Amiss Prayer (Zawgyi&Unicode) [Completed]

Part-51(စိုးရိမ်မှု)

For Unicode
စိုးရိမ်မှု

ထူးဆန်းစွာပင်..။ ယခင်ကာလ နေ့ရက်များစွာနှင့်မတူ..။ ယနေ့တွင် စိတ်ကြည်လင်စွာနိုးထလာခဲ့သည်..။ အိပ်မက်ဆိုးများလည်း မမက်မြင်တော့ပေ..။

ယနေ့တွင်အကြည်ဓာတ်တို့ ပို၍စုဆောင်းသည့်နှယ်..။ အိပ်မက်ဆိုးများမမက်မြင်၍ စိတ်ကြည်ရသည်ထက် ပို၍ကြည်နူးဖွယ်အရာတစ်ခုက ထပ်၍ရှိနေပြန်သည်..။ ဤသည်ကာ Sun ၏စာတိုတစ်ခုကြောင့်ပင်..။

Good morningကိုကို..ဒီ Sunက လမင်းလေးရဲ့အေးမြမှုကို တစ်ရက်တောင်မတွေ့ရလို့ သတိရပြီး အရမ်းတွေ့ချင်နေတာပါတယ်.. ဒီနေ့မနက် ကိုကိုတို့ရဲ့တစ်လမ်းကျော်မှာရှိတဲ့ သိဒ္ဓိစံလက်ဖက်ရည်ဆိုင်မှာ ကျွန်တော်စောင့်နေမယ်.. ကိုကိုနဲ့အတူတူ မနက်စာစားမယ် ပြီးမှ ကျောင်းသွားတာပေါ့..။

စနေ့နေ့တစ်ရက် သူ့ဆီကိုသွားရတယ်။ တနင်္ဂနွေနေ့က ကျွန်တော် နေမကောင်းလို့ မသွားဖြစ်ဘူးလေ..။ တစ်ရက်လေးမတွေ့ရတာကို လွမ်းတယ်တဲ့လား..။ အရမ်းအပိုလွန်နေတဲ့ Sunပါကွာ..။ မတွေ့ဖြစ်တဲ့တစ်ရက်လေး နေမကောင်းဖြစ်တာကို ဖုန်းကလည်း တဂွမ်ဂွမ်ဆက်..။ ဟိုဟာမစားနဲ့ ဒါမစားနဲ့က ခဏခဏမှာ..။ မသက်သာရင် သူကိုယ်‌တိုင်တောင် လာပြုစုဦးမှာတဲ့လေ..။ အဲဒီလောက်တောင်ပဲ စိုးရိမ်တာလား..။ အဲဒီလောက်ဂရုစိုက်တာလား..။

နှစ်ဘဝတောင် မျှော်လင့်ခဲ့ရတဲ့ အခွင့်အရေးတွေကို အခုမှပြန်ပေးဆပ်နေတာလား..။ အရင်ဘဝတွေကလည်း ဂရုစိုက်ပါတယ်လေ..။ ဂရုစိုက်ပုံကတော့ ကွာတာပေါ့..။ ဟိုးအရင်တုန်းက ရက်စက်မှုတွေနဲ့အတူ မဝံ့မရဲဂရုစိုက်တယ်..။ နောက်ပြီး.. ကြောက်မက်ဖွယ် အေးစက်မှုတွေနဲ့အတူ ဂရုစိုက်ပြန်တယ်..။ အခုတော့.. နွေးထွေးမှုတွေနဲ့အတူ ကြင်နာစွာဂရုစိုက်ပြန်တယ်..။ မဆိုးပါဘူး.. Sunက တစ်ဘဝကို ရသတစ်မျိုးတော့ ပေးသားပဲ..။ ရသလို့သုံးလိုက်တာ လွန်သွားသလား..။ မလွန်လောက်ပါဘူးနော်..။ ဘာလို့လဲဆိုတော့ သူ့ကို.. ဝမ်းနည်းရင်းနဲ့လည်းနှစ်သက်မိတယ်..။ ကြောက်ရွံ့ရင်းနဲ့လည်း နှစ်သက်မိတယ်..။ သနားရင်းနဲ့လည်း နှစ်သက်မိတယ်လေ..။

နံနက်နိုးစ ချစ်ရသူနှင့် ပတ်သက်သည်တို့ကို တွေးရသည်ကအရသာတစ်ခု..။ ကြည်နူးသယောင်... နွေးထွေးသယောင်...။ Sunဟူသည့် အမည်နှင့်လိုက်ဖက်လေသည်..။

ထိုသို့သောအတွေးဆတချို့နှင့် လက်ဖက်ရည်ဆိုင်လေးသို့လာနေမိသည်..။ သူသည်က ကြို၍ရောက်နှင့်လေသည်..။ စားပွဲပေါ်တွင်လည်း မိမိကြိုက်နှစ်သက်သည့် အစားအစာတို့ကို ကြို၍မှာထားလေသည်။ မိမိသည်က သူနှင့်မျက်နှာချင်းဆိုင်ခုံတွင် ထိုင်မည်ပြုသောအခါ သူသည်မိမိလက်အားဆွဲ၍ သူ၏အနား‌တွင်ထိုင်စေသည်။ ထိုင်ပြီးသည်နှင့်တစ်ပြိုက်နက် မိမိ၏နဖူးကို လက်ဖြင့်ကိုယ်ပူစမ်း‌ခဲ့သည်။

“ ကိုကို.. သက်သာရဲ့လား "

“ အင်း.. သက်သာပါတယ်.. "

“ အခု အစားစားလိုက်ဦးနော်..။ ကိုကိုကြိုက်တဲ့ ရှမ်းခေါက်ဆွဲမှာထားတယ်.. အိုဗာတင်းကို ကျွန်တော်အိမ်‌ကဖျော်ခဲ့တယ်.. ဒါတွေစားပြီးရင်ဆေးသောက်ရမယ် "

“ ကိုယ်က ကလေးလား.. အဲဒီလောက် ဂရုစိုက်နေရအောင် "

“ ကိုကိုလို့သာခေါ်နေရပေမဲ့ ကျွန်တော့်မျက်လုံးထဲမှာ ကလေးလေးလိုပဲ.. ချစ်ဖို့ကောင်းတယ် "

ကိုကိုသည် ကျွန်တော့်အဖို့ရာ ကလေးပင်..။ အရောင်တောက်နေသည့်မျက်ဝန်းလှလှနှင့် နူးညံ့သည့်ပြုံးတို့သည် အမှန်ပင်ဖြူစင်လှသည်..။ အသက်အရွယ်နှင့် အသွင်အပြင်သည်မလိုက်ဖက်စွာ။ အသက်သုံးနှစ်ငယ်သောမိမိထက်ပင် သူသည်ပို၍နုနေသေးသည်။ ပြုံးရယ်တိုင်း ပေါ်လာတတ်သည့် ပါးချိုင့်လေးတစ်ဖက်သည် ပို၍ဆွဲဆောင်မှုရှိသည်။ ပြင်ဆင်ခြယ်သခြင်းမရှိ.. သဘာဝအတိုင်းပင် ပန်းရောင်သန်းနေသော နှုတ်ခမ်းတစ်စုံသည် သူ၏အလှတရားတို့ကို ပို၍ပြည့်စုံစေသည်..။ နှုတ်ခမ်းနီမလေးများထက် ပို၍ဆွဲဆောင်မှုအားကောင်းနေသော သူ့အားအဆုံးရှုံးမခံနိုင်သည်မှာ မိမိအမှားမဟုတ်..။ လှနေသော သူ၏အပြစ်သာ...။

အလှတရားတို့ကို လွတ်လပ်စွာ စာဖွဲ့ခိုက် သူ၏‌စကားကြောင့် စာဖွဲ့မှုအား ခေတ္တရပ်တန့်ထားလ်ိုက်သည်။

“ ဘာတွေအဲဒီလောက်ကြည့်နေတာလဲ.. "

“ အရမ်းချစ်ဖို့ကောင်းနေဖို့ကောင်းနေလို့ morning kiss ပေးရင်ကောင်းမလား စဉ်းစားနေတာ "

“ ဆိုင်ထဲမှာနော် Sun "

“ ဆိုင်ထဲမှာပေးတော့ ပိုမကောင်ဘူးလား..။ ကိုကိုက ကျွန်တော့်အပိုင်ဆိုတာ လူတိုင်းသိသွားတာပေါ့ "

အနားကိုပိုပြီးတိုးလာတာကြောင့် အမြန်တားရတယ်..။ မတားရင် တကယ်လုပ်မယ့်ရုပ်..။ သူကတော့ နည်းနည်းမှ ရှက်ပုံမပေါ်ဘူး..။ ကိုယ်ကတော့ ပူထူနေပြီလေ..။

“ တော်တော့ Sun "

“ ချစ်သူတွေပဲဖြစ်နေပြီ.. morning kissလေးကို နှမြောနေတာလား "

“ ဆိုင်ထဲမှာမပေးဘူးချင်ပါဘူးကွာ "

“ အင်း ပြီးရော.. အဲဒါဆိုနောက်မှပေး "

နံနက်စာစားပြီးနောက် ခြေလှမ်းတို့သည် ကျောင်းတော်ကြီးသို့ ဦးတည်ရင်းပင် လမ်းလျှောက်နေမိသည်။ လမ်းလျှောက်နေစဉ် လူရှင်းသည့်နေရာသို့ရောက်သောအခါ ပါးပြင်ပေါ်သို့ကျရောက်လာသည့် အနမ်းနွေးနွေးတစ်ခုကြောင့် ဆောင်းရာသီနံနက်ခင်း၏အလှတို့သည်ပို၍လှလာသည်။ ကိုကိုမှ စတင်ပေးခဲ့သည့်အနမ်းဖြစ်၍ ပို၍လှပသည်..။

“ တစ်ယောက်တည်းပေးလို့ ဘယ်မျှတမလဲ.. ကျွန်တော်ကလည်း ပြန်ပေးရမှာပေါ့ "

မိမိ၏စကားကြောင့်ပင် ရင်ခွင်မီအရပ်နှင့် ထိုလူသားလေး၏ ပါးပြင်တ်ို့သည် ပန်းရောင်သန်းနေခဲ့ပြီ..။ ချစ်ရသူ၏ လက်ကိုဆွဲကာ လက်ဖမိုးပေါ်သို့ နူးညံ့စွာခြွေမိသည့်အနမ်းသည် ထိုလူသားအား မိမိအလွန်တရာမြတ်နိုးကြောင်း သက်သေပင်..။ မိမိတို့သည် နွေးထွေးမှုကိုယ်စီနှင့် ပတ်ဝန်းကျင်ကို မေ့လေချေပြီ...။ ပတ်ဝန်းကျင်သည်လည်း မိမိတို့နှစ်ဦးသားအား မျက်ကွယ်ပြုထားသည့်အလား.. မည်သူမျှရှိမနေခဲ့။

နွေးထွေးမှုတို့ဖလှယ်ပြီးနောက် ကားဂိတ်သို့လမ်းလျှောက်လာသည့် ထိုလူသားနှစ်ဦး...။ ထိုသူတို့၏သာယာမှုတို့ကို ဖျက်ဆီးမည့် အနှောင့်အယှက်တစ်ခုမှာ ဆက်၍ဖြစ်ပေါ်လာပြန်သည်။ ဤသည်မှာ စက်ဘီးတစ်စီးသည် အရှိန်မထိန်းနိုင်ဖြစ်ကာ လမင်းကိုကိုရှ်ိရာသို့ ရောက်လာခြင်းပင်..။ ထိုစက်ဘီးအရှိန်မထိန်းနိုင်ဖြစ်နေသည်ကို နေသူရိန်မြင်သောအခါ လမင်းကိုကိုအား အလျင်အမြန်ဆွဲယူလိုက်သည်ဖြစ်သောကြောင့် မည်သူမျှမထိခိုက်မိ..။

စက်ဘီးစီးလာသူသည်က ထပ်ခါထပ်ခါတောင်းပန်ရှာသည်။ ခွင့်မလွှတ်နိုင်သူက ကျွန်တော်..။ မိမိ၏အဖိုးတန်လူသားအား ထိခိုက်စေမည့်ကိစ္စဖြစ်၍ ခွင့်မလွှတ်နိုင်။ သို့သော် ကာယကံရှင် ချစ်ရသူသည်က ခွင့်လွှတ်နေပြန်သည်။ ‌

“ မေတ္တာရှင်ကြီး.. အရာအားလုံးကို နားလည်ပေးနေလိုက် "

“ တော်ပါတော့ Sunရယ်... ကိုယ်လည်းထိခိုက်မိတာမဟုတ်ဘူးလေ။ တစ်ဖက်လူကလည်း အရေးကြီးကိစ္စကြောင့် လောနေလို့ပါ "

“ အင်း.. ဘုရားဖြစ်မယ့် အုတ်နီခဲ.. အကုန်ဖြည့်တွေး.. အကုန်ခွင့်လွှတ်.. ကောင်းနေရော.. ဒေါသထွက်ရတဲ့ကျွန်တော်က လူဆိုးကြီးဖြစ်နေရော "

“ လူဆိုးဖြစ်ရင်လည်း နောက်မှဆက်ဖြစ်.. အခုတော့ ကျောင်းသွားမယ်..။ Sun အတန်းချိန်တွေနောက်ကျလိမ့်မယ် "

“ ပြီးရော "

အလိုမကျမှုတို့စုစည်းနေသည့် Sun...။ မိမိမြင်နေကျဖြစ်သော ခန့်ညားမှုနှင့်ထိုလူသားသည် ယနေ့အဖို့ရာကလေးဖြစ်နေသည်။ ဆွဲဆောင်မှုရှ်ိသည့်အပြုံးတို့စား နှုတ်ခမ်းစူမှုက နေရာယူထားသည်။ တည်ငြိမ်သည့်မျက်ဝန်းတို့အစား ဒေါသမျက်လုံးများက နေရာယူထားသည်။ မျက်မှောင်သည်လည်း ကြုတ်ထားသေးသည်..။

“ Sun.. ဒေါသလေးကို နည်းနည်းလျှော့..။ အခုတော့ကျောင်းသွားလိုက်ဦး.. ကျောင်းပြန်လာမှချော့မယ် "

“ ကျွန်တော့်ကိုချော့မယ့်အစား ကိုကိုမထိခိုက်အောင်နေရင် ပိုကောင်းမယ် "

“ ‌အင်းပါ.. ဂရုစိုက်ပါ့မယ်.."

“ ပြီးတာပဲ.. ဟိုမှာ ကိုကိုစီးရမယ့်ကားလာနေပြီ "

“ အင်း.. သွားတော့မယ်နော် "

ကားပေါ်သို့ အေးချမ်းစွာတက်သွားသည့်ကိုကို..။ မိမိသည်က မအေးချမ်းနိုင်။ အဘွားပြောထားသည်လေ..။ တစ်ဦးမဟုတ် တစ်ဦးထိခိုက်မည်တဲ့လေ..။ သူထိခိုက်မည့်အစား မိမိသာနာကျင်ရလိုသည်။ သူ့အား မှဲ့တစ်ပေါက်မျှအစွန်းမခံချင်..။

တစ်ဖက်တွင် စိုးရိမ်နေသော နေသူရိန်..။ တစ်ဖက်တွင် နေသူရိန်၏ ဂရုစိုက်မှုများမကြား ပျော်ရွှင်နေသော လမင်းကိုကို..။

တစ်ယောက်တည်းသာ‌ နေထိုင်ရသည်ကိုနှစ်သက်သော ကျွန်တော်သည် သူ၏ဂရုစိုက်မှုများတွင် အနည်းငယ်မျှစိတ်ပျက်ကွက်ခြင်းမရှိ။ ပို၍သဘောကျမိသည်။

သူမိမိအား စိုးရိမ်နေသည်မှာလည်း မလွန်..။ ကားပေါ်မှအဆင်းတွင်လည်း ခြေချော်ကျကာ ဒဏ်ရာရခဲ့သေးသည်။ ယနေ့သည်ပြဿဒါး..။ ‌ထမင်းစားချိန်ရောက်သောအခါတွင် ‌‌ချစ်ရသူဖုန်းဆက်လေပြီ။ သူ၏အမေးတို့ကို မလိမ်တတ်သည့် ကျွန်တော်သည် အမှန်တိုင်းသာဝင်ခံမိသည်။

“ ကျွန်တော် ကိုကို့ကိုမနက်က ဘာမှာလိုက်လဲ "

“ ဂရုစိုက်ဖို့ မှာလိုက်တယ် "

“ အင်း.. အခုဘာဆက်ဖြစ်လဲ "

“ ကားပေါ်က ခြေချော်ကျတယ် "

“ အင်း.. ကျွန်တော့်စကားကို တော်တော်နားထောင်တဲ့ပုံပဲ.."

“ နားထောင်ပါဝာယ်.. သူ့ဘာသာသူဖြစ်သွားတာတော့ မပြောတတ်ဘူးလေ.. လာဆူမနေနဲ့ "

“ ဆူနေတာမဟုတ်ဘူး.. စိတ်ပူနေတာ.. ပြောထားရဲ့သားနဲ့ ဖြစ်နေတာကို "

“ အရမ်းကြီးလည်း စိတ်ပူမနေပါနဲ့.. ဒဏ်ရာက သေးသေးလေးရယ်.."

“ ဆေးထည့်ထားသေးလား "

“ အင်း.."

ဤသို့ ကျွန်တော်နှင့်Sun ဖုန်းပြောနေချိန်တွင် Sun၏‌ဖုန်းထဲမှ အမျိုးသမီးတစ်ဦး၏အသံကြားခဲ့ရသည်။

“ သူရိန်.. ကန်တင်းသွားမယ်လေ "

ထိုအသံကြားသည်နှင့်တစ်ပြိုင်နက် Sunသည် ကျွန်တော့်၏စကားအား ပြန်မပြောခဲ့..။ ထိုအမျိုးသမီးနှင့်သာ စကားပြောနေခဲ့သည်။ စိတ်ထဲတွင်မသက်သာလှ..။ မိမိအားလေသံမာမာနှင့်ဆူနေသောSunသည် ယခုတွင် သာယာ‌သော‌လေသံဖြင့် အမျိုးသမီးတစ်ဦးနှင့် စကားပြောနေလေသည်။

“ ငါ ဗိုက်မဆာသေးဘူး ဇာဇာ "

“ ငါကတော့ အူလိမ်နေပြီ.. ဗိုက်မဆာလည်း လိုက်ခဲ့ဟာ.. မရဘူး.. လာ.. သွားမယ် "

“ နေဦးလေ.. ငါဖုန်းပြောနေတယ်.."

“ နင့်ဖုန်းက ငါ့လောက်အရေးမကြီးဘူး.. လာဟာ "

ဖုန်းထဲမှ ထိုသူတို့၏အသံကိုအလုံးစုံကြားပြီးနောက် Sunသည်မိမိအား သူ.. ကန်တင်းသွားမည်ဟုဆိုကာ ဖုန်းချသွားသည်။

ဤအမျိုးသမီးသည် ဤမျှနိုင်စားသည်လော..။ မိမိအားဂရုစိုက်ကြောင်းပြောနေသော်လည်း အမျိုးသမီးတစ်ဦးအား မိမိထက်ပို၍ အလေးထားသည်လော..။

ခံစားချက်တို့သည်မသက်သာလှ..။ သူ၏မလှပသောအချစ်အား အကြိမ်ကြိမ်စားသုံးဖူးသည်မို့ စိုးရိမ်လွန်ရပါသည်။

မချစ်တော့လည်း တစ်မျိုးစိုးရိမ်ရတယ်..။ အခုချစ်တော့လည်း တစ်မျိုးစိုးရိမ်နေရပြန်တယ်..။ မင်းကိုချစ်ရတာ မလွယ်ကူလိုက်တာ Sunရယ်...။