الحلقة السابعة والثلاثون
#احببتها_رغم_كل_شيء
#بوسي_مصطفي
*------------------------*
سهر بدموع/ جايه تطبطبي عليه يا ماما ولا توجعي قلبي اكتر
سهير/ انا عارفه اني عملت كتير في حياتي واللي عملته فيكي اكتر ياسهر
ظلمتك معايا وكل اللي انتي فيه ده بسبب انانيتي وحبي لنفسي مفكرتش فيكي عيشتي في حضن خالتك اكتر م عشتي في حضني
سهر/ كفاية يا ماما بلاش تعذبي نفسك اكتر من كده
سهير / لو يرجع بيه الزمن تاني كنت عيشتلك وعمري مفكرت إني أبعد عنك لحظة واحده
كل جوازة اتجوزتها قهرتك بيها كل راجل عيشت معاه ظلمك انتي لو سامحيني بابنتي انا مش هقدر اسامح نفسي
ع اللي عملته فيكي
سهر/ انا اللي نفسي يرجع الزمن تاني واعيش في حضنك انتي وبابا نفسي حد يحبني يسأل عني
لما أسر اتقدملي كل أصحابي مستغربين وبقوا يتكلموا عليه من ورايا ازاي ناس زينا تناسب البيه وعيلته ميعرفوش إن دا نفس كلام والدته بس انا غلطت
اني استمريت في جوازة فاشلة زي دي من الأول
الحب مش كل حاجة ياماما في حاجات تانية لازم تبقي موجودة
سهير/ انسي يا حبيبتي لو فضلتي تفكري بالشكل ده هتتعبي اقولك ع حاجة
سهر / قولي يا ماما
سهير/ اياد هيتجوز منه راحوا الليلة علشان يتفقوا ع ميعاد الفرح
سهر/ بتمناله السعادة من كل قلبي اياد يستاهل كل خير لانه انسان طيب وقلبه نضيف
سهير/ بس انا زعلانه كان نفسي يستني شوية يمكن
سهر/ ماما تقصدي ايه
اياد اخويا وبعدين بعد طلاقي من أسر مستحيل أفكر في الجواز خلاص
سهير بحزن/ وانا كان نفسي اموت وانا مطمنه عليكي مسبكيش قلبك مكسور بالشكل ده
سهر/ تاني ياامي خلاص تعبت وقلبي عجز من كتر الحزن متقوليش كده علشان خاطري
سهير/'هروح اخد الدوا ..هتقعدي معايا قدام التليفزيون؟
سهر/ هطلع معاكي حاضر
*--------------------------*
في فيلا علي الحسيني
علي بانفعال/ انت ايه غبي للدرجادي
حد يعمل اللي انت عملته ده
اسر/ غصب عني يا بابا
علي / تقوم تضربها وتموت اللي في بطنها
أسر بحزن/ مكونتش اعرف انها حامل
على / ولو مش حامل مينفعش تعمل اللي انت عملته دا
اسر/ الحكاية كانت متوضبه بشكل مقنع اوي مكانش في احتمال اني مصدقش ولا واحد في الميه
علي / أمك دي اتجننت انا طول عمري كنت بقول كده محدش كان مصدقني
اسر/ اعمل ايه بس نصيبي كده يابابا
علي/ عايز مراتك ولا لأ
اسر/ عايزة ونفسى تبقي في حضني دلوقتى بس جرحتها ووجعتها اوي
علي/ انا عارف هصالحها ازاي
اسر بفرحه/ بجد؟
علي / ما تجمد شوية ياابني مالك ملهوف كده للدرجة دي وحشاك
اسر/ كل دقيقة بتعدي من عمري وهي مش جانبي بموت فيها حياتي كلها انتهت ومش عارف هتسامحيني ازاي ولا بأنهي وش اروحلها واعتذرلها
علي / متقلقش سهر بتحبك واكيد هتسامحك انا عارف
اسر/ بس يا بابا انا قولتلها كلام....
مش عارف ازاي قولت كده وحاسس انها حتي لو سامحتني ع ضربي ليها مش هتسامحني ع الكلام اللي قولتهولها
علي/ هتسامح صدقني البنت دي طيبه وقلبها نضيف يا راجل دي استحملت مامتك مش هتستحمل كلمتين قولتهم ساعة غضب؟
اسر/ انا حاسس بسهر وبكل الوجع اللي فيها
وبصدمتها فيه..... كنت طوق نجاه ليها من كل الظلم اللي شافته في حياتها قتلها قتلت فرحتها انا مش عارف عملت كده ازاي قدرت أقسى ع اللي روحي فيها تعبان من غيرها ومش قادر أفكر
علي/ انا اللي مزعلني اكتر حفيدي اللي محلقتش افرح بيه
اتنهد أسر بحزن وسكت
*------------------------------*
في الجنينه
منه ل اياد وهي بتنظر في الساعة/ ع فكرة احنا بقالنا نص ساعة قاعدين ومقولتش ولا كلمة اتكلم بقي ولا اتكلم انا
انا رغايه ع فكرة ولو انت بقى من النوع اللي كلامه قليل
يبقي هنتعب مع بعض
اياد/ ههههههه مين قال كده أسألي أي حد في البيت عندنا وانتي تعرفي اني رغاي ومبفصلش بس
منه/ ايه مكسوف مني يا عم اتكلم عادي اعتبرني اختك عادي ههههههه
اياد/ اختي!!!!..أهو دا اللي مينفعش
منه/ قولي بقى مستريح في شغلك هناك
اياد/ الحمد لله. ..يعني مش اوي
منه / حبيت بقي كام مره
اياد بحزن/'مبلاش الأسئلة دي
منه / ع فكرة انا سألت سهر عنك
اياد/ سهر!!!!
منه/ شوف يا اياد انا بحب الصراحه ومبحبش اكدب ع نفسي وانا اخترت سهر انها تكلمني عنك علشان حاجة في دماغي واتأكدت منها
اياد/ وايه هي
منه/ مش هقولك غير إن دا السبب اللي خلاني مقتنعش بكلام طنط ملك
اياد/ سهر بنت خالتي وأختي اللي تربت معانا انا واخواتي ومكانش في نصيب اننا نرتبط وخلاص الموضوع انتهي بس هتفضل اختي ومش هقدر انسي المواقف اللى جمعتنا بيها انا واخواتي
منه/ وانا بحترم دا جداً وعمري مهزعل بالعكس انا بحب سهر لانها مش بس مرات اخويا لأ هي اختي ودايما كنا مع بعض وعشت معاها أوقات كتير صعبه
سهر ايام كتير كانت نفسيتها بتبقى وحشه اوي وكان أسر بيتصل بيه علشان اروح اقعد معاها كام يوم وكنت بتأثر اوي من اللي كانت بتعمله في نفسها وكنت بقول ازاي أسر مستحملها بس لما قربت منها عرفت قد ايه انها انسانه جميله ونضيفه اوي من جوه بس مامت أسر اللي كانت معاملتها ليها وحشه اوي
اياد/ انا بهرب من الكلام عن سهر علشان متفهميش غلط لكن واضح إنك كمان نفسك تتكلمي عنها
منه/ خلاص انا آسفة خلينا في موضوعنا انت بتفكر في ايه في المستقبل
اياد/ يعني زي أي شاب بفكر اعملي قرشين حلوين وارجع مصر اعمل مشروع كبير واتجوز ويبقي عندي بيت وأسرة واستقر بقي
منه/'بس كده
اياد/ لو عندك اي أفكار تانيه أوك نغير الاتجاه
انا راجل ديمقراطي ع فكرة
منه/ ههههههه كده بقي مش هنتعب مع بعض لاني بتخنق من السيطرة لمجرد إن الراجل بس عايز يثبت رجولته وخلاص مش مهم إن كان دا صح ولا لأ المهم محدش يمشي كلمته عليه
اياد/ لا طبعاً لازم المناقشة والرأي الصح هو اللي يمشي منه/ المشكلة إن كل واحد بيفتكر إن رأيه هو اللي صح
اياد/ أهم حاجة اننا مندخلش أي حد في حياتنا
منه/'وانا كمان بطلب دا منك يعني لا تقولي دي امي ولا اختي ولا الكلام ده
إياد ببتسامة/اوك اتفاقنا
*------------------------------*
فى المكتب
أسر / طيب يا تيته براحة وواحده واحده فهميني في ايه وايه الصوت ده هي ماما بتصوت ليه
دولت/ تعالي دلوقتي حالا انا اعصابي تعبت ومش قادرة استحمل مامتك من وقت ماجت من عندك وهي تصرفاتها بقت غريبه أدخلها وهي
نايمه تصوت أدخلها بالأكل تصوت وكل اللي ع لسانها هقتلها هموتها
اسر/ حاضر يا تيته انا جاي مسافة السكه
تيته/ ايوه يا ابني تعالي أنا تعبت ومش عارفة أتصرف الجيران اتلموا ع صوتها عمر ماحد سمع لينا صوت في العمارة
أسر / انا جاي. ..سلام
علي/ في ايه يا ابني مالها مامتك
اسر/ كل اللي فهمته إن ماما حالتها النفسيه وحشه اوى واعصابها تعبانه انا هروحلها بعد اذنك يا بابا
علي/ استني ياابني انا جاي معاك
اسر/ واياد ومامته
علي/ هنستأذن ونخرج عادي. ..ووليد وسعاد موجودين يلا بينا
خرج علي وأسر من المكتب استأذن أسر وخرج بسرعة
يقابله اياد/ في حاجة يااسر انت كويس
اسر/ انا كويس ماما بس تعبانه شوية هروح اشوفها
علي/ بعد اذنك ياابني
اياد/ هاجي معاكو
علي/ لا خليك مع خطيبتك
منه / ابقي طمنا يا أسر لما توصل
اسر/ حاضر
يتركهم ويشغل العربية
علي/ البيت بيتك ياابني هروح اطمن وهرجع بسرعة
اياد/ اتفضل يا عمي
*-----------------------------*
في شقة رامي
رامي ينادي علي سلمى ن/ سلمى ....سلمى
تخرج سلمى بتنهيدة/ في ايه يا رامي انا بسمع من أول مرة ع فكرة
رامي وهو بيفرش السفرة /هههههههه
'تعالي جايبلك البيتزا اللي بتحبيها
سلمى / لا مليش نفس
رامي بدهشه/ لا مش معقوله بقي ملكيش نفس للبيتزا دا جايب اتنين واحده فراخ وواحده سي فود تفتح النفس
سلمى / الحمل والدوخه اللي بتجيلي دي مخلياني مليش نفس احط حاجة في بوقي
رامي/ قربي بس اقعدي وانتي نفسك هتتفتح
قربت سلمى ونظرت للبيتزا ثم ابتلعت ريقها/ هاكل قطمه واحده بس علشان متزعلش
رامي/ طيب اقعدي
سلمى / حلوه اللي بالفراخ دي
رامي/ اياد عمل ايه. ..اتفقوا ع كل حاجة
سلمى / معرفش لسه متصلتش ب ماما
رامي/ انتي متأكدة إن اياد بيحب منه بجد مش هيتجوزها علشان ينسي اللي حصل؟
سلمى / ابقي أسأله
رامي/ ايه ده انتي زعلتي ولا ايه
سلمى / رامي انت مرتبك بيروح فين انا مبشوفش منه حاجة
رامي/ معلش اصل جيب البنطلون مقطوع
سلمى / مش فاهمه
رامي/ بكره تفهمي. .
أو يمكن بصرف ع مراتي التانية ولا حاجة
سلمى / انت بتهرج؟
رامي بسخريه/'لا بتكلم بجد....سلمي انتي تعرفي علينا قد ايه أقساط لسه متدفعتش لفرش الشقه دى
سلمى /'تقصد ايه
رامي/ هو اللي مبيشوفش من الغربال يبقي ايه
سلمى / تقصدني انا
رامي/ خلاص كلي وانتي وساكته
سلمى / يعني مش عايز تقولي
رامي/انتي ليه مصممه تنكدي عليه
سلمى / خلاص يا رامي انا قايمه نفسي اتسدت
رامي ينظر بدهشة/ نعم نفسك اتسدت بقي يا مفتريه تخلصي واحده بحالها لوحدك
سلمى / دول كام قطمه بس وبعدين دا بدل متقولي بالهنا والشفا
رامي/ اومال لو ملكيش نفس كنتي عملتي ايه
سلمى /انزل شوفلي تاكسي بطني وجعتني من البيتزا بتاعتك دي
رامي/ ههههههه انا مش قايم حتي لو تنططي دلوقتي
سلمى / طيب روح اعملي كوباية شاي دماغي مصدعه
رامي/ نعم يااختي انتي ليه محسساني يا سلمى ان اللي بتحمل دي مبتتحركش خالص يا حبيبتي في ستات بطنها قدامها وبتشتغل وعندها عيل واتنين وكمان بتتفحت شغل في البيت وانتي تعبانه ولسه في الشهر التاني ومش عايزة تعملي حاجة في البيت
سلمين/ اسمع يا رامي انا هدخل البس واروح ل ماما هي اللي هتستحملني وهترعيني بدل تقطيمك ده
رامي/ ومامتك هتفضالك ولا هتقعد جنب بنت خالتك اللي تعبانه؟
سلمى / لا ماما رجعت البيت وخالتو قعده جنب سهر
رامي/ طب دا اسمه كلام هي خالتك مش تعبانه هي كمان ومحتاجه اللي ياخد باله منها
سلمى / هروح اطمن عليهم الصبح
رامي/ طيب يا حبيبتي خليكي عاقله بقي وشيلي الأكل واعملي كوبيتين شاي نحبس بيهم
سلمى / بس تساعدني في تنضيف المطبخ
رامي ب استسلام / حاضر
*---------------------------
في شقة دولت.
اسر ل ملك/ طيب يا ماما اهدي بس وتعالي معايا
ملك ب انفعال/ هي فين
اسر/ هي مين؟
ملك/ مراتك
اسر/ سهر! حضرتك عايزاها في حاجة
ملك بصراخ/ آه عايزة اقتلها هاتهالي عايزة اخنقها ب ايدى نظر اسر لوالده بدهشه
علي/ دي اتجننت ياابني يلا خرجها قبل متعمل في نفسها حاجة
ملك نظرت ل علي بغضب وانقضت عليه وامسكت بوجهه لتترك أثر جرح كبير ب اضافرها في وجهه
بعد أن ابعدها اسر عن والده بالقوة
علي بغضب/ وديها المستشفي المجنونه دي
دي ممكن تقتلك
ملك/ انا مجنونه ياابو عين زايغه
علي/ انتي ملكيش حل غير سراية المجانين خليهم يدخلوا ياخدوها ياابني
اسر/ ماما تعالي معايا
ملك/ هتوديني فين؟
اسر/ مكان هتهدي اعصابك فيه
ملك/ بس انا كويسه مش تعبانه
اسر/ هروح معاكي اوصلك ل هناك المكان هيعجبك صدقيني
ملك/ انت بتكذب عليه هتوديني المستشفي زي ماقال باباك
علي يغمز ل اسر انه يخرج ب ملك
اسر/ طب انا هفضل معاكي الليله ولو معجبكيش المكان هنروح مع بعض
ملك/ طلقتها
اسر/ هطلقها وهعمل كل اللي حضرتك عايزاه بس تعالي معايا
أنت تقرأ
أحببتها رغم كل شيء 🥰
Romanceاجتماعية رومانسية لفتاة عانت كثيراً من زيجات والدتها حتى تستقر سهر في منزل خالتها التي عاشت معاها ك ابنتها ف أحبها أبن خالتها منذ الطفولة ليسافر وتلتقي بمن احبها وتحدي كثيراً من أجلها سهر تعيش الماضي والحاضر معاً ♥️ تعالوا نعرف حكايتها 💚💜
