بسم الله الرحمٰن الرحيم ✨.
بعد ممكن عشرة دقايق ثانية ، كيف استريحت وحسيت روحي احسن ؛ قمت موبايلي واتصلت ..
انا "بصوت داهش " : صباح الخير .
شهد : صباح الورد .
انا : شكلك كيف نايضة من النوم ؟
شهد : اي نضت امبكري مع مروان وتوا نوضتني مكالمتك .
انا : باهي اسمعي ، بنطلب منك طلب سريع .
شهد : شنو ؟
انا : عندك سيارة انتِ توا ؟
شهد : علاش ؟
انا "بعصبية" : غر النم عندك يا شهد ولالا ؟
شهد : هو معنديش بس نقدر نحصل .
انا : كم تبي وقت باش تحصلي ؟
شهد : جو ساعة .
انا "حركت السيارة ورجعت من طريقي " : لالا شنو ساعة، خلاص فوتي .
شهد : تي ساعة بس ونديرلك اللي تبيه .
انا "عيطت عليها" : منقدرش نخلي حاجاتي عندهم اكثر من هكي ؛ اهو توا انا نمشي وخلاص .
شهد "باستغراب" : شن ترعي ؟
انا : توا نكلمك بعد نهدى ، هي باي توا "وسكرت ف وجهها ".
حذفت موبايلي ع الكرسي وقعدت نسوق وانا ف حالة انهيار مش طبيعي ، حاسة روحي لو شخص واحد يكلمني حنبكي ونقلب الدنيا عزا .
وصلت لحوش جدي ف وقت قياسي الصراحة ، اساساً للحظتي هادي مش عارفة كيف وصلت بالسرعة هي .
نزلت شرينت وفتحولي من داخل ، خشيت للجنان وفتحتلي نور الباب الثاني ، مسلمتش حتى عليها ، اول ما خشيت كان ف بالي انهم يا ف الصالون يا ف المربوعة وكنت بنمشي لواحد من هادوا ؛ بس انصعقت وقت لقيتهم فم الباب ، كيف ما هما مكدسينهم ع بعض فم باب الحوش ومعاهم قفطاني اللي شريته امس !!!!!!!
كانوا ع وشك دموعي يخونوني بس تمسكت فيهم ؛ قعدت انحي ف الحاجات اللي قاعدة متفطزتش وحطيتهم ف صندوقين بروحهم وطبقت الحوايج وحطيتهم ف سابات وقمت الشاش والحاجات معاش نذكر شن درتله بس اللي نذكر فيه اني قمتهم وساويتهم بحيث كلهم يجوا ف سيارتي وميأخذوش اكبر مكان ؛ بديت نطلع فيهم وحطيتهم كلهم ف سيارتي ، وكيف جيت بنطلع الكيسة اللي فيها القفطان ، جت قدامي وجه الشر .
انا "وقفت قدامها" : من قبل مدايرتيلي فالطة اكبر من هالحوش وتعذبت منها هلبا باش مرت ، ومع هذا كنت بنت أصل ومبيتش نقسي قلبي عليك ولما روحتي من غربتك لقيتي ولاء متع قبل ؛ وكل اللي عشته معاك ممكن تجي اقل من سنة وحسيتك اختي بجد ، وبعدها انقلبتي الله اعلم من اللي قلبك وغيرلك تفكيرك ، بس انا اللي نعرفه اللي يغيروله ف تفكيره هو العيل ! كنت نحسابك حتوقفي معاي وتسانديني لأنك حاسة بشعوري ، وحاسة بشن معنى انك تحبي وتنحبي ؛ بس شكلك متحسيش ولا عندك قلب ودم ! واخر شي توقعتك اديريه هو موقف اليوم ، خليتيني زي المهبولة ف الشوارع معاش عرفت لا نمشي لخدمتي ولا نجيك ! بس نهنيك انتِ اليوم خليتيني نخسر حاجتين ، خدمتي واختي .
أنت تقرأ
قدري المتغير 💙.
حركة (أكشن)#روايات_ليبية . رواية واقعية "مهيآش خيآلية" ، نكتبها بطريقتي ، ونتمنى توصل الفكرة اللي نبيها 💫.
