بسم الله الرحمٰن الرحيم ✨.
بس قلت قبل ما نتصل بيه ؛ نكلم حسام ونقوله اني طلعت ويمشي ليوسف ، او احسنلي نبعتله مسج ، اي اي مسج افضل شي !
بعتت المسج لحسام وبعدها طول اتصلت بيه .
انا "بصوت مخنوق نوعاً ما " : ايواه .
علي "بصوت عالي" : اهلين يا قردة ، كيف حالك ؟
انا : الحمد لله ، وانتَ ؟
علي : خيرك ؟
انا "حسيت روحي حننهار ، بس حاولت نتماسك قدامه " : عييت انا ره ؛ امك درهتلي كبدي ، طول عمري نفوتلها ونتغاظى اني نحكيلك عليها ؛ بس خلاص الزفت بعد هكي معاش فيه !
علي "بخوف" : شن فيه ؟
انا : تقول ربيبتها مش بنتها يا علي ؛ وين ما تلقاني فرحانة ومبسوطة تمشي طول تقول شي او ادير شي يخلي كل شي ينقلب لنكد وهم "حسيت بالعبرة خنقتني" وربي عييت انا .
علي : باهي غر فهميني بالشوية بالشوية .
انا : اي بس متضايقش مني !
علي : ع يوسف قصدك ؟
انا "بصدمة" : وكيف تعرف انتَ ؟
علي : كلمني هو من قبل قريب اربعة مرات وبوي حكالي عليه .
انا "حسيت براحة فلحظتها" : باهي اهو نحكيلك اللي صار من الاول .
علي : هي وانا نسمعك !
انا "صح حسيتها رزينة كيف نحكي لخوي ع حبيبي ، بس مافيش حل الا هكي ، وخاصةً انه متزوج روسية " : هي اهو نبدالك ............"وقعدت نحكيله ف كل شي بس باختصار ".
علي "طول هالوقت يسمع فيا وبس ، وحدها يقولي " : اي به ، كملي "وبعد سكوت دام ما يعادل ساعة الا ربع " باهي هي علاش مصممة هكي ؟
انا "هنا معاش تحملت وحسيت بكل التراكمات تضغط عليا ، وبديت نبكي " : منعرفش ، خايفة من الناس شن بيقولوا عليها وان بنتها تزوجت واحد عربي ! عيب اللي درته يا خوي ولا حرام ؟
علي "بجدية شوية" : شوفي هو لو انا بنشوفلها بمنظور اطاري خارجي سطحي ، اي عيب وبذات عندنا احنى الزوارية ؛ بس لو بنشوف للموضوع بمنظور تعمقي داخلي مهواش حرام وانتِ مدرتيش شي غلط ، بل بالعكس صديتيه هلبا وعاملتيه بأسوء المعاملات وانا واثق فيك وف كل كلامك ، وبالرغم من هذا كله الا انه قعد صامد معاك وجا وكلمني وكلم حسام وبوي وجاب بوه رسمياً يعني ، وهذا شي كافي ، وزيادة ع هذا انا سألت عليه اكثر من شخص ، وع عيلته ومافيش حد قال فيهم اي حرف بايخ ؛ وانا اساساً منقدرش نقولك لا غلط اللي اديري فيه ، صح رقتلي وقت عرفتك مدايرة علاقة بس هو فهمني اللي صار وانكم مارتبطتوش الا شهر ممكن وبعدها سيبتي ؛ المهم انا منقدرش نصدك او نقولك عيب اللي اديري فيه لأني حنكون اناني وقت نقولها ، يعني بعقلك بنرفض شخص زيه ويحبك وتحبيه ، وانا متزوج اللي نحبها وهي روسية ؟ المهم هذا وجهة نظري يعني ، وبالنسبة لموضوع امي ورفضها وكلامها المش موزون ، توا انا نسكر منك ونكلمها ونهدرز عليها ونحاول نقنعها ، بس انتِ كوني هانية مدام بوي موافق ، حتى لو انا رفضت امورك حتمشي تمام ؛ ومدام بوي وافق معناها انه من احسن الرجالة فيك يا ليبيا .
أنت تقرأ
قدري المتغير 💙.
Akcja#روايات_ليبية . رواية واقعية "مهيآش خيآلية" ، نكتبها بطريقتي ، ونتمنى توصل الفكرة اللي نبيها 💫.
