بسم الله الرحمٰن الرحيم ✨.
زفرت بقوة وحسيت بدوخة بسيطة ، بدا النفس يضيق عليا ؛ بس صبرت روحي ، عادي يا ولاء توا يمر ، توا يمر كل شي ، توا يرضوا ، حتمر كل اللحظات الشينة ؛ حتمر .
سمعت صوت حد ينادي عليا ، وبعدها استدركت ان موبايلي يرن ، خديته من شهد ، ورديت من غير ما نشوف الاسم ،
انا : ايواه .
حسام : ترا اطلعي برا ، نبيك شوية .
انا "بضعف" : لو شي بيضايقني ويهدني ، ارجوك اجله ، لأني معاش نتحمل .
حسام : غر اطلعي !
انا : به شوية بس .
سكرت من حسام ، وكانت شهد تدوي وتسأل ف هلبا كلام ، كنت نحس بضيق تنفس والدوخة بدت تقوى ؛ وشهد زادتني بصداعها .
انا "بصوت عالي شوية" : خلاااص يا شهد ، خلاااص نفختي امهم ، ارحميني شوية من اللكلك متاعك ، درهتيلي كبدي ره ، من الصبح وانتِ ترغي ؛ خلاص اسسس شوية وريحي لسانك "كيف جاية بننزل" ارحموني شوية ، شن هذا النم !
نزلت لوطا ولقيت حناي تشوفلي ، بس مكلمتنيش ! اساساً كنت ف اقصى حالات ضعفي وغضبي ، كنت مش طاقية نشوف حد ، حتى يوسف !
لبست العباية من فوق ، وطلعت للجنان من التالي .
لقيت حسام واقف وعاطيني بالظهر.
انا "قربت منه " : ها ؟
حسام "تلفتلي" : ادوي زي الناس .
انا : ورأس امك قول شن تبي ، مش ناقصة ، راهو ع اعصابي .
حسام "يشوف للأرض ومقامش عينه فيا" : اول شي هدي روحك وفكيني من جو انا اعصاب والدخان ناقص ؛ وثاني شي يوسف واماليه ف الطريق قريب يوصلوا ، وثالث شي كلمني ع الفاتحة وقال يبيها قريبة ، ورابع شي عرفت منو اللي ورا حالة عيوش !
انا "بقلة استوعاب" : غر بالشوية عليا ، جاي انتَ توا لوحدة زيني وتقولي ف كل هالأخبار ؟
حسام : مه بعدين عارف مش حنحصل فيك دور ، فنقولهملك توا احسن .
انا : شن قصة الفاتحة وعيوش ، ومنو اللي ورا حالتها ؟
حسام : مافيهاش قصة الفاتحة ، الراجل كلمني وقال يبيها قريب ، وامك توا نكلمها ؛ وعيوش قصتها طويلة الحق !
انا : بتدوي بألغاز توا ؟
حسام "مسح ع وجهه" : هشام يا ولاء ، هو السبب ورا حالة عيوش ، هشام !
انا "بصدمة" : ممممننننووووو ؟؟؟؟
حسام "بقلة حيلة" : هشام ، هشااااااام هو السبب !
أنت تقرأ
قدري المتغير 💙.
Acción#روايات_ليبية . رواية واقعية "مهيآش خيآلية" ، نكتبها بطريقتي ، ونتمنى توصل الفكرة اللي نبيها 💫.
