Amiss Prayer (Zawgyi&Unicode) [Completed]

Part-11‌(သူ)

For Unicode

သူ

လောကကြီးနှင့် ခေတ္တအဆက်သွယ်ပြတ်ပြီးနောက် မိမိမြင်နေရသည့်ပတ်ဝန်းကျင်သည် ထူးဆန်းဖွယ်အတိ။ မင်းလွင်မြူခိုးတို့သည် ထိုပတ်ဝန်းကျင်အား လွှမ်းခြုံကာ တန်ဆာဆင်ထားသည်။ တိတ်ဆိတ်ငြိမ်သက်မှုသည်လည်း ထိုပတ်ဝန်းကျင်အား လွှမ်းခြုံထားသည်။ အလင်းရောင်မှုန်ပျပျသာရှိသော တောအုပ်တစ်ခုနှယ်။ မည်သည့်နေရာသို့သွား၍ မည်သည်ကိုရှာမည်နည်းမသိ..။ မြင်မြင်သမျှ အနီးနား၌ သစ်ပင်နှင့် မြူခိုးများသာမြင်ရသည်။

ထို့နောက် မိမိအရှေ့မှ အလင်းရောင်စူးစူးပေါ်လာသည်။ မိမိသည်လည်း ထိုအလင်းရောင်ရှိရာသို့ သွားနေမိသည်။ အနားသို့ရောက်သွားလေ‌လေ ထိုအလင်းရောင်သည် အမြင်အာရုံထဲ၌ပို၍စူးလာလေ‌လေဖြစ်ကာ နောက်ဆုံးတွင် ကြည့်၍မရတော့သည်အထိ ဖြစ်လာသောကြောင့် မိမိ၏မျက်လုံးများအား ခေတ္တခဏမှိတ်လိုက်ချိန်တွင် ထိုအလင်းရောင်စူးစူးသည်လည်း တဖြည်းဖြည်းပျောက်ကွယ်သွားခဲ့သည်။

အလင်းရောင်၏အားလျော့မှုကို သိသောအခါ မိမိသည်လည်း အမြင်အာရုံများကို ပြန်လည်အသုံးပြုကာ ပတ်ဝန်းကျင်အားကြည့်မိသည်။ မိမိရောက်နေသောနေရာသည် မကြာသောအချိန်ကာလမှ မြင်တွေ့ခဲ့ရသည့် နေရာမဟုတ်။ မိမိသိသော ရင်းနှီးသောနေရာဖြစ်သည်။ ထိုနေရာကတခြားမဟုတ်။ မိမိနေထိုင်ရာ သီပေါမြို့မှအိမ်ကြီးပင်ဖြစ်သည်။

ထိုအိမ်ကြီးမှာ မိမိနေထိုင်စဉ်ကာလများနှင့်မတူ..။ ခြံဝန်ထဲ၌ ပို၍ စိမ်းစိုလှပနေသည်။ သဇင်ပန်းအနံ့သည်လည်း လှိုင်နေသည်။ ထို့အပြင် အဖြူရောင်နှင်းဆီပန်းခင်းလေးတွင်လည်း ပန်းကလေးများသည် အစီအရီဖူးဖွင့်နေကြသည်။

ထို့နောက်ခြံဝန်းထဲသို့ လူကြီးတစ်ဦးနှင့် လူငယ်လေးတစ်ဦးက ယှဉ်တွဲ၍ဝင်လာသည်။ ထိုသူနှစ်ဦးအနက် အသက်အရွယ်ကြီးရင့်သူအား မိမိမသိ။ သို့သော် ထိုလူကြီးဘေးတွင်ပါလာသော လူငယ်ကိုမူ မိမိသိပါသည်။ မိမိသိနေသောလူဖြစ်၍ မည်သူများနည်းဟု မေးခွန်းထုတ်လာသောအခါ ဖြေရန် အနည်းငယ်ခက်ခဲလှသည်။ ထိုသူမှာတခြားမဟုတ်.. မိမိဖြစ်ကိုယ်တိုင်ပင်..။