قدري المتغير 💙.

"البآرت الثآني والعشرون"

بسم الله الرحمٰن الرحيم ✨.

طلعت من الدوش ، بدلت حوايجي وجففت شعري ودرت روتيني ، ولعت التلفزيون واتكيت ع سريري ، اول ما فردت ظهري حسيت بكمية راحة منقدرش نوصفها ، منعرفش كيف حسيت بالراحة وقتها بس اللي نذكر فيه ان فيه شي حيصير ويفرحني القدام ؛ قعدت نفكر ف ان طول ايامي الفترة هي هلبا ، قصدي اليوم الواحد بديت نحس فيه طويـــــل وهلبا أحداث تصير فيه ، زي يومي هذا ؛ مشيت للخدمة وبعدها خطمت ع شهد وهداية وطلعنا وغيرنا جونا وروحت للحوش بديت نوتي ف روحي وتصالحت مع يوسف وتعاركت مع عيوش وبابا وعلي وهديتهم وبعدين مشيت لحوش جدي وتعاركت مع ماما وشهد وحسام وكلامه وبعدها كلام اريج وتفاهتها وجوا اماليه والجو اللي صار وبعدها جا هو وخشيتله واللي صار وبعدها رجعت وروحوا وهدرزلي حسام ع عيوش ووووو ؛ اوووف غر نعد فيهم لقيتهم اكثر من عشرين حدث صارلي اليوم .
خاطري توا نرقد اسبوع كامل ، نحول كل الطاقة السلبية اللي عندي ، وندير ريفريش لروحي ولنفسيتي باش نلقى بشن نقابل الناس .
جا ع بالي لو بعد هذا كله يصير شي يخلي فاتحتنا متنقراش ، انا بني آدمة راضية نتزوج من غير عرس ، راضية نلبس قفطاني الأبيض اللي لبسته ف عرس خلود بنت عمي اللي معلق عندي من سبعة سنين ، راضية كل معازيمي يكونوا هداية وشهد ووائل والعيلة القريبة وبس ، راضية يكون يومي طبيعي غير اني قبل العصر انوض نمكيج عادي ونلبس قفطاني ويجي يوسف ويأخذني ، بجد مش انافق ف روحي بس منبيش ندير اي مبالغات ؛ فيه هلبا حيقولولي هادي ليلة عمرك ومستحيل تتكرر كيف مديريش شي ؟ نحب نقوللهم ان شن فايدة درت عرس مفخفخ ومخليتش شي الا ودرته وانا بعدها بيومين بنتعارك مع اللي يتسمى شريك حياتي ؟ انا نشوف ف كل هالتفاهات اللي يديروا فيهم ما هم الا بودعة زايدة وماليهمش طعم ، نشوف فيهم يتصنعوا ف الفرحة وعايشين تحت مسمى "سعادة كاذبة" .
منضتش ثاني يوم الا ع صوت موبايلي ، قمته ورديت ومن غير ما نشوف للاسم .

انا : الو .

وائل : تي نوضي يا خميرة ، الساعة ٩ .

انا "قعمزت مخلوعة" : كككييييففففف ؟

وائل : صباح الخير .

انا : تي اما صباح "شفت موبايلي ولقيتها بالفعل الساعة تسعة" وائل الزفت علاش كيف كلمتني ؟

وائل : ههههههههههههـ ؛ قلت اكيد تعبت امس خليها ترتاح .

انا "بعصبية" : تتمهتك عليا توا انتَ ولا كيف ؟

وائل : تي غر خيرك والعة !

انا : توا المدير يديرلي قصة ، امس روحت بكري واليوم جيت امخر ، تي يا والله هالنهار المغبر .

وائل : لالا كلمته ، واللي كنتي بديريه خديته ودرته انا ، نوضي براحتك وتعالي ع جوك ، متستعجليش .