بسم الله الرحمٰن الرحيم ✨.
اول ما وصلت استغربت بسيارة زي سيارة يوسف مدرسة ف العيادة اللي مقابلة حوش عمتي ؛ كيف جيت بندرس اذكرت اني مش واخدة معاي شي ، طلعت للطريق الرئيسي ولحسن حظي كانت عمتي تسكن ف منطقة حيوية ، خديت اللي بنأخذه ومنهم حاجات للصغار ، ورجعت درست قدام الحوش ، طلعتلي عمتي من الباب تأشرلي ندخلها للچراج ؛ وهكي دخلت بنتي 😂 للچراج وخشيت للحوش .
سلمت ع ولاد عمتي ، ولقيتهم كيف بيتغدوا ، قعمزت معاهم وكان الجو نقدر نقول عليه فوق الخيال ، ليا فتــــرة طويلة معاش تغديت مع حد من العيلة ف جو زي هذا ، هدرزت معاهم وضحكنا كلنا ع حاجات مضحكش !
بجد العيلة نعمة ، وانا ربي مرزقنيش بيها !
بعد الغدا كل حد ناض اللي بيرقد واللي بيقرا واللي بيتفرج وهكي ، ضميت الكوجينة انا وبعدها قعمزت بنتفرج التلفزيون مع روفا ، مش عارفة عمتي وين مشت .
انا : شن جو القراية ؟
عبدالرؤوف : نفخ هلبا ، متعبة الشهادة .
انا : بس ره ايامك هادوا تقعد مذكرهم طول عمرك ، مضيعهمش ف الدوة الفاضية .
روفا : كتابات عيوش قاعدات ؟
انا : والله ما نندري عليها ، بس توا نشوفهملك ، وكان لقيتهم توا نكلمك .
روفا "شافلي ع جنب" : ع اساس عندك رقمي .
انا "ضحكت" : هههههههههههههـ ؛ عندي ايميلك ع الفيسبوك .
روفا : ع اساس تستعملي فيه الفيسبوك انتِ !
انا : متعمد تقصفني انتَ توا ؟
روفا "ضحك " : لا مه هذا الواقع ، ولا عمري شفتك حتى اونلاين .
انا : منستعملش ف شي من هالبرامج الا الواتساب ، الباقي كان حننت قلبي نخشلهم مرة ف الشهر .
روفا : باهي حتى انا الواتس نستعمل فيه ، سجلي رقمي هي *******٠٩٥ .
انا : حي عندك ليبيا فون ؟
روفا : اي ، واسطات
قعدت نهدرز معاه شوية ، لحد ما جت عمتي عفاف .
عفاف : نوض يا عبدو اقرا اليوم الكيمياء ، ابلتك كانت تكلم فيا وقتلي درجاته بدوا ف النازل .
روفا : اي مه مقريتش يوم الاختبار .
عفاف : علاش شن كنت ادير ؟
روفا : توا نعوض ف الجاي يا أمي .
عفاف : نبي نسبة كويسة مش زي العام اللي فاتت .
أنت تقرأ
قدري المتغير 💙.
Action#روايات_ليبية . رواية واقعية "مهيآش خيآلية" ، نكتبها بطريقتي ، ونتمنى توصل الفكرة اللي نبيها 💫.
