قدري المتغير 💙.

البآرت الثآلث عشر

بسم الله الرحمٰن الرحيم ✨.

يوسف "زفر بس متكلمش" .

انا "بحزن" : يوسف علاش فتتني ومعاش رديت عليا ؟ علاش خليتني نموت اكثر ما انا ميتة ؟

يوسف : اليوم مقابلتك ؟ وبعد عشرة ايام بيانك ، ووقتها تلبسي خاتمه ، وبعدها بشهور حتكوني ليه ، وعلاش هذا كله ؟ ع خاطر عادات ، ع خاطر امك متبيش ، ع خاطر حبيتك وحبيتيني ، ع خاطر درت المستحيل باش نوصل فيك ! شن ناقصني انا ع اللي يجهز ف نفسه توا باش يجيك هو ويأخذك مني ؟ علااش يا ولاء درتي فيا هكي علاااش ؟ ليا أربعة أيام ميت ره والله لا نأكل لا نشرب لا نرقد ، لاهي نفكر فيك بس ؛ ولاء ديري اي شي وارفضي ، كلمي امك او خليني نكلمها ، نكلم حتى بوك وجدك واي شخص تبيه ؛ حتى بوي يكلمهم لو تبي اهم شي تكوني ليا يا ولو ! والله ما قادر حتى نتخيل حتى اللي بيصير غدوة !

انا " طول هالوقت ساكتة ونبكي ونتأمل ف كلامه وخلاص" .

يوسف "بضعف" : متبكيش يا ولو ، متبكيش يا حبيبتي ؛ كوني متأكدة وواثقة انك مش حتكوني لغيري ، حتمشي ف حياتك كلها وحترجعي ليا .

انا " ببكا" : يووسف انا منبيش غيرك ؛ دير اي شي يا يوسف وخلصني من هالقصة ، نبي نرقد وانوض نلقى كل هذا حلم ؛ يا يوسف اللي نخاف منه وصلناله وعايشين فيه ؛ مش كنت تقولي نديروا حل بعض ؟ هيا ديره هالحل ! علاش ضعفت توا ؟

يوسف "بصوت عالي" : بنضعف اي ، لأن مافيش حد فاهمني ؛ لأن اللي كنت نتمناه طول عمري ضاع فجأة ؛ مشى اختفى وتبخر ! لأن كل الحلول اللي قلتلهملك مبيتيش تسمعيني ف ولا واحد منهم ؛ ولا عطيتيني فرصة ، لأنك انتِ اللي ضيعتيني يا ولاء .

انا "بدموع" : يوسف مش انا ، معنديش ف ايدي شي نقدر نديره ، ولا انتَ عندك ف ايدك شي تقدر اديره و.......

يوسف "قطع عليا" : كيف مافيش شي نقدر نديره ؟ كييف ؟ قلتلك ستين الف مرة امي تكلم امك ونجربوا حظنا ، قلتلك الف مرة نخلي الموضوع بين الرجالة ونكلم بوي وبوك ارحم من امك وف الكلمة ليه كلمة ع العيلة اقوى ، قلتلك نسيبوا فترة سنتين ثلاثة ووقت تتخرجي ربي يدير طريق ، قلتلك نكلم خوك علي وحسب ما تحكي عليه جوه مليح مرات نقدر نتفاهم معاه ويقنع اماليك ، تعرفت ع ولاد عمامك كلهم وخليتهم صحابي باش يسهلي الوضع ، قلتلك احكي لأمك مرات تفهمك ، قلتلك هلبا حاجات غيرهم يا ولاء وحالياً منذكرش فيهم ، بس كنتي رافضة ف كل الاقتراحات اللي قلتلهملك ؛ شن تبيني نقولك هيا نهربوا ؟ نقوللك هيا نديروا الحرام ونحطوهم ف الامر الواقع واللي يصير يصير ؟ فهميني بس ! متوقعتش بسرعة يجي اليوم هذا بسرعة ، متوقعتش اني حنفرح بيك اقل من شهرين بس ويبدولنا المشاكل ، كان نندري عليه هكي ره مضغطتش عليك ف شهر ١٠ وخليتك تقوليلي نحبك بالغصب ، ره خليتها غصة ف قلبي وعايش ف وهم انك متحبينيش ! آآخخخخ ياربي ساعدني وبس ! ولاء بالله عليك ارفضيه والله عندي كل المقومات احسن منه ، وزيادة نحبك وتحبيني ؛ هو متعرفيشي ومتندريش ع طبعه ، انا تعرفيني ! "سكت شوية " هههااه وصلنا لمرحلة نقارن ف شخص بيا ليك ؛ ولا عمري غرت عليك بالطريقة هي ، ديما نغار بس نشد ف روحي ونخلي فيك براحتك ، حتى مؤيد نغار منه ؛ بس منتكلمش ! بس هذا حالياً لو شفته قدامي ره قتلته ؛ وااااااك شن درتي فيا ! "سكت قريب دقيقة كاملة بعدها حسيته يمسح ف دموعه وخشمه وصوته مخنوق وواضح كان يبكي" بجد صحة ليك اللي درتيه فيا ، قلبي حاسس بمكانه نار ؛ اول مرة يصير فيا ، شعور اول مرة نحسه وشعور كلب  ؛ بس خلاص ليا توا قريب نص ساعة ندوي وكلامي مش حيدير نتيجة ، بري تلاقي معاه اهو هو توا ع باب حوشكم ، وورأس ولاء البسي شي مش قصير ، اول مرة نكلمك ع اللبس ؛ بس متلبسيش شي قصير ومديريش مكياج زي ديما "وسكت برضو" هيا انا بنسكر توا ومتتصليش بيا بالله عليك خليني ننحرق بروحي "وسكر" .