أحببتها رغم كل شيء 🥰

الحلقة ٣٨

الحلقة الثامنة والثلاثون
#احببتها_رغم_كل_شيء
#بوسي_مصطفي
*---------------------------*
حسام/ طب وسع شوية خدلي مكان جنبك عايز انام
اسر/ يا عم أبعد انت كمان هي نقصاك روح نام في بيتكو
حسام/ لم رجلك خليني انام بجد الجو ميساعدش ع الشغل
اسر/ بابا لو جه هتبقى مصيبة بجد روح شوف شغلك ل ارفدك من هنا مخليكش تعتب الشركة دي تاني
حسام/ وكمان بتضرب بالرجل طب عمي في مكتبه بقاله نص ساعة ايه رأيك
قام أسر بسرعة
حسام/ هههههههههههه الخوف حلو بردو
مش عيب ع طولك ده واحد زيك لسه بيخاف من أبوه
اسر/ من خاف سلم ياعم وبعدين انا بسأل ع بابا لاني كنت عايزة في موضوع مهم
حسام/ لسه مجاش وبعدين ايه اللي منيمكش في بيتكو ياابني ولا الجو واحشك
اسر/ ماما  تعبانه شوية
حسام/ سلامتها الف سلامة وسيبتها وجيت
اسر/ تيته عندها دلوقتي
حسام/ هي جدتك لسه فيها صحه؟ !!!
دا انا عجزت ياابني من شهر جواز بس
اسر/ انت تقصد ايه. .خبي عينك الوحشه دي عني كفاية اللي انا فيه مش ناقصه قرك
حسام / هههههههههههه يا عم وانا هقر علي ايه
بالحق يارا كانت عايزة تزور سهر وتطمن عليها بس محرجه قالتلي اكلمك واشوف يعني ينفع ولا ايه
اسر/ بلاش تتعب نفسها ممكن تكلمها في التليفون
حسام/ بتتصل بيها مبتردش
هي مامتها عامله ايه دلوقتي لسه تعبانه
اسر بارتباك/ كويسه ..
هبقي أقولها إن مرات حسام  سألت عليكي
حسام/ هي لسه عند مامتها؟
الباب يخبط
حسام/ مين
تدخل موظفه في الشركة وتنظر ل اسر / علي بيه عايز حضرتك
اسر/ أوك انا جاي
خرجت الموظفة من المكتب
اسر/ هي كانت بتبصلي ليه وانا فيه حاجة تستحق الدهشة دي؟ !!!
حسام / هههههههههههه ليها حق
ياابني ظبط هدومك وزرر القميص ده
اسر/ يا خبر مخدتش بالي ....مش تقولي يااخي
حسام/ ما انا نسيت اقولك. ..سلام هروح اشوف شغلي انا بقي
اسر/ لو يعني ميضايقكش تاخد معاك الأوراق دي تراجعها علشان مش قادر اقرا أي حاجة دماغي هتنفجر من الصداع وقلة النوم
حسام/ ماشي هاخدهم بس علشان صعبت عليه
اسر/ متشكر ياابن عمي
حسام/ يكون يطمر فيك بس
اسر/'متعرفش تعمل حاجة من سكات لازم التقطيم بتاعك ده. ..روح يا شيخ
حسام / ها
اسر/:وتعالي بسرعة
حسام / هههههههههههه ناس تخاف متختشيش
اسر/ طب وسع خليني أخرج
*-------------------------------*
في مكتب علي الحسيني
علي / أدخل ي أسر
اسر/ صباح الخير يا بابا
علي/ صباح الخير ياابني... اقعد واقف ليه
اسر/ كنت بس بطمن عملت ايه مع سهر
علي وهو بيقلب في أوراق قدامه ع المكتب / مفيش نصيب ياابني
اسر وهو بيبتلع ريقه/ يعني ايه يا بابا
علي ترك اللي في أيده ونظر ل اسر اللى كانت عينه كلها دموع / مصره ع الطلاق
اسر/ حضرتك قولتلها ايه
علي/ هي مدتنيش فرصه أتكلم وسبتني ودخلت اوضتها
اسر بيتلف يخرج من المكتب
علي/ استني ياابني رايح فين
اسر بحزن/ هروح اشوف شغلي
علي/ لا روح واضح إنك تعبان. ..قولي مامتك عامله ايه دلوقتي
اسر بتنهيدة/ تعبانه اوي يا بابا والدكتور قال هتقعد في المستشفي كام يوم اعصابها تهدي وبعد كده يكتبلها خروج علي/ مامتك حالتها النفسيه بقت تحت الصفر
وان جيت للحق هي اللي عملت في نفسها كده
روح استريح وابقي عدي أطمن عليها
اسر / بعد اذن حضرتك
*------------------------------*
في شقة سهير
سلمى / بس سهر مغلطتش يا ماما
منى / لا غلطت الراجل مقالش حاجة تخليها تقوم وتسيبوا بالشكل ده دي قلة ذوق
سهر/ انا يا خالتو
منى / ايه يا سهر عايزاني اقولك إنك صح ومغلطتيش في حاجة مش معني إنك زعلانه مع ابنه إنك تهيني والدة بالشكل ده
سلمى / كل الرجاله زي بعض وهو لو كانت بنته اللي حصلها كده يا تري كان هيصالحها ع جوزها ولا كان هيعملها كرامة ويأدبه شوية
منى بانفعال/ خليكي محضر خير متولعهاش اكتر من كده
سلمى / انا مبولعهاش انا بقول الحقيقة
منى / ومحدش اخد رأيك علشان تتكلمي سايبه بيت جوزك وجايه تخربي عليها بدل متقوللها كلمة تهديها بيها ع جوزها
سهر/ تهديني!!!.. انتي شايفه يا خالتو إن اللى حصل ده يتنسي بكلمتين ونرجع بقي لبعض وخلاص كأن محصلش حاجة
منى بانفعال/ خلاص يا سهر صممي ع الطلاق لحد ميزهق فعلاً ويطلقك انا قايمه اطمن ع اختي
وتخرج مني من الغرفة
سلمى / متزعليش يا سهر وخليكي ع موقفك علشان يعرف إن ليكي كرامة وميكررهاش تاني
سهر/ مالك يا سلمي؟
سلمى / مالي يعني. ..ماانا كويسه قدامك أهو
سهر/ كلامك غريب النهاردة مكونتيش كده
سلمى / لان الرجاله مش عايزة غير كده
سهر/ انتي مع رامي؟
سلمين/ مش مقدر تعبي يا سهر بجد انا تعبت حمل ودوخه ومفيش حد بيساعدني ولاحتي مامته بتسأل عني كل اللي يهمه يرجع من الشغل يلاقي الأكل جاهز والبيت نضيف وينام ويصحي الصبح يروح شغله ومبقاش يقولى كلام حلو زي الأول
ايام الخطوبة كنت بحس بلهفته عليه لو كلمته ولا خرجت بره واتاخرت يتصل وبيكون قلقان لكن دلوقتي خلاص
سهر/'يا حبيبتي أيام الخطوبة حاجة وبعد الجواز حاجة تانية وبعدين كل اللي بتقوليه دا عادي جداً
انتي بقي لما بيرجع من الشغل بتعملي ايه ؟
سلمى / ببقي مهدوده وتعبانه وعايزة انام وهو بقي عايز يرغي للصبح
سهر/ مفروض العكس يعني انتي قاعدة طول اليوم لوحدك بتبقى عايزة حد تتكلمي معاه بس انه يرجع تعبان من الشغل ويبقى عايز يسهر ويتكلم معاكي اكيد بيحبك انتي مفروض تبقي فرحانه مش مضايقة كده
سلمى / ماهو انا مبرضاش اتكلم معاه لما بيرجع من الشغل علشان مش بمزاجه وقت مايحب يتكلم معايا يلاقيني ع طول ماهو انا بكلمه ف الشغل مبيردش عليه
سهر/ اكيد بيبقى مشغول يا سلمي حاولي تهدي الأمور بينكو لسه بدري ع الخناقات والمشاكل دي
سلمى / طيب يا عاقله
سهر/ بتتريقي. ..بس انا بتكلم بجد ع فكرة
سلمى / ايه يا سهر انتي مبتكليش ولا ايه
سهر / لا باكل. ..ليه؟
سلمى / اصلك دبلانه وخاسه اوي ووشك اصفر
سهر / ايه ده بجد
سلمى / ايه معندكيش مرايا تشوفي نفسك فيها
سهر/ هشوف نفسى ليه. ..هتفرق ايه يعني
سلمى بغمز/ مش يمكن نلاقي أسر بيخبط دلوقتي
ايه عايزة يجي يلاقيكي كده؟
سهر/ ايه الروقان اللي نزل عليكي فجأة ده
اللي يسمعك دلوقتي ميسمعكيش من شوية لما كنتي عماله تحمسيني أثبت ع موقفي
سلمى / علشان بتحبيه
تورد وجهه سهر والتفتت الناحية التانية
سلمى /'طالما بتحبيه بتنكري ليه
سهر/ بس بقي يا سلمي
سلمى / إن جيتي للحق هو يستاهل انك تحبيه وتموتي فيه كمان الواد فعلا يتحب طول بعرض وحاجة كده
تقاطعها سهر/ بس يا سلمي
سلمى بمكر/ ايه فكرتك بيه
سهر/ وجعني ومش قادرة أنسى اللي عمله
سلمى / لما تشوفيه هتنسي هو بس لو طبطب عليكى وحضنك هتنسي كل حاجة هههههه انا عارفه انك قلبك ابيض وبتنسي بسرعة
سهر/ إلا في دي مش قادرة انسي يمكن علشان الجرح كبير
سلمى / فكري يا سهر الحب مبيجيش إلا مرة واحده في العمر لا تحبي لا تاخدي ع قفاكي هههههه
سهر / مينفعش تتكلمي جد ابدا لازم كل جمله تقوليها تقلبيها تريقه كده؟!
جرس الباب يرن
سهر/ يا تري مين
سلمى / يمكن يكون أسر
سهر ب ارتباك/ طب أخرجي دلوقتي
سلمى / ليه؟!
سهر/ أخرجي بس
سلمى / طيب بس متزوديش المكياج
سهر/ نعم
سلمى / لما بيبقى خفيف وشك بيكون احلي
تزقها سهر وتخرجها من الغرفة
وتوقف سهر قدام المرايا تنظر لنفسها وبعدها تجري ع الدولاب تخرج فستان فيروزي جميل وتلبسه وتسرح شعرها بسرعة
سلمى تخبط ع الباب
سهر ب ارتباك / طيب ثواني
سلمى / علا جايه تطمن عليكي
سهر بغضب/ حاضر خارجة
وتنظر في المرايا بحزن / ايه يا سهر جرالك ايه معقوله هتنسي بسهولة كده وبعدين ايه اللي انا عملاه في نفسي ده ؟
وخلعت الفستان ولفت شعرها وخرجت
علا ببتسامة/ الف سلامة عليكي يا سهر
سهر/ متشكره ي علا
علا/ معلش ي سهر جايه متأخرة بس انتي عارفة الولاد بقي اياد لسه خارج من دور برد صعب اوي وانا كمان
سهر/ الف سلامة اومال الولاد فين
علا/'جوه عند طنط
سلمى / تشربي ايه بقي
علا/ ولا أي حاجة. ..متتعبيش نفسك ي سلمي
سلمى / لا ي حبيبتي مفيش تعب ولا حاجة اعملك شاي ب لبن بما اننا لسه الصبح
ابتسمت علا ودخلت سلمين المطبخ
علا/:قوليلي ي سهر ايه اللي حصل ي حبيبتي وايه سبب النزيف اللي جالك ده انا زعلت اوي لما عرفت من طنط مني
سلمى خرجت بسرعة من المطبخ
سلمى / سهر خالتي بتنادي عليكي
نظرت ليها سهر بدهشة
علا/ بس احنا مسمعناش طنط بتنادي انتي في المطبخ وسمعتي ازاي؟
سلمى / اكيد مسمعتيش علشان كنتي بتتكلمي
قامت سهر واستأذنت من علا
سلمى وسهر متجهه لغرفة سهير
سلمى بهمس/ متجاريهاش في الكلام علشان انا عارفة انها معرفتش تاخد أي تفاصيل من عمار علشان كده جايه تستفسر وتعرف كل حاجة
سهر/ انا مقولتش أي حاجة
سلمى / ادخلي لمامتك واطمني عليها عادي وبعد كده اخرجيلها بس خلي كلامك قليل.
*-------------------------------------*
بعد كام يوم
اياد ومنه خارجين مع بعض
منه / يلا اركب
نظر ليها اياد بدهشة
منه / خلاص يا عم انت بتبصلي كده ليه
اتفضل سوق انت ومتزعلش
اياد/ ههههههه لا عادي سوقي انتي معنديش مانع
منه/ لا انا واثقه فيك عادي سوق براحتك بس اوعى المطبات بقي علشان عارفه إنك متعود على السواقه في الطرق السهله
اياد/ ههههههه انتي ليه فاكره اني عايش هناك من طفولتي ماانا متعود ع الطرق هنا عادى
منه/ اللي يسوق في مصر يسوق في أي مكان في الدنيا جمله سمعتها كتير
اياد/ لا بقى انا مهما تمر بيه السنين وانا بعيد عن بلدي بحبها وهفضل طول عمري شايفاها أجمل بلد في الدنيا
منه/ يا عم هو انا غلطت سوق بقي
اتاخرنا
اياد وهو بيشغل العربية/ عم!!! هههههههههههه
طيب
منه/ مش عاجبك ولا ايه
اياد لا عاجبني اوي طريقة كلامك دي حاسس إنك مش بنت علي الحسيني استحالة هههههه
منه/ نعم!!!!!
اياد/ متفهمنيش غلط انا بهزر معاكي اوعى تكوني من النوع اللي بيقفش بسرعة علشان انا مليش في الجو ده
منه / وانا كمان مبحبش النكد بموت في المسخره
اياد/ نعم! !!!
منه / هههههههه أقصد بحب الفرفشه ايه يا عم متفك كده وبلاش تعلق ع كل كلمة
اومال بقي لو عرفتني من كام شهر كنت عملت ايه
اياد/ ليه انتي كنتي بتعملي ايه
منه/ يااااااه دا انا ياما عملت بلاوي
نظر ليها اياد بدهشه
منه / هههههههه مش خلاص كتبنا الكتاب يبقي خلاص اتكلم براحتي بقي
اياد/ واضح انك عملتي بلاوي فعلا
قولي قولي متخبيش عليه حاجة
منه / انا مكونتش محجبه ع فكره
اياد/ كويس
منه/ هو ايه اللي كويس؟ !
اياد/ انك اتحجبتي يعني
منه/ وكنت بشرب سجاير
اياد بدهشة / نعم! !!!!
منه/ بقولك كنت
اياد / دا انا معملتهاش
منه/ اصلك مؤدب
اياد/ وبطلتي ليه
منه / ايه نفسك في سيجاره
اياد/ لا. ..الحمد لله. ..عمري مشربتها
منه/ مضايق انك عرفت حاجة زي دي
اياد/ المهم دلوقتي ايه الأخبار
شربتي بانجو ولا لسه
منه / هههههههههه لا خلاص حرمت عمري مرجعلها تاني
سكت اياد
منه/ هنتغدي فين
اياد/ المكان اللي تحبيه
منه / عايزة أكل سمك
اياد / حاضر
منه/ ايه رأيك في الشقة واسعه مش كده
اياد/ جميله بصراحه بس معجبنيش السعر
منه/ غاليه؟
اياد/ لا بالعكس دي رخيصة اوي
أنا حاسس ان باباكي حب ياخد أي مبلغ ولو قليل بس علشان ميزعلنيش
منه/ انت ليه عامل فرق بينا يا حبيبي مفروض يعني بقينا متجوزين دلوقتي
اياد/ ايوه بس المبلغ دا ميجيش نص تمنها
منه/ اعتبارها هدية من بابا
اياد/ بس مقبلش هدية إلا لو كنت أملك حق ردها
منه/ وهي الهدية بتترد بردو جراايه انت ابن بلد وتفهم في الحاجات دي كويس
اياد/احرجتيني بكلامك ده
منه ببتسامة وهي بتضع ايدها في ايده/ طب سوق  بسرعة بقي ولا قلبك ضعيف ؟
اياد/ دا انا هبهرك  هههههه
منه/ هههههه يلا اما اشوف
*-----------------------------*
يوم الزفاف
سعاد/ بتعمل ايه يا وليد كل ده بتلبس
وليد/ ايه رأيك يا ماما
سعاد/ عقبالك يا حبيبي البدله تجنن عليك
ما شاء الله
وليد/ نفسي اتفتحت للجواز بجد
سعاد/ هههههههههههه طب يلا شد حيلك بقي البنات هتكون كتير الليلة
وليد/ ايه الجو القديم دا يا ماما
انا عروستي هشوفها في بيت أهلها مش في فرح
سعاد/ جواز صالونات يعني
وليد/ لا حضرتك فهمتيني غلط انا أقصد هتعرف عليها في بيت أهلها وطبعا لازم أكون شوفتها قبل كده
سعاد/ طيب يلا بسرعة باباك بيستعجلنا
*------------------------------------*
في شقة عمار
عمار ل علا/ فين فردت الشراب دي مش لاقيها
علا / خلاص البس شراب تاني
عمار / مينفعش البس شراب غير الأسود
علا / ماانت عندك شربات كتير سيبني بقي أخلص لبس
عمار/ كل الشربات دي فرده واحده بس
علا / انا هروح ادور ع شوز اياد
عمار/ مفروض تبقي مجهزه كل حاجة من بدري مش جايه دلوقتي تدوري ع حاجتك
علا/ وولادك بيسيبوا حاجة في مكانها ماانا كنت مظبطه كل حاجة واللبس كله لاقيته في الأرض
وبعدين قول لنفسك الكلام ده
علا/ ايه الصوت ده
ينظر عمار من البلكونه/ دا بابا بيستعجلنا
علا/ ايه ده دا معاه مراته واخوك عماد
عمار/ وفيها ايه
علا/ هي العربية هتاخدنا
عمار/ عماد معاه عربيته هنركب معاه
علا/ احسن بردو انا مكنتش هركب مع مرات باباك
عمار/ علا خلي الليلة تعدي ع خير مش عايزين مشاكل
علا/ وانا كمان  عايزها تعدي ع خير
يلا علشان ميضايقوش من الوقفه تحت
*-------------------------------*
في شقة رامي
رامي / لو تعبانه يا حبيبتي بلاش
سلمى / نعم!!! دا فرح اخويا لا طبعاً هروح حتى ولا ايه
رامي/ فاكره يوم فرحنا
سلمى / هو احنا عملنا فرح دا يدوب لبست الفستان وجيت اخدتني ع هنا
رامي/ اعملك فرح الليلة ولا يهمك
سلمى / ههههههههه ازاي دا بقي
رامي / هنقوم اياد وعروسته من الكوشه ونقعد مكانهم
سلمى / ع أساس ان اياد هيوافق ياابني دا مصدق اتجوز
رامي/ هقوله انا واختك غلابه ونفسنا نفرح يا عم سبلنا الكوشه خمس دقايق بس
سلمى /ههههههههه  انت هتشحت عليه؟ !!
رامي/ ههههههه حبيبتي انا اعمل أي حاجة علشان اسعدك
سلمى / وانا مبسوطه كده ومش عايزة فرح انتي فرحتي الحقيقيه
رامي/ ياوعدي ع الكلام الحلو لأ بقي احنا مستحيل ننزل اللحظات دي مبتتعوضش
سلمى / أعقل يا رامي انت عايزني محضرش فرح اخويا
رامي/ يبقي لازم نعمل فرح الليلة
سلمى / طب يلا بينا مفروض أكون هناك من بدري وانا اتاخرت اوي ع ماما
رامي / طب يلا يا حبيبتي التاكسي مستنى تحت
*----------------------------*
في شقة سهير
سهير وسهر قاعدين ع السفرة
سهر/ اجيبلك الدوا يا ماما
سهير / اخدتوا يابنتي اقعدي كملي أكل
سهر/ هعملك قهوة
سهير/ مش عايزة اشرب قهوة وبقولك ايه بقي كملي أكل احسن اقوم دلوقتي ومكملش أكل
سهر/ طيب اتفضلي
سهير/ ايه ده
سهر/ مياه
سهير نظرت لسهر ووضعت يدها ع خدها/ سهر
انتي عايزة تقوليلي حاجة
سهر بتردد/ الليلة فرح  اياد وكنت عايزة اخد رأيك في حاجة
سهير/ لو عايزة تروحي انا معنديش مانع ياريت حتى تفوكي عن نفسك شوية
سهر/ يعني لو رحت مفيهاش حاجة
سهير/ وايه اللي فيها يا بنتي دا فرح ابن خالتك وهتبقي وسط أهلك فيها ايه دي ؟!
سهر بفرحه/ طيب هقوم البس
وقامت سهر مسرعه ل غرفتها
سهير ببتسامة/ ياريت تقابل جوزها هناك ويصفو اللى بينهم ولا يمكن لما تشوفه قلبها يحن ليه وترجعله
*-------------------------------*
في فيلا اسر
حسام/ ياابني اطلع من الحمام بقي انت ناوي تبات فيه الليلة ولا ايه
اسر بيفتح باب الحمام/ انت اكلتني ايه معدتي بتتقطع يااخي اعمل فيك ايه مش قادر أقف
ويقعد اسر ع السرير
حسام/ هههههههههههه
انت اللي ملكش في الأكل السمين اعملك ايه
اسر/ وحد يااكل ممبار وكوارع واسمها ايه دي
حسام/ كرشه هههههههههههه
اسر/ آه هي دي
حسام / وانا يعني غصبتك تاكلها انت اللي شوفتها من هنا وريقك جري عليها أكلت طبقين لوحدك
اسر/ هي بصراحه طعمها حلو بس مش عارف عملت ايه في معدتي؟!
حسام/ علشان بس متعودتش عليها كده خلاص هتجيلك مناعه وعمرك مهتتعب منها بعد كده
اسر/ لا خلاص انا حرمت دا انا كنت بموت من شوية
حسام/ طب ايه مش هتحضر فرح اختك ولا ايه؟
اسر/ طب هاتلي أي حاجة من الصيدلية انا كده مش هقدر حتي أشغل العربية
حسام/ طب هنزل بسرعة اجيبلك حاجة من الصيدلية واجي الاقيك خلصت لبس وواقف تحت
اسر/ طب بسرعة علشان مش قادر
وجرى اسر ع الحمام
حسام / خمسه وراجعلك
*--------------------------------*
في الاوتيل
في قاعه كبيرة يزف العروسين
منه بفستانها الأبيض والحجاب مكياج رقيق وبسيط يظهر جمالها .
اياد بنظره حب وابتسامة/ خليتي قلبي يتنطط من الفرحه انا مش مصدق ان الليلة هيجمعنا بيت واحد
حلم دا ولا علم
منه / اقرصك علشان تعرف إن دا حقيقه
اياد/ هنبتديها قرص لا انا مروح
منه / هههههههههههه تروح فين انت خلاص ادبست اومال لو عرفت الباقي هتعمل ايه
اياد / هو في حاجات تانية مخبياها عليه
منه/ هههههههههههه انا ب عض واخربش وبتكلم وانا نايمه ع فكره
اياد/ ههههههه مش هسيبك بردو
بموت فيكي
منه/ وأنا كمان بموت فيك يا عمري
ومش متخيله إن بعد اسبوع هتسافر وتسيبني
اياد/ مبلاش السيره دي
الليلة دخلتنا خلينا في فرحتنا ببعض دلوقتي

ع أحد التربيزات
علي ل وليد/ اتصل ب اخوك شوفوا اتأخر ليه؟
وليد/ اتصلت كتير مبيردش تلاقيه سايق
اسر مبيحبش يتكلم وهو في سايق ع الطريق
سعاد/ مين الناس اللي قاعدين هناك دول شكلهم من المنطقة هناك
علي/ مالهم يا سعاد ماهم ناس زينا عادي بلاش النعره الكدابه بتاعتك دي محدش بينسي أصله
سعاد/ تقصد ايه يا علي
وليد/ انا هروح أقف مع صحابي سلام
*------------------------------*
سلمين/ شوفتي يا ماما اياد زي القمر ازاي
مني/ قولي. ...ماشاء الله. ..ايه يا بنتي دي العين فلقت الحجر
علا/ وهي هتحسد اخوها بردو يا طنط
بصراحه اياد احلي من العروسة بكتير
مني / منه دي قمر وابني. ..ما شاء الله
عليه قمرين
قرص عمار علا في رجلها نظرت ليه وسكتت
سلمين/ هي مرات بابا دي مبتكبرش ابدا
مني/ ملناش دعوة بحد خلينا في حالنا
عمار ل سلمين/ اومال فين رامي
سلمين/ معرفش هو شاف واحد يعرفه وقام سلم عليه وخرجوا مع بعض راحوا فين بقي معرفش
عمار/ اسر جه اهوه
يقرب اسر منهم / مساء الخير يا جماعه
عمار/ ايه ياابني انت مفروض تكون أول واحد هنا ايه اللي آخرك كده
اسر/ تعبان شوية
مني/ الف سلامة
اسر/ متشكر يا طنط بعد اذنكو
يبعد اسر عنهم ويرجع تاني
يهمس ل سلمين/ هي سهر مش جايه
سلمين/ معرفش هي مقالتش انها جايه
مني ل سلمين/ مش دي سهر يا بنتي 
نظر اسر ناحية الباب
سهر جايه من بعيد وقف اسر وعينه مركزة معاها وقلبه بيدق بسرعة عينه كلها فرح
قربت سهر سلمت ع خالتها وسلمين وعلا
اسر/ ازيك يا سهر
تركته سهر وقربت من الكوشة
سهر/ الف مبروك يا منه
منه بعتاب/ لسه فاكرخ يا سهر
سهر/ معلش بقي انتي عارفه الظروف
الف مبروك يا اياد
اياد/ متشكر اوي يا سهر
ابتلعت سهر ريقها واخفت دموعها وهي تنظر لفرحة منه واياد ثم نظرت ل اسر
سلمين جايه ناحية سهر
سلمين/ تعالي يا سهر اقعدي
اسر واقف بعيد ينظر لها بحزن
مني/ سيبتي مامتك نايمه؟
سهر/ لا صاحيه اخدت الدوا واكلت وسيبتها قاعدة قدام التليفزيون
علا بتقدم لها العصير/ اشربي يا سهر
شكلك تعبان وشك دبلان
سهر/ لا ابدا انا كويسه بس منمتش بالليل كويس
يمكن علشان كده باين ع وشي
عمار/ بعد اذنكو
مني/ انا قولت مش هتيجي
سهر/ يا خبر يا خالتو هو انا اقدر بردو مجيش فرح اخويا
مني تطبطب ع ايدها ببتسامة
سهر/ همشي انا بقي يا خالتو
سلمين/ انتي لسه قعدتي استني شوية يا سهر علشان خاطري
سهر/ معلش بقي علشان ماما مش عايزة اتأخر عليها
مني/ طب استني عمار يوصلك
نظرت علا بضيق
سهر/ لا يا خالتو انا هروح لوحدي بعد اذنكو
مني / استني بس يا بنتي تروحي لوحدك ازاي
علا ل سلمين / وهو جوزها ميروحهاش ليه؟ !!!
سلمين/ حاجة غريبه اوي متخليكي في حالك يا علا هي قالتلك تعالي روحيني؟ !!!
سهر خارجة من الاوتيل مسرعه
اسر من بعيد ينادي / سهر
*----------------------------*
#احببتهارغم كل شيء
#بوسي