قدري المتغير 💙.

"البآرت الثآمن عشر"

بسم الله الرحمٰن الرحيم ✨.

اول ما وصلت لقيت وائل قدامي ؛ صبح عليا وابتسمتله وخشينا مع بعض ، كان جوي يعتبر متعكر بس حاولت نكون عادية ، مر الوقت ومكانش عندنا ضغط هلبا ، بس انا لأن نبي نطلع فلذلك ضغطت روحي ونص التقارير اللي يبوا ترجمة درتهم وقتها والنص ثاني بنرفعه معاي بنديره ف الليل ، المهم مشيت للمدير وطلبت منه اني بنطلع ف البريك ؛ ف الاول رفض بس بعدها سمحلي .
طلعت للكافيتيريا وطلبت شاهي اخضر ، خديته وقعمزت ف اول كرسي جا قدامي .
وكالعادة سرحت بأفكاري ، وقعدت نخمم ف شن امي مجهزتلي من مفاجآت اليوم ، وكيف امه بتتصرف ، اساساً انا قاعدة حاسة علاقتنا متذبذبة كيف بنكملوا فيها وامه بتجينا ؟ غريبين احنى والله ، احياناً نحس ف اللي بداخلنا مهواش حب ، نحس فيه تشبث ، تعمق ، خوف من الفقدان ، وخاصةً فقدان النفس ! بالرغم من ان اللي صاير بيني وبينه مهواش صغير واول مرة نتعاركوا هكي ونقدروا ف لحظة نكبروا المشكلة ؛ بس مش قادرين حتى نفكروا ف ان بنبعدوا ع بعض ساعات ، وف النفس الوقت جت ايام اللي قعدنا بالسنة ونص مشفناش بعض ، مش قلتلكم غريبين احنى ؟ احنى وصلنا لمرحلة فتنا بيها الحُب والتعلق ، فتنا الهيام والعشق ، فتناهم كلهم ، وصلنا لمرحلة مهما كنتي غالطة ومهما زعلت منك الا اني منقدرش نرخي بايدك ؛ مهما قلت من كلام بايخ الا اني منقدرش نهرب الا ليك ، بالرغم من اني تكيتها معاه الا انه حالياً يوتي ف الحاجات اللي بتجيبهم امه ! وتبوني نكرهه ؟
حسيت بلمسة ايد خفيفة ع ذراعي ، ووقت تلفتت لقيت وائل مقابلني .

انا "ابتسمت" : شنجو ؟

وائل : وين سرحانة من امبكري وانا مقعمز هنا .

انا "وخرت رأسي شوية وغمضت عيوني" : حاسة روحي ف حلم ، حلمي الأبدي !

وائل "ابتسم " : سمعت بتروحي ؟

انا "رجعت رأسي وشبكت صوابع ايديا ف بعض" : اي عندي ما ندير الحق ، بنخطم ع شهد وبنطلعوا انا وياها وبعدها عندي شي نبي نديره وبعدها بنمشي لحوش جدي وهكي .

وائل : اليوم تتسمي ليه ؟

انا "شربت رشفة من طاسة الشاهي ونزلتها " : تي لاااا مزال هلبا باش نتسمى ع اسمه .

وائل : يا ملا موال ، تي مه يلخصوا الموضوع ويكملوا كل شي خت فت ؛ علاش هالسريب والمشي والجي ؟

انا "مديت شاربي اللوطي" : مش عارفة الحق ، يقولي عليه واجب !

وائل : المهم هيا كان بتطلعي نوضي "ووقف" ولو احتجتي اي شي يا ولاء ف اي وقت بالله عليك وورأس اغلى شخص ع قلبك انا اول واحد تجيه .

انا "وقفت" : حاضر ، واكيد هالكلام من غير ما تقول "وكيف جيت بنمشي" ااه حقا كتاباتك حنحاول الخميس نكملهم بس منوعدكش .