قدري المتغير 💙.

"البآرت الخآمس"

بسم الله الرحمٰن الرحيم ✨.

انا "اول ما شفت الاسم انسخطت ، كان يقصد ع وائل " : يخدم معاي يا بابا ، وحتى اريج وماما يعرفوه ويعرفوا اماليه .

بابا "شافلي ، وبعدها تلفت لماما " : صح هالكلام يا جميلة ؟

ماما "بعد صمت يعادل ربع ساعة " : اي يا عادل ، ولد كويس .

انا : اقرا حتى اللي بيناتنا ، كلام عادي ره وشوف التواريخ بعد حتى شهر يسأل فيا وهكي .

بابا : لا انا مندخلش ف الكلام وخصوصيات .

انا : خش حتى ع السناب ، مرات نضيف ف ولاد يشوفوا ف صوري .

بابا "شافلي برفعة حاجب " .

انا : لالا مش هداكا ، الاصفر سناب ، وهذا اللي كنت تبي تخشله لعبة اسمها فورت نايت .

بابا "حدفه بس بالشوية" : خلاص ، شدي موبايلك .

انا "مديتهوله" : لا ، مدامك شكيت فيا مرة ، معناها انا منبيشي .

بابا : انا مخديتاشي لأني مش واثق فيك ، انا خذيته باش نثبت لأمك كلامي اخر فترة ، وان مافيش شي وراك ، وعيوش هي اللي تصرفاتها غريبة .

انا "هنا كيف ركزت ف اللي صار وصمت ماما المبالغ" : وتأكدتوا اني معاش كلمت يوسف من قريب سنتين ؟

بابا "مدلي موبايل عيوش" : افتحيه .

انا : نفتحه ، بس تعذرني بنوض .

بابا : بتقعمزي هنا لحد ما نكمل ولحد ما نقول اللي نبيه كله .

انا "نزلت رأسي " : به .

بابا "بعصبية" : افتحي الخارب .

انا " اول مرة نشوف بابا وهو مهستر هكي ، وصوته عالي ، ولا عمره تعلى صوته ع خاطر اي شي ، حتى وقت صارت مشكلتي مع حسام وبعدها قصة اريج وكل اللي صار من مشاكل مع عمامي ، كان الهدوء متملكه الا توا " : الباسوورد ٠١٠١٠٩٠

بابا "بهزوة" : وهذا ان شاء الله يكون عيد ميلاد حبيبها .

انا "اذكرت انه عيد ميلاد هشام ، ومفهمتش شن صلة عيوش بهشام " : منعرفش شي .

بابا : تمام .

قعد يشوف من برنامج لبرنامج ويتفرج ع عار بنته بعيونه ؛ كل ما نشوف بابا ينفص ووجهه يبدأ احمر نزيد نخاف ، مش ع نفسي ، ولا ع عيوش ، خايفة ع بابا وهو زمان كان مداير قسطرة ؛ والصراحة عنده الحق ف اي ردة فعل يديرها ، لأن اللي شفته يهد جبل بحاله ، كان بعيد كلياً ع مبادئ عيلتنا ، وتعاليم ديننا ، وتقاليد دولتنا ، كانت بالزبط كبنت ليل في وسط عيلة محترمة من احسن العائلات ف السمعة ف زوارة .
وبالرغم من هذا كله واللي يشوف فيه بابا ، الا اني عارفة اللي شفته اكثر بهلبا منه ، مهما يكون انا ادرى بوسائل التواصل ونعرف كل التراكين ف هالحاجات اكثر منه .