قدري المتغير 💙.

البآرت الرآبع والعشرون .

بسم الله الرحمٰن الرحيم ✨.

سكرت من ماما وانا مش فاهمة علاش درت هكي وعلاش قلتلها وكذبت عليها ! قعمزت قعدت نفكر ، يا ولاء باهي بتمشيله شن بتكون ردة فعله اول ما يشوفك ، وشن بيكون رد فعلك اول ما بتشوفيه ؛ متمشيش يا ولاء حتنهاري قدامه ! امشي يا ولاء هذا حب حياتك ، حتى لو سيبك امشي وامسحي بيه الأرض ، متخليش ذكر يهزك !
قعدت ف صراع بيني وبيني برضو ؛ جهة تحبه وجهة تكرهه ، خليتني يا يوسف خليط ونقيض من المشاعر ، خليتني ف الشخصية اللي نكره اني نكون فيها واللي هي الغير متخذة قرارها .
مرت قريب ساعة وجت الساعة ٣ ؛ بعتت مسج لشهد وحكيتلها ع الكلام اللي قلته لماما باش تكمل معاي .
نضت دوشت وبدلت حوايجي ، وكان كإن شخص يسير فيا مش انا ولاء اللي تتحرك ، لبست السورية اللي ف اول هدية هداهالي ، كانت من نوعية السواري الواقفات لونها أبيض وفيها ربطتين من ايديها ؛ ولبست سروال أسود ووشاح أخضر وركبت ع كرسي نزلت البوكس وفتحته ولبست الخاتم اللي جايبهولي ؛ وطلعت ، سكرت الحوش كويس ومشيت ف اتجاه المطار وانا ف داخلي شي يقولي ولاء ره تغلطي ف غلط كبير ، هو اللي سيبك وهو اللي فاتك وهو اللي معاش كلمك وهالمدة سنة ونص مش شوية ، ولاء متخليش روحك مضحكة ، ولاء ركزي ف اللي اديري فيه ! بس بالرغم من هالكلام كله إلا اني مفقش الا وانا ف البوابة ، خشيت وشفت للساعة لقيتها ٤:١٥ ؛ قعدت شوية ونزلت وانا كلي خوف ورجفة من اللي حيصير ؛ دخلت وحاولت نمسك روحي ومنكونش ضعيفة ، سألت وقاولي ان رحلته وصلت وع وشك انهم يطلعوا يستنوا ف الشناطي ، استنيت عشرة دقايق وبدوا يطلعوا من الباب ، كنت واقفة بعيييييد مع ان جايتله بس خايفة يشوفني ، شوية وطلع وشفته ، شفت حياتي كلها ف اللحظة هاديكا وايقنت اني قاعدة نحبه ، مش نحبه بس نموت فيه والله ، بس مقدرتش نمشيله قعدت جامدة ف مكاني وبس ، شوية وركزت ان العيون اللي اول مرة ف حياتي نتأمل بطريقتهم يشوفولي ؛ قعد واقفة جامد زي ما انا واقفة ف الزبط ، استاقضت وقلت خلاص ياسرني شفته شن نبي اكثر ، ودرت ظهري ومشيت ، مشيت خطوات بس حسيت خطواتي رزان وفيه شي يقولي اقعدي .
حسيت بايد شادة ايدي ، دموعي كان حينزلوا بس خفت يشوف ضعفي وقعدت نرد فيهم ، تلفتت وحولت ايده .

انا : حول متمسنيش .

يوسف "بعيون فيهم لمعة زي قبل واكثر " : ولاء استاحشتك .

انا : لو سمحت اخرتني هلبا ، هيا باي "وقعدت نمشي".

يوسف : يعني جيتي لهنا ومتبيش تكلميني وبديري ظهرك ليا ؟

انا "وقفت وتلفتتله ": ايييي زي ما انتَ درت ظهرك ليا وخليتني بروحي نعوم .

يوسف : وقسماً بدين الله إلا انك مش فاهمة شي .

انا : منبيش نفهم ، منبيش شي منك غير انك تطلع من حياتي انتَ وكل صحابك واختك واي شخص ليه صلة بيك .