بسم الله الرحمٰن الرحيم ✨.
سكرت اللابتوب انسدت نيتي ع اي شي ، نضت بدلت وخديت شيتاتي وكتاب مؤيد ونزلت تحت لقيت ماما مدايرتلي فطور وقاعد ع الطاولة ، كليت وبعدين طلعت سخنت السيارة وركبت ومشيت ف اتجاه الجامعة ، اول ما وصلت ؛ بعتت مسج لمؤيد ع الانستاغرام وقلتله فيه "صباح الخير ، لو إنك فاضي اليوم نتلاقوا بنعطيك شي " نزلت وحضرت محاضرتين وبعدين الجو كان نو هلبا فركبت السيارة وقلت نأخذ شوية برودة بما إن مزال المحاضرة الثالثة مبدتش ؛ شوية فتحت النت لقيت مؤيد راد عليا "صباح النور ، انا جهة الكافيتيريا ، انتِ وين ؟ " رديت عليه "انا برا ف الباركينج " رد "اوكِ شوية ونجيك" ؛ استنيت جو ١٠ دقايق وجا ، فتحتله الروشن .
مؤيد : اوووو ولاء ، شن جوك وشن أخبارك ؟ والله ليك وحشة !
انا : بخير الحمد لله ، حتى انتَ ليك وحشة ، شن مداير ؟
مؤيد : والله اهو كساد وخلاص ، هالسيمستر مباش يكمل .
انا : اي والله هههههههههههـ؛ ، مؤيد انا منبيش نعطل لأن محاضرتي قريب ؛ يوم الأحد اللي فات كنت مقعمزة ف الجردينة بعدين جا شخص بحداي ونسا كتاب ومعرفتاش منو لأن مكنتش مركزة معاه ؛ ع المهم الكتاب وقت فتحته لقيت عليه اسمك ، فقلت نردهولك وكان عاطيه لحد اعطيهوله "مديتله الكتاب" .
مؤيد "باستغراب" : هذا كتاب قديم ره من السيمستر الثالث لو تلاحظي ، واساساً هو صح ليا بس عطيته ليوسف كان عنده بحث وقالي نبيه .
انا "بتعجب" : يوسف ؟
مؤيد : اي والله ما عارف علاش واخذه اساساً لأن هو متقدم عليا بسيمستر بس الشهر اللي فات قالي بيقري ولد خالته ويبيه من غير بيدير بيه بحث لواحد من الدكاترة .
انا "باستغراب " : غريب والله ، يعني توا تأخذه او لا ؟
مؤيد : اعطيه ليوسف انتِ وخلاص !
انا : اعطيهوله انتَ خير .
مؤيد : يا ولاء كان بنعطيهوله انا بيقولي من وين جاك وكذا وبيديرلي قصة اعطيهوله انتِ وخلاص ؛ يعني انتِ وقت قعمز بحداك مكلمكش ؟
انا : لالا ؛ يعني لو كملني وعرفته يوسف بنجيب الكتاب ليك ؟
مؤيد : مه هذا اللي يدوخ مستحيل يوسف يقعمز بحداك وميكلمكش ، هو اساساً يخطم من بعيد ويسلم عليك ، يا بال قريب !
انا : غريب والله ؛ بالك ولد خالته اللي نساه ، مش قلت بيقريه بيه ؟
مؤيد : هو ممكن اي ؛ بس انتِ تعرفي يوسف لما يأخذ حاجة مستحيل يلوحها او يعطيها لغيره ، ويحافظ عليها .
أنت تقرأ
قدري المتغير 💙.
Ação#روايات_ليبية . رواية واقعية "مهيآش خيآلية" ، نكتبها بطريقتي ، ونتمنى توصل الفكرة اللي نبيها 💫.
