أحببتها رغم كل شيء 🥰

الحلقة ٢٦

الحلقة السادسة والعشرون
#احببتها_رغم_كل_شيء
#بوسي_مصطفي
......................
سهر ببكاء / هونت عليك ترفع ايدك وتضربني دا قولت إنك اخرت صبري بعد اللي شوفتوا من الدنيا
دا لما كنت بضايق ولا حد يزعلني كنت بترمي في حضنك اتحامي فيك كنت ابويا اللي ملحقتش اشبع منه
اسر/ كنت يا سهر اومال انا ايه دلوقتي
سهر وهي بتبعد عنه وبتمسح دموعها/ انت زي كل راجل عرفته وشوفته في حياتي. ..انت حمدي وراضي وسراج وجميل انت كلهم
اسر/ حقك عليه سامحينى يا سهر غلطت بس انتي قلبك كبير وبتسامحي انا حاسس إن الدنيا كلها متقفله في وشي ولما رفعت ايدي عليكي اتخنقت اكتر انا آسف ياحبيبتي
سهر/ مامتك عايرتني ب امي علشان متربتش في حضنها طب متبقي هي امي وتاخدني في حضنها
أسر يخطفها وياخدها ف حضنه/ وانا حضني راح فين مش دا اللي ياما بكيتي وانتي متشعلقه فيه
سهر/ محستش اني يتيمه ومليش حد اكتر من اللحظة اللي لاقيتك فيها بعيد عني
اسر/ ايه اللي يرضيكي  اللي هتقولي عليه هنفذه
سهر/ انك تبعد عني وتسيبني لوحدي
اسر/ مستحيل اسيبك تنامي لوحدك
سهر/ ليه الاوضة فيها عفريت؟!! مبقتش أخاف خلاص من كتر اللى شوفته في حياتي
اسر/ طب بلاش انام جنبك هنام ع الكنبه هنا ونامي انتي براحتك
المهم مش هسيبك تنامي لوحدك
ابتعدت سهر واستدارت لتنام
اسر/ سهر متناميش زعلانه مني علشان اعرف انام عشان خاطري ياحبيبتي انا مش قادر اسامح نفسي ولا عارف انا عملت كده ازاي
سكتت سهر ومردتش ابتعد أسر وقرب ينام ع الكنبه
شوية وقام اسر يطمن ع سهر لاقها نايمه قرب منها واحتضنها واغمض عينيه لينام
*------------------------*
في شقة عمار
عمار/ يا بنت الناس سبيني عايز انام
علا/ تنام وتسيبني دمي محروق بالشكل ده اعمل ليكو خدامه انا وأختي علشان خاطر مامتك وف الآخر تقولي
انا بكلم ابني مبكلمكيش انتي
عمار / انتي اللي غلطانه امي وبتتكلم معايا أنتي ايه اللي يدخلك بينا
علا/ يعني الحق عليه اني بدافع عنك
عمار / بدافعي عني ايه هو احنا كنا في خناقة وبعدين امى لو بتضربني حتي انتي ملكيش فيه ومتدخليش
علا/ انت بتزعقلي ليه؟
عمار / علا انا تعبان طول النهار في الشغل وعايز استريح ممكن اذا سمحتي يا علا هانم تسيبيني انام
علا/ ايه موضوع سهر بالظبط
عمار بغضب/ سيبتي موضوع ماما ودخلنا ف سهر
خير مالها سهر؟!!!
علا/ جايه يعني من غير جوزها يكونش متخانقين
عمار/ حاضر هبقي أسألها الصبح ممكن تسيبني انام بقي
علا/ بتتريق؟ !!!
عمار/ شوفي يا بنت الناس انا بقيت لحد هنا منك ومن أسألتك الغريبه دي
علا/ طيب والست منه كمان اللي طلعتلنا كده ع فجأة
عمار / منه صاحبة سلمى وهي عزمتها عادي ايه مشكلتك انتي مش فاهم؟!!!
علا/ كلهم بيرسموا ع اياد اخوك ماهو بقى جاي ومعاه تحويشة خمس سنين غربه وتلاقي المبلغ اللي معاه مش قليل
عمار/ هههههههه يا سلام علي ذكائك الخارق
يا مراتي يا عاقله انتي تفتكري منه هترسم ع اياد علشان فلوسه انتي متعرفيش هي بنت مين دا أبوها معاه فلوس توزني انا شخصيا يا بنتي فوقي بقي وبعدين كل حاجة قسمه ونصيب  المهم هو يحب مين اياد مش أي واحده تدخل دماغه كده بسهولة
علا/ وطبعاً اختي بعيده عن تفكيره لان الست سهر واخده عقله
عمار بغضب وهو ممسك بذراع علا/ حسك عينك اسمعك تقولي الكلام دا في اي مكان ولا مع أي حد فاهمه
سهر متجوزه وانتي بكلامك ده بتخربي بيتها وبتعملي مشكلة ل اخويا
علا/ يعني اياد اخوك بطل يحبها
عمار/ ايوه مبقاش يحبها
علا/ واهتمامه بيها دا بتسميه ايه
عمار / علا. .سهر دي اختنا متربيين مع بعض من وإحنا صغيرين متحاوليش تعكري علاقتنا بيها
علا/ بس انا حاسه إن الموضوع اكتر من انكو اخوات
عمار وهو ممسكت بالبطانية وبانفعال يغطى نفسه/تصبحي ع خير يامراتي روحي شوفي العيال
*-------------------------*
بعد الظهر تستيقظ سهر بتعب لتقترب من المرآة تتحسس وجهها بحزن لتسقط دمعه من عينيها تزيلها سريعا لتتجه الي الحمام وبعد وقت قصير تخرج وهي بتقوم بتجفيف شعرها بالمنشفه تتجه لخزانة الملابس 
تقوم بتمشيط شعرها ثم ترتدي ملابسها وتمسك بالهاتف وتقوم بكتابة رسالة محتواها
(انا خارجة هروح ابارك ل سلمي لو تحب تيجي تبارك لها ممكن اقعد هناك شوية لما تيجي)
وضعت الهاتف ع المرآة وقامت بجلب الحذاء
الهاتف يرن تنظر للشاشة. .أسر بيتصل
لم تجب وقامت بإرسال رسالة أخري
( انا كنت بستاذنك هروح عند سلمي مش هتاخر لو تحب تيجي يعني )
قرأ أسر الرسالة وهو جالس ع مكتبة ف الشركة بغضب ثم قام بإرسال رسالة ل سهر
(يعني مش عايزة تردي ع التليفون وتكلميني أوك يا سهر براحتك وعايزة تروحي تباركي لبنت خالتك مفيش مشكلة بس انا مش هقدر أجي عندي شغل سلام)
قرأت سهر الرسالة ولم تهتم وضعت الهاتف في حقيبتها
وخرجت من الغرفة
ملك قاعدة ع السفرة بتشرب قهوتها 
تنزل سهر وبدون اهتمام تفتح باب الفيلا وتخرج
ملك بانفعال/ عزيزة
تخرج عزيزة من المطبخ / نعم يا هانم
ملك/ ادخلي اوضتي هتلاقي في الدرج اللي جنب السرير
ازازة صغيرة هاتيها
عزيزة / حاضر يا هانم
*--------------------------*
قدام العمارة اللي ساكنه فيها سلمى توقف سهر وتتصل ب مني
سهر/ الو ...آه انا واقفه قدام العمارة
منى / طيب اطلعي يا سهر وخبطي ع الباب يا حبيبتي
سهر / لا هستني حضرتك لما تيجي قدامك كتير.
منى / لا خلاص قربنا
سهر/ معاكي حد
منى / معايا الحبايب كلهم
سهر/ انا واقفه مستنياكو
منى / دقيقتين ونكون عندك. ..إن شاء الله
تقفل سهر التليفون وتفتح باب العربية تنتظر خالتها وهي ناظرة لنهاية الشارع عربيه توقف قدام العمارة تنزل منها مني
وبعدها تنزل سهر وتقرب عربيه تانية وتوقف
ينزل عمار وعلا والولاد
تسلم سهر ع مني وعلا ويطلعوا فوق
منى ل اياد/ اركن يا حبيبي العربية ومتنساش تطلع بالحاجة اللى معاك
اياد/ حاضر ياماما
في شقة سلمين الجرس يرن تستيقظ سلمين وهي تفرد ذراعيها لتأتي صفعه قوية ع وجه رامي يستيقظ بفزع
رامي / مين. ..مين اللي بيضرب
سلمى وبضحكه عاليه/ ههههههههههههههه آسفة يا حبيبي ماخدتش بالي
رامي وهو ممسك خده بألم وسخرية / ولا يهمك يا حياتي دا ايه الصباح العسل ده
سلمى / ههههههههههههه معلش بقي أصلي متعودة انام لوحدي وماخدتش بالي إن ف حد جنبي
رامي/ ع أساس اني هوا مثلا
سلمى / بطل رغي وشوف مين اللي ع الباب الجرس بيرن بقالوا كتير
رامي/ ومين اللي جاي الصبح كده
سلمى / الساعة حداشر صبح ايه بقي يلا شوف مين ع الباب
رامى ببتسامة/ طب مش نصبح الأول ع القمر
سلمى / هههههههههههه لا ماانا صبحت عليك ولا ناسي
رامي وهو ممسك خده مرة تانية وببتسامة/ صباحيه مباركه يا عروسة
سلمى بخجل/ ميرسي يا حبيبي
رامي يقرب منها/ ايه ميرسي دي
سلمى / اومال اقولك ايه
رامي / ميرسي حاف كده مينفعنيش 
سلمى / رامي الناس اللي ع الباب هتزهق وتمشي.
*------------------*
قدام الباب
سهر/ واضح انهم لسه نايمين يلا يا خالتو ونبقي نيجي وقت تاني
علا/ احنا لسه هنيجي تاني؟!!!...لا يا طنط خبطي تاني
عمار/ فعلا سهر معاها حق شكلنا جينا بدري يلا ننزل
يطلع اياد بتعب / ايه العمارة اللي مفيهاش اسانسير شغال دي اومال لو مكانتش لسه جديدة
ياخد عمار الحاجة من ايد اياد / معلش يا اياد عارف إن السلم  متعب لو مكونتش شايل اياد وياسمين كنت شلت الحاجة معاك
مني/ ماهو مفروض اياد كبر ميتشالش
علا بضيق/ خبط انت يا عمار خلينا نخلص
الباب يتفتح
رامي ببتسامة/ يااهلا وسهلاً اتفضلوا
عمار يقرب يدخل / صباحيه مباركه يا عريس
ويدخل عمار
منى / سلمى نايمه.
رامي/ اتفضلوا الاول يا جماعة.
يدخلوا كلهم...
رامي/ سلمى صاحيه يا طنط.
تخرج سلمى ببتسامة لتحتضنها مني بدموع.
عمار/ في ايه بس يا ماما. ..مبروك يا سلمى
سلمى / متشكرة يا عمار عقبال ولادك
اياد وسهر وعلا يسلموا ع سلمين ويباركولها
سلمى / هنفطر مع بعض بقي
منى / فطار ايه انا جايبه غدا ليكي انتي وجوزك
رامي/ مكانش ليه لزوم التعب دا يا طنط ع العموم هنتغدا مع بعض بقي ومتقولوش لأ هنتغدا من الأكل اللي طبخته طنط تسلم ايدك
منى / بالف هنا يا حبيبي بس مينفعش يعني ناكل اكلكو
رامي/ يلا يا سلمي دخلي الأكل المطبخ وانا هجهز السفرة
منى / استني يا بنتي انا جايه معاكي تعالي يا سهر.
يدخلوا المطبخ
منى / عامله ايه يا حبيبتي
سلمى / الحمد لله. ...كويسين يا ماما
تبتسم مني وتنظر ل سهر/ مالك يا سهر انتي تعبانه
سهر/ لا ابدا يا خالتو انا كويسه
منى / طب اقعدي ع الكرسي هنا لما نجهز الأكل
سلمى شغلي البوتاجاز نسوي المحشي انا جيبتو من غير تسوية علشان عارفة انه هيبرد في الطريق
سلمى / تسلم ايدك يا ماما وكمان كنتي عايزة تسويه انتي لحقتي عملتي كل الأكل دا أمتي
منى / شغلي الفرن بقي علشان المكرونة وانا هحمر الفراخ والحمام
سهر قاعدة سامعه ضحكات مني وسلمين مع بعض ولمه العيله اللي في الصالون عمار واياد ورامي بيهزروا ويضحكوا مع بعض والشقة فيها لمه وهيصه كلهم سعدا ومبسوطين تفتكر يوم صباحيتها ليتغير وجهها
{فلاش باك}
سهر مازالت نايمه وبجوارها أسر
جرس الباب يرن لتخرج عزيزة من المطبخ
ملك/ صباح الخير يا عزيزة العرسان لسه نايمين
عزيزة / صباح الورد يا هانم. ..من شوية نزل أسر بيه اخد فطار وطلع اوضته
ملك/ يعني صحيو وبيفطروا كمان
تمسك ملك بالهاتف وتتصل ب أسر
أسر يفتح عينه ع صوت التليفون ليستدير الناحية التانية متجاهل صوت التليفون ويقوم باحتضان سهر ليغمض عينه مره تانية
التليفون يرن مره تانية
يقوم أسر بغضب ويمسك التليفون
الو...ماما؟ . ..لا هقوم أهو. ..
بقينا الضهر؟. ..أوك هنزل خمس دقايق سلام
سهر ممسكه ايد اسر/ رايح فين يا حبيبي
أسر ببتسامة / أخيراً صحيتي
سهر/ صباح الخير يا حبيبى
أسر ببتسامة / صباحيه مباركه يا عروسة
سهر تبتسم بخجل
اسر/ هنزل ل ماما وهطلع ع طول مش هتاخر
سهر/ هي مامتك تحت
اسر/ لسه جايه. ..هتحجج بأي حجه علشان اطلعلك يا قمر
سهر ببتسامة/ أوك. . بس متتأخرش
*----------------------*
تحت
ملك/ محدش جه يا عزيزة
عزيزة/ لا يا هانم
ملك/ معقولة مفيش حد خالص من قرايبها جه
ينزل أسر ببتسامة /صباح الخير يا ماما
ملك ببتسامة وتحتضن اسر/ صباح الخير يا حبيبي. ..ألف مبروك قولي عامل ايه
اسر/ الحمد لله. ..ايه يا داده معملتيش حاجة ل ماما تشربها
ملك/ لا يا حبيبي مش هشرب حاجة انا جايه بس اطمن عليك أنت وعروستك ...هي نايمه ؟
اسر/ آه نايمه. ..معلش بقي حضرتك عارفة احنا رجعنا من بره متأخر
ملك/ عارفة يا حبيبي يعني لا هيبقى فرح ولا كمان تتعشوا مع بعض بره بس حلوه فكرة العشاء اللي عملته لاصحابك ع الأقل علشان شكلنا قدام الناس دا انا كنت حاسه كانها مش اول جوازة ليك
اسر/ الظروف جات كده بقي يا ماما هنعمل ايه
ملك/ ومحدش من أهلها جم يا ابني؟
أسر بحرج/ لا يا ماما هيجو ع بالليل
........
في غرفة سهر
سهر في التليفون/ لا الف سلامة عليكي يا خالتو
منى / معلش يا سهر اعذريني يا بنتي بس البرد مكسر جسمي ومش مخليني قادرة اتحرك ابعتلك سلمي؟
سهر/ لا يا خالتو خليها جنبك علشان لو احتاجتي حاجة
منى / المهم انتي كويسه
سهر/ الحمد لله
منى / وجوزك كويس معاكي. .مبسوطه يا سهر ؟
سهر/ الحمد لله. ..يا خالتو
منى / ربنا يسعدك. ..يا بنتي خلي بالك من نفسك ومن بيتك يا بنتي
سهر/ حاضر يا خالتو
منى / لو فضلت تعبانه كده لبكره هبعتلك سلمى ... وعمار ومراته هيجولك بالليل يا حبيبتي
سهر بحزن/ هي ماما لسه مرجعتش من شهر العسل
منى بارتباك/ هو انا مش كفاية ولا ايه ع فكرة بقي اتصلت وقالتلي انها جايه قريب ومحضرالك مفاجأة حلوه اوي
سهر/ فيها الخير  ..سلام بقى يا خالتو
بكت سهر وهي تتذكر الماضي
منى / سهر. ..سهر مالك يا بنتي انتي بتعيطي
سهر فاقت من ذكرياتها وهي بتمسح دموعها / لا يا خالتو مفيش حاجة
سلمى / يلا يا جماعة الأكل هيبرد
منى / يلا يا سهر علشان تتغدي
*----------------------------------*
قعدوا ع السفرة
منى ل سلمى / اقعدي جنب جوزك يا بنتي
وانتي يا علا مالك قاعدة بعيد كده تعالي اقعدي جنب جوزك
علا/ بأكل ياسمين وعمار بيضايق وبيتنرفز لو حاجة وقعت عليه
عمار/ لا يا حبيبتي ولا يهمك تعالي
مش هتنرفز قدام الناس ف البيت بقي نتحاسب
رامي/ هههههههه يا عم وفيها ايه ...انا بقي لما نخلف يا سلمي مش هضايق ابدا هاكلهم بايدي
منى ببتسامة / يا حبيبي قول... إن شاء الله  ...
سلمى / دلوقتي بس بتقول كده وقتها هتعمل زي عمار مبيعمل مع علا كده بالظبط
رامي/ مبتاكلش ليه يا اياد. ..متخافش دا أكل مامتك سلمي ممدتش ايدها فيه
الجميع/ هههههههههههههههههه
سلمى / يا سلام ماشي بس لما يمشوا شوف هيحصلك ايه
رامي/ انا مروح معاكو يا جماعة
منى / سلمي قلبها ابيض بتحب بس تهزر معاك
مبتاكليش ليه يا سهر أكل مراتك يا رامي وانت يا عمار أكل مراتك عماله تاكل بنتها وماكلتش حاجة
علا/ انا باكل أهو يا طنط
سهر/'الحمد لله
وقامت من ع السفرة
سلمى /'رايحه فين يا سهر كملي اكلك
سهر/ شبعت. ..تسلم ايدك يا خالتو
منى /'بألف هنا يا حبيبتي
اياد بياكل ابن عمار
منى / سيبه يا حبيبي ياكل لوحده علشان يتعلم هو مش صغير
اياد/ ماهو قاعد مبياكلش. ..ماكلش إلا لما بدأت اكله بأيدي
منى / طول عمرك حنين ع العيال من وانت صغير
علا/ عقبالك يا اياد منفرح بيك ونشوف ولادك بيجروا كده حواليك
منى / قريب. ..إن شاء الله
علا/ البنات كتير بس هو يختار المناسبة ليه
سهر / بعد اذنكو هروح أنا بقى
سلمى / ايه دا يا سهر انتي لحقتي تقعدي
علا/ ايه يا سهر هو انتي اضايقتي من كلامى
سهر/ اضايقت من كلامك؟ !!!يعني ايه مش فاهمة انتي قولتي ايه علشان اضايق
يخبطها عمار في رجلها من تحت الطربيزة
علا / اصلك قاطعتي كلامي وقولتي انك مروحه
سهر/ آه ودي فيها ايه مش فاهمه
منى /'في ايه يا علا مالك
اياد/ بعد اذنكو هقوم اغسل ايدي
تليفون سهر يرن تخرج تتكلم في البلكونة
منه/ ازيك يا سهر اخبارك ايه
سهر/ الحمد لله
منه/ كلمتك كتير بالليل مردتيش ليه؟
سهر/ كنت نايمه ليه  في حاجة؟
منه/ لا يا حبيبتي مفيش بس كنت قاعدة في النادي زهقانه قولت اكلمك. ..بتعملي ايه دلوقتي
سهر/ انا عند سلمي
منه/ بجد....هي عامله ايه ...
سهر/ كويسه. ..الحمد لله. ..
منه/'هكلمها بعد شوية تكون فاضيه
بقولك متيجي يا سهر النادي انا قاعدة لوحدي وعايز حد أتكلم معاه
سهر/ تعرفي اني واحشني النادي اوي ونفسي اشوف أصحابي هناك
منه/ طيب تعالي انا قاعدة منتظراكي
سهر/ مسافة السكه سلام
تخرج سهر من البلكونة
مني/ ايه يا سهر جوزك اللي كان بيكلمك
سهر/ لا دي منه بتسلم عليكي يا سلمي وبتقولك هتبقي تكلمك بعد شوية
سلمى /طيب اقعدي يا سهر مستعجله ليه
سهر/ هروح النادي اغير جو ...سلام
منى / مع السلامة. .مش محتاجه حد يوصلك
سهر/ معايا العربية.
منى / اه نسيت.
*----------------------------------*
في النادي
يارا/ هي قالتلك جايه
منه/ آه انا مش قولتلك كلمتها   من شوية وقالت جايه
يارا/ أصلها بصراحة وحشاني اوي سهر دي تدخل القلب ع طول
منه/  فعلا سهر طيبه اوي وقلبك يتفتح ليها من أول متشوفيها
سهر مقربه منهم ببتسامة/ مين بيجيب في سيرتي
يارا بفرحه/ سهر!!!مش ممكن
تقوم يارا وتحتضن سهر / وحشاني اوي يا سهر فينك يا بنتي محدش بيشوفك يعني
سهر/ أهو في الدنيا ازيك يا منه
منه/لسه فاكره ماهو من لقي اصحابه
يارا / هههههههه انتي غيرانه ولا ايه
سهر/ خلوني اقعد الأول
منه/ ايه مالك جايه الطريق مشي؟!
سهر/ لا يااختي أكلت عند سلمي والأكل تعب معدتي
يارا / الف مبروك عرفت من منه إن بنت خالتك اتجوزت
سهر/ عقبالك يا يارا
منه / شكلها مش ناويه تعملها
سهر/ ليه بس كده؟ !
يارا/ حسام ابن عم جوزك كل منحدد ميعاد الفرح يأجل
منه/ هههههههه شكله خايف من الجواز
سهر/ تشربوا ايه
منه/ ولا أي حاجة انا معايا اللي هشربه
سهر/ اوعى يكون اللي في بالي
منه/ ههههههه مقولتليش اسر عمل ايه
سهر/:عدت ع خير. ..الحمد لله
يارا/ ههههههه ايه قفشكوا بتشربوا سجاير
سهر/ لا يا اختي مشربتش ومستحيل اشرب هو انا ناقصة
منه/ يا خوافه
سهر/ اللي يسمعك كده يقول انك مخوفتيش من اخوكي لما دخل علينا
منه / اتكلمي عن نفسك انا مبخافش من حد
يارا تشاور لوحده صاحبتها/ بعد اذنكو خمسه ورجعالكو
منه / مين كان معاكي عند سلمي؟
سهر / هيكون مين يعني؟...خالتو وعمار وولاده ومراته
منه/ واياد كان هناك
سهر/ اه بتسألي ليه؟ !!!
منه/ لا ابدا عادي يعني اصلك قولتي ع كل اللي راحوا هناك ومجبتيش سيرة اياد
*------------------------*
في فيلا اسر في المساء
في المطبخ
عزيزة / كفاية يا هانم الأكل هيبقى حراق اوي وأسر بيه مش هياكل منه
ملك/ ماهو دا المطلوب
عزيزة /يعني ايه مش فاهمه
ملك/ مش مهم تفهمي. ..خلصي الأكل بسرعة وظبطي السفرة
هي سهر فين
عزيزة/ نايمة فوق
ملك/ ابقي صحيها علشان تاكل
اسر واقف ع باب المطبخ ببتسامة / يا سلام ريحة الأكل تجنن
تقرب ملك من اسر/ اطلع غير هدومك وصحي مراتك عزيزة هتجهز السفرة
اسر/ تسلم ايدك مقدما يا ست الأكل
*-------------------------*
يطلع اسر الغرفة سهر نايمه يحاول يصحيها
سهر بغضب / انا عايزة انام
اسر / مش هتاكلي
سهر / لأ مليش نفس
يتركها اسر وينزل تحت
السفرة جاهزة والأكل موضوع بشكل رومانسي
ورود وشموع
اسر/ مين اللي عمل كل ده
عزيزة/ دي الست ملك هي اللي جهزت السفرة بالشكل ده
ملك / عزيزة تعالى
تدخل عزيزة المطبخ
ملك/ الطبق ده حطيه قدام اسر فاهمه
عزيزة / حاضر بس ايه اللي ف ايدك دا يا هانم
ملك/ انتي المره اللي فاتت منفذتيش اللي قولتلك عليه بس انا المرادي هنفذ بنفسي
عزيزة/ يعني الازازة
تقاطعها ملك/ متساليش حطي الطبق دا قدام اسر ودا قدام سهر سمعاني
هزت عزيزة راسها وخرجت من المطبخ
عزيزة لنفسها/ جاتلك الفرصة لحد عندك يا عزيزة انك تنتقمي بس سهر ملهاش يد ف الموضوع الانتقام بحق وحقيقي يبقي من   علي ومفيش حاجة هتحرق قلبه اكتر من دي بس لو حققوا معايا هقول ايه دي الوليه عايزة تنتقم مني انا كمان ما انا اللي بطبخلهم
عزيزة/ ساعتها لو اتكلمت هتبقي فتحت ع نفسها نار مش هتنطفي
كده كله تمام خطه ناجحه ميه في الميه
اسر/ داده انتي في ايه متخلصي
عزيزة / ها. ..لامؤاخذة يا بيه
وبدلت عزيزة الأطباق
تخرج ملك من المطبخ/ ايه يا حبيبي اومال فين مراتك
اسر/ نايمه يا ماما
ملك بضيق/ كده طيب
وتاخد الطبق اللي كان مفروض هيبقى قدام سهر وتدخل بيه المطبخ وتضعه في الباسكت
اسر/ ماما حضرتك مش هتاكلي
ملك/ لا يا حبيبي انا هطلع اخد شاور وانام تصبح ع خير
وهي طالعه فوق / أوك يا سهر ناجل المرادي بس هتروحي مني فين بعد كده
واقفه عزيزة وببتسامة خبيثة تنظر ل اسر اللي أكل طبقه بالكامل
اسر/ الحمد لله. ..شيلي بقي يا داده الأكل
عزيزة/ بألف هنا يا بيه
اسر طالع ع السلم شعر بألم في معدته كمل طريقة ووصل ل اوضته فتح الباب الألم اشتد عليه
*---------------*
ملك في غرفتها واقفه قدام المرايا / كده احلوت اوي
بس باقي التنفيذ لازم انتقم منك يا عزيزة انتي كمان بقى كنتي متجوزه علي ف السر وكنتي هتخلفي منه كمان
وكل الوقت ده بتضحكي علينا
انا لازم أخلص منك قبل متنفذي انتقامك مننا وهو بالمره سهر ابعدها عن طريق ابني ويرجع لحضني من تاني
ازازة مش هتكلفني كتير
كفاية اللي اخدته عفاف واهو ابقي خلصت من اتنين كانوا سبب  تعاستي طول حياتي واحده خطفت مني أبو ابني والتانيه خطفت ابني مني
*------------------------*
في غرفة أسر
يقترب أسر من سهر وهو واضع يده ع معدته / سهر. ..سهر
سهر تستيقظ بانفعال/ قولتلك مش هاكل. .عايزة انام. ..عايزة انام. ..ايه أقولها تاني
أسر بصوت متعب يكاد ان يتلاشي/ سهر قومي اعملي حاجة انا بموت
تتلفت سهر بفزع وما أن تري أسر حتى تصرخ
سهر/ أسر في ايه مالك انت تعبان ولا بتهزر ايوه تلاقي دي حركه من حركاتك علشان اكلمك ما انا عارفاك لما تحب تصالحني بتعمل أي حاجة علشان اكلمك
أسر وهو ممسك بيد سهر / اتصلي بالاسعاف بطني بتتقطع هموت
ويوقع أسر ع الأرض
تصرخ سهر وتخرج من الغرفة لتطرق باب غرفة ملك بكل قوة
ملك تفتح بانفعال/'في ايه هو مفيش ذوق. ..حد يخبط بالطريقة دي
سهر بصوت مرتعش/ أسر جوه تعبان
ملك/ نعم تعبان يعني ايه
سهر/'معرفش واقع ع الأرض وبيتألم من معدته
ملك / ايه
تجرى ملك ناحية الغرفة وتجلس ع ركبتيها واضعه أسر ع قدميها /'مالك يا حبيبي في ايه
اسر/ ماما هموت آلم في معدتي معرفش أكلت ايه 
ملك بتصرخ في سهر/ اتصلي بالاسعاف ابني هيروح مني

*--------------------------*
بالأسفل عزيزة اخدت شنطتها وخرجت من الفيلا بسرعه
ملك ل سهر اللي كانت واقفه بتبكي وتصرخ / اسندي معايا مش هسيب ابني كده
قربت سهر وامسكت ب أسر من ناحية وملك من ناحية أخري ووقفوه ليستند عليهم
لحد م وصلوا بيه للجنينه
ملك/ انا هشغل العربية خليكي معاه
في نفس اللحظة جاءت سيارة الإسعاف التي نقلته سريعاً الي المستشفي
تجلس ملك وسهر امام غرفة العمليات
ملك تبكي خوفاً ع حياة ابنها محدقه ف سهر التي كانت تبكي بصمت و جسدها يرتعد خوفاً ع حبيبها
*----------------------------------------*
#احببتها_رغم_كل_شيء
#بوسي_مصطفي