أحببتها رغم كل شيء 🥰

الحلقة ٤

الحلقة الرابعة
#احببتهارغم كل شيء
#بوسي
.............
في مساء أحد الأيام.
سهر قاعدة في غرفتها قدام التليفزيون
التليفون يرن / الو.. اه كويسه.
سلمى / محدش بيشوفك يعني بطلتي تيجي عندنا ليه ؟
سهر / معلش يا سلمى مشاغل.
سلمى /   ومشغولة في ايه بقى؟
سهر / يعني قاعدة في البيت بفكر اعمل أي حاجة.
سلمى / ههههههه لا بجد مشغولة اوي
دا اسمه فراغ يا حبيبتي ابقي افتكرينا وتعالي شوفي خالتك لانها زعلانه منك اوي.
سهر/ سلميلي عليها.
سلمى / بتقوليها من غير نفس
يا بنتي دي أمك اللي ربتك دي آخرتها يا سهر؟!
سهر/ اسمعي يا سلمى انا محدش رباني.
سلمى / ههههههه يا بنتي عيب اللي يسمعك بتقولي كده يقول انك متربتيش حقيقي.
سهر/ محدش كان فاضي يهتم بواحده يتيمه وأمها مش سائلة فيها.
سلمى / طب يخونك العيش والملح مش فاكرة ساندوتشات الجبنه بالخيار ولا العدس اللي ماما كانت بتعمله دا  احنا من كتر حلاوته كنا بنمسح الحله هههههه وانتي اولنا.
سهر ببتسامة/ انتي عماله تفكريني ليه؟
سلمى / طب مش فاكرة يوم القبض بتاع ماما لما كنا نرجع من المدرسة نلاقيها عامله صنيه بطاطس بالفراخ كنا يومها بناكل قبل نغير هدومنا.
سهر / هههههه كانت أيام وبعدين بتذليني يعني علشان كنت باكل عندكو!
سلمى / ههههههه ايه هتنكري؟
سهر/ لا منكرش طبعاً بس الحلو يتعد علي الصوابع.
سلمى / سيبك من الوحش وخليكي في الحلو
جوزك فين؟
سهر/ في الشركة لسه مجاش.
سلمى / وانتي بقي قاعدة لوحدك بتعملي ايه؟
سهر/ كنت بتفرج علي التليفزيون وهدخل اخد شاور وأحاول انام.
سلمى / لسه بتاخدي مهدئات؟
سهر / مبطلاها من فترة.
سلمى / ايه في حاجة جايه في الطريق. ههههه
سهر / لا بس آسر قالي ملهاش لازمة
وفعلا انا بقيت احسن من غيرها.
سلمى / خدي بالك من نفسك ومتخليش حاجة تأثر علي نفسيتك.
سهر/ بحاول.
سلمى / رامي بيسلم عليكي.
سهر/ ايه ده هو عندكو؟ ...سلميلي عليه.
سلمى / لسه نازل من شوية وقولتله اني هكلمك قالي سلميلي عليها.
سهر/ بجد رامي ده إنسان محترم ههههه خسارة فيكي.
سلمى / طيب ماشي... بس مش لما نتلم في بيت واحد الأول
اسيبك تذوقي لعريسك يا عروسة هههه بدل مايرجع يلاقي كده يتخض ولا حاجة.
سهر/ نعم! !!....هو شايفني حلوة ع طول.
سلمى / يا بنتي بيجاملك عادي مدوقيش. هههههه
سهر / طب اقفلي احسنلك.
سلمى / اقفلي الأول.
سهر/ انتي من النوع اللي مبيجيش الا بالسك
وادى قفله.
تغلق سهر الهاتف وتوقف قدام المرآه تُفك شعرها وتدخل جري الحمام.
يرجع آسر من الشغل ويصعد السلم
يفتح الباب.
آسر / سهر انتي فين يا حبيبتي؟
سهر/ انا هنا متدورش.
آسر / هههههه حاضر.
يقعد آسر يشغل التليفزيون ويستلقي علي السرير.
سهر / آسر معلش هاتلي هدوم من الدولاب.
آسر / كل مره تنسى كده.
سهر/ لا اخدت هدوم بس وقعت مني واتبلت. ض
آسر / حاضر.
يحضر ملابس لسهر ويطرق الباب.
سهر تمد ايدها تاخد الهدوم/ ايه دا يا آسر هو انا هلبس ده؟
آسر / انا معرفش انتي هتلبسي ايه بالظبط
اطلعي وهاتي اللي يعجبك.
سهر/ نعم! !!!
آسر / طيب خلاص متضايقيش كده. ههههههه
بعد شوية تخرج سهر من الحمام.
آسر بحب/ ايه الجمال ده؟
سهر/ هههههههه
وسع بقي عايزة ادفي الدنيا ساقعة
يحتضنها آسر ويغطيها بالبطانية.
آسر / مش تنشفي شعرك الأول.
سهر / شوية كده الجو برد
آسر يحملها بالبطانية ويضعها علي الكرسي أمام المرآة
ويفتح الدرج.
سهر/ هتعمل ايه؟
آسر / هنشفلك شعرك.
يخرج استشوار ويبدأ بتجفيف شعرها.
سهر/ ههههههه تنفع كوافير.
آسر / كويس بردو علشان محدش يلمسك غيري.
سهر/ عادي يعني في كوافير للستات
زي مدام مها.
آسر / تيجي هنا البيت عادي أما خروج بره لا مينفعش.
سهر/ ليه؟
اسر/ ليه انتي متعرفيش انه بيكون في كاميرات في الأماكن دي؟
سهر/ عندك حق البيت أضمن  طيب يا حبيبي كفاية كده بقي .
آسر / طيب لفي شعرك بقي وتعالي نامي الجو برد اوي الليلة.
سهر تحري بسرعة ناحية السرير.
آسر / ههههههه ايه ده شكلك بردانه بجد
يضع يده عليها
سهر تصرخ
آسر / في ايه مالك؟
سهر/ ايدك ساقعة اوي.
آسر / هههههه هرفع حرارة الدفاية شوية.
سهر وهي بترتعش / آه يا حبيبي متحرمش منك
آسر يقرب منها بحب / ايه لسه بردانه؟
سهر وهي بتحتضنه / شوية.
آسر / هتدفي دلوقتي متقلقيش
سهر / ايه مالك بتبصلي ليه كده؟!
آسر / هههههه لا مفيش اصلك عامله زي العيال بالظبط.
تلتفت سهر وتفتح الدرج اللي جنب السرير وتخرج علبة دواء
آسر ممسك ايدها.
سهر بدهشة/ في ايه مالك يا حبيبي؟
آسر / بلاش علشان خاطري.
سهر / وعلشان خاطري انا مينفعش أبطله.
آسر يُقبل يدها / علشان خاطري يا سهر بطلي الحبوب دي.
سهر بغضب/ لأ.
آسر / يبقى مبتحبيش.
سهر/ ودا ايه علاقته بحبي ليك؟
آسر / أنا نفسي أكون أب تلات سنين وانتي بتاخدي البتاع ده كفاية كده بقى.
سهر/ انا قولتلك من الأول وانت وافقت.
آسر / وافقت علي أساس إنك هتاخدي الحبوب دي مؤقتا بس  شهر شهرين  مش تلات سنين ايه يا سهر منفسكيش تبقي أم؟!
سهر/ مش عايزة أظلم اللي هخلفه زي م اتظلمت.
آسر / كفاية بقي يا سهر وبعدين ظلم ايه انا مش فاهم؟
سهر/ لو خلفت بنت ولا ولد هيناموا فين؟
أسر / في اوضهم هيناموا فين يعني؟!
سهر/ يعني اسيب بنتي تنام لوحدها؟
آسر / خلاص تنام معانا ولا تزعلي.
سهر/ ازاي بقى؟
آسر / زي الناس انا مش فاهم انتي عايزة توصلي لـ ايه؟
سهر/ مش هسيب بنتي تنام لوحدها ومينفعش تنام معانا هتقبل أنام انا معاها واسيبك تنام لوحدك؟
آسر يخبط أيده في بعضها / سهر نامي احسن.
سهر / مجاوبتنيش.
آسر / اعملي اللي ريحك يا سهر وسبيني أنام
أنا راجع تعبان.
سهر/ هو دا بقى اللي عيشته وأنا لسه صغيرة.
آسر / تاني يا سهر لسه بتفكري في الماضي تاني
الدكتور مش قالك إنك كويسه بس بلاش تقعدي تفتكري حاجات تضايقك انتي مش عايزة تنسي الماضي ليه؟
سهر ببكاء/ علشان كل مااحاول أنساه يرجعلي تاني قولي انسى ازاي؟... وانا أنسى علي طول.
آسر يحتضنها/ بس يا حبيبتي كفاية اعصابك مش كده بلاش تضري نفسك بكتر التفكير بالشكل ده.
سهر/ انت زعلان وعايز طفل وانا نفسياً مش جاهزة للموضوع ده.
آسر / خلاص يا سهر اعملي اللي يريحك انا مش هجبرك ع حاجة بس علشان خاطري متعمليش في نفسك كده.
سهر وهي بتمسح دموعها / متتكلمش معايا في الموضوع دا تاني.
آسر / حاضر بس كفاية بقى ويلا علشان ننام.
تبتسم سهر.
آسر ببتسامة/ ايوه كده بقى خلي الابتسامة تنور وشك.
ويسمح دموعها / متعيطيش تاني علشان متوجعنيش عليكي.
تهز سهر رأسها.
آسر / تصبحي على خير بقى.
تبتسم سهر وتستدير الناحية التانية.
{فلاش باك}
سهر راجعة من المدرسة تعبانه ترن جرس باب الشقة محدش يفتح تخبط جامد مفيش رد
تخرج جارتهم من الشقة اللي قصادهم.
أم ابراهيم/ سهر! يا حبيبتي ثواني هجبلك المفتاح.
سهر/ هي ماما مش جوه؟
أم ابراهيم/ مامتك خرجت من شوية مع جوزها وسبتلي المفتاح علشان لما ترجعي افتحلك الباب.
سهر/ متشكرة يا طنط.
تخرج الجاره بالمفتاح وتقرب من الباب تفتحه.
أم ابراهيم/ عايزة حاجة اعملهالك؟
سهر/ لا يا طنط متشكرة ماما زمانها راجعه.
أم ابراهيم/ طيب لو احتاجتي حاجة انا موجودة رني الجرس متتكسفيش.
سهر/ حاضر يا طنط.
تدخل سهر الشقة وتقفل الباب
تنزل شنطتها و تغير هدومها وتوضعهم علي الكنبه اللي بتنام عليها
تقعد شوية سرحانه وبعدها تقوم تلبس بيجامه وتدخل الحمام
ثواني وتخرج...تدخل المطبخ تدور على حاجة تاكلها.
سهر / يعني كمان يا ماما مطبختيش حاجة
طب انا هاكل ايه دلوقت؟
تفتح التلاجة متلاقيش غير قطعة جبنه صغيرة
تقعد علي الكنبه وتبدأ تاكل قطعة الجبنه خلصت وسهر لسه جعانه.
سهر تصبر نفسها / اكيد ماما نزلت تشتري أكل وهترجع علي طول .
تخرج الكتب من شنطتها علشان تكتب واجباتها   تخلص الواجب وهي بتغمض عينها تدخل الكتب
من تاني وتضع رأسها علي الكنبه وتنام.
.........
بعد حوالي تلات ساعات
يدخل حمدي من باب الشقة ومعاه سهير فرحانيين
و بيضحكوا.
سهير / دي سهر نامت.
حمدي/ طيب ادخل انا كمان انام تصبحي علي خير.
تقرب سهير من سهر تغطيها.
سهر تفتح عينها / ماما انتي جيتي؟
سهير/ ايوه يا حبيبتي
خلصتي الواجب؟
تهز سهر رأسها
سهير/ شطورة يا سهر.
سهر/ ماما انا جعانه.
سهير تفتح الكيس اللي معاها / شوفتي جبتلك ايه حاجة بتحبيها.
سهر بفرحه/ وريني يا ماما كده
آه انا بحب الكفته اوي.
سهير / كلي يا حبيبتي الف هنا هدخل اغير هدومي.
تدخل سهير تغير هدومها وترجع تاني لسهر
سهير / خلصتي أكلك يا حبيبتي؟
سهر بغضب/ آه.
سهير/ مالك يا سهر زعلانه ليه؟
سهر / علشان لسه جعانه.
سهير / طيب مش اكلتي؟
سهر / أكلت بس دول صوبعين  مشبعونيش.
سهير / دا انا سيبهوملك من نصيبي مرضتش أكل واسيبك بكره اجيبلك يا حبيبتي متزعليش نفسك.
سهر/ طب اعمليلي ساندوتش.
سهير / حاضر.
تدخل سهير المطبخ تفتح التلاجة
تلاقي كل العلب فاضية والتلاجه مفيهاش حاجة.
سهير / بقي كده يا حمدي قولتلك تجيب طلبات  البيت تقوم تطنش
طب اعملها ايه دلوقتي؟
تخرج سهير من المطبخ تلاقي سهر نايمه.
قلبها يوجعها عليها / تلاقيها نايمه جعانه يا قلبي دلوقتي.
تدخل لحمدي تصحيه يقوم كالعادة متنرفز ومضايق.
حمدي بغضب/ في ايه يا ست سهير مالك؟
سهير/ أنزل هات لسهر أي حاجة تتعشي بيها.
حمدي/ نعم يااختي أنزل فين دلوقتي؟
سهير/ أنزل للسوبر ماركت اللي على أول الشارع
هات علبة تونه ولا جبنه اعملها ساندوتش تتعشى بيه.
حمدي/ إنتي يا وليه جرالك حاجة في نفوخك عايزة تقوميني من نومي علشان أنزل أجيب أكل للمحروسة بنتك؟!
سهير/ انت بتكلمني كده ليه وبعدين انا كنت عامله حسابي إن في حاجة في البيت أعشيها بيها لكن لاقيت كل حاجة خلصانه في التلاجة.
حمدي/ والمطلوب اني اصرف علي بنتك؟!
سهير/ انت اللي بتصرف عليها بردو ولا لولا الشهرية اللي بيبعتها هارون بيه كتر خيره مكناش عرفنا نكمل باقي الشهر.
حمدي/ تقصدي ايه بكلامك ده يعني انا قاعد في البيت عاله عليكي انتي وبنتك؟!
سهير/ بصراحة بقى انا زهقت من عيشتي معاك بدل السجاير اللي عمال تحرق فلوسك وصحتك فيها دي البيت أولي بدل متعزمنا علي كباب وكفته كنت جبت أكل للبيت.
حمدي/ واجيب أكل ليه متشتغلي وتصرفي على بنتك.
سهير / انا قبل متجوزك كنت ممشية نفسي بالفلوس اللي بتجيني لكن دلوقتي مش عارفة اعمل ايه.
حمدي/ خلاص طالما كنتي ممشيه حالك وانا اللي جيت وقفتهولك يبقي نخرج بالمعروف يا بنت الناس.
سهير/ قصدك ايه عايز تطلقني؟
حمدي/ بصراحة بقي مبقتيش تلزمني.
سهير/ لأ بقى دي الحكاية فيها إنه!
حمدي/ آه فيها إنه وعفاف وفوزية وكريم
ايه رأيك بقى؟
سهير / وقعتك مهببه مين دول
آه متلاقيك مضيع فلوسك عليهم وبستخسر تصرف علي البيت اللي تويك.
حمدي بغضب ينفعل ليرفع يده ويضرب سهير
تصرخ من الألم يأتي بحزام بنطاله ويضربها عدة ضربات
يعلو صراخ سهير
تستيقظ سهر بفزع وتسمع صوت صراخ والدتها وخبط علي الباب تجري تفتح الجيران يدخلوا / في ايه يا بنتي؟
يسمع حمدي صوت دوشة في الصالة يخرج
أحد الجيران يري الحزام ف يده /'في ايه يااستاذ حمدي ميصحش كده.
حمدي / وانت مالك مراتي وبربيها.
تجري سهر تدخل لوالدتها اللي كانت منهارة من البكاء
تحتضن سهر والدتها وتبكي معها
يخرج الجيران من الشقة بحرج من قلة ذوق حمدي.
يدخل حمدي الغرفة.
تصرخ سهير / طلقني...لو راجل يا حمدي طلقني.
حمدي بكل سهولة / انتي طالق ولا تزعلي
ها كده مبسوطه؟
تبكي سهير وهي مصدومه من ردت فعل حمدي
و يخرج من الشقة
تظل سهير تبكي وسهر بجانبها تواسيها.
........
وبعد كام يوم منى عند سهير في شقتها.
منى / ايه يا سهير متروقي كده وخدي بالك من بنتك الدنيا متهدتش لا انتي اول ولا آخر واحده يحصل معاها كده
بكره تاخدي علي الوضع دا و تتعودي.
سهير / طبعا ما انتي فرحانه علشان بقيت زيك.
منى / عيب اللي بتقوليه دا يا سهير
انا يااختي أطلقت اه بس مموتش ولا حاجة عايشة
وبربي ولادي ومبسوطه عادي محصليش حاجة
وبعدين الراجل اللي يكون حمل علي الواحده بدل ميكون سندها يغور يااختي في ستين داهية
شايفة بنتك وشها منور ازاي البنت يا حبة عيني كانت خاسه ودايما حزينه.
سهير / آه ماهي مبسوطة زيك عايزاني أفضل لازقالها كده مشوفش مصلحتي.
منى / مصلحتك مع بنتك واديكي جربتي وشوفتي عمل ايه في البنت ضربها وبهدلها ومتكلمتيش لكن لما مد أيده عليكي طلبتي الطلاق.
سهير/ اتسرعت ياريتني فكرت قبل منطقها.
منى / اما أمرك عجيب
عاجبك فيه ايه ده علشان لسه متمسكه بيه؟
عيشي لبنتك وانسي موضوع الجواز ده.
سهير/ بنتي بكره تكبر وتتجوز ومش هتسأل فيه وقتها بقي اعمل ايه ملاقيش راجل يونسني اليومين اللي فاضلنلي في الدنيا.
منى / مفيش فايدة من الكلام معاكي.
يجي عمار/ مش يلا بقى ياماما عايز انام عندي مدرسة الصبح.
سلمى / علشان خاطري يا خالتو خلي سهر تيجي تبات معانا الليلة.
منى / مينفعش يا حبيبتي عندها مدرسة الصبح.
سهير/ لا عادي تبقى تروح من هناك يلا يا سهر ألبسي.
سهر / بس انا مش عايزة أخرج.
سلمى / أخص عليكي يا سهر بقى كده مش عايزة تيجي معانا.
سهير/ متزعليش ولاد خالتك وروحي معاهم.
سهر بحزن / حاضر.
اياد بفرحة / وانا هبقى اجيبها معايا وانا جاي من المدرسة متقلقيش يا خالتو.
تبتسم سهر وتدخل تلبس هدومها.
.... ...
في غرفة آسر.
آسر بتعب/ سهر بطلي بقي تتقلبي انا مش عارف انام.
سهر/ حاضر يا حبيبي انا آسفة.
يضع آسر ذراعة عليها ويحتضنها.
آسر وعيونه مغمضة ببتسامة/ علشان تبطلي تتقلبي ونامي بقي علشان اعرف انام.
ابتسمت سهر واغمصت عينها لتنام.
.....................................
في فيلا علي الحسيني
علي وسعاد قاعدين بيفطروا