قدري المتغير 💙.

البآرت الثآني والعشرون.

بسم الله الرحمٰن الرحيم ✨.

حسيت بموبايلي وصله مسج ، فتحته لقيته من لميس "ولاء لما تفضي كلميني" ؛ كلمتها .

انا : ايواه .

لميس : اهلين ولاء كيف حالك ؟

انا : الحمد لله وانتِ ؟

لميس : بخير في نعمة .

انا : خيرك شغلتيني ، صاير معاك شي ؟

لميس : لالا ؛ مش موضوع قوي هو ، بس نبي نقولك إن يوسف مروح الجمعة الجاية بس .

انا "وقت قالت اسمه حسيت صوت نبضات قلبي هي بدت تسمع فيهم" : اهاا .

لميس : غر قلت نقولك بس .

انا "فقت ع دماغي واذكرت انه سيبني وحطمني " : يوصل ع خير ان شاء الله .

لميس : شوفي احنى مدايرينله عزومة السبت لو تقدري تجي .

انا : يا لميس ع أي أساس بنجيك ؟

لميس : انك صاحبتي يا ولاء ، عادي ره ! عازمة صاحباتي ومدايرينها عزومة كبيرة .

انا : صاحباتك هادوا من الطفولة ، اما انا لا وحتى لو جوك ف اي وقت عادي ، انا شن بيكون موقفي قدام امك ؟

لميس : ماما هي اللي قالتلي كلميها .

انا "توترت الحق " : امك ؟

لميس : اي ولو تبي حتى تكلم امك !

انا : مه شوفي لو انها مناسبة قوية زي خطوبة او عرس ره نجي ؛ بس غر جية من السفر منشوفش فيها شي قوي .

لميس : انا ره مش قصدي نحرجك ونسببلك ف اوجاع ، بس والله من كثر ما نحكيلهم للعيلة ع ولاء صاحبتي لدرجة قالولي اعزميها نتعرفوا عليها ؛ وتوا ماما شدت فيا قتلي ع الأقل متتسبلش واهو فيه مناسبة ! ره ماما متعرفش انك نفسها اللي كان يبيها خوي .

انا : انا خوك ره معاش نحبه ولا يهمني ف حياتي .

لميس : لو بجديات كيف تقولي ، تعالي السبت.

انا : لميس احنى مش فتحدي ره ونشوفوا ف قوة بعضنا .

لميس : عارفة يا ولاء ، بس والله مش نيتي كيف ما تقولي .

انا : حنحكي لماما وتوا نشوف .

لميس : أوكِ عزومة عشا هي وع جو قبل المغرب .

انا : ان شاء الله .

لميس : تمام ، هي سلامات توا .