بسم الله الرحمٰن الرحيم ✨.
اريج : لا غيره ! كلميه هو اللي شادة فيه بكل اعضائك وحواسك وقوليله يجي ، شن فالحة غر ترفضي ، ترفضي ونستنوا ف حضرته ؟
انا"تكنطيت منها" : اول شي موضوع اني بنتزوج توا او بعدين هذا شي يخصني ، ومافيش حد دخله بيا ؛ وموضوع اني نرفض برضو يرجعلي ومدخلش الناس ولا انتِ وامك اساساً ، وموضوع اني نكلمه نقوله تعالى اخطبني لو توقفي ع حواجبك منقدرش نقولهاله ، الولد كلم بوي فوق من الستة مرات وامه كلمت امي وبوه كلم بابا والامور واضحة ، علاش نزيد نضغط عليه ؟
اريج : باهي معاك ان طلع راجل ، لاكن خلاص يتحرك يدير اي لقطة !
انا : اريج والنبي متنفخيهمش ، كيف بيدير اي لقطة وامك وزعت امه ؟ وهما اصلاً الزوز رافضات ؟
اريج : وخيتي انا نبي مصلحتك ، مهند اللي خطبك اخر مرة كويس هلبا ،!
انا : كويس لروحه ملياش علاقة بيه ، وانتِ علاش مصرة عليه هلبا ؟
اريج : لأني نشوف ف انك حتكوني مستريحة معاه اكثر من العربي هذا !
انا : شن دخل الراحة ف الكلام اللي تقولي فيه ؟ يعني لو عربي مش حنرتاح معاه ؟ خيرك مولية زي ماما ؟
اريج : انا اكبر منك يا ولاء بثمانية سنين ونعرف ما يصلح وميصلحش ووخذة عربي مش حتريحك .
انا : وانا غير هالعربي مش واخذة ! وهالكلام ع ما اعتقد قلته قبل وعاودته ، تخلي فيا نعاود فيه توا ، علاش ؟
اريج : ولاء افتحي دماغك واسمعيني .
انا : اسمعي مطلعينيش ع طوري ، انا غيره مش حنأخذ ومدام بابا واقف معاي ميهمنيش كلام حد ، تي والله لو نهرب معاه هروب .
اريج : استغفر الله وخلاص ، منعرفكش هكي ، انتِ .....
انا "قطعت عليها" : اريج جيت هنا باش نفك روحي من ضغط الحوش ، بتنفخيهم بنروح ؛ حتى شهد تزوجت كان هذا منحتاجش لحد .
اريج : بتجلطيني وربي "وقفت" اقعدي فكري بروحك ف كلامي وحولي الحب شوية من قدامك وفكري بعقلك .
انا : مانيش عيوش ره باش نكون درامية او غير مركزة ف تصرفاتي وقرارتي .
اريج "طلعت ومردتش عليا ".
قعدت نفكر ، علاش هما شادينها ف جرتي هكي ، وعلاش الكل معتقد نفسه انه بكلامه هذا فيه مصلحتي ؟ علاش اصلاً ميقتنعوش ان كلامهم هذا مجرد ارضاءً لضميرهم اللي قاعد حي ويضايق بكلام الناس !
فتحت التلفزيون ولحسن حظي ونيتي كان فيه فيلم انيمايشن للمنيونز وكنت نحبه هلبا ، فوق الحب ، هبال .
بعد ما تم الفيلم وانا منسجمة معاه آخر انسجام ، وخاصةً ان اريج مجتش ! نضت وكنت جيعانة ، خشيت للمطبخ ولقيتها ادير ف العشا .
أنت تقرأ
قدري المتغير 💙.
Aksi#روايات_ليبية . رواية واقعية "مهيآش خيآلية" ، نكتبها بطريقتي ، ونتمنى توصل الفكرة اللي نبيها 💫.
