قدري المتغير 💙.

البآرت الخآمس والعشرون "الأخير".

بسم الله الرحمٰن الرحيم ✨...

شوي وجاني مسج ع موبايلي "نحبه الوردي عليك 💙" ؛ زدت توترت وعرفت روحي اني ف المكان الغلط واني درت مصيبة لحياتي ماليهاش اول ولا آخر .
جتني لميس .

لميس : ولاء انا مقدرة خوفك وتوترك بس الموضوع مش كيف ما انتِ مفكرة .

انا : لميس انا غلطتي الكبيرة ف الدنيا اني جيت هنا ، مش عارفة كيف تجرأت وجيت .

لميس : انتِ تبي تبيني انك قوية وبس ؛ وهالشي نوقف فيه معاك ! انتِ قوية هلبااااااا بكيف قدرتي تواجهي وتوقفي ف وجهه .

انا : والنبي جيبيلي امية ،!

لميس : حاضر هي "ناضت وطلعت مالدار".

انا "قعدت نلعب ف ولدها ونذكر ف يوسف لما يكلمني ويقعد يلعب عليه ووقتها كان صغير هلبااااا ".

لميس "جت وجابتلي امية".

انا "قعدت نشرب ، وحسيت روحي هديت شوية ، شفتلها" : تسمحيلي نروح ؟

لميس "شدت ايدي" : منقدرش يا ولاء ، لازم تتواجهي معاه ويحكيلك كل شي ، هو قالي مستحيل تسمعني لو فمكالمة وشدي فيها باش تقعد ؛ واصلاً فرح هلبا وقت عرف انك جيتي .

انا "قعدت نسمعلها وحسيت بعيوني دمعوا" : منقدرش نكلمه ، مش شي ساهل اللي داره فيا ؛ يبعت فيك ليا ويبعت ف هشام باش توصلوني كلامه ؛ انا يا لميس اللي بنت ونكلم فيه علاقة وورا اماليا وهما رافضين اساس العلاقة ، هو اللي راجل وعايش بعيد ع بوه اصلاً حتى لو كان رافض يقدر يكلمني .

لميس : كلامك كله عندك الحق فيه ؛ بس والله صاير موضوع كبير انتِ مش فاهماته .

انا : منقدرش نفهم شي إلا انه سيبني وجرحني وقتلني .

لميس : بس مع هذا قاعدة تحبيه !

انا "قلبي وجعني" : لا منحباش ؛ نبي نوريه اني قوية من وراه بيه او بلاه !

لميس : باهي غر تعالي معاي .

انا : وين ؟

لميس "مدتلي ايدها" : غر نوضي معاي .

انا "شديت ف ايدها وركبتني فوق ، كان الدور الفوقي هادي ومريح عكس ضجة الدور الأرضي ؛ دخلتني لدارها وقعمزت ع السرير" .

لميس : ارتاحي شوية توا واحكيلي تفاصيل علاقتكم .

انا : يوسف نعرفه كمعرفة من ثانية ثانوي ؛ والاحتكاك اللي صار بيني وبينه ف نص سنة ثانية وكان شبه معدوم ره ف الاول ؛ كنت نهدرز عليه ع الانستاغرام بس لا نعرفه انه نفسه هو هداكا ولا هو يعرفني ، لحد ما خشيت للجامعة ؛ قبلها دار كل المحاولات باش يخش معاي ف علاقة وكان مقايل انه يحبني والحق دار هلبا حاجات يدلوا ع الشي هذا بس انا رفضته هلبا مرات ودرتله بلوكات ف كل مكان ! قعد يحايل عليا وبعت هلبا اطراف بس كنت رافضة نهائياً مع اني كان عندي مشاعر ليه بس لأني نعرف عيلتي قعدت نصد فيه ، مرت فترة وجا هشام اللي هو صاحب خوي هلبا ونعرفوه عائلياً كلنا ، هشام ف الاول كان يهدد متع ابعدي عليه وره مش نفس البيئة وحتتعبي وووو وبعدين هكر ايميلي وشد هدرزتي مع يوسف وقعد بين كل فترة وفترة يكلمني ويهددني وميدورش لشن انا نحس ويسكر ، خشيت للجامعة ولقيت ان يوسف نفسه متع زمان يقرا غادي ؛ صار ان طلبت شيتات متع السيمستر الاول من بنت وجابتهملي منه وقعد بعد فترة فيه تواصل بيني وبينه ، وبعد مدة كل مرة يزيد هالتواصل لحد ما عرفت انه نفسه اللي مدايرتله بلوك ف كل مكان ؛ حتسأليني يوسف خوي يحط ف صوره كيف مزبطيشي ؟ مش مزبطاشي بس كنت شاكة وكنت مدايرتله بلوك ومنقدرش انحيه باش نتأكد والحق تجاوزت الموضوع ، بعد مدة رجع لنفس القصة وحاول بكل الطرق لما بقاني مسكرة رأسي ، قعد صديق واخ فنفس الوقت لقيته مساندني ف كل ايامي ، الحلوة والمُرة وحياته كلها فرغهالي ، يعني نذكر ايام الامتحانات ، هو يكون معنداش مرات وانا انوض ٤ ونكون مضايقة نتصل بيه ف نص نومه وانوضه ويهدرز عليا عادي ويقولي لا كنت نتفرج مع اني زابطة انه كان راقد ؛ عطاني وعطاني وعطاني كل ما يقدر عليه ف حياته دارهولي وانا كنت بنت كلب ومندورش فيه ؛ هذا كان اللي يبانله بس كل هذا كان من ورا قلبي ومكنتش نبي نديره بس باش مينصدمش ف واقعي ومجتمعي ، من الاول حاكيتله ع كيف طبيعة عيلتنا وان منأخذوش عرب وووووو بس هو قعد شاد فيا وياما تعبتله نفسيته وانا كنت اكثر منه بس برضو نرجعوا ؛ يوم من الايام زابطني نحبه فضغط عليا وحطني بين خيارين يا نعترف بحبي يا يختفي من حياتي ، وانا غر فكرة معاش نكلمه لأسبوع ترعب فيا فبعد تفكير لمدة هلبا ايام حكيتله كل شي ، وكان اسعد يوم ف حياتنا الزوز وبعدها بجو شهر ممكن حسب ما قال هو وهشام ان تعارك هو وامك وقالتله مش راضية عليك لو تأخذها وهو كلمني وقالي احنى مش لبعض ومقاليش السبب الأساسي ف الأول ، واختفى ف طروف غامضة وانا مكنتش نعرف انه امك ضاغطة عليه ، مروا شهرين ع ما أظن وبعدين جا هشام لليبيا وطلب مني ان يتلاقى معاي ، تلاقيت معاه وهدرزنا وحكالي اللي صار وقالي انا طلبت منه دير هكي ! مافيش شي يخلي امك مش راضية عليك وانتَ تقدر تسيبه وكلام زي هو ، بعد اسبوع رجع خوك وانا ف نص تهزيبي وعتابي ليه ، تخش عليا ماما وتكون سامعة كل كلام وتهزبني ، بعد يومين نسمع انها وافقت ع شخص خاطبني من غير موافقتي وتقابلت مع هالشخص وصارت هلبا مشاكل مع عيلتي وبعدين فسخت وجا يوسف هو وبوك لبابا وجدي وكلموهم وكانوا رافضين المبدأ كلياً ومن بعدها خوك قعد يوعد فيا ان حنقعدوا مع بعض وحنكونوا لبعض وحيسافر يكون روحه ويروح يخطبني ونديروا المستحيل ؛ بس اول ما سافر كلمني وبعدها اختفى ولمدة سنة ونص كاملات معاش بان ف حياتي وحطيت كل طاقتي باش ننساه ونتجاهله ؛ بس لقيت روحي كإني نحرث ف بحر ، اول ما سمعت بيه جاي جيتله نجري زي العبيطة ! وهادي هي كل قصتي مع يوسف بالتفصيل .