /بالراحه شوية ياماما ع العيال.
وداد /عيال..... ايه صدقتي كلام ابنك؟!
منى / وهو هيكدب ليه ؟
وداد/ انا من الصبح هاخد البت اوديها عند أمها مش ناقصة تحصل مصيبه...البنت بنتنا...والواد ابننا
يعني المصيبة هتوقع علينا.
منى / ماشي بس هتوديها عند جوز أمها يا ماما
انا بقول طالما اياد بيحبها يتخطبوا دلوقتي ولما تخلص يكون اياد اشتغل وعمل قرشين يتجوز بيهم.
وداد/ وهتقعديها فين؟ مع ابنك في بيت واحد؟!
منى / طب اعمل ايه؟
وداد/ خلاص هاخدها معايا شقتي.
منى / ازاي بس يا ماما وانتي محتاجة اللي يخدمك وياخد باله منك؟.
وداد / هعمل ايه ماهو لو بنت اختك شاطرة كانت عرفت تخدمني هستحمل وخلاص وانتي برضو  ابقي شقري علينا من وقت للتاني.
منى / بس أنا خايفة لو بعدناهم عن بعض يعندوا اكتر وانتي عارفة اياد.
وداد/ يبقي تتكسر دماغه ودماغها جرا ايه يا منى انتي هتخافي من ابنك ولا ايه؟!
......
في غرفة الأولاد
اياد نايم ع السرير
يدخل عمار وهو بينشف شعره بالفوطه.
عمار / مالك نايم كده ليه؟!
اياد/ عمار انت شوفت ايه تحت؟
عمار / آه تقصد انت وسهر بص بقي انا مقدرش أظلم بس....
يقاطعه اياد/ انت كمان هتقول زي تيته اسمع يا عمار مفيش حد في الدنيا دي هيحب سهر ولا يخاف عليها قدي وانتوا بقي خرجوا الأفكار السوده دي من دماغك.
عمار/ اياد انا خايف عليك.
اياد/ من ايه؟
عمار / تقدر تقولي آخرة الحب دا ايه؟
اياد/ خطوبة و جواز.
عمار/ ههههههه منين انت حيلتك حاجة؟!
اياد/ من هنا ورايح كل قرش هيجيني من الشغل هحوشه مش هيكون عندي حاجة اعملها غير الشغل واهو السنه دي آخر سنه ليا وبعدها هدور ع شغل بمرتب أكبر.
عمار/ طيب....متشكر اوي ع الاحلام السعيدة اللي انت عيشتني فيها بجد تصبح ع خير هناملي ساعة علشان عندى حصه بالليل.

........................
وداد / ادخلي قوليلها تجهز الصبح علشان هتقعد معايا في شقتي.
منى / لا يا ماما مقدرش أقولها كده.
وداد/ خلاص انا اللي هقولها.

في الصباح
وداد بتحضر شنطتها وبتلبس.
منى / يلا يا ماما علشان تفطري.
وداد / طيب خمس دقايق وجايه.
تخرج سهر و سلمى من الغرفة بفرحه.
اياد ع السفرة / صباح الخير.
ونظر لسهر بحزن.
سلمى / النهاردة بقي بدأت اجازتنا نفذ وعدك.
اياد/ حاضر هخرجكوا.
سلمى / نعم..وفسحة شرم الشيخ؟
منى خارجة من المطبخ/ بدل اللماضه دي تعالي ساعديني.
سلمى / ثواني بس يا ماما...انت رجعت في كلامك ولا ايه؟
اياد/ مرجعتش في كلامي بس.
سهر/ خلاص يا سلمى ما تتحيليش عليه.
اياد / لأ اوعى تزعلي ياسهر انا مقدرش ع زعلك.
تخرج وداد بالشنطة.
عمار خارج من الغرفة يتجه بسرعة ناحية وداد.
عمار/ هاتي الشنطة يا تيته متتعبيش نفسك
وبعدين رايحه فين كده؟
سلمى / رايحه فين يا تيته؟
وداد / مروحه انا و سهر...يلا يا سهر ألبسي.
سهر بدهشة/ ليه هنروح فين يا تيته؟
وداد / انا راجعه شقتي وهاخدك معايا علشان تونسيني هناك.
سلمى / لأ متمشيش وتاخدي سهر.
سهر/ خلينا قاعدين هنا يا تيته.
وداد بحده/ وبعدين هتيجي معايا ولا اروحك عند مامتك؟
سهر وهي حابسه دموعها/ لأ ماما لأ.
وداد/ يبقي خلاص تيجى معايا.
إياد نظر لجدته وسكت... 

في غرفة سلمى

سلمى قاعدة بتبكي وسهر بتجهز شنطتها ودموعها
ع خدها.
سهر وهي بتمسح دموعها/ خلاص يا سلمى يعني انا هروح فين؟! وقت ماتحبي ابقي تعاليلي ع هناك.
سلمى / يعني مش هتيجي عندنا تانى؟
سهر / لا خلاص مش جايه هنا تاني واضح إن مامتك مش حابه وجودي هنا.
تدخل منى / أخص عليكي يا سهر دي كلمة تقوليها برضو انتي عارفة معزتك عندي قد ايه بس ماما هي اللي مصممه ترجع شقتها وعايزة ونس معاها.
سلمى / طب يا ماما اروح معاهم علشان خاطري متقوليش لأ.
منى / وانا بقولك لأ.
تخرج منى من الغرفة.
اياد لـ جدته/ انتي عايزة تبعدي سهر عن البيت ليه
يا تيته؟
انتي فاكرة انك تقدري تبعديها عني؟!
وداد/ تعالي يا منى شوفي ابنك بيقول ايه!
عمار/ متهمد بقى  وتسكت كفاية كده.
اياد وهو متجه ناحية الغرفة /انا بقي هشوف هتبعدوها عني ازاي.
تخرج سهر من الغرفة و سلمى ماسكه ايدها بدموع.
وداد ل عمار / نزل الشنط تحت ياابني.
منى / هتوحشوني هبقى اعدي عليكي يا ماما كل يوم اشوف طلباتك.
وداد / كتر خيرك يا بنتي...وسهر كمان هتبقى معايا وهتاخد بالها مني...مش كده يا سهر ؟
سهر وقتها كانت بتفكر ازاي هتقدر تعيش مع جدتها وتستحمل اطباعها وشدتها معاها.
.........
رجعنا للحاضر...في الصباح
ينزل أسر بقلق وهو بيدور ع سهر
صحي من النوم ملقهاش جنبه نزل يدور عليها في كل مكان لحد ما لمحها نايمه ومايله بدماغها على طربيزة المطبخ
جري ناحيتها وقعد جنبها وحاول يصحيها بهدوء علشان متتخضش اسر يمرر ايده ع ايدها برقه/ سهر...حبيبتي اصحي
النوم بالشكل ده غلط عليكي .
سهر تفتح عينها ضوء الشمس جاي من الشباك/ يا خبر انا نمت هنا ازاي ؟!
اسر/ انتي بتساأليني أنا! قومي نامي في سريرك.
سهر تقوم بتعب وهي بتفرد ضهرها/ ااااه تعبانه اوي
ازاي قدرت انام كده؟!
أسر يحاوطها بذراعة ويحملها.
سهر/ بجد ضهري حاسه إنه اتكسر من النومه دي
هههههههههههه
اسر/ معرفش ازاي نمتي كده؟
أسر طالع بسهر ع السلم. ..وعزيزة داخله من باب الفيلا جري ع المطبخ و في ايدها ازازة.
عزيزة / خلاص بقي كفاية كده انا استحملت كتير
جه الوقت اللي أحرق قلبك فيه يا علي.
..........................
#احببتها_رغم_كل_شيء
#بوسي_مصطفي