قدري المتغير 💙.

البآرت الثآلث والعشرون .

بسم الله الرحمٰن الرحيم ✨.

بابا "ناض ومردش حتى كلمة عليا وطلع من الدار وسمعت صوت باب الحوش تسكر ".

انا : ربي يهدينا وخلاص .

ماما : ولاء كلامك صح بس هادي العيشة اللي اخترناها ، باش نأمنولكم كل شي تبوه .

انا : اهااا وتوا لميها بنتك باللي تبيه ؛ انا مش ضد انك تخدمي ، بس ضد انه ع حسابنا ، باهي فوتيني انا وفوتي علي تزوج اوني واريج نفس الشي ؛ اللي اديري فيه ره ع حساب عيوش ، عيوش دارت هكي لأن مش حاسة بأن فيه أم وراها وترعاها ، مافيش أم تنصحها وتقويها وقت منحتها ؛ تحسابي الفلوس يهموا ؟ ره قدام الشعور المعنوي ميجيش شي ، ياما من ايامات تعبت بسبب هالموضوع ، بس انا والحمد لله مدرتش أخطاء كبيرة ، اما بنتك ملبزة توا واشبح بعد وقت شن تلبز ، حني عليها وهدرزي عليها وفوقيها للغلط والصح ، متقوليليش كبرت توا وتعرف بروحها ، عيوش ره ع كبر عمرها اما عقلها وثقافتها ف الدنيا صفر ، متعرفش تتصرف لأنها طيبة هلبا واي حد يضحك عليها .

ماما "قعدت تشبحلي وساكتة" .

انا : مكنتش نبي يجي يوم وانا اللي ننصحك ، بس يا أمي ره مش كل فلوس ولبس وموبايلات وسفر ، انتِ الوقت الاخير من اليوم اللي تفضي فيه يا تجيبي خواتك يا تمشيلهم يا تمشي لحوش بوك ، امتا تقعمزتي وهدرزتي عليها ، تحسابي انك اديري ف كل شي عليك بأنك تسألي فينا كل يوم شن الغدا ؟ او تعطي ف مصروف ؟ او درتيلنا خدامة تأخذ علينا شوية من تعب الحوش ! منبيهاش الخدامة ، اقل شي يكون فيه احتكاك بيني وبين اختي ، اقل شي نتعارك حتى معاها ع الضمان والتسييق ! انتوا الزوز ، انتِ وراجلك درتوا كل السبل اللي تخلينا عيلة متشتتة .

ماما : متحطيش اللوم كله عليا ، انا نحاول نوفرلكم كل شي وهذا كله ع حساب صحتي !

انا : لالا لحظة ، احنى بخدمة بوي بس تسدنا ونكونوا نلبسوا ف احسن لبس ونأكلوا ف احسن الحاجات وكل شي يجينا لعندنا ؛ ببوي بس يا أمي والحمد لله تعرفي هو منصبه شنو وهو الراجل اللي يجيب فلوس ، حتى لو يخدم ف ثلاثة اماكن ! انتِ تخدمي لأن قلتي تقتلي ف الكساد ومتبيش اللي قريتيه من حياتك ف الطب يمشي ع الفاضي ، وقلنا باهي ، بس السبب الرئيسي مكانش هكي ولا تحطيه ف رأسنا ، انتِ كنتي تبي تشري سيارة غالية وبابا قالك اصبري ومقدرتيش تصبري لأن خالتي سهام شرت وحدة ، وانتِ تبي تغيري صالون وسط الحوش لأن اختك إيمان دارت جديد ؛ وانتِ تبي تشري تاكم بمش عارفة كم باش تطلعي مميزة ف عرس نهى بنت خالتك وانتِ وانتِ ياما مواقف لو بنحكيهم ؛ بس متديريهاش ف رأسها لأن احنى نبوا نعيشوا ف مستوى معين ؛ واحنى لما كنا صغار منعرفوش شن معنى كلمة مستوى أصلاً ! فيقي يا أمي انتِ متعبة نفسك وصحتك ع خاطر شي احنى نشوفوا فيه تافه لأبعد حد .