قدري المتغير 💙.

"البآرت الرآبع عشر".

بسم الله الرحمٰن الرحيم ✨.

ناض وائل وقعدت نشوف ف شن فيهم اخطاء وهكي ؛ وبعدها تم البريك ونضت رجعت لخدمتي .
وقت جيت بنروح ، طلعت وكنت تعبانة بطريقة مش طبيعية ، اساساً قعدت امخر اليوم وكان الدوام تام من ساعة الا ربع ؛ كيف جيت بنركب للسيارة ، سمعت اسمي .

حسام : تي وين هالتأخير كله ؟

انا "تلفتت" : تعرف تعب هلبا والله .

حسام : امك قاعدة عندنا وانشغلت عليك انك لتوا مروحتيش وموبايلك مترديش عليه ، مشيت لحوشكم وملقيتكش قلت بالك قاعدة مروحتش .

انا "فتحت باب السيارة وركبت" : اي اهو توا كيف بنروح "وولعت السيارة".

حسام "وقف جنبي" : اي باهي ، علاش اتعبي ف روحك كل هالتعب ؟

انا : امالا كيف بنطلع فلوس يا حسام ؟ وكيف بنطور من روحي ؟ كل شي ليه مقابل "فتحت الروشن وسكرت الباب".

حسام "اتكى ع حاشية الروشن" : تي باهي باهي ، قوليلي توا خيرك انتِ وامك ؟

انا "تنهدت بقوة ع امل انحي هالضيقة اللي ف صدري " : انا مدرت شي ، كل اللي صار انـ.....

حسام "قطع عليا" : عارف كل اللي صار ، حكاهولي يوسف وعاودتاه امك ، وحكتلي شن قتلك !

انا : مقتنع بوجهة نظرها ؟

حسام : اكيد لا ، لأنك تبي مصلحة اختك ؛ بس برضو خلاص خليهم هما يتعاملوا معاها وانتِ كوني معاهم طبيعي ، هما شهور بس وبتطلعي منه الحوش .

انا "حسيت كلمته الاخير وجعتلي بطني" : تي اما بنكون طبيعية وهي تقلبلي ف عيونها ؟ قصدي لو هي تبي تبادر ره بادرت وانا تغاظيت عليه الموضوع ، بس هي مدارتش اي خطوة .

حسام : ولاء فيقي ، امك هادي .

انا "بصوت عالي" : تي شن امي يا حسام ، تعرف شن قتلي امي ؟ نحساب روحي بديرلي اي قدر ف الحوش وبتقيمها بيا بس هي لا طيحتني اكثر وخلتني نغرق اكثر ؛ تتخيل ف حجم الموقف انتَ ؟ ماشية نجري بأختي بين المصحات ونكلم ف يوسف اللي ليه سنين مكلمنيش ونبي نعرف مرت خوه وين ، ويجي هو ع خاطري ونتلبزوا انا وهو بالدم بسبب اختي اللي حاولت تنتحر ؛ ونعيش ف حالة رعب لمدة ثلاثة ساعات ، ومرضت وقتها وف النهاية يطلع هذا كله بسببي ؟ "دمعوا عيوني" حسام انا مغلطتش ، ولحد توا مقتنعة بعدم غلطي ومش حنقدر نعاملها عادي ! تخيل طالعة فرحانة وقت جا يوسف ودار خطوة ان جا هو وبوه ودرت معاه مقابله ، ووقت نطلع تشدني وتقولي يوم اللي تتزوجيه انا نموت ؟ اي ام هادي ؟ تقولي بتحشميني قدام اقاربي يا طفلة ؟ "خنقتني العبرة" فوته يا حسام جو الصلح ، وخليها ع ربي .