الحلقة السابعة
#احببتهارغم كل شيء
#بوسي
........................
رجعت سهير لـ شقتها بعد وفاة هارون حزينه مكتئبه مبتتكلمش مع حد.
سهير بغضب وصوت عالي / مش عايزة اشوف حد مش عايزة أتكلم مع حد خالص سيبوني لوحدي.
سهر تراجعت و رجعت تقعد على كرسي قريب
من باب الشقة
مش عارفه بعد وفاة هارون تحزن و لاتفرح
تحزن لأنه كان بيحبها علي الرغم من انه زوج أمها
و لا تفرح لإن مامتها رجعت ليها
بعد فترة..
سهر في الصف الأول الثانوي
متغيرش الوضع كثيرا بالنسبه لسهر سواء بزواج والدتها أو بعد ما بقت ارمله.
سهر / انا جعانه.
سهير بغضب/ وانتي صغيرة ادخلي كلي أي حاجة
ولا اتعلمي تطبخي.
سهر/ طب علميني.
تسيبها سهير وتدخل اوضتها.
تلحقها سهر بحب/ ماما في حاجة مش فاهمها في المنهج ممكن حضرتك تشرحهالي؟
سهير/ امال بتاخدي دروس ليه انا مش فاضية لوجع الدماغ ده.
سهر / طب انا كنت عايزة فلوس الدرس المستر قال اللي هيجي الحصة الجايه من غير فلوس الدرس ميجيش ويتعب نفسه لاني مش هدخله.
سهير/ انتي ايه معندكيش دم مش عارفة إن الفلوس اللي كان هارون بيدهالي كل شهر اتقطعت بعد وفاته وإن ولاده مش عايزين يدوني حاجة من ميراثي ايه مبتحسيش مش كفاية الفلوس اللي بيطلبها المحامي وأهو فات سنه ومعمليش حاجة ولا رجعلي جنيه واحد من حقي.
سهر/ خلاص حضرتك بقى ذاكريلي وبلاش دروس.
سهير بانفعال/ وانتي لسه صغيرة علشان اذاكرلك.
سهر/ ماما. ..خالتو بتذاكر لسلمى عادي وعمري مسمعتها بتزعقلها.
سهير بغضب / طيب يا حبيبتي اتفضلي روحي لخالتك خليها تذاكرلك.
وخرجت سهير بانفعال
و دخلت غرفة سهر تفتح الدولاب وتخرج هدومها في شنطة وتاخدها من ايدها
أمام شقة منى
سهر/ ماما سيبي ايدي وجعتني.
سهير تخبط جامد علي باب الشقة يخرج عمار.
عمار / خالتو اتفضلي.
سهير/ مامتك جوه؟
تخرج منى من الغرفة.
منى / انا هنا يا سهير ادخلي.
تدخل سهير وهي لسه ماسكه ايد سهر.
منى بدهشة/ خير يا سهير في ايه
وايه الشنطة اللي معاكي دي؟
سهير/ جايبالك سهر تقعد معاكي كام يوم.
منى / تشرف وتنور تعالي يا سهر مالك زعلانه من ايه؟
سهير/ معلش يا منى انا اعصابي تعبانه اوي اليومين دول خليها عندك.
مني بدهشة وحرج ملقتش كلام غير إنها ترحب بسهر
قعدت سهير ربع ساعة وخرجت.
منى لسهر/ تعالي نامي بقى معايا يا سهر الليلة في أوضتي.
كانت سلمى واياد نايمين وقتها ومشفوهاش.
....
في الصباح تتفاجئ سلمى بسهر.
سلمى / ايه المفاجأة الحلوة دي.
مني تخرج من المطبخ/ بطلي بقى رغي وادخلي لاخواتك صحيهم علشان ميتأخروش على المدرسة.
يخرج اياد من اوضته / انا خلصت لبس خلاص يا ست الكل.
يتفاجئ بسهر.
اياد بهمس / انتي جيتي أمتى؟
سهر/ ماما جبتني بالليل.
اياد/ احلي مفاجأة ياريت خالتو تعملها ع طول.
ابتسمت سهر بحزن.
منى / أدخل لاخوك استعجله علشان متتأخروش.
يخرج عمار / حد بينادي عليا؟
وببتسامة/ صباح الخير يا سهر.
منى / اتفضلوا ساندوتشاتكو ويلا مفيش وقت.
عمار/ ما بلاش حكاية الساندوتشات دي احنا كبرنا
يا ماما
يعني واحد زيي في أولي جامعه يدخل المحاضرة بساندوتش ؟!
اياد بهمس/ يا عم خدوا وانت ساكت وأهو زي كل يوم أي واحد غلبان تقابله ابقي ادهولوا
عمار/ وافرض ملقتش بقي
اياد/ يا عم الغلابة مفيش اكتر منهم هاتوا وانا هتصرف
مش محتاجة حاجة يا سهر
سهر/ متشكرة يا إياد.
ينزل اياد وعمار.
منى / افطري بقى يا سهر وكملي لبس
سلمى يلا علشان عايزة اروق المطبخ.
سلمى / حاضر يا ماما.
منى / مصروفك اهوه زي كل يوم بس برضو تاكلي ساندوتشاتك.
تدخل سهر الغرفة تلبس لبس المدرسة.
سلمى / بسرعة يا سهر اتاخرنا اوي النهاردة.
تخرج سهر من الغرفة وهي بتلبس حجابها.
سهر/ خلصت اهوه يلا.
تاخد سلمى شنطتها وشنطة سهر وتلبس الشوز على السلم.
سلمى / يلا يا سهر عندنا اول حصة عربي وانتي عارفة الأستاذ دا بيدقق اوي في المواعيد.
ينزلوا مع بعض ...المدرسة قريبه من البيت يدخلوا من البوابة والطلبه لسه بتطلع الفصول.
.....
منى بتروق المطبخ وخرجت تشيل الاطباق
تتفاجئ بساندوتشات على السفرة.
منى / ياعيني يا بنتي لا فطرتي ولا اخدتي ساندوتشاتك
بحطت أيدي ياترى مين فيهم اللي نسيت فطارها
حتي معرفش سهر مامتها سايبه معاها مصروف و لا افتكرت اديها علي الأقل كنت عزمت عليها كنت عرفت معاها ولا لأ.
............
في المدرسة
وقت الفسحه سهر قاعدة في حوش المدرسة تبص لزميلاتها بحزن و هما قاعدين الأصحاب مع بعض بيضحكوا.
تيجي سلمى / ياااه الحمامات كانت زحمه اوي اللي داخله تغسل وشها واللي بظبط هدومها واللي بتحط معرفش ايه في وشها.
سهر قاعدة ساكته
سلمى / مالك يا سهر؟
سهر / ها....بتقولي حاجة يا سلمى؟
سلمين/ مخرجتيش ساندوتشاتك ليه انتي مش جعانه؟
سهر / لأ
سلمين/ يا بنتي لازم تفطري اقولك لو مش جعانه خدي هاتيلي حاجة من الكانتين ليا وليكي بس هاتيلي حاجة حلوه بقي أحلى بيها.
سهر / حاضر
تاخد سهر الفلوس وتوقف قدام الكانتين تنظر لأنواع البسكوتات والحلويات وبطنها توجعها من شدة الجوع تشتري حاجة واحدة وترجع ل سلمى.
سلمين/ مجبتيش حاجة ليكي ولا الفلوس مكفتش؟
سهر/ مليش نفس. ...الباقي اهوه
سلمى / رايحة فين؟
سهر/ هروح الحمام.
سلمى / طيب متتأخريش علشان الحصة هتبتدي
سهر تقرب من الحمام البنات واقفين بيضحكوا وبياكلوا تنظر ليهم وتبتلع ريقها وتدخل الحمام.
..........
فى شقة منى
بعد رجوع الولاد من الجامعة.
منى / عمار هو باباك لما كلمته علي زيادة المصروف قالك ايه؟
عمار / زعق وقالي انتوا رجاله متشتغلوش ليه وتصرفوا على نفسكوا.
منى / اوعى تكون قولتله إنك بتشتغل انت واياد
عمار/ لأ يا ماما مقولتش انا عارف حضرتك عايزة
بابا يزود المصروف ليه.
منى / انت شايف يا حبيبي مصاريفنا كتيرة واختك بتاخد دروس في كل المواد واللي بيجي يدوب يكفي مصاريف الجامعه.
يخرج اياد من الغرفة / أنا نازل مش محتاجين مني حاجة؟
منى / لا يا حبيبي بس ابقى قول لصاحب المحل يخرجك بدري شوية انت مبتلحقش تنام عندك الجامعة الصبح.
اياد/ قولتله يا ماما وقالي إن البيع مبيزدش غير بالليل وفعلا هو دا اللي بيحصل.
منى / طيب ياابني ابقى كلمه يزودك شوية.
اياد / كويس كده يا ماما هو حد لاقي شغل.
منى / يعني تبقى طالب في تجارة وتشتغل في محل ملابس وياريت حتي المرتب مجزي للبهدله دي.
عمار ينظر في الساعة/ يدوب بقي ألحق حصة الواد علي جارنا أبوه ببحاسبني بالدقيقة.
منى / وآخر الشهر يقعد يفاصل معاك كأنه بيشتري كيلو طماطم ولو بيشتريها مش هيعمل كده.
عمار/ ماهو اياد لو فيه خير يكلم صاحب المحل عليا ادي لولاده دروس هتبقى قشطة اوي وأهو نلم مصاريفنا.
اياد/ بلاش الراجل اللي انا شغال عنده لانه بيحسبها بالمليم.
عمار/ يعني ايه اصرف نظر عن الموضوع؟
اياد/ ايوه و سلام بقي علشان ميخصمش منى اليوم.
تخرج سلمى من الغرفة بحزن.
منى / مالك يا سلمى مين مزعلك؟
عمار بمزح/ تلاقيها اتضربت في المدرسة.
سلمى / ليه وانا زيك؟!
عمار/ ههههههه يا بنتي بكره ادرس للعيال واطلع عليهم كل اللي اتعمل فيه.
اياد/ امال زعلانه من ايه؟
سلمى / سهر مش عايزة تروح الدرس.
اياد / ليه هي تعبانه؟
سلمى / لأ بس بتقول هتذاكر في البيت.
منى / طب وفيها ايه مايمكن شاطرة في المادة وهتعرف تذاكرها لوحدها.
سلمى / وحد يعرف يذاكر رياضة لوحدة برضو
يا ماما.
اياد/ معاكي حق اسأليني انا دي ياما طلعت عيني المادة دي.
سلمى / شوفت بقى مع إنك كنت شاطر فيها وجبت مجموع كويس.
منى / امال يعني هتكون مش عايزة تروح الدرس ليه؟
سلمى / المرة اللي فاتت المستر سألها مجبتش فلوس الدرس ليه قالتله الحصة الجايه.
منى / يعني علشان الفلوس؟
ياادي النيله طب اعمل ايه دلوقتي دا انا
ماسكه مصروف البيت وعماله اجيبها يمين وشمال علشان بس نكمل الشهر ده علي خير ومتحوجش لحد.
يدخل اياد الغرفة وينادي علي سلمى.
سلمى تدخل/ في حاجة يا إياد؟
يخرج اياد فلوس من دولابه ويعطيها ل سلمى.
سلمى / ايه ده؟!
اياد/ خديهم بس واوعي تقولي لسهر انهم مني.
سلمى / بس دول فلوس الكتب بتاعتك.
اياد/ مفيش مشكلة اشتريهم الشهر الجاي.
سلمى / بس هقولها منين الفلوس دي ماهي أكيد هتسالني انت عارف سهر.
اياد/ قوليلها انك محوشاهم من مصروفك من السنه اللي فاتت بس اوعى تجيبي سيرتي خالص علشان متحرجهاش.
سلمى بفرحه/ متشكره يا دودا
يا احن أخ في الدنيا.
اياد /طب وسعي بقي علشان ألحق الشغل.
...............
تدخل سلمى لسهر الغرفة ببتسامة.
سلمى / مش هتقومي تلبسي بقي هنتأخر ع الدرس.
سهر / انا قولت مش رايحه هذاكر في البيت.
سلمى / بتضحكي ع نفسك هي الرياضة ينفع تتفهم منغير درس وانتي عارفة المدرسين مبيشرحوش في المدرسة ايه ناويه تسقطي؟!
سهر/ يا سلام ع الفاظك اللي كلها أمل وابتهاج.
سلمى / هههههه مين أمل وابتهاح دول قومي خلينا نلحق الدرس.
سهر/ بصراحة بقي مش هينفع علشان الأستاذ عايز فلوس الدرس وماما...
قاطعتها سلمى / ولا يهمك اختك سداده انا فهمت كده برضو.. اتفضلي.
سهر بدهشة/ جبتيهم منين دول؟
سلمى / كنت محواشهم من السنه اللي فاتت ميغلوش عليكي.
سهر/ بس يا سلمى أنا..
تقاطعها سلمى / بت انتي انا مش اختك ولا ايه
يلا بقى.
سهر / الظاهر تيته جات.
بالخارج.
وداد/ يعني لو مسألتش محدش يسأل عليا؟!
منى / معلش يا ماما حقك عليا بس انتي عارفة الولاد والدراسة والبيت و....
تقاطعها وداد / خلاص قولتي ع كل ظروفك
ايه أمك ملهاش مكان في كل دول؟!
منى / ازاي بقي يا ست الكل طب دا انا عامله بصارة تتاكل حاف وكنت هبعت طبق مع سلمى ليكي دلوقت.
تخرج سلمى وسهر من الغرفة.
وداد/ هي سهر هنا؟
سهر / ازيك يا تيته؟
وداد/ انتي هنا لوحدك؟
سهر/ ايوه.
وداد/ وسايبه مامتك لوحدها في البيت؟
يا قلبك!
منى / يلا يا بنات ع الدرس ومتتأخروش.
تخرج سهر و سلمى.
منى / ماما سهير اللي جابت سهر من نفسها.
وداد / ليه؟
منى / معرفش ومسألتهاش علشان متفكرش إني مضايقة من وجود سهر.
وداد/ طب ماتتصلي طمنيني عليها.
منى / حاضر.
تتصل منى بـ سهير.
جرس ومحدش يرد
وداد / اتصلي تاني انا بدأت اقلق.
تتصل منى مره تانية.
.....
في شقة سهير.
سهير قاعدة في السرير.
سهير / استنى بس يا حبيبي هشوف مين ورجعالك على طول.
الرجل/ طيب متتأخريش.
تجري سهير / الو مين؟
منى! ازيك؟
منى / انا كويسه انتي اخبارك ايه مبترديش ليه
ع التليفون؟
سهير/ كنت مشغولة... في حاجة؟
منى / ماما كانت عايزة تطمن عليكي.
سهير/ طمنيها عليا وقوليها اني كويسه.
الرجل / يلا بقى يا سوسو بتعملي ايه عندك كل ده؟
منى بدهشة/ ايه الصوت اللي عندك ده يا سهير
دا صوت راجل صح؟!
سهير/ ايوه صوت راجل ومخك ميروحش لبعيد
دا جوزي.
منى / اتجوزتي؟!
وداد / مين اللي اتجوز يا بنتي؟
منى / ثواني بس يا ماما.
سهير/ اه اتجوزت فيها حاجة دي؟!
منى / لا مفيهاش حاجة بس مش كنتي تعرفينا
وبعدين اتجوزتي أمتى؟
سهير/ امبارح وبعدين اقفلي التحقيق ده انا مش فاضية للرغي معاكي جوزي بينادي عليا.
منى / و بنتك يا سهير؟
سهير/ خليها عندك كام يوم.
منى / وهقولها ايه؟
سهير/ قوليلها الحقيقة فاكراني هخاف.
منى / طيب يا سهير اقفلي وشوفي وراكي ايه.
تضع منى سماعة التليفون وتقعد.
وداد/ خير يا بنتي اختك كانت بتقولك ايه؟
منى / سهير اتجوزت يا ماما.
وداد / طيب كويس.
تنظر منى لوالدتها بدهشة.
وداد/ ايه مالك؟
منى / حضرتك واخده الموضوع عادي كأن محصلش حاجة.
وداد/ وايه اللي كان حصل أختك و متجوزة وعايشة في الحلال ايه اللي مضايقك بس؟!
منى / وانا هضايق ليه ما كل واحد حر في حياته بس ع الأقل كانت عرفتنا وبعدين اخدت رأي بنتها
سهر مبقتش صغيرة.
وداد/ والعيله المفعوصه دي ليها رأي؟!
افرحي لاختك وبلاش من النكد ده.
.........
في المساء
يرجع عمار البيت يتعشوا مع بعض ويدخلوا يناموا ماعدا سهر و سلمى.
منى وهي داخله الغرفة/ لو هتقعدي شوية يا سلمى ابقي جهزي العشا لاخوكي.
سلمى / حاضر يا ماما
يلا يا سهر افتحلنا التليفزيون وانا هروح اعمل فشار وهاتي الباطنية من جوه نتغطا بيها من البرد.
سهر/حاضر علم وينفذ يا فندم.
سلمى / هههههههههههه
تشغل سهر التليفزيون وتقعد تتدفى تحت البطانية.
بعد شوية.
تخرج سلمى من المطبخ / يا سلام عليكي يا سهر قاعدة ولا في دماغك طب حتي قومي خدي مني حاجة مش شايفة اللي انا شايلاه.
سهر تقوم / ايه ده انتي عملتي ساندوتشات كمان؟!
سلمين/ والشاي ع النار.
سهر/ لأ بقي دا احنا الظاهر سهرتنا صباحي.
سلمى / طالبه معايا سهر الليلة بما إن بكره الجُمعة واجازة من المدرسة والدروس.
سهر / ع رأيك الواحد أمتى يخلص بقى.
سلمى / احنا لسه شوفنا حاجة لسه وجع القلب السنه الجايه واللي بعدها.
سهر/ متفكرنيش.. نفسي بس ماما نفسيتها تتحسن علشان انا كمان استريح.
سلمى / كلي يا سهر وبطلي تفكير شوية دماغك دي ايه مبتتعبش!؟
تاكل سهر وهي بتشاهد التليفزيون و سلمى بتشاركها.
أنت تقرأ
أحببتها رغم كل شيء 🥰
Romansaاجتماعية رومانسية لفتاة عانت كثيراً من زيجات والدتها حتى تستقر سهر في منزل خالتها التي عاشت معاها ك ابنتها ف أحبها أبن خالتها منذ الطفولة ليسافر وتلتقي بمن احبها وتحدي كثيراً من أجلها سهر تعيش الماضي والحاضر معاً ♥️ تعالوا نعرف حكايتها 💚💜
